བོད་མི་མང་སྤྱི་འཐུས་ལྷན་ཚོགས་ཀྱིས་སྤྲུལ་སྐུ་ཧཱུྃ་རྡོ་རྗེ་མཆོག་གི་སྐུ་ཕུང་རྩིས་སྤྲོད་དང་རང་དབང་ལྡན་པའི་ཐོག་ནས་ཞིབ་འཇུག་བྱེད་དུ་འཇུག་དགོས་པའི་རེ་སྐུལ་བསྒྲགས་གཏམ་སྤེལ་གནང་འདུག
མགོ་ལོག་དགའ་བདེ་རྫོང་ལུང་སྔོན་དགོན་པའི་ཁྲི་པ་སྤྲུལ་སྐུ་ཧཱུཾ་ཀར་རྡོ་རྗེ་མཆོག་སྐུ་གཤེགས་རྐྱེན་ལ་ཞིབ་འཇུག་དགོས་པའི་བོད་མི་མང་སྤྱི་འཐུས་ལྷན་ཚོགས་ཀྱི་བསྒྲགས་གཏམ། ༢༠༢༥།༠༤།༡༨
ཁ་སང་ཕྱི་ཚེས་ ༡ ༨ ཉིན་བོད་མི་མང་སྤྱི་འཐུས་ལྷན་ཚོགས་ཀྱིས་སྤྲུལ་སྐུ་ཧཱུྃ་ཀར་རྡོ་རྗེ་མཆོག་གི་སྐུ་ཕུང་འཕྲལ་དུ་དགོན་པར་རྩིས་སྤྲོད་ཞུ་དགོས་པ་མ་ཟད། རྒྱལ་སྤྱིའི་ཚད་གཞི་དང་མཐུན་པའི་རང་དབང་ཅན་གྱི་ཁྲིམས་དོན་སྨན་སྦྱོར་དཔྱད་ཞིབ་ཁང་ནས་གཤེགས་རྐྱེན་ཞིབ་དཔྱོད་དགོས་པའི་བསྒྲགས་གཏམ་སྤེལ་གནང་འདུག
དེ་ཡང་བོད་མི་མང་སྤྱི་འཐུས་ལྷན་ཚོགས་ཀྱི་བསྒྲགས་གཏམ་ནང་། སྤྲུལ་སྐུ་རིག་འཛིན་ཧཱུྃ་ཀར་རྡོ་རྗེ་རིན་པོ་ཆེ་མཆོག་སྐུ་གཤེགས་རྐྱེན་གྱི་གནས་ཚུལ་ཐད་ཕྱི་གསལ་ནང་གསལ་དང༌། རྒྱལ་སྤྱིའི་གཞུང་དང་རང་དབང་ཅན་གྱི་སྡེ་ཚན་ཁག་ནས་ཞིབ་དཔྱོད་ཆ་ཚང་གནང་སྟེ་གནས་སྟངས་ངོ་མ་གང་ཡིན་འཕྲལ་དུ་ཕྱིར་བསྒྲགས་དགོས་རྒྱུ། རྒྱ་ནག་དམར་གཞུང་གི་གནོན་ཤུགས་འོག་མ་ཚུད་པར་ཝི་ཐི་ནམ་རྒྱལ་ཁབ་དང་འབྲེལ་ཡོད་ཁག་ནས་སྤྲུལ་སྐུ་རིག་འཛིན་ཧཱུྃ་ཀར་རྡོ་རྗེ་རིན་པོ་ཆེ་མཆོག་གི་སྐུ་ཕུང་འཕྲལ་དུ་དགོན་པར་རྩིས་སྤྲོད་བྱས་ཏེ་རྒྱལ་སྤྱིའི་ཚད་གཞི་དང་མཐུན་པའི་རང་དབང་ཅན་གྱི་ཁྲིམས་དོན་སྨན་སྦྱོར་དཔྱད་ཞིབ་ཁང་ནས་གཤེགས་རྐྱེན་ཞིབ་དཔྱོད་གནང་དགོས། སྤྲུལ་སྐུ་རིག་འཛིན་ཧཱུྃ་ཀར་རྡོ་རྗེ་རིན་པོ་ཆེ་མཆོག་གི་སྐུ་ཕུང་ལ་ཞིབ་དཔྱོད་ཚད་ལྡན་བྱས་རྗེས་བོད་ཀྱི་ཆོས་ཕྱོགས་སྲོལ་རྒྱུན་གྱི་འདས་མཆོད་ཚད་ལྡན་ཡོང་སླད་རྒྱ་ནག་གཞུང་ནས་འགོག་རྐྱེན་མེད་པར་སྐུ་ཕུང་དགོན་པར་ངེས་པར་དུ་ཕྱིར་སྤྲད་དགོས། ཞེས་གསལ་འདུག
སྤྲུལ་སྐུ་ཧཱུྃ་ཀར་རྡོ་རྗེ་མཆོག་ནི་བོད་ནང་སྙན་གྲགས་ཡོད་པའི་ལུང་སྔོན་དགོན་ཕྱག་འདེབས་མཁན་སྤྲུལ་སྐུ་པདྨ་གཏུམ་པོ་མཆོག་གི་སྲས་ཡིན་ཞིང་། ཕྱི་ལོ་ ༢༠༠༤ ལོར་ཁོང་གིས་མཚོ་སྔོན་ཞིང་ཆེན་གེ་སར་གཞན་ཕན་ཐེབས་རྩ་གསར་འཛུགས་གནང་སྟེ་གེ་སར་རིག་གནས་རྒྱུན་འཛིན་ཐད་ཕྱག་ལས་མང་པོ་གནང་། ཕྱི་ལོ་ ༢༠༠༧ ལོ་ནས་མགོ་ལོག་ཁུལ་སྲིད་གཞུང་དང་སློབ་གསོ་ཁང་གི་ཆོག་མཆན་ཐོབ་པ་བརྒྱུད་དགེ་སློབ་ཆིག་སྟོང་ཙམ་ཡོད་པའི་ཧཱུྃ་ཀར་རྡོ་རྗེ་མི་རིགས་ལག་རྩལ་མཐོ་འབྲིང་གསར་འཛུགས་གནང་བ་སོགས་བོད་ཁུལ་གྱི་རོང་འབྲོག་གི་བྱིས་པ་སྟོང་ཕྲག་མང་པོར་རིན་མེད་ཐོག་ཤེས་ཡོན་སློབ་སྦྱོང་གི་གོ་སྐབས་ཐོབ་སླད་སློབ་གྲྭ་ཆུང་འབྲིང་ ༡༤ ཙམ་སྔ་གཞུག་ཏུ་ཆེད་འཛུགས་གནང་ཡོད་པ་དང་། དེ་བཞིན་དགོན་པ་དང་བཤད་གྲྭ་མང་པོ་ཕྱག་བཏབ་སྟེ་བོད་ཀྱི་ཆོས་དང་རིག་གཞུང་སྐད་ཡིག་སོགས་མི་ཉམས་རྒྱུན་འཛིན་དང་ཉམས་པ་སླར་གསོའི་ཆེད་མཛད་འཕྲིན་རླབས་ཆེན་བསྐྱངས་ཡོད་པར་བརྟེན། རྒྱ་ནག་གཞུང་གིས་ཁོང་ལ་ཆབ་སྲིད་ཀྱི་སྙོན་འཛུགས་སྣ་ཚོགས་བྱས་ཡོད་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།
