མཆོག་སྤྲུལ་ཧཱུྃ་ཀར་རྡོ་རྗེ་མཆོག་གི་སྐུ་ཕུང་ནང་མིར་རྩིས་སྤྲོད་བྱེད་དགོས་པའི་འབོད་སྐུལ་གནང་འདུག

རྒྱལ་སྤྱིའི་པེན་དང་བོད་ཀྱི་པེན་རྩོམ་པ་པོའི་མཐུན་ཚོགས། དེ་བཞིན། ཝི་ཏི་ནམ་གྱི་ཕྱི་སྡོད་པེན་རྩོམ་པ་པོ་མཐུན་ཚོགས་བཅས་ཀྱིས། ཝི་ཏི་ནམ་གཞུང་ནས་ཧཱུྃ་ཀར་རྡོ་རྗེ་རིན་པོ་ཆེ་མཆོག་སྐུ་དཀྲོངས་པའི་གནས་ཚུལ་ཁ་གསལ་བཟོས་ཏེ་སྐུ་ཕུང་ནང་མིར་རྩིས་སྤྲོད་དགོས་པའི་འབོད་སྐུལ་ཞུས་འདུག

Image provided by: SFT India, with permission from the author (anonymous)

ཟླ་འདིའི་ཕྱི་ཚེས་ ༡༦ ཉིན་རྒྱལ་སྤྱིའི་པེན་དང་བོད་ཀྱི་པེན་རྩོམ་པ་པོའི་མཐུན་ཚོགས། དེ་བཞིན། ཝི་ཏི་ནམ་གྱི་ཕྱི་སྡོད་པེན་རྩོམ་པ་པོ་མཐུན་ཚོགས་བཅས་ཀྱིས། མཆོག་སྤྲུལ་ཧཱུྃ་ཀར་རྡོ་རྗེ་མཆོག་འདས་གྲོངས་སུ་ཕྱིན་པའི་གནས་སྟངས་དེ་ནི་བློ་འཚབ་སྐྱེས་ཡུལ་ཆེན་པོ་ཞིག་ཡིན་ཁར། ཁོང་གི་དཀྲོངས་རྐྱེན་དེས་རྒྱལ་མཚམས་ལས་བརྒལ་བའི་དྲག་གནོན་གྱི་འཇིགས་སྐུལ་བྱེད་ཤུགས་ཆེ་རུ་ཕྱིན་པའི་སེམས་འཚབ་བསླངས་ཡོད། དེར་བརྟེན། ཝི་ཏི་ནམ་གཞུང་ནས་མཆོག་སྤྲུལ་ཧཱུྃ་ཀར་རྡོ་རྗེ་མཆོག་འདས་གྲོངས་སུ་ཕྱིན་པའི་གནད་དོན་ལ་ཕྱི་གསལ་ནང་གསལ་དང་རང་དབང་གི་ཐོག་ནས་ཞིབ་འཇུག་མཐིལ་ཕྱིན་པ་བྱེད་དགོས་པ་མ་ཟད། ཁོང་འཛིན་བཟུང་བྱས་པའི་བརྒྱུད་རིམ་ནང་རྒྱ་ནག་གཞུང་གིས་བྱ་སྤྱོད་ཅི་ཞིག་སྤེལ་ཡོད་མེད་སོགས་ཁ་གསལ་བཟོ་དགོས་པའི་སྐུལ་མ་བཏང་འདུག

དམིགས་བསལ་རྒྱལ་སྤྱིའི་པེན་དང་བོད་ཀྱི་པེན་རྩོམ་པ་པོའི་མཐུན་ཚོགས། དེ་བཞིན། ཝི་ཏི་ནམ་ཕྱི་སྡོད་པེན་རྩོམ་པ་པོ་མཐུན་ཚོགས་བཅས་ཀྱིས། ད་ལྟའི་ཆར་རྒྱ་ནག་གི་མགོ་ཁྲིད་ཞི་ཅིན་ཕིན་ཝི་ཏི་ནམ་དུ་ཡོང་ཡོད་པ་དང་བསྟུན། ཝི་ཏི་ནམ་གྱི་མགོ་ཁྲིད་ཚོས། སྤྲུལ་སྐུ་ཁོང་འདས་གྲོངས་སུ་གྱུར་བའི་གནས་ཚུལ་ལ་ཛ་དྲག་གི་ཐོག་ནས་རང་དབང་ལྡན་པའི་ཞིབ་འཇུག་བྱེད་དགོས་པ་དང་། ལྷག་པར་དུ་ཁོང་གི་སྐུ་ཕུང་ཕྱིར་ཁྱིམ་མིར་རྩིས་སྤྲོད་བྱེད་པར་མཐུན་འགྱུར་སྦྱོར་དགོས་པ་སོགས་ཀྱི་འབོད་སྐུལ་ཡང་གནང་འདུག

དེ་བཞིན། ཟླ་འདིའི་ཕྱི་ཚེས་ ༡༥ བོད་རང་བཙན་སློབ་ཕྲུག་ཚོགས་པས་རྒྱ་གར་གྱི་རྒྱལ་ས་ལྡི་ལི་རུ་ཝི་ཏི་ནམ་གྱི་གཞུང་ཚབ་ཁང་གི་སྒོ་འགྲམ་དུ་ཞི་བའི་སྐད་འབོད་ལས་འགུལ་ཞིག་སྤེལ་ཏེ། མཆོག་སྤྲུལ་ཧཱུྃ་ཀར་རྡོ་རྗེ་མཆོག་ཝི་ཏི་ནམ་དུ་རྒྱ་ནག་གི་གནོན་ཤུགས་འོག་སྐུ་དཀྲོངས་པའི་གནད་དོན་ཕྱི་གསལ་ནང་གསལ་བཟོ་དགོས། སྤྲུལ་སྐུ་ཁོང་སྐུ་དཀྲོངས་པར་དྲང་བདེན་གྱི་ཐག་གཅོད་ཅིན་ལེན་དགོས་སྐོར་སོགས་འབོད་སྐུལ་ཞུས་འདུག་ལ། སྐབས་དེར་རྒྱ་གར་ཉེན་རྟོག་པས་བོད་རང་བཙན་སློབ་ཕྲུག་ཚོགས་པའི་ལས་འགུལ་བ་ཁག་ཅིག་འཛིན་བཟུང་ཡང་བྱས་ཡོད་པ་རེད།

ཟླ་འདིའི་ཕྱི་ཚེས་ ༡༡ ཉིན་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་མི་ ༡༧ གྱིས་རྒྱ་གར་གྱི་རྒྱལ་ས་ལྡི་ལི་རུ་ཡོད་པའི་རྒྱ་ནག་གཞུང་ཚབ་ཁང་གི་མདུན་དུ་མཆོག་སྤྲུལ་ཧཱུྃ་ཀར་རྡོ་རྗེ་མཆོག་སྐུ་དཀྲོངས་པར་རྒྱ་ནག་གཞུང་ལ་ངོ་རྒོལ་གྱི་ལས་འགུལ་སྤེལ་ཡོད་པ་དང་། སྐབས་དེར་རྒྱ་གར་ཉེན་རྟོག་པས་ལས་འགུལ་བ་ ༡༦ འཛིན་བཟུང་བྱས་ཡོད། ཉིན་དེའི་ཕྱི་དྲོར་བོད་ཀྱི་གཞོན་ནུ་ལྷན་ཚོགས་དང་བོད་ཀྱི་བུད་མེད་ལྷན་ཚོགས། བོད་རང་བཙན་སློབ་ཕྲུག་ཚོགས་པ། བོད་རྒྱལ་ཡོངས་མང་གཙོ་ཚོགས་པ་བཅས་ཀྱི་གོ་སྒྲིག་འོག་བཞུགས་སྒར་དྷ་རམ་ས་ལའི་མེག་གྷན་ཁྲོམ་གཞུང་དུ་མར་མེ་ཁྲོམ་སྐོར་གྱི་ལས་འགུལ་ཞིག་ཀྱང་སྤེལ་ཡོད། གཞན་ཡང་། ཨོ་གླིང་དང་དབྱིན་ཡུལ། ཡུ་རོབ་དང་ཨ་རི་སོགས་སུ་གཞུང་འབྲེལ་མིན་པའི་ཚོགས་པ་ཁག་གིས་ཝི་ཏི་ནམ་དང་རྒྱ་ནག་གཞུང་ཚབ་མདུན་དུ་ངོ་རྒོལ་ལས་འགུལ་རིམ་པ་སྤེལ་ཡོད།

ཟླ་འདིའི་ཕྱི་ཚེས་ ༨ ཉིན་བོད་མིའི་སྒྲིག་འཛུགས་ཀྱིས་གསར་འགོད་གསལ་བསྒྲགས་ཤིག་བསྐྱངས་ཏེ། རྒྱལ་སྤྱིའི་སྤྱི་ཚོགས་ནས་སྤྲུལ་སྐུ་ཧཱུྃ་གར་རྡོ་རྗེ་མཆོག་གློ་བུར་དུ་སྐུ་དཀྲོངས་པར་རྒྱ་གཞུང་ལ་སྐྱོན་བརྗོད་གནང་དགོས་པ་དང་། རྒྱ་ནག་དང་ཝི་ཏི་ནམ་གྱི་དབང་འཛིན་པ་ཚོས་རིན་པོ་ཆེ་འཛིན་བཟུང་བཀག་ཉར་དང་སྐུ་དཀྲོངས་པའི་གནས་སྟངས་ཐད་གསལ་བཤད་བྱེད་དགོས་པ་མ་ཟད། སྤྲུལ་སྐུ་ཧཱུྃ་དཀར་རྡོ་རྗེ་མཆོག་གི་སྐུ་ཕུང་དེ་འཕྲལ་དུ་ལུང་སྔོན་དགོན་པར་རྩིས་སྤྲོད་བྱ་དགོས་ཤིང་། བོད་ཀྱི་སྲོལ་རྒྱུན་ལྟར་འདས་མཆོད་ཆ་ཚང་ཞིག་བྱེད་དུ་འཇུག་དགོས་པ། དེ་བཞིན་རིན་པོ་ཆེ་མཆོག་གི་ནང་མི་དང་གྲོགས་པོ། དད་ལྡན་རྗེས་འཇུག་པ་ཡོངས་ལ་ཐུགས་གསོ་ཞུ་རྒྱུ་ཡིན་སྐོར་བསྒྲགས་ཡོད། བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་ཨ་རིའི་གྲོས་ཚོགས་ཀྱི་རྒྱ་ནག་ལས་དོན་ཚོགས་ཆུང་གི་ཚོགས་གཙོ་སྐུ་ཞབས་ཇིམ་མེག་གྷ་ཝན་(Jim McGovern)མཆོག་སོགས་ཀྱིས་མཆོག་སྤྲུལ་ཧཱུྃ་ཀར་རྡོ་རྗེ་མཆོག་སྐུ་དཀྲོངས་པར་བློ་ཕམ་དང་འབྲེལ་ཝི་ཏི་ནམ་དང་རྒྱ་ནག་གཞུང་ལ་སྐྱོན་བརྗོད་གནང་ཡོད།

ཟླ་འདིའི་ཕྱི་ཚེས་ ༢ ཉིན་རྒྱ་ནག་དམར་གཞུང་གིས་མགོ་ལོག་དགའ་བདེ་རྫོང་ལུང་སྔོན་དགོན་པའི་མཁན་པོ་སོགས་གནད་ཡོད་མི་སྣ་བདུན་བརྒྱད་ཅིག་ལ་སྤྲུལ་སྐུ་ཁོང་སྐུ་དཀྲོངས་ཟིན་པའི་བརྡ་ཞིག་བཞག་ཡོད་ཀྱང་། ས་གནས་གང་དུ་སྐུ་གྲོངས་ཡོད་མེད་སོགས་ཀྱི་གནས་ཚུལ་གང་ཡང་འགྲེལ་བརྗོད་བྱས་མེད་པ་རེད་ལ། ཕྱིས་སུ་ཤེས་རྟོགས་བྱུང་གསལ་ལ། རིན་པོ་ཁོང་ཕྱི་ཟླ་ ༣ ཚེས་ ༢༨ ཉིན་ཝེ་ཏི་ནམ་གྱི་རྒྱལ་སྤྱིའི་སྨན་ཁང་(Vinmec Central Park International Hospital ) དུ་སྐུ་གྲོངས་ཡོད་སྐོར་གྱི་གནས་ཚུལ་ཐོན་ཡོད།

དེ་རྗེས། ཕྱི་ཟླ་ ༤ ཚེས་ ༡༠ ཉིན་རྒྱ་ནག་གཞུང་ཚབ་ཁང་གི་དོ་དམ་འོག་ཝེ་ཏི་ནམ་རྒྱལ་སྤྱིའི་སྨན་ཁང་(Vinmec Central Park International Hospital )དུ། ལུང་སྔོན་དགོན་པའི་སྐུ་ཚབ་དགེ་འདུན་པ་ལྔ་ལ་རིན་པོ་ཆེ་མཆོག་གི་ཞལ་རས་སྐར་མ་གཉིས་གསུམ་ཙམ་ལ་མཇལ་དུ་བཅུག་ཡོད་ཀྱང་། སྐུ་ཕུང་ཡོངས་རྫོགས་ལ་མཇལ་བཅུག་མི་འདུག་པའི་ཁར། ད་ལྟ་ད་དུང་ཡང་དགོན་པ་དང་ནང་མིར་སྐུ་ཕུང་རྩིས་སྤྲད་མེད་པ་དང་། ལུང་སྔོན་དགོན་པར་མཆོད་འབུལ་སྨོན་ལམ་དང་འདུ་འཛོམས་རིགས་བྱེད་པར་དམ་དྲག་ཤུགས་ཆེན་བྱེད་མུས་ཡིན་འདུག

སྤྲུལ་སྐུ་ཧཱུྃ་ཀར་རྡོ་རྗེ་མཆོག་ནི་བོད་ནང་སྙན་གྲགས་ཡོད་པའི་ལུང་སྔོན་དགོན་ཕྱག་འདེབས་མཁན་སྤྲུལ་སྐུ་པདྨ་གཏུམ་པོ་མཆོག་གི་སྲས་ཡིན་ཞིང་། ཕྱི་ལོ་ ༢༠༠༤ ལོར་ཁོང་གིས་མཚོ་སྔོན་ཞིང་ཆེན་གེ་སར་གཞན་ཕན་ཐེབས་རྩ་གསར་འཛུགས་གནང་སྟེ་གེ་སར་རིག་གནས་རྒྱུན་འཛིན་ཐད་ཕྱག་ལས་མང་པོ་གནང་། ཕྱི་ལོ་ ༢༠༠༧ ལོ་ནས་མགོ་ལོག་ཁུལ་སྲིད་གཞུང་དང་སློབ་གསོ་ཁང་གི་ཆོག་མཆན་ཐོབ་པ་བརྒྱུད་དགེ་སློབ་ཆིག་སྟོང་ཙམ་ཡོད་པའི་ཧཱུྃ་ཀར་རྡོ་རྗེ་མི་རིགས་ལག་རྩལ་མཐོ་འབྲིང་གསར་འཛུགས་གནང་བ་སོགས་བོད་ཁུལ་གྱི་རོང་འབྲོག་གི་བྱིས་པ་སྟོང་ཕྲག་མང་པོར་རིན་མེད་ཐོག་ཤེས་ཡོན་སློབ་སྦྱོང་གི་གོ་སྐབས་ཐོབ་སླད་སློབ་གྲྭ་ཆུང་འབྲིང་ ༡༤ ཙམ་སྔ་གཞུག་ཏུ་ཆེད་འཛུགས་གནང་ཡོད་པ་དང་། དེ་བཞིན་དགོན་པ་དང་བཤད་གྲྭ་མང་པོ་ཕྱག་བཏབ་སྟེ་བོད་ཀྱི་ཆོས་དང་རིག་གཞུང་སྐད་ཡིག་སོགས་མི་ཉམས་རྒྱུན་འཛིན་དང་ཉམས་པ་སླར་གསོའི་ཆེད་མཛད་འཕྲིན་རླབས་ཆེན་བསྐྱངས་ཡོད་པར་བརྟེན། རྒྱ་ནག་གཞུང་གིས་ཁོང་ལ་ཆབ་སྲིད་ཀྱི་སྙོན་འཛུགས་སྣ་ཚོགས་བྱས་ཡོད་འདུག

གསར་འགོད་པ། སྐལ་བཟང་སྦྱིན་པ།