ཨོ་གླིང་དུ་གནས་སྡོད་བོད་མི་སེང་གེ་ཟེར་བས་༧གོང་ས་མཆོག་ལ་མཚན་སྨད་དང་བོད་མིའི་སྒྲིག་འཛུགས་རྩ་མེད་གཏོང་དགོས་པ་སོགས་འཇིགས་སྐུལ་གྱི་བྱ་སྤྱོད་སྤེལ་བར་བརྟེན། རྒྱ་གར་གཞུང་གིས་སེང་གེ་རྒྱ་གར་དུ་ཡོང་མི་ཆོག་ཁར་ད་དུང་ནག་ཉེས་གཞན་མང་པོ་བསགས་ཡོད་པའི་གནས་ཚུལ་ཐོན་འདུག
རྒྱ་གར་གྱི་གསར་འགྱུར་བརྒྱུད་ལམ་ཁག་གིས་བསྒྲགས་པའི་རྒྱ་གར་དབུས་གསང་བའི་ལས་ཁུངས་ཀྱི་གནས་ཚུལ་ལྟར་ན། འདས་ལོར་༧གོང་ས་མཆོག་ལ་མཚན་སྨད་དང་འཇིགས་སྐུལ་བྱས་པའི་གནད་དོན་དང་འབྲེལ་ནས། ཕྱི་ལོ་ ༢༠༢༤ ཟླ་ ༧ ཚེས་ ༡ ཉིན་ནས་ལག་བསྟར་བྱས་པའི་རྒྱ་གར་གཞུང་གི་ཉེས་ཁྲིམས་གསར་པ་ (BNS) ཞེས་པའི་འོག་ནས་ཨོ་གླིང་དུ་གནས་སྡོད་བོད་མི་སེང་གེ་ཟེར་བ་རྒྱ་གར་ནང་ཡོང་རྒྱུ་བཀག་སྡོམ་བྱས་ཡོད་པའི་ཁར། ཁོས་རྒྱ་གར་གྱི་སྤྱི་ཚོགས་བརྟན་ལྷིང་ལ་གནོན་སྐྱོན་དང་གཏོར་བཤིག་བཏང་སྟེ་རྒྱ་གར་གྱི་སྤྱི་ཚོགས་དཀྲུགས་ཐབས་བྱས་ཡོད་པ་སོགས་ཀྱི་ནག་ཉེས་བསགས་ཡོད་འདུག
རྒྱ་གར་གྱི་གསར་ཁང་ (News18) གིས་སྤེལ་བའི་གནས་ཚུལ་ནང་། སེང་གེ་ཡིས་ (waging war against India) རྒྱ་གར་ལ་འཁྲུག་རྐྱེན་ནམ་འཐབ་འཁྲུག་བསླངས་ཡོད་པའི་ནག་ཉེས་བསགས་ཡོད་པར་བརྗོད་འདུག་པས། ཕྱི་ལོ་ ༢༠༢༤ ལོའི་རྒྱ་གར་གྱི་ཉེས་ཁྲིམས་ (BNS) གསར་བའི་ནང་གསེས་དོན་ཚན་ ༡༤༧ པ་ལྟར་ན། རྒྱ་གར་གཞུང་ལ་འཐབ་འཁྲུག་བསླངས་ཚེ། ཚེ་བཙོན་ནམ་སྲོག་ཁྲིམས་ཀྱི་ཉེས་ཆད་ཕོག་གི་ཡོད་པ་གསལ་འདུག
དེ་འབྲེལ་གནས་ཚུལ་ནང་། ༧གོང་ས་མཆོག་ལ་འཇིགས་སྐུལ་བྱས་པའི་གནད་དོན་དེར་རྒྱ་གར་གཞུང་གིས་ཆེས་གཟབ་ནན་གྱིས་ལྟ་ཞིབ་བྱེད་བཞིན་ཡོད་ཅིང་། ༧གོང་ས་མཆོག་དང་འབྲེལ་བའི་གནད་དོན་དེས་བོད་པའི་སྤྱི་ཚོགས་ཙམ་དུ་མ་ཟད། རྒྱལ་སྤྱིའི་སྟེང་གི་རྒྱ་གར་གྱི་མཚན་སྙན་ལའང་གནོན་སྐྱོན་བཟོ་ཡི་ཡོད། སེང་གེ་ཡིས་༧གོང་ས་མཆོག་ལ་མཚན་སྨད་ཞུས་པའི་གནས་ཚུལ་བྱུང་རྗེས། རྒྱ་ནག་གཞུང་གིས་བོད་མི་ཁག་ཅིག་བཀོལ་སྤྱོད་བྱས་ཏེ་བཙན་བྱོལ་བོད་མིའི་བར་འགལ་ཟླ་བསླངས་ཏེ་སྤྱི་ཚོགས་ཀྱི་འཆམ་མཐུན་གཏོར་བརླག་གཏོང་ཐབས་བྱས་ཡོད་ཅེས་གསང་བའི་ལས་ཁུངས་བརྒྱུད་ནས་ཤེས་རྟོགས་བྱུང་ཡོད་པ་སོགས་བརྗོད་འདུག
འདས་ལོའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བརྒྱད་པའི་སྟེང་། སྤྱི་འཐུས་མང་པོས་བོད་མི་སེང་གེས་སྒེར་གྱི་ངོ་དེབ་སྟེང་དུ་༧གོང་ས་རྒྱལ་བ་རིན་པོ་ཆེ་མཆོག་ལ་མཚན་སྨད་དང་འཇིགས་སྐུལ་བྱས་པའི་གནད་དོན་གླེང་སློང་ཤུགས་ཆེན་བྱས་ཏེ། བཀའ་ཤག་ནས་ཚོགས་ཆུང་འཛུགས་དགོས་པ་དང་སྐུ་ཚབ་དོན་གཅོད་ལས་ཁུངས་སོགས་བརྒྱུད་ནས་ཨོ་གླིང་གཞུང་ལ་ཞུ་གཏུགས་གནང་དགོས་པ་སོགས་ཀྱི་གླེང་སློང་བྱུང་ཡོད་ལ། དེ་བཞིན། འདས་ལོའི་ཕྱི་ཟླ་ ༩ ནང་བཞུགས་སྒར་དུ་རྟེན་གཞི་བྱས་པའི་གཞུང་འབྲེལ་མིན་པའི་ཚོགས་སྡེ་ཁག་གཙོ་བྱས་པའི་འཛམ་གླིང་ཡུལ་གྲུ་གང་སར་གནས་པའི་བོད་རིགས་ཚོགས་པ་ཁག་གིས་ཀྱང་སེང་གེ་ལ་སྐྱོན་བརྗོད་དང་ངོ་རྒོལ་བསྒྲགས་གཏམ་སྤེལ་ཡོད།
དེ་འབྲེལ་དབུས་བོད་ཀྱི་གཞོན་ནུ་ལྷན་ཚོགས་དང་། དབུས་བོད་ཀྱི་བུད་མེད་ལྷན་ཚོགས། བོད་རྒྱལ་ཡོངས་མང་གཙོ་ཚོགས་པ། བོད་རང་བཙན་སློབ་ཕྲུག་ཚོགས་པ། རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་། དབུས་གཙང་དང་མདོ་སྟོད། མདོ་སྨད་ཆོལ་ཁའི་དབུས་སྤྱི་ཁྱབ་རྒྱུན་ལས་ཁང་བཅས་ཀྱིས་ངོ་རྒོལ་བསྒྲགས་གཏམ་སྤེལ་བའི་ནང་། དང་པོ། ཉེ་ཆར་ཨོ་གླིང་ལྷོ་ཕྱོགས་ས་ཁུལ་ཨ་ཌེལ་ལེ་ཌེ་ (Adelaide) ཞེས་པར་གནས་སྡོད་དངོས་མིང་ལ་སེང་གེ་དང་། དྲ་མིང་གངས་སེང་ཟེར་མཁན་ཞིག་སྙིང་ཁམས་གདོན་གྱིས་བརླན་ཏེ། རང་ཅག་གངས་ཅན་པ་ཡོངས་ཀྱི་དཔྲལ་བའི་མིག་དང༌། ཁོག་པའི་སྙིང་ལྟ་བུ་༧གོང་ས་༧སྐྱབས་མགོན་རྒྱལ་བའི་དབང་པོ་མཆོག་ལ་ཚད་ལས་བརྒལ་བའི་མཚན་སྨད་དང༌། ༧མགོན་པོ་གང་གི་སྐུ་སྲོག་ལ་འཇིགས་སྐུལ་བྱས་པ་མ་ཟད། བཙན་བྱོལ་དབུས་བོད་མིའི་སྒྲིག་འཛུགས་ལ་དགྲ་བོའི་འདུ་ཤེས་བཟུང་སྟེ། བཙན་བྱོལ་བོད་མིའི་སྒྲིག་འཛུགས་གཏོར་བཤིག་གཏོང་བའི་བསམ་ངན་སྦྱོར་རྩུབ་ཀྱིས་བརྒྱུད་སྐུལ་བྱས་པར། གཞུང་འབྲེལ་མ་ཡིན་པའི་ཚོགས་པ་ཆེ་ཁག་བརྒྱད་ཀྱི་ཁྱབ་ཁོངས་རྒྱ་ཆེའི་མི་མང་ཡོངས་ནས་མཐའ་གཅིག་ཏུ་ངོ་རྒོལ་ཡོད། གཉིས་པ། སེང་གེ་ཟེར་བས་༧གོང་ས་རྒྱལ་བ་རིན་པོ་ཆེ་མཆོག་གི་སྐུ་སྲོག་ལ་དོ་ཕོག་གཏོང་སེམས་ཀྱིས་སྒྲ་གཟུགས་གཉིས་ཐོག་ནས་མཚན་སྨད་བསམ་ཡུལ་ལས་འདས་པ་བྱས་པར་བརྟེན། ཚོགས་པ་ཁག་བརྒྱད་ཀྱི་ངོས་ནས་མི་དེ་བོད་མི་རིགས་ཀྱི་ཆིག་སྒྲིལ་གཏོར་བཤིག་པ་དང་འཇིགས་སྐུལ་བར་ངོས་འཛིན་ཐོག་གནས་ཡུལ་རྒྱ་གར་གཞུང་དང༌། ས་གནས་ཀྱི་འབྲེལ་ཡོད་ལས་ཁུངས་ཁག་ལ། ཁོས་སྤྱི་ཚོགས་སུ་བཀྲམ་པའི་སྒྲ་གཟུགས་གཉིས་དང༌། ཁོའི་ལོ་རྒྱུས་སོགས་མཁོ་སྤྲོད་ཀྱིས་༧མགོན་པོ་གང་ཉིད་ཀྱི་༧སྐུའི་བདེ་འཇགས་དང་འབྲེལ་བའི་ཐོག རྒྱ་གར་ལ་ཡོང་མི་འཇུག་པའི་འབོད་སྐུལ་ཞུ་རྒྱུ་ཡིན། གསུམ་པ། འཇིགས་སྐུལ་བ་སེང་གེས་༧གོང་ས་མཆོག་ལ་འཇིགས་སྐུལ་བྱས་པའི་བྱ་སྤྱོད་འདི་འཛམ་གླིང་རྒྱལ་སྤྱི་དང༌། གནས་ཡུལ་རྒྱལ་ཁབ་ཀྱིས་འཇིགས་སྐུལ་བར་ངོས་འཛིན་གང་ཡོད་ལྟར། དབུས་བོད་མིའི་སྒྲིག་འཛུགས་གཙོས་འབྲེལ་ཡོད་ནས་ཁྲིམས་གཏུགས་ཞུ་དགོས་པའི་འབོད་སྐུལ་དང༌། ཁྲིམས་གཏུགས་སོགས་ལས་འགུལ་སྤེལ་སྐབས་གཞུང་འབྲེལ་མ་ཡིན་པའི་ཚོགས་པ་ཁག་བརྒྱད་ནས་ཕྱར་གྲུ་མཉམ་འདེགས་ཞུ་རྒྱུ་ཡིན། བཞི་པ། མིང་ལ་སེང་གེ་ཟེར་བའི་བཀའ་དྲིན་བསམ་མེད་ཀྱི་མི་དེའི་རྒྱབ་ལྗོངས་རྩད་གཅོད་དང་འབྲེལ་ཡོད་སུ་ཡོད། བདེ་སྲུང་གཙོས་འབྲེལ་ཡོད་ཁག་གིས་སེང་གེ་ཟེར་བའི་མི་དེའི་རྒྱབ་ལྗོངས་དང་འབྲེལ་ཡོད་སུ་ཡིན་མིན་རྩད་གཅོད་ཀྱིས་ཞིབ་དཔྱོད་ནན་འདྲོངས་དང༌། དེ་རིགས་རྒྱ་ཡན་དུ་མི་གཏོང་བར་འབོད་སྐུལ་ཞུ་རྒྱུ་ཡིན། ཞེས་འཁོད་ཡོད།
འདས་ལོར་བོད་མི་སེང་གེ་ཡིས་༧གོང་ས་མཆོག་དང་བོད་མིའི་སྒྲིག་འཛུགས་གཉིས་རྩ་མེད་དུ་གཏོང་དགོས་པ་སོགས་བློ་ཡུལ་ལས་འདས་པའི་སྐྱོན་བརྗོད་བྱས་པ་དང་། ཁོས་ལོ་ཤས་གོང་ནས་༧གོང་ས་མཆོག་ལ་སྐྱོན་བརྗོད་བྱེད་མགོ་བཙུགས་ཡོད་པར་བརྟེན། ནང་མི་གཉེན་ཉེ་སོགས་ཀྱིས་ཁ་ཏ་བསླབ་བྱ་བརྒྱབ་པར་ཉན་འཇོག་བྱས་མེད་པ་རེད། སེང་གེ་ནི་ཕྱི་ལོ་ ༢༠༠༠ ལོར་རྒྱ་གར་དུ་འབྱོར། ཕྱི་ལོ་ ༢༠༠༧ ལོར་བོད་མིའི་སྒྲིག་འཛུགས་བདེ་སྲུང་ལས་ཁུངས་ཀྱི་གཞིས་སྤོའི་ལས་གཞིའི་ཁོངས་ནས། ཨོ་གླིང་དུ་འགྲོ་རྒྱུའི་གོ་སྐབས་ཐོབ། ཁོའི་དྲ་མིང་ལ་གངས་སེང་དང་ཆོས་མིང་ལ་བློ་བཟང་རྒྱ་མཚོ་ཟེར་ཞིང་། ཨོ་གླིང་གི་ལྷོ་ཕྱོགས་ས་ཁུལ་ Adelaide ཞེས་པར་སྡོད་ཀྱིན་ཡོད་འདུག
