བོད་རང་སྐྱོང་ལྗོངས་ཀྱི་དམར་ཤོག་དྲུང་ཆེ་ཟུར་བ་ཝུའུ་ཡེན་ཅེ་ཡིས་རྒྱ་སྒོར་དུང་ཕྱུར་ ༣། ༤༣ ལྐོག་རྔན་བླངས་ཡོད་པའི་མིང་འོག་ནས་ཁྲིམས་ར་འཚོགས་ནས་ཞིབ་བཤེར་བྱས་ཡོད་འདུག
འདས་ལོའི་ཕྱི་ཟླ་ ༡༢ ཚེས་ ༡༡ ཉིན། བོད་རང་སྐྱོང་ལྗོངས་ཀྱི་དམར་ཤོག་དྲུང་ཆེ་ཟུར་བ་ཝུའུ་ཡེན་ཅེ་ (Wu Yingjie)ཡིས། དམར་ཤོག་ཚོགས་པར་དད་སེམས་ཉམས་པ་དང་ཏང་གཤིས་ཀྱི་རྩ་དོན་ཤོར་བ། ཕུགས་བསམ་ཉམས་པ་སོགས་ཀྱི་ཉེས་མིང་འོག་ནས་དམར་ཤོག་ཚོགས་ཁོངས་ནས་ཕྱིར་ཕུད་བཏང་ཡོད་པ་ལྟར། ཟླ་འདིའི་ཕྱི་ཚེས་ ༢༠ ཉིན་རྒྱ་ནག་གཞུང་འབྲེལ་དྲ་ལམ་ཁག་གིས་པེ་ཅིང་གྲོང་ཁྱེར་འབྲིང་རིམ་མི་དམངས་ཁྲིམས་ཁང་གསུམ་པས་རྒྱལ་ཡོངས་སྲིད་གྲོས་སྐབས་བཅུ་བཞི་པའི་རྒྱུན་ལས་ཟུར་པ་དང་། བོད་རང་སྐྱོང་ལྗོངས་ཀྱི་དམར་ཤོག་དྲུང་ཆེ་ཟུར་བ་ཝུའུ་ཡེན་ཅེ་ཡིས་རྒྱ་སྒོར་དུང་ཕྱུར་ ༣། ༤༣ གྱི་ལྐོག་རྔན་བླངས་ཡོད་པའི་མིང་འོག་ནས་ཁྲིམས་ར་འཚོགས་ཏེ་ཞིབ་དཔྱོད་བྱེད་སྐབས་ནག་ཉེས་ངོས་ལེན་བྱས་ཡོད་ལུགས་བསྒྲགས་འདུག
ཕྱི་ལོ་ ༢༠༡༦ ནས་ ༢༠༢༡ ཟླ་ ༢ བར་ཝུ་ཡེན་ཅེ་ཡིས་བོད་རང་སྐྱོང་ལྗོངས་རྒྱ་ནག་དམར་ཤོགས་ཚོགས་པའི་རྒྱུན་ལས་དང་། དྲིལ་བསྒྲགས་འགན་འཛིན། བོད་རང་སྐྱོང་ལྗོངས་ཀྱི་རྒྱ་ནག་དམར་ཤོག་ཚོགས་པའི་ཚོགས་གཙོ། དམར་ཤོག་སྲིད་གཞུང་གི་ཚོགས་གཙོ་གཞོན་པ་སོགས་བྱས་ཡོད་ཅིང་། ཁོས་བོད་རང་སྐྱོང་ལྗོངས་ཟེར་བའི་དམར་ཤོག་ཚོགས་པའི་དྲུང་ཆེའི་དབང་ཆ་བཟུང་བའི་ལོ་དུས་ནང་དཔལ་འབྱོར་དང་འཛུགས་སྐྲུན་སོགས་ཀྱི་ཐད་ལ་ནུས་ཤུགས་བཏོན་ཡོད་ཀྱང་། དཔལ་འབྱོར་གོང་མཐོར་གཏོང་བའི་གོ་རིམ་ཁྲོད། ཁྲིམས་ལུགས་གང་ལའང་བརྩི་འཇོག་མི་བྱེད་པར་ཉེས་མེད་བོད་མི་བསད་པ་དང་། མནར་གཅོད་བཏང་བ། བཙན་འཁྲིད་བྱས་པ་ཚུད་པའི་འགྲོ་བ་མིའི་ཐོབ་ཐང་ལ་རྡོག་རོལ་ཚབས་ཆེན་བཏང་ཡོད། དེ་བཞིན་ཁོས་བོད་ནང་དབང་ཆ་འཛིན་སྐབས་བོད་ནང་གི་བུད་མེད་མང་པོ་ཞིག་གི་སྐྱེ་སྒོ་བཙན་གྱིས་བཀག་པ། བུད་མེད་ཚོའི་མངལ་བཙན་གྱིས་ཤོར་དུ་བཅུག་ཡོད་ལ། བོད་མིའི་ཆོས་སྲིད་གཉིས་ཀྱི་ཐོབ་ཐང་ལ་དམ་དྲག་བྱས་ཡོད་པ་མ་ཟད། བོད་ནང་གི་ཉེས་མེད་ཆབ་སྲིད་བཙོན་པ་རྣམས་ལ་མནར་གཅོད་ཚད་མེད་བཏང་ཡོད།
ཕྱི་ལོ་ ༢༠༡༩ ཟླ་ ༧ ཚེས་ ༡༧ ཉིན་རྒྱ་ནག་དམར་ཤོག་ཚོགས་པའི་བོད་རང་སྐྱོང་ལྗོངས་ཏང་གི་རྒྱུན་ལས་ལྷན་ཚོགས་ཟེར་བ་ཞིག་བོད་ཀྱི་རྒྱལ་ས་ལྷ་སར་འཚོགས་ཡོད་ཅིང་། སྐབས་དེར་ཁོས་རྒྱ་ནག་གཞུང་གི་ལས་བྱེད་ཚོས་ཆབ་སྲིད་ཀྱི་བསམ་བློ་གོང་འཕེལ་དུ་བཏང་ནས་མི་མང་གི་སྣེ་ཁྲིད་དེ། སྤྱི་ཡོངས་ནས་འཆར་འགོད། རྩ་བ་དང་རྨང་གཞི་བརྟན་དུ་གཏོང་བ། རྩ་བ་གཙང་མ་བརྟན་སྲུང་བྱས་ཏེ་རྒྱ་ནག་དམར་ཤོག་གི་ལས་དོན་ལ་དམ་འཛིན་ནན་ཏན་གྱིས། ཁ་བྲལ་ངོ་རྒོལ་གྱི་འཐབ་རྩོད་ལ་སྐུལ་སློང་ཤུགས་ཆེན་དང་མཐའ་མཚམས་སྲ་བརྟན། སྤྱི་ཚོགས་བདེ་འཇགས་སོགས་ལ་འགན་ལེན་ཐུབ་པ་བཅས་བྱས་ནས་རང་འགུལ་གྱིས་བརྟན་བརླིང་སྲུང་བར་སྲུང་སྐྱོབ་དགོས་ལུགས་དང་། རྒྱ་ནག་དམར་ཤོག་ཚོགས་པར་ངོ་རྒོལ་བྱེད་མཁན་རྣམས་ལ་མཐའ་གཅིག་ཏུ་ངོ་རྒོལ་བྱ་དགོས་ལུགས་སོགས་བཤད་ཡོད།
ཕྱི་ལོ་ ༢༠༢༢ ཟླ་ ༡༢ ཚེས་ ༩ ཉིན་ཨ་རིའི་ནོར་སྲིད་ལྷན་ཁང་གིས་འགྲོ་བ་མིའི་གཞི་རྩའི་ཐོབ་ཐང་ལ་རྡོག་རོལ་གཏོང་མཁན་གྱི་དཔོན་ངན་གྲངས་ ༤༠ ཐེར་འདོན་བྱས་ཏེ། ཨ་རིའི་ནང་ཡོད་པའི་ཁོ་ཚོའི་རྒྱུ་དངོས་གཞུང་བཞེས་གཏོང་བའི་དཔལ་འབྱོར་ཉེས་ཆད་བཅད་ཡོད་པའི་ཁྲོད། བོད་རང་སྐྱོང་ལྗོངས་ཟེར་བའི་དམར་ཤོག་ཚོགས་པའི་དྲུང་ཆེ་ཟུར་པ་ཝུའུ་ཡེན་ཅེ་ཚུད་ཡོད་སྟབས། ཁོའི་ཨ་རིར་ཡོད་པའི་རྒྱུ་དངོས་ཡོངས་རྫོགས་བཀག་སྡོམ་བྱས་ཡོད་ཅིང་། ཕྱི་ལོ་ ༢༠༢༣ ཟླ་ ༨ པའི་ནང་ཨ་རིའི་ཕྱི་སྲིད་བློན་ཆེན་ལས་ཁུངས་ཀྱིས། རྒྱ་ནག་གཞུང་གིས་བོད་ཀྱི་བྱིས་པ་ས་ཡ་གཅིག་ལྷག་རྒྱའི་བཅའ་སྡོད་སློབ་གྲྭར་བཙན་གྱིས་བཅུག་སྟེ། བོད་པའི་བྱིས་པ་རྣམས་བོད་ཀྱི་སྐད་ཡིག་དང་རིག་གཞུང་། ཆོས་ལུགས་སྲོལ་རྒྱུན་སོགས་ལས་ཁ་བྲལ་དུ་གཏོང་ཐབས་ཀྱི་སྲིད་ཇུས་ལག་བསྟར་བྱེད་བཞིན་ཡོད་སྟབས། སྐབས་དེའི་བོད་རང་སྐྱོང་ལྗོངས་ཀྱི་རྒྱ་ནག་དམར་ཤོག་ཚོགས་པའི་དྲུང་ཆེ་ཝུའུ་ཡེན་ཅེ་ལ་ཉེས་ཆད་བཅད་ཡོད་པ་རེད།
ཕྱི་ལོ་ ༢༠༡༤ ཟླ་ ༡ ཚེས་ ༢༤ ཉིན་རྒྱ་ནག་དམར་ཤོག་ཚོགས་པའི་མགོ་ཁྲིད་ཞི་ཅིན་ཕིན་གྱི་གཙོ་སྐྱོང་འོག དབུས་ཆབ་སྲིད་ལས་ཁུངས་ཀྱིས་ཚོགས་འདུ་བསྡུས་ཏེ་རྒྱལ་ཁབ་བདེ་འཇཊ་ཨུ་ཡོན་ལྷན་ཁང་ཞེས་པ་གསར་འཛུགས་བྱ་རྒྱུའི་གཏན་འབེབས་བྱས་ཏེ། དབུས་གཞུང་གིས་གཏན་འབེབས་དོན་ཚན་བརྒྱད་ལག་བསྟར་བྱས་པའི་གནས་ཚུལ་ཕྱོགས་བསྡོམས་དང་འབྱུང་འགྱུར་གྱི་ལས་དོན་སྤྱི་ལེགས་བཅོས་བྱེད་དགོས་པའི་ཐག་གཅོད་འོག རྒྱ་ནག་ནང་དང་བོད་སོགས་བཙན་བཟུང་འོག་ཡོད་པ་ཚང་མར་ལྐོག་ཟ་རུལ་སུངས་དང་གཞུང་དངུལ་ལོག་སྤྱོད། རྒྱས་སྤྲོས་བག་མེད་སོགས་ཀྱི་ཉེས་མིང་འོག དབུས་ས་གཉིས་ནས་དཔོན་རིགས་མང་པོར་ཞིབ་བཤེར་དང་བཙོན་འཇུག་ཁྲིམས་ཐག་བཅད་ཡོད་ལ། སྤྱི་ཡོངས་ནས་མང་ཚོགས་ཁྲོད་བྱ་འགུལ་དེ་ལ་དགའ་མོས་དང་རྒྱབ་སྐྱོར་བྱེད་མཁན་མང་པོ་བྱུང་།
དེ་བཞིན་ཕྱི་ལོ་ ༢༠༢༢ ལོའི་ལོ་མཇུག་ཏུ་བོད་རང་སྐྱོང་ལྗོངས་ཟེར་བའི་སྲིད་གཞུང་གི་མགོ་ཁྲིད་གཞོན་པ་ཀྲང་ཡོང་ཙི་དང་། དྲིལ་བསྒྲགས་ལྷན་ཁང་གི་རྒྱུན་ལྷན་ཚོགས་གཙོ་གཞོན་པ་ཝང་ནིན་ཧྲིན། བོད་རང་སྐྱོང་ལྗོངས་ཟེར་བའི་ཉེན་རྟོག་ཁང་གི་རྒྱུན་ལྷན་ཚོགས་གཙོ་གཞོན་པ་ཡང་ཀང་མིན་བཅས་ལས་གནས་ནས་གནས་དབྱུང་དང་། ཕྱི་ལོ་ ༢༠༢༤ ལོའི་ཟླ་ ༢ ཚེས་ ༣ ཉིན་དཀར་མཛེས་ཁུལ་རྟའུ་རྫོང་ཉེན་རྟོག་ལས་ཁུངས་ཀྱི་དཔོན་པོ་གཞོན་པ་ཡེ་ཤེས་རྡོ་རྗེ་དང་། ཕྱི་ལོ་ ༢༠༢༢ ལོའི་ཟླ་ ༡༡ ཚེས་ ༢༤ ཉིན་ཆབ་མདོ་གྲོང་ཁྱེར་འཐབ་ཕྱོགས་གཅིག་གྱུར་ཁང་གི་འགན་འཛིན་ཚེ་རིང་འགྱུར་མེད། དེ་བཞིན་ཕྱི་ལོ་ ༢༠༢༢ ལོར་བོད་ཀྱི་མཚོ་ཤར་དང་མཚོ་ནུབ་ཁུལ། སྐྱེ་རྒུ་མདོ་ཁུལ་སོགས་སུ་ལོ་ངོ་ ༣༣ ལྷག་ཙམ་རིང་མགོ་ཁྲིད་བྱས་མྱོང་བའི་རྒྱ་དཔོན་ཝུན་གོ་ཏུང་ཟེར་བ་སོགས་ཚུད་པའི་ཉུང་མཐར་བོད་ཁུལ་གྱི་མཐོ་རིམ་དཔོན་རིགས་མང་དག་ཅིག་ལ་ཞིབ་བཤེར་དང་བཙོན་འཇུག་བྱས་པའི་གནས་ཚུལ་ཐོན་ཡོད་པ་རེད།
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
