༧སྐུའི་གཅེན་པོ་ཁྲི་ཟུར་རྒྱ་ལོ་དོན་གྲུབ་མཆོག་གི་སྐུ་ཕུང་ཀ་ལིང་སྦུག་གི་སྟག་འཚེར་བཞུགས་སྒར་དུ་ཞུགས་འབུལ་གནང་སོང་།
དེ་རིང་སྔ་དྲོའི་ཆུ་ཚོད་བདུན་པ་ཙམ་ལ་ཀ་ལིང་སྦུག་གི་སྟག་མཚེར་བཞུགས་སྒར་དུ། ༧སྐུའི་གཅེན་པོ་ཁྲི་ཟུར་རྒྱ་ལོ་དོན་གྲུབ་མཆོག་གི་སྐུ་ཕུང་ཞུགས་འབུལ་གནང་ཡོད་ཅིང་། སྐབས་དེར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གི་དབུས་པའི་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་དང་། འབྲས་ལྗོངས་མངའ་སྡེའི་ཆོས་རིག་བློན་ཆེན་བསོད་ནམས་བླ་མ་མཆོག སྐུ་སྒེར་ཡིག་ཚང་གི་སྐུ་ཚབ་རྡོ་རྗེ་རིག་འཛིན་ལགས་དང་བློ་བཟང་སྦྱིན་པ་ལགས། སྤྱི་འཐུས་ཁག་ཅིག ཀ་ལིམ་སྦུག་གཞིས་ཆགས་ཀྱི་ས་གནས་མགོ་འཛིན་ཚེ་བརྟན་ལགས། སྒང་ཏོག་གཞིས་ཆགས་ཀྱི་ས་གནས་མགོ་འཛིན་དོན་གྲུབ་བཟང་པོ་ལགས། གཞུང་འབྲེལ་དང་གཞུང་འབྲེལ་མིན་པའི་ཚོགས་སྐྱིད་ཁག་གི་སྐུ་ཚབ་དང་མི་མང་། དང་ཟུར་དང་སྐུ་འཁོར་ནང་མི་སོགས་ཆེད་ཕེབས་ཀྱིས་མྱ་ངན་ཞུས་ཡོད་འདུག
ཁྲི་ཟུར་རྒྱ་ལོ་དོན་འགྲུབ་མཆོག་ཕྱི་ལོ་ ༡༩༢༨ ལོར་མདོ་སྨད་སྟག་འཚེར་ཡུལ་དུ་སྐུ་འཁྲུངས་ཡོད་ཅིང་། སྐུ་ན་ཆུང་བའི་དུས་ནས་རྒྱ་ནག་ནང་སློབ་གཉེར་གནང་བར་ཕེབས། རྒྱ་དམག་གིས་བོད་ཤར་ཕྱོགས་ནས་བཙན་འཛུལ་བྱེད་མགོ་བཙུགས་རྗེས། རྒྱུ་རྐྱེན་འདྲ་མིན་གྱི་ཐོག་ནས་ཁོང་བོད་དུ་ཕྱིར་ཕེབས་མ་ཐུབ་པར་རྒྱ་གར་དུ་ཕེབས་དགོས་བྱུང་། རྒྱ་གར་དུ་བཞུགས་སྐབས་ཨ་རིའི་དབུས་གསང་བའི་ལས་ཁུངས་ལ་ཐོག་མར་འབྲེལ་བ་བྱུང་ཞིང་། དེའི་རྗེས་ལོ་རབས་ལྔ་བཅུའི་མགོ་སྟོད་དུ་ཨ་རིའི་དབུས་གསང་བའི་ལས་ཁུངས་ཀྱིས་བོད་མི་འཐབ་རྒོལ་བ་བརྒྱ་ཕྲག་ལ་གསང་བའི་ཐོག་ནས་སྦྱོང་བརྡར་སྤྲད།
ཕྱི་ལོ་ ༡༩༥༩ ལོར་༧གོང་ས་རྒྱལ་བ་རིན་པོ་ཆེ་མཆོག་བོད་ནས་རྒྱ་གར་དུ་བཙན་བྱོལ་དུ་མ་ཕེབས་གོང་ནས་༧སྐུའི་གཅེན་པོ་རྒྱ་ལོ་དོན་གྲུབ་མཆོག་དང་རྒྱ་གར་གཞུང་དབར་འབྲེལ་བ་ཡོད་ལ། ༧གོང་ས་མཆོག་རྒྱ་གར་དུ་ཞབས་སོར་འཁོད་སྐབས་རྒྱ་གར་གྱི་སྲིད་བློན་ནེ་རུ་མཆོག་གི་དབུས་རྒྱ་གར་དབུས་གཞུང་གི་དཔོན་རིགས་རྣམས་དང་འབྲེལ་བ་ཞུ་རྒྱུའི་ཐུགས་འགན་གཙོ་བོ་བཞེས། དེ་བཞིན་ལོ་རབས་ལྔ་བཅུའི་མཇུག་དང་དྲུག་ཅུའི་ནང་འཛམ་གླིང་མཉམ་འབྲེལ་རྒྱལ་ཚོགས་ཀྱི་ནང་བོད་དོན་ཞུ་གཏུག་གནང་རྒྱུའི་ཕྱག་ལས་ཤུགས་ཆེ་གནང་ཞིང་། ཨ་རིའི་གཞུང་གིས་ཀྱང་རྒྱབ་སྐྱོར་ཤུགས་ཆེན་གནང་ཡོད་ལ། བོད་དོན་ཐད་འཛམ་གླིང་མཉམ་འབྲེལ་རྒྱལ་ཚོགས་ནང་ལོ་རྒྱུས་རང་བཞིན་ལྡན་པའི་གྲོས་ཆོད་ཁག་གསུམ་བཞག
ཕྱི་ལོ་ ༡༩༧༦ ལོར་མའོ་ཙེ་ཏུང་འདས་གྲོངས་སུ་ཕྱིན་རྗེས་རྒྱ་ནག་ནང་མགོ་ཁྲིད་ལ་འགྱུར་བ་ཆེན་པོ་ཞིག་ཕྱིན་ཏེ། ཏིང་ཞའོ་ཕིང་གིས་ཧོང་ཀོང་ནང་ཡོད་པའི་རྒྱ་ནག་གཞུང་འབྲེལ་ཤིན་ཧྭ་གསར་ཁང་བརྒྱུད་༧སྐུའི་གཅེན་པོ་རྒྱ་ལོ་དོན་གྲུབ་མཆོག་ལ་འབྲེལ་བ་ཞུས་ཤིང་། ༧གོང་ས་རྒྱལ་བ་རིན་པོ་ཆེ་མཆོག་གི་བཀའ་འཁྲོལ་འོག་ཕྱི་ལོ་ ༡༩༧༩ ལོར་རྒྱ་ནག་གི་རྒྱལ་ས་པེ་ཅིན་དུ་ཆེད་ཕེབས་ཀྱིས་ཏིང་ཞའོ་ཕིང་དང་མཇལ་འཕྲད་ཐོག་མ་དེ་གནང་ཡོད། ཕྱི་ལོ་ ༡༩༩༡ ལོར་༧གོང་ས་མཆོག་གིས་བཙན་བྱོལ་བོད་མིའི་བཅའ་ཁྲིམས་ལ་བསྐྱར་བཅོས་གནང་རྗེས། ༧སྐུའི་གཅེན་པོ་རྒྱ་ལོ་དོན་གྲུབ་མཆོག་གིས་བོད་མིའི་སྒྲིག་འཛུགས་ཀྱི་བཀའ་བློན་ཁྲི་པའི་མཛད་འགན་བཞེས། ཕྱི་ལོ་ ༡༩༩༣ ནས་ ༡༩༩༦ བར་བདེ་སྲུང་བཀའ་བློན་གྱི་མཛད་འགན་བཞེས།
བཀའ་བློན་ཁྲི་ཟུར་རྒྱ་ལོ་དོན་གྲུབ་མཆོག་ནི་༧སྤྱི་ནོར་༧གོང་ས་རྒྱལ་བ་རིན་པོ་ཆེ་མཆོག་གི་༧སྐུའི་གཅེན་པོ་བགྲེས་ཤོས་གཉིས་པ་དེ་ཡིན་ཞིང་། བོད་ཀྱི་ཆབ་སྲིད་དང་སྤྱི་ཚོགས་ལམ་ལུགས་ལ་བསྒྱུར་བ་གཏོང་རྒྱུ་དང་། བོད་ནང་རྒྱ་ནག་གི་དབང་བསྒྱུར་ལ་གདོང་ལེན་ཆེད་དྲག་པོའི་རོགས་རམ་འཚོལ་སྒྲུབ། འཛམ་གླིང་མཉམ་འབྲེལ་རྒྱལ་ཚོགས་ནང་བོད་དོན་ཞུ་གཏུག རྒྱ་ནག་གཞུང་དང་ཞི་མོལ་མགོ་འཛུགས། དེ་བཞིན་བོད་ཀྱི་རིག་གཞུང་སྲུང་སྐྱོབ་དང་བོད་མིའི་འཐབ་རྩོད་སོགས་ཀྱི་ནང་དུས་སྐབས་མི་འདྲ་བ་སོ་སོར་འབད་བརྩོན་དང་ཐུགས་འགན་རྐང་བཞེས་གནང་མཁན་གྱི་ལོ་རྒྱུས་མི་སྣ་གལ་ཆེན་ཞིག་ཡིན་པ་རེད།
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
