ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་མཆོག་གིས་མངའ་སྡེའི་ཁོངས་ཀྱི་བཙན་བྱོལ་བོད་མི་འདུས་སྡོད་ཀྱི་ས་ཁང་རྣམས་དབུས་བོད་མིའི་ངལ་སེལ་ཚོགས་པའི་ཁོངས་སུ་མིང་བསྒྱུར་དེབ་སྐྱེལ་གང་མགྱོགས་ཐག་གཅོད་གནང་རྒྱུ་ཡིན་སྐོར་གསུངས་འདུག
ཟླ་འདིའི་ཕྱི་ཚེས་ ༡༦ ནས་ ༢༥ བར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་སིམ་ལ་བོད་མིའི་གཞིས་ཆགས་དང་། ཀུམ་རའོ་བོད་མིའི་གཞིས་ཆགས། ས་ཊོན་བོད་མིའི་གཞིས་ཆགས། ལྡི་ལི་བཅས་སུ་གཞུང་འབྲེལ་ཕྱོགས་ཕེབས་གནང་བཞིན་ཡོད་པ་ལྟར། ཁ་སང་ཕྱི་ཚེས་ ༡༧ ཉིན་གྱི་ཉིན་རྒྱབ་སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་གར་ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་སུ་ཁི་ཝིན་ཌར་སིངྒ་སུ་ཁུ་མཆོག་(Shri Sukhvinder Singh Sukhu) དང་མཇལ་འཕྲད་གནང་ཡོད་ཅིང་། སྐབས་དེར་སྲིད་སྐྱོང་མཆོག་གིས་མངའ་སྡེའི་སྤྱི་ཁྱབ་བློན་ཆེན་མཆོག་༧གོང་ས་རྒྱལ་བ་རིན་པོ་ཆེ་མཆོག་གི་༧སྐུའི་གོ་སྟོན་གྱི་མཛད་སྒོའི་ཐོག་སྐུ་མགྲོན་དུ་མགྲོན་འབོད་ཞུས་ཡོད་པ་དང་། དེ་བཞིན་མངའ་སྡེའི་ཁོངས་སུ་ཡོད་པའི་བཙན་བྱོལ་བོད་མི་འདུས་སྡོད་ཀྱི་ས་གནས་ཁག་གི་ས་ཁང་རྣམས་དབུས་བོད་མིའི་སྒྲིག་འཛུགས་ཀྱི་ངལ་སེལ་ཚོགས་པའི་ཁོངས་སུ་མིང་བསྒྱུར་དེབ་སྐྱེལ་དང་འབབ་ཁྲལ་ཁག་ཆག་ཡང་གནང་རྒྱུའི་སྐོར་རེ་སྐུལ་ཞུས་པ་ལྟར། སྤྱི་ཁྱབ་བློན་ཆེན་མཆོག་གིས་ས་ཁང་མིང་བསྒྱུར་དེབ་སྐྱེལ་གང་མགྱོགས་ཐག་གཅོད་གནང་རྒྱུའི་ཐད་ཧི་མ་ཅལ་མངའ་སྡེའི་ཤེས་རིག་བློན་ཆེན་སོགས་སུ་བཀོད་མངགས་གནང་ཚར་ཡོད་སྐོར་གསུངས་ཡོད་འདུག
དེའི་རྗེས་ས་ཁང་མིང་བསྒྱུར་ལས་གཞི་དང་འབྲེལ་བའི་ཐོག་སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་གར་ས་ཁང་མིང་བསྒྱུར་ལས་གཞིའི་སློབ་སྟོན་པ་ཨུ་ཊར་ཁན་མངའ་སྡེའི་སྤྱི་ཁྱབ་དྲུང་ཆེ་ཟུར་པ་སྐུ་ཞབས་སུ་བྷ་་ཤུ་ཀུ་མར་(Subhash Kumar)མཆོག་ལ་མཇལ་འཕྲད་ཀྱིས་བཀའ་སྡུར་ལྷུག་པོ་གནང་ཡོད་འདུག་ལ། སྐབས་དེར་ཏཱ་ལའི་བླ་མའི་དགེ་རྩ་ཚོགས་པའི་དྲུང་ཆེ་འཇམ་དཔལ་ལྷུན་གྲུབ་ལགས་དང་། བོད་མིའི་སྒྲིག་འཛུགས་ཀྱི་ནང་སྲིད་དྲུང་ཆེ་དང་དྲུང་འཕར་སོགས་མཉམ་བཅར་གནང་ཡོད་འདུག
གཞན་ཡང་། སྲིད་སྐྱོང་སྤེན་པ་ཚེ་རིང་མཆོག་གཙོས་ནང་སྲིད་དྲུང་ཆེ་དཔལ་ལྡན་དོན་གྲུབ་ལགས་དང་། ནང་སྲིད་དྲུང་འཕར་བཀྲ་ཤིས་བདེ་སྐྱིད་ལགས། སིམ་སྤྱི་བཅས་ཀྱིས་ཧི་མཱ་ཅལ་མངའ་སྡེའི་སྤྱི་ཁྱབ་དྲུང་ཆེ་སྐུ་ཞབས་པྲ་བྷོཌ་སག་སེ་ནཱ་མཆོག་ལ་མཇལ་འཕྲད་གནང་སྟེ། ཧི་མཱ་ཅལ་མངའ་སྡེའི་ཁོངས་ཀྱི་ས་གནས་བོད་མི་རྣམས་ལ་འཕྲད་བཞིན་པའི་དཀའ་ངལ་སྐོར་ལ་བཀའ་སྡུར་ལྷུག་པོ་གནང་ཡོད་འདུག
ཉིན་དེའི་སྔ་དྲོར་སྲིད་སྐྱོང་མཆོག་སིམ་ལ་ཁུལ་གྱི་རང་བཙན་གྲོང་སྡེར་གཟིགས་སྐོར་གནང་སྟེ། ཁུལ་དེའི་ས་གནས་མི་མང་གི་དཀའ་ངལ་སེལ་བའི་སྐོར་ལ་ལམ་སྟོན་གནང་ཡོད་པ་མ་ཟད། སྲིད་སྐྱོང་མཆོག་གིས་སིམ་ལར་རྟེན་གཞི་བྱས་པའི་ཇོ་ནང་མ་དགོན་རྟག་བརྟན་ཕུན་ཚོགས་ཆོས་གླིང་དུ་ཆོས་མཇལ་གནང་བ་དང་། ཇོ་ནང་མ་དགོན་ཆོས་གླིང་གི་འཛུགས་སྐྲུན་བྱེད་བཞིན་པའི་ལས་གཞི་བཅས་ལ་རྟོག་ཞིབ་གནང་འདུག དེའི་རྗེས་སངས་རྒྱས་ཆོས་གླིང་འདུས་སྡོད་ས་གནས་ཀྱི་མི་མང་དང་། རྣམ་རྒྱལ་གྲྭ་ཚང་གི་རྒན་གསོ་ཁང་བཅས་སུ་འཚམས་གཟིགས་གནང་ཡོད་འདུག
ཐེངས་འདིའི་སྲིད་སྐྱོང་མཆོག་གི་གཞུང་འབྲེལ་ཕྱོགས་ཕེབས་ནང་ཧི་མཱ་ཅལ་མངའ་སྡེའི་རྒྱལ་ས་སིམ་ལ་ཁུལ་གྱི་གནད་ཡོད་མི་སྣ་ཁག་ཅིག་ལ་མཇལ་འཕྲད་དང་། སིམ་ལ་བོད་མིའི་གཞིས་ཆགས་སུ་འཚམས་གཟིགས་གནང་རྒྱུ། དེ་བཞིན་ཕྱི་ཚེས་ ༡༩ ཉིན་ཀུམ་རའོ་བོད་མིའི་གཞིས་ཆགས་དང་། ཕྱི་ཚེས་ ༢༠ ཉིན་ས་ཊོན་བོད་མིའི་གཞིས་ཆགས་སུ་འཚམས་གཟིགས། ཕྱི་ཚེས་ ༢༡ ནས་ ༢༤ བར་ལྡི་ལིར་གནད་ཡོད་མི་སྣར་མཇལ་འཕྲད་གནང་རྒྱུ་སོགས་ཀྱི་མཛད་རིམ་ཡོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།
