རྩོམ་ཁུངས། བོད་ཀྱི་དུས་བབ།
རྩོམ་པ་པོ། བློ་གྲོས་རབ་བརྟན།
སྐུ་ཚེ་ཧྲིལ་བོར་བོད་མི་རིགས་འདིའི་སྲིད་དོན་ལ་འཐམས་ཏེ་ཚེ་ཡི་འདུ་བྱེད་རྫོགས་སོ།། ཧ་ལམ་ལོ་ངོ་བདུན་ཅུའི་རིང་འུ་ཚོ་ལ་ཆབ་སྲིད་ཐད་གྲུབ་འབྲས་གང་ཡོད་ཚང་མའི་རྒྱབ་ལ་ཁོང་གི་རྣམ་དཔྱོད་དང་འཇོན་ཐང་ཡོད། བོད་མི་རིགས་ལ་བཀའ་དྲིན་ཅི་འདྲའི་ཆེ་ནའང་། ཀླད་པར་འབུ་ཚང་བཅས་ཟིན་པ་ཚོས་ནམ་ཡང་ཤེས་མི་ཐུབ། དེ་ལས་ལྡོག་སྟེ་ཁོང་གིས་“བོད་མི་རིགས་ང་ལ་བཀའ་དྲིན་ཆེན་པོ་ཡིན། ” ཞེས་རྒྱལ་ལོ་དོན་གྲུབ་ཀྱིས་ལན་མང་གསུང་མྱོང་ཡོད།
རྒྱལ་ལོ་དོན་གྲུབ་ནི་༧ གོང་ས་མཆོག་གི་སྐུ་སྤུན་བགྲེས་བའི་གྲས་ཡིན་ལ། དགུང་ལོ་༩༧ ཐོག་སྐུ་གཤེགས། ཁོང་༧གོང་ས་མཆོག་ལས་ལོ་བདུན་གྱི་རྒན་པ་ཡིན། བོད་ཀྱི་གནད་དོན་ཡོངས་རྫོགས་ལ་རྒྱུས་མངའ་ཆེ་ཞིང་། དངོས་སུ་འཛུལ་ཞུགས་ཀྱིས་ལས་དོན་བསྒྲུབས་པའི་མི་ཞིག་དང་། དཀའ་ཚགས་ཆེ་བའི་བོད་ཀྱི་སྲིད་དོན་ལོ་རྒྱུས་ཁྲོད་མི་གླེང་ཐབས་མེད་ཀྱི་མི་སྣ་གལ་ཆེན་ནང་གི་གལ་ཆེན་ཞིག་རེད།
ཁོང་༧གོང་ས་མཆོག་གི་སྐུ་སྤུན་བགྲེས་པ་དེ་ཡིན་སྟབས། ཆུང་དུས་ནས་ཆབ་སྲིད་ཀྱི་ཁོར་ཡུག་ཏུ་ཚུད་ཅིང་། ༧གོང་ས་མཆོག་གི་ཕྲག་སྟེང་དུ་ལྷུང་བའི་ཁ་ཆག་སྣ་རལ་དུ་གྱུར་བའི་བོད་ཀྱི་ཆོས་སྲིད་ཀྱི་ལས་འགན་ལྕི་མོ་དེས། ཁོང་ཐག་རིང་དུ་མ་བཏང་བར་༧གོང་ས་མཆོག་གི་གམ་དུ་བཅར་ཏེ། གང་ཐད་ནས་བློ་ཐག་གཙང་བཅད་ཀྱིས་རང་གི་ཕུ་བོའི་དཔུང་རོགས་ལ་ཞུགས།
༧གོང་ས་མཆོག་གིས་ལུགས་གཉིས་ཀྱི་འགན་བཞེས་པ་དང་། སྐབས་དེའི་བོད་གཞུང་ནི་ནང་ཁུལ་རྙོག་དྲ་ཆེ་ཞིང་སྟག་བྲག་དང་ར་སྒྲེང་ཞེས་ཕྱོགས་གཉིས་སུ་ཁད་དེ་དབང་ཆའི་ཐད་འགྲན་སེམས་འཁོན་རེས་ཀྱིས་བཟུང་སྟེ། སྤྱི་དོན་ཟུར་དུ་ལྷག་བཞིན་པའི་དུས་དེར། སྐུ་ཉིད་༧ གོང་ས་མཆོག་ལ་ཤ་ཚ་དང་སྙིང་ཉེའི་ངང་སྐྱིད་སྡུག་གི་ཁུར་བོ་མཉམ་དུ་འདེགས་རོགས་གཅིག་པུ་དེ་ཡིན།
ལོ་ན་ཆུང་བའི་དུས་ནས་ཡུལ་གྲུ་མང་བོ་འགྲིམས་འགོ་བརྩམས། མི་སྣ་ཆེ་ཆུང་མང་བོར་ཐུག་འཕྲད་བྱུང་ཞིང་། གནད་ཡོད་མི་སྣ་མང་པོར་བག་ཆགས་འཇོག་ཐུབ་པའི་རང་གཤིས་མངའ་སྟབས། ཆབ་སྲིད་པ་ཚོས་ཁོང་ཉིད་གཡས་འཐེན་གཡོན་གྱིས་རང་ཕྱོགས་སུ་འགུག་ཐབས་བྱས་ཀྱང་། རྩ་བའི་ཆ་ནས་བོད་མི་རིགས་དང་༧གོང་ས་མཆོག་ལྟེ་བར་བཟུང་སྟེ་ཐབས་ཤེས་ཡོད་དགུས་རྩ་དོན་ལ་འབད་འབུངས་རྒྱུན་མཐུད་བྱས་ཡོད།
མི་ཞིག་ག་ཚོད་ལྟ་རྒྱ་ཆེ་ན་དེའི་ཚོད་ཀྱིས་ལས་དོན་འཐུས་ཚང་ཡོང་བ་ལྟར། རྒྱ་ནག་ནན་ཅིན་དུ་སློབ་སྦྱོང་ལ་བརྩོན་བཞིན། རྒྱལ་སྤྱིའི་ཆབ་སྲིད་འགྱུར་འགྲོས་ལ་རྒྱུས་ལོན་བྱེད་སྐབས་བཟང་བོར། བོད་གཞུང་གི་རང་སྲུང་གཞུང་ཞབས་འགས། ཕྲ་མ་དང་དོགས་པ་འདྲ་མིན་གྱིས་ཕྱིར་འགུག་ཐབས་བྱས་ཀྱང་། ཡུམ་ཆེན་གྱི་གསང་བརྡ་དང་ལྷ་སའི་ཆབ་སྲིད་ཀྱི་རླུང་འཚུབ་ལ་རྒྱུས་མངའ་ཡོད་པས་རང་ལམ་དུ་བསྐྱོད་ཐུབ་ཡོད།
རྒྱ་ནག་གོ་མིན་ཏང་མའོ་ཡིས་མཐའ་འདེད་གཏོང་བཞིན་ཡོད་ཀྱང་། གོ་མིན་ཏང་གིས་བོད་ལ་ཆབ་སྲིད་ཀྱི་ཧམ་སེམས་དོར་མེད། ཁོང་ལ་ཐབས་མཁས་ཀྱིས་འབྲེལ་བ་ཉར་ཞིང་། ཐད་ཀར་མིན་པའི་ཤ་ཚ་དང་སྙིང་ཉེའི་ངང་ཨ་རི་ལ་སློབ་སྦྱོང་ལ་བསྐྱོད་ཐུབ་ན། སློབ་ཡོན་ཐད་རོགས་རམ་གནང་རྒྱུ་ཞལ་བཞེས་གནང་ཡང་། ༧གོང་ས་མཆོག་སྐུ་ན་ཕྲ་བ་དང་བོད་གཞུང་ནང་ཁུལ་རྙོག་དྲ་ཆེ་བ། རྒྱ་དམར་གྱི་ཧམ་སེམས་བོད་ལ་ཕྱོགས་པ། གོང་ས་མཆོག་གི་གམ་ན་བློས་ཐུབ་ཀྱི་སྐྱེས་བུ་དཀོན་པ་བཅས་ལ་བརྟེན། སྐུ་ཉིད་ཀྱིས་རྒྱང་རིང་ནས་བྱ་ར་མཛད་དེ་༧གོང་ས་མཆོག་ལ་དཔུང་རོགས་ལམ་སྟོན་མཛད།
གཅིག་དགུ་ལྔ་བཅུ་ང་དགུ་ལོར་༧གོང་ས་མཆོག་བཙན་བྱོལ་དུ་མ་ཕེབས་སྔོན་ནས། བོད་དུ་གནས་སྟངས་སྡུག་ནས་སྡུག་ཏུ་འགྲོ་བཞིན་ཡོད་སྟབས། སྐུ་ཉིད་ནས་རྒྱ་གར་གྱི་སྲིད་བློན་ནེ་ཧ་རི་མཆོག་ལ་དངོས་སུ་མཇལ་ཏེ། བོད་ཀྱི་གནས་སྟངས་ག་འདྲ་ཡིན་པ་སྙན་སྒྲོན་དང་། གལ་ཏེ་༧གོང་ས་མཆོག་བཙན་བྱོལ་དུ་ཕེབས་དགོས་ན། མཐུན་འགྱུར་གནང་དགོས་པའི་སྐུལ་མ་གནང་ཞིང་། དེའི་རྐྱེན་གྱིས་དངོས་སུ་༧གོང་ས་མཆོག་བཙན་བྱོལ་དུ་ཕེབས་དུས་ས་མཚམས་ནས་སྣེ་ལེན་དང་ཕེབས་ལམ། བཞུགས་གནས་བཅས་ཀྱི་ཐད་སྟབས་བདེ་བྱུང་བ་མ་ཟད། རིམ་གྱིས་བོད་མི་བཙན་བྱོལ་དུ་འབྱོར་མཁན་ཡོངས་ལ་ལམ་ཁ་ཕྱེས་ཡོད།
བོད་ས་ཡོངས་རྒྱ་དམར་གྱིས་བཙན་བཟུང་བྱས་པ་དང་བསྟུན་ཏེ། སྐུ་ཉིད་ནས་སྣེ་ཁྲིད་དེ་མཉམ་འབྲེལ་རྒྱལ་ཚོགས་ལ། བོད་ནི་ལོ་རྒྱུས་ཁྲོད་རྒྱ་ནག་ལས་ཐ་དད་རང་བཙན་རྒྱལ་ཁབ་ཅིག་ཡིན་པ་དངོས་ལེན་དགོས་པའི་འབད་བརྩོན་རྒྱུན་མཐུད་གནང་སྟབས། རྒྱལ་ཚོགས་སུ་བོད་ནི་ལོ་རྒྱུས་སྟེང་རྒྱ་ནག་ལས་ཐ་དད་རང་བཙན་རྒྱབ་ཁབ་ཅིག་ཡིན་པའི་གྲོས་ཆོད་ཐེངས་གཉིས་འཇོག་ཐུབ་ཡོད། དེ་བཞིན་རྒྱལ་སྤྱིའི་ཁྲིམས་དོན་མཁས་པའི་ལྷན་ཚོགས་ཤིག་ཆེད་དུ་བསྐོངས་ཏེ། ཁྲིམས་ལུགས་གཞིར་བཟུང་བོད་ནི་རང་བཙན་རྒྱལ་ཁབ་ཅིག་ཡིན་མིན་ཐག་གཅོད་དགོས་པའི་བླངས་བྱ་བཏོན་པར། རྒྱལ་སྤྱིའི་ཁྲིམས་ལུགས་ལྟར་ན་བོད་ནི་རང་བཙན་རྒྱལ་ཁབ་ཅིག་རེད་ཅེས་ཡོངས་ཁྱབ་བསྒྲགས་གཏམ་སྤེལ་ཡོད།
བོད་དུ་འབྱུང་བཞིན་པའི་རྒྱ་དམར་གྱི་བཙན་འཛུལ་སྡུག་ཏུ་འགྲོ་བཞིན་པ་དང་། རྒྱ་གར་དང་ཨ་རིའི་གཞུང་ལ་སྐུ་ཉིད་ནས་སྙན་གསན་ཞུས་པ་དང་། ཨ་རིའི་གསང་ལས་ཁང་གིས་རོགས་སྐྱོར་ཅི་དགོས་གནང་རྒྱུའི་ཁས་ལེན་བྱས་ཤིང་། སྐབས་དེར་བོད་དུ་མདོ་དབུས་ཁམས་གསུམ་ནས་དང་བླང་དམག་མི་ཇེ་མང་དུ་འགྲོ་བཞིན་པ་དང་། ཁོང་ཚོས་རྒྱ་དམར་ལ་འགོག་རྒོལ་བྱེད་བཞིན་ཡོད་དུས། དེ་དག་ལ་གོ་མཚོན་གྱི་རོགས་རམ་དང་དམག་འཁྲུག་ལ་སྦྱོང་བརྡར་གལ་ཆེན་ཡིན་ཚུལ་ཞུས་པས། ཨ་རིའི་གསང་ལས་ཁང་གིས་གོ་མཚོན་གྱི་རོགས་རམ་དང་། བོད་མི་སྐོར་ཞིག་ལ་ཨ་རིའི་ས་ཐོག་ནས་དམག་སྦྱོང་ཡང་སྤྲད་ཅིང་། བལ་བོད་ས་མཚམས་གློ་ཁུལ་དུ་སྒྲིག་འཛུགས་གསར་དུ་བཙུགས་ཏེ། དུས་ཡུན་གང་འཚམ་རིང་ཁོང་ཚོས་རྒྱ་དམག་ལ་འཇབ་རྒོལ་ཡང་ཡང་བྱས་ཡོད།
རྒྱ་དཀར་ནག་གཉིས་ཀྱིས་འཕགས་བོད་ས་མཚམས་སུ་དམག་འཁྲུག་བརྒྱབ་པ་དང་། གནམ་གཤིས་དང་ས་བབ་ཀྱི་དབང་གིས་རྒྱ་གར་ལ་ཕམ་ཉེས་བྱུང་བ་དང་འབྲེལ་ཏེ། ཧི་མ་ལ་ཡའི་གནམ་གཤིས་ལ་གོམས་ཡོད་པའི་བོད་ཀྱི་དམག་སྡེ་ཞིག་མ་འོངས་པར་དགོས་མཁོ་མཐོང་སྟེ། སྐུ་ཉིད་དང་རྒྱ་གར་གསང་དོན་ཁང་གཉིས་གྲོས་མོལ་བརྒྱུད་ནས། བོད་ཀྱི་དམག་སྒར་ཨང་༢༢ འབོད་པ་གསར་འཛུགས་གནང་ཞིང་། དེས་རྒྱ་གར་གཞུང་མང་ལ་ཕན་ཐོགས་བྱུང་ཡོད། རེད་དེ། སྐབས་དེའི་བོད་དམག་ཚོའི་ངོས་ནས་བཤད་ན། ནམ་ཞིག་རྒྱ་དམར་ལ་རང་སའི་ཆེད་དུ་དམག་འཁྲུག་ཅིག་རྒྱག་ཐུབ་པའི་རེ་བ་བཟུང་ཡོད་ཀྱང་ད་ལྟའི་བར་དུ་རེ་བ་དེ་མངོན་གྱུར་བྱུང་མེད།
བོད་པའི་ཁྲོད་རྒྱ་ནག་གཞུང་ལ་འབྲེལ་བ་འཛིན་ཐུབ་མཁན་སྐུ་ཉིད་གཅིག་པུ་དེ་རེད། ཏིན་ཞོའི་ཕིང་དང་དངོས་སུ་ཐུག་སྟེ། ༧གོང་ས་མཆོག་དང་བོད་གཞིས་བྱེས་གཉིས་ཀྱི་གནས་སྟངས་གསལ་བཤད་དང་རྒྱ་གཞུང་གིས་བོད་ཐོག་སྤེལ་བའི་སྲིད་ཇུས་ལ་སྐྱོན་བརྗོད་གནང་ཞིང་། ལྷག་པར་དུ་བོད་གཞིས་བྱེས་བར་འགྲོ་འོང་ལ་སྲིད་ཇུས་ལྷུག་ཏུ་གཏོང་དགོས་སྐོར་བཤད་པར། ཏིན་ཞོའོ་ཕིང་ནས་དེ་ལྟར་ཁས་ལེན་གྱིས་ལག་བསྟར་གནང་བས། བརྒྱད་ཅུ་གྱ་གྲངས་ནས་ཧ་ལམ་ཉིས་སྟོང་བརྒྱད་ལ་ཐུག་གི་བར་ཕན་ཚུན་འགྲོ་འོང་དེས། བོད་མིའི་འཐབ་རྩོད་དང་མི་རིགས་ཀྱི་འདུ་ཤེས། ཆོས་དངརིག་གཞུང་སྲུང་སྐྱོབ་བཅས་ལ་གྲུབ་འབྲས་གང་བྱུང་བ་དེ་སྐུ་ཉིད་ཀྱི་འཇོན་ཐང་དང་ཁ་འབྲལ་ཐབས་མེད།
བོད་ཀྱི་གནད་དོན་འདི་སེལ་དགོས་ན། རྒྱ་གཞུང་དང་མཉམ་དུ་སྐད་ཆ་མ་བཤད་ན་འགྲོ་ས་མེད་དུས། བོད་རྒྱ་འབྲེལ་མོལ་སྔར་ཕྱི་ཐེངས་འགར་བྱེད་ཐུབ་ཡོད་དེ། ཐོག་མར་སྐུ་ཉིད་ཀྱིས་སྒེར་འབྲེལ་བརྒྱུད་ནས་རྒྱ་དཔོན་མཉམ་དུ་འབྲེལ་བ་བཟུང་། དེ་ནས་བོད་མིའི་སྒྲིག་འཛུགས་ལའང་སྐད་ཆ་བཤད་དེ། ཕྱོགས་གཉི་ཀ་མདུན་ལྕོག་གཅིག་གི་སྟེང་དུ་ཁྲིད་དེ། ད་ལྟའི་བོད་ཀྱི་དངོས་ཡོད་གནས་སྟངས་ཅི་ཡིན་གདོང་དང་གདོང་ཐུག་སྟེ་བཤད་ཐུབ་ཡོད། དེ་བཞིན་༧གོང་ས་མཆོག་གི་དགོངས་གཞི་དང་། བོད་ཀྱི་གནད་དོན་སེལ་ཐུབ་པའི་ཐབས་ལམ་ནས་བཟུང་འགྲེལ་བཤད་བརྒྱབ་ཡོད། རེད་དེ་སྐུ་ཉིད་ནས་རྒྱ་བོད་བར་འབྲེལ་མཐུད་ཀྱི་་ཕྱག་ལས་མཚམས་བཞག་པ་དང་མཉམ་དུ། བོད་རྒྱ་འབྲེལ་མོལ་ཡང་གཞན་སུ་གང་ཡང་མཐུད་མཁན་མ་བྱུང་བར་ད་བར་ལྷག་སོང་།
མི་སྐོར་ཞིག་ལ་གོ་སྐབས་ཤིག་བྱུང་ན། གཞུང་དོན་རྒྱབ་ནས་རང་ཉིད་ལ་རྒྱས་སྤྲོས་དང་རང་ཕོར་གསེར་གྱིས་ཤན་ནི་ཚོར་བལྟས་ན། སྐུ་ཉིད་ཀྱིས་ཀ་ལོན་ཕུག་ཏུ་ལྟོ་རྒྱབ་ཆེད་དུ་ཐུག་པའི་བཟོ་གྲྭ་ཆེས་དཀྱུས་མ་ཞིག་གཉེར་ཞིང་། འཚོ་བ་སྟབས་བདེའི་ངང་སྐད་ཆ་རྫིག་པོ་དང་ཆེན་པོ་མི་ཤོད་པར་ཧ་ཅང་དཀྱུས་མའི་སྐད་ཆའི་ནང་གནད་དོན་མང་པོ་ཤེས་རྒྱུ་ཡོད་ཅིང་། ངས་བྱས་རབས་དང་འཇོན་རབས་བཞག་སྟེ། རྒྱ་དཔོན་ཚོས་ང་ལ་དགའ་བོ་དང་ངའི་སྐད་ཆར་ཉན་གྱིན་འདུག་ཅེས་ཡང་ཡང་གསུང་མྱོང་ཡོད། ངའི་སྐད་ཆ་ལ་ཉན་གྱི་འདུག་ཅེས་པར་གོ་རྒྱུ་དམིགས་བསལ་ཡོད་ཅིང་། རྒྱ་དཔོན་ཚོ་ལས་སླ་བོ་སྐད་ཆར་ཉན་ནི་ཞིག་ཡིན་དང་མིན་ཚང་མས་ཤེས་གསལ་རེད།
བོད་ཀྱི་ཉེ་བའི་ལོ་རྒྱུས་ཁྲོད་སྐུ་ཉིད་ཆབ་སྲིད་ཀྱི་གོ་རྟོགས་དང་། སྐད་ཡིག་སྣ་མང་གི་ཤེས་ཚད། དཔོན་རིགས་དང་དཔོན་རིགས་བར་ཐོག་མར་སྒེར་འབྲེལ་བརྒྱུད་ནས་གཞུང་འབྲེལ་ལ་སྟབས་བདེ་སྐྲུན་ཐུབ་མཁན། ཕན་ཚུན་སྐད་ཆ་ཤོད་སྐབས་གཉིས་ཕན་གྱི་རྨང་གཞིའི་སྟེང་དགོས་པའི་གནད་དོན་དེ་མདུན་ལ་འདེད་ཐུབ་པ། མ་འཚམས་པའི་ལས་ཀ་དེས་རང་གཞན་ཚང་མར་ཕན་ཐོགས་མེད་པའི་རྒྱུ་མཚན་ཟུར་ནས་དྲངས་ཏེ། ཡང་དག་པའི་ཐབས་ལམ་ཞིག་བརྒྱུད་དེ་གནད་དོན་སེལ་འཐུབ་ཅིང་། དཔོན་རིགས་ཤིག་ལ་མཚོན་ན་གནད་དོན་མེད་ན་དཔོན་གོ་ཆོད་པ་ཡིན་ལ། གནད་དོན་སེལ་ཐུབ་པའི་བློ་ཁོག་ངེས་པར་དུ་ཡོད་དགོས་པའི་བླངས་བྱ་རྒྱ་དཔོན་ཚོར་འདོན་ཐུབ་མཁན་སྐུ་ཉིད་གཅིག་པུ་དེ་ཡིན་སྟབས། ངས་ནི་སྐུ་ཉིད་བོད་ཀྱི་ལོ་རྒྱུས་ཁྲོད་ཀྱི་ཕྱི་འབྲེལ་མི་སྣ་ཁྱད་དུ་འཕགས་པ་གཅིག་པུ་དེ་རེད་ཅེས་བཤད་ཐུབ།
མཐོ་འདོད་གྲགས་འདོད་ཀྱི་བསམ་བློ་རང་རྒྱུད་ལ་དཀོན་པའི་དབང་གིས། བརྙན་འཕྲིན་ཁང་དང་གསར་འགོད་ཚོའི་བཅར་འདྲི་དང་ལེན་བྱས་པ་ཧ་ཅང་ཉུང་ཉུང་རེད། དེར་གཞིགས་ན་ཁོང་ཆབ་སྲིད་པ་ཆོག་ཤེས་ཅན་ཞིག་ཀྱང་རེད། ཁ་གཞན་ཞིག་ཏུ་བསྒྱུར་ནས་བཤད་ན། གནད་དོན་གང་ཡིན་དོན་ལ་འགྲུབ་དགོས་པ་ལས་དེ་ས་བསྒྲགས་གནམ་བསྒྲགས་བྱས་ན་ཕན་ལས་གནོད་ཆེ་བའི་གནས་ཚུལ་འབྱུང་གི་ཡོད་པས་ཡིན་སྲིད་ཅིང་། ཆབ་སྲིད་པ་ཚོས་སྐད་ཆ་གང་བྱུང་བཤད་རྒྱུ་མང་དྲགས་ན་རྙོག་དྲ་བཟོས་པ་མང་བས་ཡིན་སྲིད།
དྲང་མོ་བཤད་ན། མི་ཞིག་གི་དོན་དམ་པའི་རིན་ཐང་ཤེས་རྒྱུ་ལས་སླ་བོ་ག་ལ་ཡིན། བོད་པའི་སྤྱི་ཚོགས་ལ་མཚོན་ན། སྐུ་ཉིད་ལྟ་བུའི་རིན་ཐང་ཅན་ཞིག་བྱོན་ནའང་། བོད་པས་དེ་ཤེས་མི་ཐུབ། དེ་ལྟར་བསམས་ན། མི་ཞིག་གི་རིན་ཐང་སྤྱི་ཚོགས་འདིས་མི་རྟོགས་ཁོ་ཐག་རེད། བོད་མི་རིགས་འདིའི་ཀླད་པ་ཕྱེད་ཀ་འབུ་ཡིན་ཁོ་ཐག་རེད། ཡང་ན་ནི། ང་ཚོའི་མེས་པོ་གོང་མ་ཚོའི་ཐོག་ཡོད་པའི་ལེགས་བྱང་མང་པོ་ཞིག་ང་ཚོའི་ལུས་ཐོག་ནས་ཉམས་ཚར་བ་ཡིན་དུས། མིའི་རིན་ཐང་རྟོགས་པའི་རྣམ་དཔྱོད་དེ་ཡང་ཉམས་ཚར་འདུག་གོ།།
