ནེའུ་ཌར་ལན་ཌིའི་གྲོས་ཚོགས་ནང་བོད་དོན་རྒྱབ་སྐྱོར་གྱི་གྲོས་ཆོད་གཏན་འབེབས་བྱུང་འདུག

ཡུ་རོབ་རྒྱལ་ཁབ་ནེའུ་ཌར་ལན་ཌིའི་གྲོས་ཚོགས་འོག་མའི་ནང་དུ་དོན་ཚན་གསུམ་ལྡན་པའི་བོད་དོན་རྒྱབ་སྐྱོར་གྱི་གྲོས་ཆོད་གཏན་འབེབས་བྱུང་འདུག

ཁ་སང་ཡུ་རོབ་རྒྱལ་ཁབ་ནེའུ་ཌར་ལན་ཌིའི་གྲོས་ཚོགས་འོག་མའི་ནང་བོད་དོན་རྒྱབ་སྐྱོར་གྱི་ཁྲིམས་འཆར་གསུམ་ལ་མང་མོས་རྒྱབ་སྐྱོར་ཐོབ་སྟེ་གྲོས་ཆོད་གཏན་འབེབས་ཡོད་ཅིང་། དེ་ནི་ཡུལ་དེའི་གྲོས་ཚོགས་ནང་བོད་དོན་ལ་རྒྱབ་སྐྱོར་གྱི་རྣམ་པ་གསར་པ་ཞིག་ཆགས་ཡོད་པ་མ་ཟད། ཡུལ་དེའི་གྲོས་ཚོགས་འཐུས་མི་ཚོས་ཡུ་རོབ་གྲོས་ཚོགས་ནང་བོད་དོན་ལ་འཛིན་པའི་གཅིག་གྱུར་གྱི་སྲིད་ཇུས་ཤིག་གཏན་འབེབས་ཡོང་ཐབས་གནང་རྒྱུ་ཡིན་འདུག

ནེའུ་ཌར་ལན་ཌིའི་གྲོས་ཚོགས་འོག་མའི་ནང་གཏན་འབེབས་བྱུང་བའི་གྲོས་ཆོད་ནང་། གཅིག ཡུ་རོབ་གྲོས་ཚོགས་ནས་བོད་དོན་དམིགས་བསལ་འབྲེལ་མཐུད་པ་ཞིག་བསྐོ་གཞག་གནང་དགོས་པ་དང་ཨ་རི་ནང་བཞིན་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་ཤིག་གཏན་འབེབས་ཡོང་ཐབས་བྱེད་དགོས་པ། གཉིས། རྒྱ་ནག་གཞུང་གིས་༸གོང་ས་མཆོག་གི་༧སྐུའི་ཡང་སྲིད་ངོས་འཛིན་བྱེད་ཕྱོགས་ལ་ཐེ་གཏོགས་བྱེད་བཞིན་པར་དགག་པ་རྒྱག་རྒྱུ་དང་། རྒྱལ་སྤྱིའི་སྲིད་གཞུང་ཁག་དང་ཚོགས་སྡེ་ཁག་ལ་༧གོང་ས་མཆོག་གི་ཡང་སྲིད་ཀྱི་གནད་དོན་ཐོག་གོ་རྟོགས་སྤེལ་རྒྱུ། གསུམ། རྒྱ་ནག་གཞུང་གིས་བོད་དང་ཡུ་གུར་སོགས་ཀྱི་འགྲོ་བ་མིའི་ཐོབ་ཐང་ལ་རྡོག་རོལ་གཏོང་བཞིན་པའི་གནས་སྟངས་གསལ་འདོན་བྱ་རྒྱུ་བཅས་རེད་འདུག

སྤྱིར་ད་ལན་གྱི་གྲོས་ཆོད་དེ་ནི། འདས་ལོའི་ཕྱི་ཟླ་ ༡༠ ནང་ནེའུ་ཌར་ལན་ཌིའི་གྲོས་ཚོགས་ཀྱི་ཕྱི་སྲིད་ལས་དོན་ཚོགས་ཆུང་གིས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ཡུལ་དེའི་ནང་ཕེབས་པ་དང་བསྟུན་ཉན་ཞིབ་ཅིག་འཚོགས་ཡོད་ཅིང་། སྐབས་དེར་སྲིད་སྐྱོང་མཆོག་གིས། རྒྱ་ནག་གཞུང་གིས་༧གོང་ས་མཆོག་གི་༧སྐུའི་ཡང་སྲིད་ཀྱི་གནད་དོན་གཙོས་བོད་ནང་དུ་དྲག་གནོན་གྱི་སྲིད་ཇུས་འདྲ་མིན་ལག་བསྟར་བྱེད་བཞིན་པའི་ཛ་དྲག་གི་གནས་སྟངས་ཞུ་གཏུག་གནང་བ་དང་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་ནས་ཞུ་སྐུལ་གནང་བ་དང་གཅིག   གཉིས་ནས་ནེའུ་ཌར་ལན་ཌིའི་ནང་ཡུ་རོབ་བོད་དང་མཉམ་དུ་ཡོད་ཅེས་པའི་འདི་ལོའི་གསུམ་བཅུ་དུས་དྲན་སྐབས། རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ལྷན་ཚོགས་ཀྱི་ཚོགས་གཙོ་རེ་ཆ་ཌི་གྷའེ་རེ་མཆོག་གི་གཙོས་སྦར་སིལ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་དང་བོད་པའི་ཚོགས་སྡེ་ཁག་གི་སྐུ་ཚབ་བཅས་ནས་ཡུལ་དེའི་གྲོས་ཚོགས་འཐུས་མི་རྣམས་དང་ལྷན་དུ་བོད་ནང་གི་ཛ་དྲག་གནས་སྟངས་སྐོར་ལ་ཞུ་གཏུག་བྱས་པའི་ཤུགས་རྐྱེན། དེ་བཞིན། ཡུལ་དེའི་གྲོས་ཚོགས་འཐུས་མིའི་མཉམ་འབྲེལ་ཚོགས་པ་ཞིག་གིས་བོད་དང་། ཡུ་གུར། ཧོང་ཀོང་། ལྷོ་སོག་མི་རིགས་བཅས་ཀྱི་ཆེད་དུ་ཕྱག་ལས་གནང་གི་ཡོད་པ་སོགས་ལ་བརྟེན་ནས་བྱུང་བ་ཞིག་ཡིན་པ་བོད་མིའི་སྒྲིག་འཛུགས་ཀྱི་དྲ་རྒྱའི་ཐོག་གསལ་འདུག

ཐེངས་འདིའི་གྲོས་ཆོད་ངོ་སྤྲོད་གནང་མཁན་གྱི་ཁྲོད་དུ། གྲོས་ཚོགས་འཐུས་མི་ཇན་པཱ་ཊར་ནོ་ཊི་  (Jan Paternotte) ལགས་དང་། ཁ་ར་མན་ (Isa Kahraman) ལགས། བྷོ་སི་ཝི་ཀི་(D.G. Boswijk) ལགས། ཌར་བྷག (E.Van der Burg) ལགས། བན་བྷེར་ལེ་ ( S.R.T. Van Baarle) ལགས། བན་ཌར་ལི (T.M.T. van der Lee) ལགས། D.G.M. Cedar ལགས། ཁུ་རེ་སི་སི་ཊོ་ཧྥར་Chris Stoffer ལགས། མཱར་ཊིན་ (Martin Oostenbrink) ལགས། ཇོའུ་ (Joi NB) ལགས། Don Ceder ལགས་བཅས་འདུག

གསར་འགོད་པ། སྐལ་བཟང་སྦྱིན་པ།