སྲིད་སྐྱོང་མཆོག་རྒྱ་གར་ལྷོ་ཕྱོགས་ཁུལ་དུ་གཞུང་འབྲེལ་ཕྱོགས་ཕེབས་གནང་བཞིན་འདུག

སྲིད་སྐྱོང་མཆོག་གིས་འདི་ལོར་༧གོང་ས་མཆོག་ནས་ཞི་བདེ་དང་འཚེ་མེད་ཞི་བ། བོད་མིའི་ངོ་བོ་སྲུང་སྐྱོབ་བཅས་ཀྱི་ཆེད་སྐུ་ངལ་བསྐྱོན་པར་སྲུང་གཙི་བྱེད་དགོས་པ་ནན་བརྗོད་གནང་འདུག

ཟླ་འདིའི་ཕྱི་ཚེས་ ༡༠ ནས་ཕྱི་ཟླ་ ༣ ཚེས་ ༤ བར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་རྒྱ་གར་ལྷོ་ཕྱོགས་བོད་མིའི་གཞིས་ཆགས་སྦེལ་ཀོབ་ལུགས་ཟུང་བསམ་གྲུབ་གླིང་དང་། བདེ་སྐྱིད་སླར་གསོ། ཧོན་སུར་གཞིས་ཆགས་བཅས་སུ་གཞུང་འབྲེལ་ཕྱོགས་ཕེབས་ཐེངས་གཉིས་པ་གནང་བཞིན་ཡོད་པ་ལྟར། ཟླ་འདིའི་ཕྱི་ཚེས་ ༡༡ ཉིན་སྲིད་སྐྱོང་མཆོག་རྒྱ་གར་ལྷོ་ཕྱོགས་སྦེལ་ཀོབ་བོད་མིའི་གཞིས་ཆགས་སུ་ཕེབས་འབྱོར་བྱུང་སྐབས། སྦེང་ལོར་ལྷོ་སྤྱི་ལས་ཁུངས་ཀྱི་མི་མང་འབྲེལ་མཐུད་པ་ཀུན་དགའ་ཡེ་ཤེས་ལགས་དང་། བདེ་སྐྱིད་སླར་གསོ་དང་ལུགས་ཟུང་བསམ་གྲུབ་གླིང་གི་ས་གནས་མགོ་འཛིན། དགོན་སྡེ་ཁག་གི་སྐུ་ཚབ་གཙོས་པའི་མང་ཚོགས་བཅས་ནས་ཕེབས་བསུ་ཞུས་འདུག  

ཕྱི་ཚེས་ ༡༢ ཉིན་གྱི་སྔ་དྲོ་གདན་ས་བཀྲ་ཤིས་ལྷུན་པོའི་གཙུག་ལག་ཁང་དུ། ༧གོང་ས་རྒྱལ་བ་རིན་པོ་ཆེ་མཆོག་ལ་བཀྲ་ཤིས་ལྷུན་པོ་དགོན་པའི་འདུས་སྤྱི་ནས་གནས་བཅུ་དང་འབྲེལ་བའི་མདོ་ལུགས་ཀྱི་བརྟན་བཞུགས་བསྟར་འབུལ་ཞུས་ཡོད་ཅིང་། སྐབས་དེར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ནས་བརྟན་བཞུགས་ཀྱི་མཎྜལ་རྟེན་གསུམ་འདེགས་འབུལ་ཞུས་འདུག

ཉིན་རྒྱབ་སྲིད་སྐྱོང་མཆོག་གིས་སེ་ར་སྨད་གྲྭ་ཚང་དང་སེ་ར་བྱེས་གྲྭ་ཚང་དུ་གཟིགས་སྐོར་གནང་སྐབས། དགོན་པའི་མཁན་པོའི་དབུ་ཁྲིད་པའི་འཛིན་སྐྱོང་དང་དགེ་འདུན་པ་རྣམས་ཀྱིས་ཕེབས་བསུ་ཞུས་ཡོད་ཅིང་། སྲིད་སྐྱོང་མཆོག་གིས་སེ་ར་བྱེས་སྨད་ཀྱི་དགེ་འདུན་པའི་འདུས་མང་ལ་གསུང་བཤད་གནང་སྐབས།  ཕྱི་ལོ་ ༢༠༢༥ ལོར་བྱམས་བརྩེའི་ལོ་ཞེས་སྲུང་བརྩི་ཞུ་རྒྱུའི་སྐོར་ནན་བརྗོད་དང་འབྲེལ། འདི་ལོར་༸གོང་ས་རྒྱལ་བ་རིན་པོ་ཆེ་མཆོག་དགུང་གྲངས་ ༩༠ ལ་ཕེབས་ཀྱི་ཡོད་སྟབས་བོད་མི་ཡོངས་ལ་གལ་གནད་ཆེ་བའི་ལོ་ཞིག་ཡིན།  བོད་མི་ཡོངས་ལ་ལོ་རྒྱུས་རང་བཞིན་ལྡན་པའི་དུས་སྐབས་འདི་སྲུང་གཙི་ཞུ་དགོས་པའི་འབོད་སྐུལ་གནང་བ་དང་། ༧མགོན་པོ་གང་ཉིད་མཆོག་གིས་ཞི་བདེ་དང་། འཚེ་མེད་ཞི་བ། བོད་མིའི་ངོ་བོ་སྲུང་སྐྱོབ་བཅས་ཀྱི་ཆེད་སྐུ་ཚེ་ཧྲིལ་པོ་སྐུ་ངལ་བསྐྱོན་པར་བསྐྱར་དྲན་བྱེད་པའི་གོ་སྐབས་ཤིག་ཡིན་ཞེས་ནན་བརྗོད་གནང་འདུག

སྲིད་སྐྱོང་མཆོག་གིས་རྒྱ་གར་གཞུང་དང་། མི་མང་གིས་བོད་མི་ཚོར་བཙན་བྱོལ་ནང་བོད་ཀྱི་ཐུན་མིན་རིག་གཞུང་དང་མི་རིགས་ཀྱི་ངོ་བོ་སྲུང་སྐྱོབ་སླད་རོགས་རམ་དང་རྒྱབ་སྐྱོར་གནང་བར་ངོས་འཛིན་ཞུས་པ་དང་སྦྲགས། བོད་མི་ཚོས་ས་གནས་ཡུལ་མི་དང་མཉམ་དུ་འབྲེལ་ལམ་བཟང་པོ་འཛུགས་རྒྱུའི་གལ་གནད་ཐོག་གསལ་འདོན་གནང་། གཞན་ཡང་བོད་མི་རྣམས་མཐུན་སྒྲིལ་རྡོག་རྩ་གཅིག་སྒྲིལ་གནང་དགོས་པའི་སྐོར་གསུང་སྐབས་རང་བཙན་དང་དབུ་མའི་ལངས་ཕྱོགས་ཐད་ཆབ་སྲིད་ཀྱི་བསམ་ཚུལ་མི་འདྲ་བ་ཡོད་ནའང་། མཐར་ཐུག་གི་དམིགས་ཡུལ་ནི་བོད་རང་དབང་འཐབ་རྩོད་ཀྱི་རྨང་གཞི་བརྟན་པོ་བཟོ་རྒྱུ་དེ་ཡིན། ཞེས་ནན་བརྗོད་གནང་བ་མ་ཟད་བོད་སྤྱི་པའི་རྩ་དོན་ཆེད་དུ་ཞབས་འདེགས་བསྒྲུབ་དགོས་པའི་སྐུལ་མ་གནང་འདུག

ཡང་སྲིད་སྐྱོང་མཆོག་གིས། ཊོ་རོན་ཊོ་གཙུག་ལག་སློབ་གྲྭ་ཆེན་མོ་ནས་འབུམ་རམས་པའི་ཕྱག་ཁྱེར་བཞེས་མཁན་འབུམ་རམས་པ་རྒྱལ་ལོ་ལགས་ངོ་སྤྲོད་གནང་བ་དང་། ཁོང་གིས་བོད་ཀྱི་ཤེས་ཡོན་དང་རྒྱ་ནག་གཞུང་གིས་དམ་དྲག་ཅན་གྱི་ཤེས་ཡོན་སྲིད་བྱུས་བརྒྱུད་བོད་མིའི་ངོ་བོ་རྩ་མེད་གཏོང་བཞིན་པའི་སྐོར་རྒྱལ་སྤྱིའི་སྤྱི་ཚོགས་ལ་གོ་རྟོགས་སྤེལ་བར་བསྔགས་བརྗོད་གནང་ཡོད། དེ་བཞིན་སྲིད་སྐྱོང་མཆོག་གིས་རྒྱ་ནག་གཞུང་གིས་བོད་ནང་དམ་དྲག་ཤུགས་ཆེན་བྱེད་བཞིན་ཡོད་པ་མ་ཟད།  བོད་ཀྱི་ལོ་རྒྱུས་ཐོག་ལོག་འགྲེལ་གྱི་ལས་འགུལ་ཤུགས་ཆེར་སྤེལ་བཞིན་པ་སོགས་ཀྱི་སྐོར་གསལ་སྟོན་དང་། བཙན་བྱོལ་བོད་མིའི་ཤེས་ཡོན་ཡར་རྒྱས་གཏོང་རྒྱུ་དང་། རིག་གཞུང་སྲུང་སྐྱོབ་ལས་གཞི་རྒྱུན་སྐྱོང་། སྤྱི་ཚོགས་དང་དཔལ་འབྱོར་གྱི་གནས་སྟངས་ཡར་རྒྱས་གཏོང་རྒྱུ་བཅས་བོད་མིའི་སྤྱི་ཚོགས་དང་འབྲེལ་བའི་གནད་དོན་གལ་ཆེན་སྐོར་ལ་གསུང་བཤད་དང་དྲི་བ་དྲིས་ལན་བཅས་གནང་འདུག

ཕྱི་ཚེས་ ༡༣ ཉིན་གྱི་སྔ་དྲོ་སྲིད་སྐྱོང་མཆོག་གིས་སྦེལ་ཀོབ་བོད་མིའི་གཞིས་ཆགས་ཀྱི་དགོན་སྡེ་ཁག་དང་། སློབ་གྲྭ། སྨན་ཁང་བཅས་སུ་གཟིགས་སྐོར་གནང་ཡོད་ཅིང་། ཕྱི་དྲོར་ལུགས་བསམ་དང་བདེ་སྐྱིད་སླར་གསོ་བོད་མིའི་གཞིས་ཆགས་གཉིས་ཀྱི་གོ་སྒྲིག་ཞུས་པའི་རིག་གཞུང་འཁྲབ་སྟོན་ཐོག སྐུ་མགྲོན་གཙོ་བོར་སྲིད་སྐྱོང་མཆོག་དང་རྒྱ་གར་དབུས་གཞུང་གི་ནང་སྲིད་དྲུང་ཆེ་སྐུ་ཞབས་བྷན་དི་སན་ཇེ་ཀུ་མར་མཆོག་ཆེད་ཕེབས་གནང་ཡོད་འདུག

གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།