དེ་རིང་༧གོང་ས་རྒྱལ་བ་རིན་པོ་ཆེ་མཆོག་གི་འདས་པའི་རླབས་ཆེན་གྱི་མཛད་རྗེས་ལ་ཆེ་བསྟོད་སླད་རྒྱལ་སྤྱིའི་མར་ཁུ་རི་གསེར་གྱི་གཟེངས་རྟགས་ཕུལ་སོང་།
དེ་རིང་ཕྱི་ཟླ་ ༣ ཚེས ༣༡ ཉིན་བཞུགས་སྒར་རྒྱལ་བའི་ཕོ་བྲང་དུ་རྒྱལ་སྤྱིའི་མར་ཁུ་རི་གསེར་གྱི་གཟེངས་རྟགས་(Gold Mercury International) ཚོགས་པས། ༧གོང་ས་རྒྱལ་བ་རིན་པོ་ཆེ་མཆོག་ནས་ཐུགས་བསྐྱེད་དམ་བཅའ་བཞི་བརྒྱུད། ཞི་བདེ་དང་། སྤྱི་ཚོགས་འདུམ་སྒྲིག ཆོས་ལུགས་མཐུན་འབྲེལ། དེ་བཞིན་འཚེ་མེད་ཞི་བའི་ལྟ་གྲུབ་དང་ཁོར་ཡུག་སྲུང་སྐྱོབ་སོགས་མཚོན་པའི་སྐྱེ་འགྲོའི་དོན་དུ་རླབས་ཆེན་གྱི་མཛད་འཕྲིན་བསྐྱངས་དང་སྐྱོང་བཞིན་པར་ཆེ་བསྟོད་གནང་སླད། ཕྱི་ལོ་ ༢༠༢༥ ལོའི་མར་ཁུ་རི་གསེར་གྱི་གཟེངས་རྟགས་དེ་ཕུལ་སོང་།
གཟེངས་རྟགས་དེ་༧གོང་ས་རྒྱལ་བ་རིན་པོ་ཆེ་མཆོག་ལ་འབུལ་སྐབས་༧མགོན་པོ་གང་ཉིད་ཀྱིས། ང་ཚོའི་མི་ཚེ་ནི་ཨ་མའི་མངལ་ནས་མགོ་བཙུགས་པ་ཞིག་ཡིན། ང་ཚོ་ཚང་མ་བྱམས་བརྩེ་ལ་བརྟེན་ནས་འཚོ་བ་ཡིན་ཞིང་། ཨ་མའི་བརྩེ་སེམས་དང་བྲལ་ཚེ་ང་ཚོ་འཚོ་ཐབས་བྲལ་བ་རེད། ང་ཚོ་སྐྱེས་མ་ཐག་ཨ་མས་ང་ཚོར་ལྟ་རྟོག་ཆེས་མང་ཤོས་གནང་གི་ཡོད། ང་རང་ཚོ་བྱིས་དུས་སུའང་ཨ་མ་ཡོད་ཚེ་ངུ་ཆོག་བསམ་པའི་ཚོར་སྣང་སྐྱེས་པ་དང་། ཨ་མ་དང་བྲལ་ཚེ་བྱ་ཐབས་བྲལ་བ་ཞིག་ཡིན། དེ་འདྲ་སོང་ཙང་མ་གྱུར་སེམས་ཅན་ཐམས་ཅད་ང་ཚོའི་ཨ་མ་ཡིན་པའི་བཤད་སྲོལ་ཞིག་ཡོད་པ་རེད། ཚེ་འདི་ལ་མཚོན་ནའང་རང་གི་ཨ་མར་བཅངས་པའི་འདུ་ཤེས་དེ་སྐྱེ་འགྲོ་ཀུན་ལ་བཅངས་དགོས་པ་རེད། དེ་ལ་བརྟེན་ནས་ང་ཚོས་དོན་དམ་གྱི་ཞི་བདེ་རང་བཞིན་ལྡན་པའི་འཛམ་གླིང་ཞིག་བསྐྲུན་ཐུབ་སྲིད་པ་རེད། ཅེས་གསུངས་འདུག
རྒྱལ་སྤྱིའི་མར་ཁུ་རི་གསེར་གྱི་གཟེངས་རྟགས་ཀྱི་འགན་འཛིན་དང་སྤྱི་ཁྱབ་དྲུང་ཆེ་སྐུ་ཞབས་ནི་ཁུ་ལ་སི་ (Nicolas De Santis) ལགས་ཀྱིས། ༧གོང་ས་རྒྱལ་བ་རིན་པོ་ཆེ་མཆོག་ནི་ཞི་བདེའི་མཚོན་རྟགས་ཤིག་རེད། ཁོང་ནི་འཐབ་འཁྲུག་རང་བཞིན་ལྡན་པའི་འཇིག་རྟེན་ཁྲོད་ཀྱི་འཚེ་མེད་ཞི་བའི་མགྲིན་ཚབ་ལྟ་བུ་ཡིན། ང་ཚོས་༧གོང་ས་རྒྱལ་བ་རིན་པོ་ཆེ་མཆོག་ནས་བྱམས་བརྩེ་དང་། ཁོར་ཡུག་སྲུང་སྐྱོབ། འཛམ་གླིང་གི་སྣེ་མོ་གསུམ་པར་གྱུར་བའི་བོད་མཐོ་སྒང་གི་ཁོར་ཡུག་བདག་གཅེས་སོགས་ཀྱི་ཐད་ལ་ཕྱག་ལས་གནང་མུས་ཡིན་སྟབས། ཕྱི་ལོ་ ༢༠༢༥ ལོའི་མར་ཁུ་རི་གསེར་གྱི་གཟེངས་རྟགས་དེ་༧མགོན་པོ་གང་ཉིད་ལ་ཕུལ་བ་ཡིན། དེ་རིང་ནི་མར་ཁུ་རི་གསེར་གྱི་གཟེངས་རྟགས་ཀྱི་ཆེས་བློ་སྤོབས་སྐྱེས་འོས་པའི་ཉིན་མོ་ཞིག་ཏུ་ངོས་འཛིན་བྱེད་ཀྱི་ཡོད། ཅེས་བརྗོད་བྱུང་།
ཡང་ཁོང་གིས། ང་ཚོའི་དམིགས་ཡུལ་གཙོ་བོ་ནི་ཞི་བདེ་དང་མཉམ་ལས་གོང་མཐོར་གཏང་རྒྱུ་དེ་ཡིན་ཞིང་། བོད་བརྒྱུད་ནང་བསྟན་ནི་ལག་ལེན་རང་བཞིན་གྱི་ཐོག་ནས་ཉམས་ལེན་བྱ་སའི་སྡིངས་ཆ་ཞིག་རེད། དེ་རིང་ང་ཚོས་འཛམ་གླིང་གི་མགོ་ཁྲིད་ཚོས་དྲག་གནོན་གྱི་སྐོར་ལས་བྱམས་བརྩེའི་ཐད་ལ་གླེང་སློང་བྱས་ན་དགེ་མཚན་ཆེ་བ་ཡོད་པའི་བརྡ་ལན་གཏོང་གིན་ཡོད། ཅེས་བརྗོད་བྱུང་།
རྒྱལ་སྤྱིའི་མར་ཁུ་རི་གསེར་གྱི་གཟེངས་རྟགས་ཚོགས་པའི་དྲ་རྒྱར། ༧གོང་ས་རྒྱལ་བ་རིན་པོ་ཆེ་མཆོག་ལ་གསེར་གྱི་གཟེངས་རྟགས་ཕུལ་བར་དགའ་སྤྲོ་ཆེན་པོ་སྐྱེས་ཡོད། ༧གོང་ས་མཆོག་དགུང་གྲངས་ ༩༠ ལ་ཕེབས་པའི་ལོ་རྒྱུས་རང་བཞིན་ལྡན་པའི་ལོ་འདིར་གཟེངས་རྟགས་དབུལ་རྒྱུ་བྱུང་བ་ནི་ཁོང་གིས་མི་ཚེ་ཧྲིལ་པོར་ཞི་བདེ། འདུམ་སྒྲིག ཆོས་ལུགས་ཕན་ཚུན་གྱི་བགྲོ་གླེང་། ཤེས་རབ་ཀྱི་རིག་གཞུང་། ང་ཚོའི་གོ་ལ་འདི་སྲུང་སྐྱོབ་གནང་རྒྱུར་འགྱུར་བ་མེད་པའི་དམ་བཅའ་བརྟན་པོ་བཞག་པར་དགའ་བསུ་ཞུ་ཆེད་ཡིན། འཛམ་གླིང་གི་བདེ་འཇགས་དང་ཞི་བདེ། ཁོར་ཡུག་རྒྱུན་གནས་ཐུབ་པའི་གནས་སྟངས་ཇེ་ཞན་དུ་འགྲོ་བཞིན་པའི་སྐབས་འདིར། ཁོང་གི་བཀའ་སློབ་རྣམས་ཀྱིས་མི་སྒེར་དང་སྤྱི་ཚོགས། མགོ་ཁྲིད་རྣམས་ལ་ཡང་དག་པ་དང་ཞི་བདེ། འདྲ་མཉམ། རྒྱུན་གནས་ཐུབ་པའི་འཛམ་གླིང་ཞིག་བསྐྲུན་ཐུབ་པར་སྐུལ་མ་གནང་མུས་ཡིན། ༧གོང་ས་རྒྱལ་བ་རིན་པོ་ཆེ་མཆོག་ནི་རྒྱ་གར་གྱི་སྐྱེས་ཆེན་དམ་པ་གྷན་དྷི་མཆོག་གི་རྗེས་སུ་འབྲངས་ཏེ་འཚེ་མེད་ཞི་བའི་ཐབས་ལམ་ཁོ་ནས་བོད་མི་རིགས་ཀྱི་ཐོབ་ཐང་སྲུང་སྐྱོབ་གནང་མཁན་གྱི་སྐྱེས་བུ་དམ་པ་ཞིག་ཡིན། ཞེས་གསལ་འདུག
མར་ཁུ་རི་གསེར་གྱི་གཟེངས་རྟགས་ནི་འཛམ་གླིང་ནང་འགྲོ་བ་མའི་ཐོབ་ཐང་དང་། དཔལ་འབྱོར། ཁོར་ཡུག་སྲུང་སྐྱོབ། ཆོས་ལུགས་མཐུན་སྒྲིལ་སོགས་ཀྱི་ཐད་ལ་ཕྱག་ལག་གནང་མཁན་གྱི་མི་བུ་བྱས་པ་ཅན་ལ་འབུལ་སྲོལ་ཡོད་ཅིང་། འདི་ལོའི་ཕྱི་ཟླ་ ༣ པའི་ཚེས་ ༡༠ ཉིན་༧གོང་ས་རྒྱལ་བ་རིན་པོ་ཆེ་མཆོག་ལ་གསེར་གཟེངས་རྟགས་དེ་ཐོབ་པའི་གསལ་བསྒྲགས་བྱས་རྗེས། དེ་རིང་དངོས་སུ་གཟེངས་རྟགས་འབུལ་བཞེས་ཀྱི་མཛད་སྒོ་འདི་འཚོགས་པ་ཡིན་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
