གནས་ཆུང་གྲྭ་ཚང་གི་བརྟན་བཞུགས་བསྟར་འབུལ་སྐབས་༧གོང་ས་རྒྱལ་བ་རིན་པོ་ཆེ་མཆོག་དགུང་ལོ་བརྒྱ་དང་སུམ་ཅུ་ལྷག་བཞུགས་རྒྱུ་ཡིན་པའི་བཀའ་སློབ་བཟང་པོ་སྩལ་འདུག
༧གོང་ས་རྒྱལ་བ་རིན་པོ་ཆེ་མཆོག དགའ་ལྡན་ཕོ་བྲང་གི་སྐུ་པར། ༢༠༢༥།༣།༢༤
དེ་རིང་བཞུགས་སྒར་༧རྒྱལ་བའི་ཕོ་བྲང་དུ་གནས་ཆུང་རྡོ་རྗེ་སྒྲ་དབྱངས་གླིང་འདུས་སྤྱི་ཡིས་༧གོང་ས་རྒྱལ་བ་རིན་པོ་ཆེ་མཆོག་ལ་ཚེ་ལྷ་དཀར་པོའི་སྒོ་ནས་བརྟན་བཞུགས་བསྟར་འབུལ་ཞུས་ཡོད་ཅིང་། སྐབས་དེར་༧མགོན་པོ་གང་ཉིད་ཀྱིས་མུ་མཐུད་དུ་བསྟན་པ་དང་འགྲོ་བའི་དོན་དུ་ཧུར་ཐག་འབད་ཐག་གནང་རྒྱུ་ཡིན་སྐོར་སོགས་གསུངས་འདུག
སྐབས་དེར་༧གོང་ས་རྒྱལ་བ་རིན་པོ་ཆེ་མཆོག་ནས། ད་བར་དུ་ངོས་རང་གིས་ཆོལ་ཁ་གསུམ་གྱི་མི་རིགས་ཚང་མར་སངས་རྒྱས་ཀྱི་བསྟན་པ་ཉམས་པར་སོར་ཆུད་དང་མི་ཉམས་གོང་འཕེལ་ཡོང་སླད་སྨོན་ལམ་རྒྱག་གིན་ཡོད་ལ་འབད་བརྩོན་བྱེད་ཀྱིན་ཡོད། དེང་སང་འཛམ་གླིང་ནུབ་ཕྱོགས་སུ་ནང་ཆོས་ལ་དོ་སྣང་གསར་པ་སླེབ་མཁན་དེ་དག་གིས་ཀྱང་ང་རང་ཚེ་རིང་པོ་ཡོང་རྒྱུར་རེ་འདུན་དང་མོས་པ་ཆེན་པོ་བྱེད་ཀྱི་འདུག དེ་འདྲ་ཡིན་དུས་ངོས་རང་གིས་བསྟན་པ་དང་འགྲོ་བའི་དོན་ད་བར་ཧུར་ཐག་བྱས་པ་ཡིན། ངོས་རང་གིས་ད་དུང་ཡང་ཧུར་ཐག་འབད་ཐག་བྱེད་ཀྱི་རེད། ཚང་མར་ཐུགས་རྗེ་ཆེ་ཞུ་རྒྱུ་ཡིན། དེ་བཞིན་དེ་རིང་གནས་ཆུང་གྲྭ་ཚང་གིས་བརྟན་བཞུགས་གནང་བ་རེད། ཚང་མར་ཐུགས་རྗེ་ཆེ་ཞུ་རྒྱུ་ཡིན། བཀྲ་ཤིས་བདེ་ལེགས། ཞེས་གསུངས་འདུག
དེ་བཞིན་གནས་ཆུང་གྲྭ་ཚང་གི་དགེ་བཤེས་རྡོ་རྗེ་ལགས་ཀྱིས་འདི་གའི་གསར་ཁང་ལ། ༧གོང་ས་རྒྱལ་བ་རིན་པོ་ཆེ་མཆོག་ལ་ཞབས་ཕྱིས་ཞུ་མཁན་དེ་དཔལ་ལྡན་ལྷ་མོ་དང་གནས་ཆུང་ཆོས་རྒྱལ་ཆགས་ཡོད་རེད། དཔལ་ལྡན་ལྷ་མོས་བརྡ་འཕྲིན་ ( Message )དེ་གནས་ཆུང་བརྒྱུད་ནས་ཕུལ་གྱི་ཡོད་རེད། ཅེས་དང་། གནས་ཆུང་གིས་བཀའ་ལུང་ག་དུས་གནང་ནའང་དམ་ཚིག་གཙང་མ་བྱ་རོགས་བྱོས། ཚང་མས་རྡོག་རྩ་གཅིག་སྒྲིལ་བྱ་རོགས་བྱོས་ཞེས། ཉེ་ཆར་རང་ཚེས་བཅུའི་སྐབས་སུ་སྤྱི་འཐུས་ཚོགས་གཙོ་ལ་བཀའ་གནང་སོང་ལ། དེའི་སྔོན་ལའང་བཀའ་གནང་བ་རེད། གང་ཡིན་ཟེར་ན་ང་རང་ཚོ་ཚང་མ་གཟབ་གཟབ་བྱོས། ལྷག་པར་འགན་འཁུར་མཁན་སྤྱི་འཐུས་རྣམ་པ་ཚང་མས་ད་ལྟའི་དུས་འདིར་༧གོང་ས་རྒྱལ་བ་རིན་པོ་ཆེ་མཆོག་སྐུ་འཚོ་བཞུགས་སྐབས་ལ་གཟབ་གཟབ་མ་བྱས་པ་ཡིན་ན། གལ་སྲིད་༧གོང་ས་རྒྱལ་བ་རིན་པོ་ཆེ་མཆོག་སྐུ་ཚེ་མ་ཟིན་པའི་གནས་ཚུལ་དེ་འདྲ་བྱུང་སོང་ན། བོད་འདི་མུན་པ་མུན་ནག་གི་གནས་སུ་གྱར་གྱི་རེད་གདའ། ཞེས་བཀའ་ལུང་ཐེངས་གཉིས་གསུམ་གནང་ཚར་བ་རེད། ཅེས་དང་། ཡང་ཉེ་ཆར་གྱི་བཀའ་ལུང་དེའི་ནང་དུའང་ཆོལ་ཁ་གསུམ་གཅིག་ཏུ་སྒྲིལ་བའི་ཐོག་ནས། ༧གོང་ས་རྒྱལ་བ་རིན་པོ་ཆེ་མཆོག་གི་བཀའ་གསུང་ཇི་བསྒྲུབ་ཞུ་རྒྱུ་ཡིན། ཞེས་མནའ་བསྐྱལ་དམ་བཅའ་ཞིག་བྱེད་ཐུབ་པ་ཡིན་ན་ཡག་པོ་ཡོད་རེད། ཅེས་བཀའ་ལུང་ཕེབས་ཡོད་རེད། དེ་འདྲ་ཡིན་དུས་གཞུང་གི་འགན་འཁུར་མཁན་དང་མང་ཚོགས་ཚང་མས་རྡོག་རྩ་གཅིག་སྒྲིལ་གནང་ཐུབ་པ་ཡིན་ན། ༧གོང་ས་རྒྱལ་བ་རིན་པོ་ཆེ་མཆོག་སྐུ་ཚེ་ཞབས་པད་བརྟན་རྒྱུ་དང་ཞབས་བརྟན་གལ་ཆེ་ཤོས་དེ་འདི་རེད་བསམ་གྱི་འདུག ཅེས་འགྲེལ་བརྗོད་གནང་སོང་།
དེ་བཞིན་གནས་ཆུང་སྐུ་རྟེན་ཐུབ་བསྟན་དངོས་གྲུབ་མཆོག་གིས། དེ་རིང་རྒྱལ་པོ་ཚེ་ལྷ་དཀར་པོའི་ཆོ་གའི་སྒོ་ནས་བརྟན་བཞུགས་ཕུལ་བ་རེད། དེ་རིང་ང་ཚོ་སྐལ་བ་བཟང་བ་ཞིག་ལ་༧གོང་ས་རྒྱལ་བ་རིན་པོ་ཆེ་མཆོག་གི་བཀའ་སློབ་ཏུ་དགུང་ལོ་བརྒྱ་དང་སུམ་ཅུ་ཙམ་བཞུགས་ཀྱི་ཡིན་ཞེས་བཀའ་གསལ་པོ་ཐེངས་གཉིས་ལ་ཕེབས་སོང་། ང་རང་གིས་ཀྱང་༧གོང་ས་རྒྱལ་བ་རིན་པོ་ཆེ་མཆོག་ལ་སྐུ་ཚེ་ཞབས་པད་བརྟན་རོགས་ཞེས་ཟུར་མཇལ་སྐབས་ཞུས་དུས། སེམས་ཁྲལ་མ་གནང་། ངོས་རང་ཡུན་རིང་བསྡད་ཀྱི་རེད་གདའ། ཞེས་བཀའ་བཟང་ཐོབ་སོང་། ཞེས་གསུངས་སོང་། དེ་བཞིན་དེ་རིང་༧གོང་ས་རྒྱལ་བ་རིན་པོ་ཆེ་མཆོག་ནས་སོག་ཡུལ་གྱི་ཡོན་བདག་ཉི་ཤུ་ལྷག་དང་གནས་ཆུང་གྲྭ་ཚང་གི་ལས་བྱེད་ཁག་ཅིག་ལ་མཇལ་ཁ་སྩལ་འདུག
གསར་འགོད་པ། དོན་འགྲུབ་བཀྲ་ཤིས། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
