ཚོགས་པ་གསུམ་གྱིས་༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུས།

དགའ་ལྡན་ཕོ་བྲང་དང་། རྣམ་རྒྱལ་གྲྭ་ཚང་། རྣམ་ཟུར་བཅས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་སྐབས་ནང་ཆོས་ཀྱིས་འཛམ་བུ་གླིང་དུ་ཞི་བདེ་ཡོང་་བ་དང་སེམས་འཁྲུག་བསྡད་པར་ལྷོད་ལྷོད་ཆགས་པར་གཏན་གཏན་ཕན་ཐོགས་ཀྱི་ཡོད་སྐོར་སོགས་གསུངས་འདུག

དེ་རིང་ཕྱི་ཚེས་ ༥ ཉིན་བཞུགས་སྒར་རྒྱལ་བའི་ཕོ་བྲང་དུ།  དགའ་ལྡན་ཕོ་བྲང་དང་། རྣམ་རྒྱལ་གྲྭ་ཚང་། རྣམ་ཟུར་བཅས་ཀྱི་གོ་སྒྲིག་འོག ༧གོང་ས་རྒྱལ་བ་རིན་པོ་ཆེ་མཆོག་ལ་ཚེ་དཔག་མེད་དྭངས་མ་བཅུད་འདྲེན་གྱི་ཆོ་གའི་སྒོ་ནས་མཁའ་འགྲོའི་བསུན་བཟློག་དང་འབྲེལ་བའི་བརྟན་བཞུགས་བསྟར་འབུལ་ཞུས་ཡོད་ཅིང་། སྐབས་དེར་༧གོང་ས་རྒྱལ་བ་རིན་པོ་ཆེ་མཆོག་ནས། དེ་རིང་འདིར་དགའ་ལྡན་ཕོ་བྲང་དང་། རྣམ་རྒྱལ་གྲྭ་ཚང་། རྣམ་ཟུར་བཅས་ཀྱིས་དད་པ་དང་དམ་ཚིག་གཡོ་བ་མེད་པར་བརྟན་བཞུགས་གནང་བ་རེད། ངོས་ལ་ཆ་བཞག་ན་འཛམ་བུ་གླིང་ཐོག་ཏུ་ཕན་ཐོགས་གང་འཚམ་ཡོང་ཐུབ་ཀྱི་འདུག ངོས་ཀྱིས་བསམ་པ་རྣམ་དག་ཐོག་གཞིས་བྱེས་བོད་རིགས་ཡོངས་ལ་ཁ་ཕན་ཚིག་ཕན་བྱེད་བསྡད་ཀྱི་ཡོད། དེ་དག་གཏན་གཏན་ཕན་ཐོགས་ཡོང་གི་ཡོད་པ་ལྟ་བུ་འདུག ངོས་ཀྱི་བསམ་ཚུལ་དང་མཐོང་ཚུལ་བཤད་པ་དེ་ཆོས་དད་མེད་མཁན་ཚོས་ཧ་ཅང་དགའ་བོ་བྱེད་ཀྱི་འདུག ཧམ་པ་ལྟ་བུ་བཤད་ན་འཛམ་བུ་གླིང་དུ་མི་གྲངས་དུང་ཕྱུར་ཁ་ཤས་ཡོད་པ་ཚང་མས་ངོས་རང་ལ་ཕལ་ཆེར་དགའ་བོ་བྱེད་ཀྱི་འདུག ངོས་རང་གིས་བསམ་པ་རྣམ་དག་བྱས་ཏེ་འཛམ་བུ་གླིང་ཐོག་གི་མི་ཡོད་ཚད་ལ་ཕན་ཐོགས་ཀྱི་ཡོད། དམིགས་བསལ་ཆོས་དང་འབྲེལ་བའི་སྐད་ཆ་མེད་པར་ཡ་རབས་སྤྱོད་བཟང་ཐོག་ནས་མི་ཚེ་བསྐྱལ་ཚེ། སོ་སོའི་མི་ཚེ་སྐྱིད་པོ་ཡོང་བ་དང་། སོ་སོའི་ཉེ་འཁོར་གྱི་མི་རྣམས་སྐྱིད་པོ་ཡོང་བ། མཐར་འཛམ་བུ་གླིང་ཐོག་དོན་དམ་པའི་ཞི་བདེ་ཡོང་བར་ག་ས་གང་དུ་བཤད་བསྡད་ཀྱི་ཡོད། དེར་ཚང་མས་དགའ་བོ་བྱེད་ཀྱི་འདུག ཅེས་གསུངས་འདུག

 ༧མགོན་པོ་གང་ཉིད་མཆོག་གིས།  ངོས་ཀྱིས་བློ་རིག་དང་རྟགས་རིག་སྦྱངས་ཏེ་བློའི་འགྲོ་སྟངས་ཐོག་གང་ལ་གང་འཚམ་ཤེས་ཀྱི་ཡོད་པར་བརྟེན། བློ་ཡི་འགྲོ་སྟངས་སྐོར་ལ་དོ་སྣང་ཡོད་མཁན་གྱི་ཚན་རིག་པ་ཚོས་གོ་བསྡུར་བྱེད་བཞིན་ཡོད། སེམས་མ་ཞི་བ་ཞི་བ་བྱེད་པ། མ་འདུལ་བ་འདུལ་བར་བྱེད་པ། གང་ལྟར་སེམས་ལ་བདེ་སྐྱིད་ཡོང་བའི་བསམ་བློའི་འགྲོ་སྟངས་ལ་སློབ་སྦྱོང་བྱེད་ཀྱི་ཡོད་དུས། སེམས་ཀྱི་ཞི་བདེ་སྐོར་ལ་དོ་སྣང་ཡོད་མཁན་མང་པོས་དགའ་བོ་བྱེད་བཞིན་འདུག ངོས་རང་ཚན་རིག་པ་དང་ཐུག་དུས་ཚན་རིག་པ་འདྲ་བོ་ཆགས་ཀྱི་ཡོད། སེམས་ཁམས་རིག་པའི་སྐོར་བཤད་དགོས་ཚེ་ངོས་རང་ལ་ཧ་ལམ་མཁས་དབང་ལབ་ཆོག་པ་རེད། གང་ལྟར་མི་ལ་ཕན་ཐོགས་པ་ཞིག་ཡོང་གི་འདུག ངོས་རང་གིས་ད་ལྟ་བར་དུ་ཧུར་ཐག་བྱས་པ་ཡིན།  བོད་གངས་ཅན་ལྗོངས་ལ་རིག་གཞུང་གཏིང་ཟབ་ཡོད་པ་སྐྱབས་སུ་མཆི་ཞེས་དད་པ་གཅིག་པུ་མ་ཡིན་པར་རིག་པའི་ཐོག་ནས་བསམ་བློ་བཏང་ཡོང་བར་ང་ཚོ་བོད་པར་དམིགས་བསལ་ཞིག་ཡོད། བསམ་བློའི་ནང་ཆོས་རབ་ཏུ་རྣམ་འབྱེད་ཤེས་རབ་ཀྱིས་དཔྱད་པ་བྱེད་པའི་ནུས་པ་དེ་ང་ཚོའི་གོམས་གཤིས་འདིའི་ཐོག་ནས་གཏན་གཏན་ཡོང་རྒྱུ་རེད།  འདི་ཧ་ཅང་རྩ་ཆེན་པོ་རེད། ཅེས་གསུངས་འདུག

ཡང་༧མགོན་པོ་གང་ཉིད་ཀྱིས། ངོས་རང་ལ་ཆ་བཞག་ན་ཆུང་ཆུང་སྐབས་སུ་བློ་རིག་དང་རྟགས་རིག དེ་ནས་མངོན་པ་མཛོད་སོགས་སུ་བལྟས་པ་རེད། མཛོད་དེ་ཞེ་དྲགས་རིན་ཐང་མཐོང་གི་མི་འདུག མཛོད་ནང་རི་རབ་དང་གླིང་བཞི་སོགས་བཤད་ཡོད་པ་དེ་སྒྲུང་རེད་ཟེར་ཆོག་པ་ཞིག་རེད། ཞེ་དྲགས་གང་ཡང་མི་འདུག གཞན་དབུ་མའི་གཞུང་དང་། རྣམ་འགྲེལ་གྱི་གཞུང་། བསྡུས་གྲྭའི་གཞུང་དེ་དག་ཆོས་ཀྱི་སྐད་ཆ་མིན་པར་སེམས་ཁམས་རིག་པ་དང་བསྟུན་ནས་མི་ལ་ཕན་ཐོགས་ཡོང་བ་དང་། འཛམ་བུ་གླིང་དུ་ཞི་བདེ་ཡོང་བ། སེམས་འཁྲུག་བསྡད་པར་ལྷོད་ལྷོད་ཆགས་པར་གཏན་གཏན་ཕན་ཐོགས་ཀྱི་ཡོད། ང་ཚོ་བོད་ལ་ཡོད་བསྡད་པའི་ཆོས་ཕྱོགས་ཀྱི་རིག་གཞུང་དེ་ཧ་ཅང་ཡག་པོ་རེད། དེ་རིང་སྐབས་སུ་བབ་པ་ཁྱེད་ཚོས་བརྟན་བཞུགས་གནང་བ་རེད། ངོས་རང་ལོ་མང་པོ་བསྡད་ཐུབ་པ་དང་། དེའི་རིང་ལ་འཛམ་བུ་གླིང་མི་ཡོངས་ལ་གང་ལ་གང་འཚམ་གྱིས་ཕན་ཐོགས་བྱ་ཐུབ་རྒྱུ། ལྷག་པར་དུ་རྒྱ་ནག་ཏུ་ནང་ཆོས་ལ་དོ་སྣང་བྱེད་མཁན་མང་ནས་མང་དུ་འགྲོ་བཞིན་འདུག ངོས་རང་ལ་དགའ་བོ་བྱེད་མཁན་རྒྱ་རིགས་ནང་མང་དུ་འགྲོ་བཞིན་འདུག དེ་དག་ཚང་མར་བསམ་པ་རྣམ་དག་གིས་ཕན་ཐོགས་ཐུབ་པའི་རེ་བ་རྒྱག་བཞིན་ཡོད་ལ། ཕན་ཐོགས་ཡོང་ཐུབ་པའི་བཟོ་ཞིག་འདུག དེ་རིང་འདིར་བརྟན་བཞུགས་གནང་བར་ཐུགས་རྗེ་ཆེ་ཞུ་རྒྱུ་ཡིན། ཞེས་གསུངས་འདུག

གསར་འགོད་པ། བྱམས་པ་ཚེ་རིང་།