ཨ་རིས་དཀྱིལ་ཤར་ཡུལ་གྲུའི་ཡེ་མན་སྤྱི་མཐུན་རྒྱལ་ཁབ་ཀྱི་ནུབ་བྱང་ཁུལ་དུ་དྲག་རྒོལ་བྱས་ཏེ་མི་ ༧༤ རྐྱེན་འདས་ཕྱིན་པ་དང་མི་ ༡༧༡ ལྷག་ལ་རྨས་སྐྱོན་བཟོས་ཡོད་འདུག
དེ་རིང་བྷི་བྷི་སི་སོགས་རྒྱལ་སྤྱིའི་གསར་འགྱུར་བརྒྱུད་ལམ་ཁག་གིས་གནས་ཚུལ་སྤེལ་བ་ལྟར་ན། ཁ་སང་ཨ་རིའི་སྲིད་འཛིན་ཌོ་ནལ་ཊོམ་ཕུའི་བཀའ་ཁྱབ་འོག ཨ་རིའི་དམག་གིས་དཀྱིལ་ཤར་ཡུལ་གྲུའི་ཡེ་མན་སྤྱི་མཐུན་རྒྱལ་ཁབ་ལ་གོ་མཚོན་གྱིས་དྲག་རྒོལ་བྱས་ཏེ། མི་ ༧༤ འདས་གྲོངས་དང་མི་གྲངས་ ༡༧༡ ལ་རྨས་སྐྱོན་བཟོས། ཨ་རིའི་དྲག་རྒོལ་དེ་ནི་ཡ་མན་ནང་རྟེན་གཞི་བྱས་པའི་ཧོ་ཐའི་ (Houthi) ཁ་ཆེ་དམག་གི་སྒྲིག་འཛུགས་ལ་སྣུམ་གྱི་ཐོན་ཁུངས་ཚར་གཅོད་བྱེད་པར་དམིགས་འདུག་ལ། ཨ་རིས་དམག་དོན་སྒྲིག་འཛུགས་དེ་ནི་འཇིགས་སྐུལ་རིང་ལུགས་པའི་སྒྲིག་འཛུགས་ཤིག་ཡིན་པར་ངོས་འཛིན་བྱེད་ཀྱིན་འདུག
ཐེངས་འདིའི་དྲག་རྒོལ་ཁྲོད། ཨ་རིའི་མཁའ་དམག་གིས་མེ་ཤུགས་འཕུར་མདའ་ཚར་ ༡༤ འཕངས་ཏེ། ཧོ་ཐའི་དམག་གི་སྒྲིག་འཛུགས་ལ་སྣུམ་གྱི་ཐོན་ཁུངས་མཁོ་སྤྲོད་བྱེད་སའི་རཱ་སི་ཨེ་ཟ་ (Ras Isa) སྣུམ་གྱི་ས་ཚིགས་ལ་གཏོར་བཤིག་བཏང་ཞིང་། ཨ་རིའི་དམག་གིས། ང་ཚོས་རཱ་སི་ཨེ་ཟ་གཏོར་བཤིག་བཏང་སྟེ། ཨེ་རན་གྱིས་རྒྱབ་རྟེན་བྱས་པའི་ཧོ་ཐའི་འཇིགས་སྐུལ་དྲག་སྤྱོད་པར་སྣུམ་གྱི་ཐོན་ཁུངས་ཚར་གཅོད་དང་ཁྲིམས་འགལ་གྱིས་སྣུམ་གྱི་ཐོན་སྐྱེད་བཀོལ་སྤྱོད་བྱེད་བཞིན་པ་མཚམས་འཇོག་བྱས་ཡོད། ཅེས་བརྗོད་འདུག་ལ། ད་ཐེངས་ནི་ཨ་རིའི་སྲིད་འཛིན་ཊོམ་ཕུས་བཀའ་ཁྱབ་བཏང་བའི་ད་སྔ་བར་གྱི་དྲག་རྒོལ་ཆེས་འཇིགས་སུ་རུང་བ་དེ་ཡིན་འདུག
གནད་དོན་དེའི་ཐད་ཧོ་ཐའི་ཡིས་སྣེ་འཁྲིད་པའི་ནུབ་བྱང་ཡེ་མན་གཞུང་གིས། ཨ་རིའི་དྲག་རྒོལ་བྱེད་ཡུལ་དེ་ནི་སྤྱི་དམངས་སྣུམ་གྱི་ས་ཚིགས་ཤིག་ཡིན་པ་ལས་དམག་སྤྱོད་སྣུམ་གྱི་ས་ཚིགས་མིན་པས། ཨ་རིས་རྒྱལ་སྤྱིའི་སྒྲིག་ཁྲིམས་ལས་བརྒལ་བའི་ནག་ཉེས་བཟོས་ཡོད་ཅེས་སྐྱོན་བརྗོད་བྱས་ཡོད་ཁར། ཧོ་ཐའི་འགྲམ་རྒྱུད་ཀྱི་མཚོ་དམར་ (Red Sea) ཁུལ་དུ་གནས་ཚུལ་ཅི་ལྷག་གི་འགན་ཚང་མ་ཨ་རིས་འཁུར་དགོས་ཞེས་ཉེན་བརྡ་ཞིག་ཀྱང་བཏང་འདུག་ལ། ད་ལན་གྱི་ཨ་རིའི་དྲག་རྒོལ་དེ་ནི་ཟླ་སྔོན་མའི་ནང་ཧོ་ཐའི་དམག་གིས་མཚོ་དམར་ཁུལ་དུ་ཨི་ཟི་རལ་གྱི་གྷ་ཛའི་དམག་འཁྲུག་དང་འབྲེལ་བའི་སྐྱེལ་འདྲེན་དང་དམག་དོན་གྲུ་གཟིངས་སོགས་ལ་དྲག་རྒོལ་བྱས་པར་རྒོལ་ལན་བསློགས་པ་ཞིག་ཡིན་འདུག
ད་དུང་ཨ་རིས་ཧོ་ཐའི་དམག་གི་སྒྲིག་འཛུགས་དང་དེར་རྒྱབ་སྐྱོར་བྱེད་མཁན་ཨི་རན་གྱི་ཁ་ཆེ་ཨ་དཔོན་ཚོའི་བྱ་སྤྱོད་འཛམ་གླིང་ནང་ལྷང་ལ་བཏོན་ཏེ། འཇིགས་སྐུལ་ཚོགས་པ་དེར་ཁྲིམས་འགལ་གྱི་ཐོག་ནས་སྣུམ་མཁོ་སྤྲོད་བྱ་རྒྱུ་མཚམས་འཇོག་དང་། དམིགས་བསལ་ཧོ་ཐའི་དྲག་སྤྱོད་པར་དཔལ་འབྱོར་གྱི་ཡོང་འབབ་བཀག་འགོག་བྱ་རྒྱུ་ཡིན་སྐོར་བརྗོད་འདུག་ལ། ཨ་རིས་དྲག་རྒོལ་བྱས་པའི་བརྙན་སོགས་དྲ་ལམ་དུ་སྤེལ་བའི་ནང་། སྣུམ་གྱི་ས་ཚིགས་དེར་གས་འཐོར་ཚབས་ཆེན་བྱུང་སྟེ་མེ་སྐྱོན་ཆེན་པོ་བྱུང་བ་དང་། སྣུམ་འཁོར་སོགས་གཏོར་བཤིག་བཏང་བ་མཐོང་རྒྱུ་འདུག
ཕྱི་ཟླ་ ༣ པའི་ཟླ་དཀྱིལ་ཙམ་ནས་ཧོ་ཐའི་དམག་གིས་ཨ་རིའི་མཚོ་དམག་གྲུ་གཟིངས་ (USS Harry S Truman) དང་སྐྱེལ་འདྲེན་གྲུ་གཟིངས་སོགས་ཀྱི་སྟེང་དུ་དྲག་རྒོལ་ཐེངས་བརྒྱད་ཅུ་བྱས་ཤིང་། ཨི་ཟི་རལ་གྱི་སྟེང་དུ་དྲག་རྒོལ་ཐེངས་ ༢༦ བྱས་ཡོད་འདུག ཧོ་ཐའི་དམག་གིས་པ་ལི་སི་ཐན་ལ་རྒྱབ་སྐྱོར་བྱེད་པ་དང་ཕྱི་ལོ་ ༢༠༢༣ ལོ་ནས་ཨ་རི་དང་དབྱིན་ཡུལ། ཨི་ཟི་རལ་བཅས་ཀྱི་ཚོང་གྲུ་མང་པོ་ཞིག་ལ་དྲག་རྒོལ་བྱས་དང་བྱེད་མུས་ཡིན་པ་རེད།
ཨ་རིའི་སྲིད་འཛིན་ཟུར་བ་བྷའེ་ཌན་གྱི་སྐབས་སུ་ཡེ་མན་གྱི་གཞུང་འཛིན་ངེས་གཏན་མེད་པ་སོགས་ཀྱི་རྒྱུ་མཚན་འོག་ནས་ཧོ་ཐའི་འཇིགས་སྐུལ་དྲག་སྤྱོད་པའི་མིང་བྱང་གི་ཁོངས་ནས་ཕྱིར་བཏོན་ཡོད་ཀྱང་། ཊོམ་ཕུ་སྲིད་འཛིན་ཆགས་པ་དང་འཕྲལ་དུ་ཧོ་ཐའི་འཇིགས་སྐུལ་དྲག་སྤྱོད་པའི་ཐོ་ཁོངས་སུ་བཅུག་ཡོད་པ་མ་ཟད། ཧོ་ཐའི་དམག་གི་སྒྲིག་འཛུགས་ལ་འཇིགས་སྐུལ་ཡང་བྱས་འདུག ཧོ་ཐའི་དམག་གི་སྒྲིག་འཛུགས་ནི་འདས་པའི་ལོ་བཅུའི་ཡར་སྔོན་དུ་ཡེ་མན་གྱི་ནང་འཁྲུག་སྐབས། ཡ་མན་གྱི་ནུབ་བྱང་ས་ཁུལ་ལ་བདག་བཟུང་བྱེད་མཁན་གྱི་སྒྲིག་འཛུགས་ཤིག་ཡིན་པ་མ་ཟད། ཡེ་མན་གྱི་གཞུང་ཡང་སྒྲིག་འཛུགས་དེས་བཙན་བཟུང་བྱས་ཡོད་པས། ད་ལྟ་ཡ་མན་རྒྱལ་ཁབ་ཕྱོགས་གཉིས་སུ་གྱུར་ཏེ། ཡ་མན་གྱི་ (PLC) ཚོགས་པས་ལྷོ་ཤར་ས་ཁུལ་གྱི་བདག་དབང་བཟུང་ཡོད་འདུག
གསར་འགོད་པ། སྐལ་བཟང་སྦྱིན་པ།
