རྒྱ་ནག་བཅིངས་གྲོལ་དམག་མི་ཟེར་བས་ཐའེ་ཝན་གྱི་མངའ་ཁོངས་སུ་དམག་དོན་གནམ་གྲུ་ ༥༨ དང་མཚོ་གྲུ་ ༩ སྡེབ་གཏོང་བྱས་ཏེ་ཐའེ་ཝན་གྱི་མཁའ་མཚོ་གཉིས་སུ་དམག་དོན་གྱི་ལས་དོན་སྤེལ་འདུག
Taiwan detected 59 Chinese aircraft around the self-ruled island, the defence ministry said on March 18, 2025, photo :the japantimes’
འདས་པའི་ལོ་ཤས་རིང་རྒྱ་ནག་བཅིངས་གྲོལ་དམག་མི་ཟེར་བས་ཐའེ་ཝན་མཚོ་འགག་ཁུལ་དུ་སུན་གཙེར་ཡང་ཡང་བཟོ་མུས་ཡིན་པ་ལྟར། འདས་པའི་ཆུ་ཚོད་ཉེར་བཞིའི་རིང་རྒྱ་ནག་གིས་ཐའེ་ཝན་གྱི་རྒྱལ་སྲུང་མངའ་ཁུལ་དུ་དམག་དོན་གནམ་གྲུ་ ༥༨ དང་དམག་དོན་མཚོ་གྲུ་ ༩ སོགས་སྡེབ་གཏོང་བྱས་ཏེ། རྒྱ་ནག་བཅིངས་གྲོལ་དམག་མི་ཟེར་བས་གནམ་མཚོ་གཉིས་ནས་ཐའེ་ཝན་མི་དམངས་ལ་འཇིགས་སྐུལ་བྱས་ཡོད་སྟབས། ཐའེ་ཝན་དམག་དོན་བདེ་སྲུང་ཚན་པས་ཀྱང་གནམ་མཚོ་གཉིས་སུ་དམག་མི་མངགས་ནས་རྒོལ་ལན་བསློགས་འདུག
གནད་དོན་དེའི་ཐད་ཐའེ་ཝན་གྱི་བདེ་སྲུང་བློན་ཆེན་ལས་ཁུངས་ཀྱིས། འདས་པའི་ཆུ་ཚོད་ཉེར་བཞི་ལྷག་གི་རིང་རྒྱ་ནག་བཅིངས་གྲོལ་དམག་མི་ཟེར་བས་དམག་དོན་གནམ་གྲུ ༥༨ དང་མཚོ་གྲུ་ ༩ ཐའེ་ཝན་གྱི་མཚོ་གླིང་དུ་དྲག་པོས་དམག་སྦྱོང་བྱས་ཡོད་ཅིང་། དེའི་ཁྲོད་ནས་དམག་དོན་མཁའ་གྲུ་ ༤༣ གྱིས་ཐའེ་ཝན་གྱི་བདེ་སྲུང་ས་ཐིག་གི་ནང་དུ་འཛུལ་ནས་འཇིགས་སྐུལ་བྱས་ཡོད་སྟབས། ཐའེ་ཝན་མཐའ་སྲུང་དམག་དོན་ཚན་པས་རྒྱ་ནག་བཅིངས་གྲོལ་དམག་མི་ཟེར་བའི་འཇིགས་སྐུལ་ལ་འགོག་སྲུང་དང་། རྒྱུན་དུ་རྒྱ་ནག་གི་ཚུལ་མཐུན་མིན་པའི་དམག་སྦྱོང་གི་རིགས་ལ་རྒོལ་སྲུང་བྱེད་ཀྱི་ཡོད། ཅེས་བསྒྲགས་འདུག་ལ། ད་ལན་འདས་ལོའི་ཕྱི་ཟླ ༡༠ རྗེས་ནས་རྒྱ་ནག་བཅིངས་གྲོལ་དམག་མི་ཟེར་བས་ཐའེ་ཝན་གྱི་མཁའ་མཚོ་གཉིས་སུ་དམག་དོན་གནམ་གྲུ་མངག་གཏོང་བྱེད་ཐེངས་མང་ཤོས་སུ་གྱུར་འདུག
དེ་བཞིན་ཁ་སང་ཕྱི་ཚེས་ ༡༧ ཉིན་རྒྱ་ནག་ཕྱི་སྲིད་བློན་ཆེན་ལས་ཁུངས་ཀྱི་མགྲིན་ཚབ་པ་མའེ་ཉིང་གིས། ད་ལན་གྱི་དམག་སྦྱོང་དེ་ནི་ཐའེ་ཝན་རྒྱལ་ཁབ་ཏུ་རྒྱབ་སྐྱོར་བྱེད་མཁན་དང་ཐའེ་ཝན་རང་བཙན་འདོད་པའི་ཁ་བྲལ་རིང་ལུགས་པའི་སྟོབས་ཤུགས་ཟེར་བར་དམིགས་པའི་ཉེན་བརྡ་ཞིག་ཡིན། ཞེས་དང་། ཨ་རིས་ཐའེ་ཝན་བེད་སྤྱད་དེ་རྒྱ་ནག་གི་ལམ་བུ་བཀག་འགོག་བྱེད་པའི་སྲིད་ཇུས་ལག་བསྟར་དང་ཐའེ་ཝན་རང་བཙན་ལ་རྒྱབ་སྐྱོར་བྱེད་མཁན་དག་ལ་དམིགས་པའི་ཉེན་བརྡ་ཡིན་ལུགས་བརྗོད་འདུག ཨ་རིས་ཐའེ་ཝན་ལ་ཕྱི་འབྲེལ་སྲིད་ཇུས་བཟུང་ནས་ངོས་ལེན་བྱེད་ཀྱིན་མེད་ཀྱང་། རྒྱལ་ཁབ་དེའི་བདེ་འཇགས་ཐད་ལ་རྒྱབ་སྐྱོར་བྱེད་མུས་ཡིན་པའི་ཁར། འདི་ལོའི་ཕྱི་ཟླ་ ༢ ནང་ཨ་རིའི་ཕྱི་སྲིད་ལས་ཁུངས་ཀྱི་ཡིག་ཆར་གསལ་བའི་ང་ཚོས་ཐའེ་ཝན་རང་བཙན་ལ་རྒྱབ་སྐྱོར་མི་བྱེད། ཅེས་པའང་བླངས་འདུག
གནད་དོན་དབྱེ་ཞིབ་པ་རྣམས་ཀྱིས། རྒྱ་ནག་གིས་མི་གྲངས་ས་ཡ་ ༢༣ ལྷག་ལས་མེད་པའི་ཐའེ་ཝན་མཚོ་འགག་ཏུ་སྟོབས་ཤུགས་རྒྱ་སྐྱེད་ཐུབ་ཚེ། ནུབ་ཞི་བདེ་རྒྱ་མཚོའི་ཁུལ་དུ་སྟབས་བདེ་བོའི་ཐོག་ནས་འགུལ་སྐྱོད་བྱེད་ཐུབ་པ་མ་ཟད། ནུབ་ཞི་བདེ་རྒྱ་མཚོའི་ཁུལ་དུ་ཡོད་པའི་གྷུ་ཝམ (Guam ) མཚོ་གླིང་དང་ཨ་རིའི་ཧཱ་ཝའེ་( Hawaii) མངའ་སྡེར་ཡོད་པའི་ཨ་རིའི་དམག་སྒར་ལ་འཇིགས་སྐུལ་བྱེད་སྲིད་སྐོར་བརྗོད་ཀྱི་འདུག
རྒྱ་ནག་གིས་ཐའེ་ཝན་མཚོ་འགག་ཁུལ་དུ་དྲག་པོའི་དམག་དོན་གྱི་ལས་འགུལ་མང་པོ་ཞིག་སྤེལ་མུས་ཡིན་པར། ཨ་རི་དང་། ཨོ་གླིང་། ཉི་ཧོང་བཅས་ཀྱིས་རྒྱ་ནག་གཞུང་གིས་ཐའེ་ཝན་གཞུང་མང་གཉིས་ཀྱི་བདེ་འཇགས་ལ་གནོད་པའི་དམག་དོན་ལས་འགུལ་སྤེལ་མཚམས་འཇོག་དགོས་པའི་ཉེན་བརྡ་གཏོང་མུས་ཡིན་ལ། ཨ་རིའི་མཐུན་ཕྱོགས་རྒྱལ་ཁབ་དེ་གཉིས་ཀྱིས་ཨ་རི་དང་མཉམ་དུ་ཐའེ་ཝན་གྱི་མཚོ་འགག་བདེ་འཇགས་ཡོང་བར་མཉམ་ལས་བྱ་རྒྱུ་ཡིན་སྐོར་གསལ་བསྒྲགས་བྱས་ཡོད་ལ། ལྷག་པར་ཕྱི་ལོ་ ༢༠༢༠ ལོ་ཙམ་ནས་རྒྱ་གར་གྱིས་ཁོ་ཝ་ཊི་ (Quad) ནང་འཛུལ་ཞུགས་བྱས་ཏེ། ཨེ་ཤ་ཡའི་ཁུལ་དུ་རྒྱ་ནག་གཞུང་གི་དབང་ཤུགས་ལ་འགོག་རྒོལ་དང་། རྒྱ་གར་ཞི་བདེ་རྒྱ་མཚོའི་ཁུལ་དུ་བརྟན་སྲུང་བྱེད་ཐབས་ཀྱི་མཉམ་འབྲེལ་དམག་སྦྱོང་སྤེལ་གྱིན་ཡོད་པ་རེད།
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
