ཁྲིམས་ཞིབ་པ་རྣམ་པ་གསུམ་གྱིས་༧གོང་ས་མཆོག་ལ་མཇལ་བཅར་ཞུས།

ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་ཡེ་ཤེས་དབང་མོ་མཆོག་དང་ཁྲིམས་ཞིབ་པ་གཞན་ཟླ་བ་ཕུན་སྐྱིད་ལགས་དང་འཕགས་པ་ཚེ་རིང་ལགས་བཅས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་ལ་གསར་མཇལ་ཞུས་འདུག

བོད་མིའི་སྒྲིག་འཛུགས་ཀྱི་ཆེས་མཐོའི་ཁྲིམས་ཞིབ་པ་ཆེ་བ་ཡེ་ཤེས་དབང་མོ་མཆོག་དང་ཁྲིམས་ཞིབ་པ་གཞན་ཟླ་བ་ཕུན་སྐྱིད་ལགས་དང་འཕགས་པ་ཚེ་རིང་ལགས་བཅས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུས་ཏེ། ལས་དོན་ལམ་ལྷོངས་ཡོང་བའི་སྐྱབས་འཇུག་ཞུས་པ་ལྟར་ཐུགས་སྨོན་མཛད་ཡོད་འདུག

ཁྲིམས་ཞིབ་པ་ཆེ་བ་ཡེ་ཤེས་དབང་མོ་མཆོག་གིས། དེ་རིང་ཁྲིམས་ཞིབ་པ་གསར་པར་འདེམས་ཐོན་བྱུང་ནས་དམ་བཅའ་ཕུལ་བས་གསར་མཇལ་རང་ཡིན་ལ། སྐུ་མདུན་གྱིས་སྨོན་ལམ་བསྐྱོན་གནང་སོང་། ཞེས་དང་། ཁྲིམས་ཞིབ་པ་གཞན་ཟླ་བ་ཕུན་སྐྱིད་ལགས་ཀྱིས། ད་ལན་གྱི་མཇལ་ཁ་འདི་སྤྱི་སྲོལ་བཞིན་དམངས་གཙོའི་ཀ་བ་གསུམ་གྱི་སྡེ་ཚན་གཅིག་གི་ནང་ལས་ཀ་གསར་པ་གཉེར་ཀྱི་ཡོད་པ་སོང་ཙང་། གསར་མཇལ་བྱས་ནས་ཡར་བཅར་བ་ཡིན་ལ། སྐུ་མདུན་ལ་སྙན་ཞུ་ཞིག་ཀྱང་ཡར་ཕུལ་ཡོད་རེད། ༧གོང་ས་རྒྱལ་བ་རིན་པོ་ཆེ་མཆོག་ནས་དམིགས་བསལ་བཀའ་སློབ་གནང་མ་སོང་ཡང་། ཁྲིསམ་ཞིབ་པ་ཆེ་བས་སྙན་ཞུ་ཡར་འབུལ་སྐབས་ཐུགས་སྨོན་གནང་སོང་། ཞེས་གསུངས་བྱུང་། 

ཕྱི་ཟླ་ ༣ ཚེས་ ༢༩ ཉིན་ཏེ་སྐབས་ ༡༧ པའི་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དགུ་པའི་ལས་ཉིན་ ༡༢ སྟེང་། ཁོང་རྣམ་པ་གསུམ་མང་མོས་འདེམས་ཐོན་བྱུང་བ་ལྟར། ཕྱི་ཟླ་ ༤ ཚེས་ ༤  ཉིན་ཁྲིམས་ཞིབ་པ་ཆེ་བ་ཡེ་ཤེས་དབང་མོ་མཆོག་གིས་བོད་མི་མང་སྤྱི་འཐུས་མཁན་པོ་བསོད་ནམས་བསྟན་འཕེལ་མཆོག་གི་དྲུང་ནས་ལས་ཁུར་དམ་འབུལ་ཞུས་ཏེ། ཕྱི་ཚེས་་ ༧ ཉིན་གངས་སྐྱིད་བོད་མིའི་སྒྲིག་འཛུགས་ཀྱི་སྲིད་སྐྱོང་ཚོགས་ཁང་དུ། ཁྲིམས་ཞིབ་པ་ཆེ་བ་ཡེ་ཤེས་དབང་མོ་མཆོག་གི་དྲུང་ནས་ཁྲིམས་ཞིབ་པ་གཞན་ཟླ་བ་ཕུན་སྐྱིད་ལགས་དང་། ཁྲིམས་ཞིབ་པ་གཞན་འཕགས་པ་ཚེ་རིང་ལགས་གཉིས་ཀྱིས་ལས་ཁུར་དམ་བཅའ་ཕུལ་ཡོད། 

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།