དེ་རིང་གདན་ས་བཀྲ་ཤིས་ལྷུན་པོས་༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་སྐབས། ༧རྒྱལ་དབང་སྐུ་ཕྲེང་རིམ་བྱོན་གྱི་མཛད་རྣམ་ཕྱོགས་སྒྲིག་བྱས་པའི་པོད་ ༢༩ ཅན་གྱི་དཔེ་ཚོགས་ཤིག་དབུ་འབྱེད་མཛད།
གདན་ས་བཀྲ་ཤིས་ལྷུན་པོས་༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་སྐབས། བོད་ཀྱི་དུས་བབ་གསར་ཁང་གི་པར། ༢༠༢༥།༢།༡༢
དེ་རིང་རྒྱ་གར་ལྷོ་ཕྱོགས་སུ་རྟེན་གཞི་བྱས་པའི་གདན་ས་བཀྲ་ཤིས་ལྷུན་པོ་དགོན་གྱིས་༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུས་ཡོད་ཅིང་། སྐབས་དེར་༧མགོན་པོ་གང་ཉིད་ཀྱི་གཟིམ་ལམ་སོགས་སུ་༧རྒྱལ་མཆོག་སྐུ་གོང་མ་རྣམས་ཀྱི་བྱིན་རླབས་གྱི་རྒྱུན་ཞིག་ཡིན་པའི་ཚོར་སྣང་སྦྱིན་གྱིན་ཡོད་སྐོར་སོགས་གསུངས་བ་དང་སྦྲགས། ༧རྒྱལ་དབང་སྐུ་ཕྲེང་རིམ་བྱོན་གྱི་མཛད་རྣམ་ཕྱོགས་སྒྲིག་བྱས་པའི་དཔེ་ཚོགས་ཤིག་ཀྱང་དབུ་འབྱེད་མཛད།
༧གོང་ས་རྒྱལ་བ་རིན་པོ་ཆེ་མཆོག་གིས། དེ་རིང་བཀྲ་ཤིས་ལྷུན་པོས་བརྟན་བཞུགས་ཕུལ་བ་རེད། ༧རྒྱལ་དབང་དགེ་འདུན་གྲུབ་པ་དང་། བསོད་ནམས་རྒྱ་མཚོ་ལ་སོགས་པ་ནས་ཐུན་མོང་མ་ཡིན་པའི་འབྲེལ་བ་ཡོད་པ་ཞིག་ཆགས་བསྡད་ཡོད། ངོས་རང་ཡང་༧རྒྱལ་དབང་སྐུ་ཕྲེང་གོང་མ་དག་གི་སྐྱེས་སྤྲུལ་ཆགས་བསྡད་ཡོད་རེད། སྐབས་རེར་ངོས་རང་གི་རྨི་ལམ་དང་བསམ་བློའི་ནང་ལ་༧རྒྱལ་དབང་གོང་མ་ཚོའི་བྱིན་རླབས་ཀྱི་རྒྱུན་ཞིག་ཡོད་པའི་ཚོར་སྣང་ཡོང་གི་འདུག བཀྲ་ཤིས་ལྷུན་པོ་དགོན་པ་དང་དམིགས་བསལ་གྱི་འབྲེལ་བ་དམ་ཟབ་ཅིག་ཡོད་པ་ཡིན་དུས། དེའི་ཐོག་ནས་དེ་རིང་བརྟན་བཞུགས་གནང་བ་དེ་དགའ་པོ་བྱུང་། ཚེ་རབས་མང་པོའི་ལས་དང་འབྲེལ་བའི་ཆ་ནས་དམིགས་བསལ་གྱི་འབྲེལ་བ་ཞིག་ཡོང་གི་ཡོད་རེད། ངོས་རང་སྐྱེས་ས་མདོ་སྨད་ཀྱི་ཕྱོགས་ནས་ཡོང་བ་རེད་དེ། སྐྱེས་རབས་མང་པོའི་འབྲེལ་བའི་ཆ་ནས་བཀྲ་ཤིས་ལྷུན་པོ་དང་དམིགས་བསལ་གྱི་འབྲེལ་བ་ཆགས་བསྡད་ཀྱི་ཡོད། ཅེས་གསུངས་འདུག
དེ་རིང་བརྟན་བཞུགས་དང་འབྲེལ་ནས་བཀྲ་ཤིས་ལྷུན་པོ་དགོན་གྱི་མཁན་པོ་གཟིག་རྒྱབ་རིན་པོ་ཆེ་མཆོག་གིས་འདི་ག་བོད་ཀྱི་དུས་བབ་གསར་ཁང་ལ། ༧གོང་ས་རྒྱལ་བ་རིན་པོ་ཆེ་མཆོག་གདན་ས་བཀྲ་ཤིས་ལྷུན་པོ་ལ་ཕེབས་ནས་ཟླ་བ་གཅིག་ལྷག་འགྲོ་ཡི་ཡོད། དེ་རིང་གདན་ས་བཀྲ་ཤིས་ལྷུན་པོ་དགོན་པས་༧གོང་ས་རྒྱལ་བ་རིན་པོ་ཆེ་མཆོག་སྐུ་ཚེ་ཞབས་པད་བརྟན་སླད་མདོ་ལུགས་ལྟར་བརྟན་བཞུགས་གོ་སྒྲིག་ཞུས་ཡོད་རེད། འདས་པའི་མི་ལོ་གཉིས་ལྷག་གི་རིང་གདན་ས་བཀྲ་ཤིས་ལྷུན་པོས་ཕྱོགས་སྒྲིག་བྱས་པའི་༧རྒྱལ་དབང་སྐུ་ཕྲེང་དང་པོ་རྗེ་དགེ་འདུན་གྲུབ་པ་ནས་༧རྒྱལ་མཆོག་སྐུ་ཕྲེང་བཅུ་བཞི་བར་མཛད་རྣམ་པོད་ ༢༩ དབུ་འབྱེད་དང་། ང་རང་ཚོ་ཆོས་ཉམས་ལེན་བྱེད་མཁན་དང་དམ་པ་དམ་ཚིག་ཡོད་མཁན་ཞིག་ཡིན་ན། མཛད་རྣམ་དེ་དག་སྟབས་བདེ་པོ་དང་གཟིགས་བདེ་པོའི་ཐོག་ནས་ཕྱོགས་སྒྲིག་ཞུས་ཡོད། ཅེས་དང་། ད་ལན་༧གོང་ས་རྒྱལ་བ་རིན་པོ་ཆེ་མཆོག་རྒྱ་གར་ལྷོ་ཕྱོགས་སུ་ཟླ་ངོ་གཅིག་ལྷག་བཞུགས་པ་ནི་ཁུལ་དེའི་དགོན་སྡེ་ཆེ་ཁག་དང་། མཁན་བླ་སྤྲུལ། དེ་བཞིན་དགེ་བའི་བཤེས་གཉེན་སོགས་ཀྱི་ཐུན་མོང་གི་བསོད་ནམས་དང་མཉམ་རུབ་ཀྱི་ནུས་པ་ལས་བྱུང་བ་ཞིག་ཡིན་སྐོར་སོགས་གསུངས་སོང་།
ཕྱི་ཚེས་ ༡༧ ཉིན་རྒྱུད་སྨད་གྲྭ་ཚང་གིས་རྒྱུད་སྨད་ཚོགས་ཆེན་འདུ་ཁང་དུ་བརྟན་བཞུགས་བསྟར་འབུལ་ཞུ་རྒྱུ་དང་། ཟླ་འདིའི་ཕྱི་ཚེས་ ༡༨ ཉིན་༧མགོན་པོ་གང་ཉིད་མཁའ་ལམ་བརྒྱུད་རྒྱ་གར་གྱི་རྒྱལ་ས་ལྡི་ལི་དང་། ཕྱི་ཚེས་ ༢༢ ཉིན་བཞུགས་སྒར་དྷ་སར་ཆིབས་བསྒྱུར་བསྐྱང་རྒྱུ་ཡིན་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
