སྤྲུལ་སྐུ་ཧཱུྃ་ཀར་རྡོ་རྗེ་མཆོག་གི་གདུང་ཐལ་བོད་ནང་འབྱོར་ཡོད་ཟེར་བ་ནི་རྒྱ་ནག་གི་སྐད་ཆ་ཡིན་སྐོར་བརྗོད་བྱུང་།

ལུང་སྔོན་དགོན་པའི་མིང་ཐོག་ནས་རྒྱ་ནག་གི་སྤྱི་ཚོགས་དྲ་ལམ་ཁག་ཏུ་སྤྲུལ་སྐུ་ཧཱུྃ་ཀར་རྡོ་རྗེ་རིན་པོ་ཆེ་མཆོག་གི་གདུང་ཐལ་ལུང་སྔོན་དགོན་པར་སྤྲད་ཡོད་པའི་གསལ་བསྒྲགས་མི་འདྲ་བ་གཉིས་སྤེལ་ཡོད་འདུག

སྤྲུལ་སྐུ་ཧཱུྃ་ཀར་རྡོ་རྗེ་མཆོག་ཝི་ཏི་ནམ་དུ་སྐུ་གྲོངས་པའི་གནས་ཚུལ་བྱུང་བའི་རྗེས་སུ། བཙན་བྱོལ་བོད་མིའི་སྒྲིག་འཛུགས་དང་བོད་ཀྱི་ཚོགས་སྡེ་ཁག་ནས་རྒྱལ་སྤྱིའི་ཚོགས་སྡེ་ཁག་དང་འབྲེལ་ཡོད་ཝི་ཏི་ནམ་གཞུང་སོགས་སུ་རིན་པོ་ཆེ་མཆོག་གི་སྐུ་ཕུང་ལ་བརྟག་དཔྱད་གཏོང་དགོས་པ་དང་། སྐུ་ཕུང་ནང་མིར་རྩིས་སྤྲོད་དགོས་པའི་དགོས་འདུན་བཏོན་ཡོད་ཀྱང་། ཟླ་འདིའི་ཕྱི་ཚེས་ ༢༠ ཉིན་རྒྱ་གཞུང་གིས་ཝི་ཏི་ནམ་དུ་སྤྲུལ་སྐུ་ཧཱུྃ་ཀར་རྡོ་རྗེ་མཆོག་གི་སྐུ་ཕུང་གསང་བའི་ཐོག་ནས་ཞུགས་འབུལ་ཞུས་པ་དང་། ཁ་སང་ཕྱི་ཚེས་ ༢༡ ཉིན་བོད་མགོ་ལོག་ལུང་སྔོན་དགོན་པའི་མིང་ཐོག་ནས་སྤྱི་ཚོགས་དྲ་ལམ་ཁག་ཏུ་རིན་པོ་ཆེ་མཆོག་གི་གདུང་ཐལ་ལུང་སྔོན་དགོན་པར་སྤྲད་ཡོད་པའི་གསལ་བསྒྲགས་མི་འདྲ་བ་གཉིས་བཀྲམ་ཡོད་འདུག

གནད་དོན་དེའི་སྐོར་ལ་འདི་གའི་གསར་འགོད་པས་ཁ་པར་བརྒྱུད། ཨ་མྱེས་རྨ་ཆེན་བོད་ཀྱི་རིག་གཞུང་ཞིབ་འཇུག་ཁང་གི་འགན་འཛིན་མཁན་པོ་འཇུ་བསྟན་སྐྱོང་ལགས་སུ། སྤྲུལ་སྐུ་ཧཱུྃ་ཀར་རྡོ་རྗེ་མཆོག་གི་གདུང་ཐལ་ལུང་སྔོན་དགོན་པ་དང་ནང་མིར་འཕྲོད་ཡོད་མེད་དྲིས་པར། ཁོང་གིས། དེའི་སྐོར་གྱི་གནས་ཚུལ་གསལ་བོ་གང་ཡང་འབྱོར་མ་སོང་། ཕྱི་ཚེས་ ༢༠ ཉིན་གྱི་ཞོགས་པའི་ཆུ་ཚོད་དང་པོའི་སྟེང་དུ་ཝི་ཏི་ནམ་གྱི་ཆོས་ཚོགས་ཤིག་ཏུ་སྤྲུལ་སྐུ་ཧཱུྃ་ཀར་རྡོ་རྗེ་རིན་པོ་ཆེ་མཆོག་གི་སྐུ་ཕུང་ཕལ་ཆེར་ཞུགས་འབུལ་ཞུས་ཚར་ཡོད་ས་རེད། ཉིན་དེའི་ཕྱི་དྲོའི་ཆུ་ཚོད་གསུམ་པ་ཡས་མས་ཙམ་ལ་བོད་མགོ་ལོག་ལུང་སྔོན་དགོན་པ་ནས་ཕེབས་པའི་དགེ་འདུན་ལྔ་ཝི་ཏི་ནམ་ནས་ཕྱིར་རང་ཡུལ་དུ་ལོག་གི་བཅུག་ཡོད་པ་ཞིག་གོ་བྱུང་། དེའི་རྗེས་སུ་དགེ་འདུན་པ་རྣམས་ཀྱི་ལག་པར་རིན་པོ་ཆེ་མཆོག་གི་གདུང་ཐལ་རག་ཡོད་མེད་ཀྱི་གནས་ཚུལ་གསལ་བོ་གང་ཡང་གོ་མ་བྱུང་། རྒྱ་ནག་གཞུང་གིས་རིན་པོ་ཆེ་མཆོག་གི་སྐོར་ལ་གསལ་བསྒྲགས་གཉིས་སྤེལ་ཡོད་ཅིང་། གསལ་བསྒྲགས་གཉིས་ཀ་ཡང་གཅིག་མཚུངས་རེད་མི་འདུག ཤོག་བུ་སྐྱ་བོ་ཞིག་གི་སྟེང་དུ་གསལ་བསྒྲགས་སྤེལ་ཏེ་ལུང་སྔོན་དགོན་པའི་ཐམ་ཀ་བརྒྱབ་འདུག གསལ་བསྒྲགས་དེ་དག་དངོས་གནས་ཡིན་མིན་གསལ་བོ་ཧ་གོ་ཡི་མི་འདུག དེའི་རྗེས་སུ་ལུང་སྔོན་དགོན་པའི་ལས་ཤོག་གི་སྟེང་དུ་གསལ་བསྒྲགས་ཤིག་སྤེལ་འདུག དེའི་ཐོག་ནས་ཀྱང་ཝི་ཏི་ནམ་ནས་དགེ་འདུན་པ་ལྔ་ལུང་སྔོན་དགོན་པར་འབྱོར་ཡོད་མེད་དང་། རིན་པོ་ཆེ་མཆོག་གི་གདུང་ཐལ་རག་ཡོད་མེད་གསལ་ཁ་གང་ཡང་མི་འདུག དེ་བས་གནས་ཚུལ་ཏག་ཏག་ཡིན་མིན་བཤད་ཚོད་ཐིག་གི་མི་འདུག གསལ་བསྒྲགས་དེ་དག་གི་ནང་དུ་རྒྱ་ནག་གཞུང་གི་བཀའ་དྲིན་དང་རོགས་པ་བྱས་ཡོད་ཚུལ་སོགས་རྒྱ་གཞུང་གི་སྐད་ཆ་རང་རེད། རིན་པོ་ཆེ་མཆོག་གི་གདུང་ཐལ་འབྱོར་ཡོད་པའི་ཡིད་སྟོན་ཁེལ་བའི་གནས་ཚུལ་གང་ཡང་རག་མ་སོང་།  ཅེས་འགྲེལ་བརྗོད་གནང་བྱུང་།

རྒྱ་ནག་གཞུང་གིས་རིན་པོ་ཆེ་མཆོག་གི་གདུང་ཐལ་ལུང་སྔོན་དགོན་པར་རྩིས་སྤྲད་ཡོད་སྐོར་བསྒྲགས་ཡོད་ཀྱང་། གལ་སྲིད་གདུང་ཐལ་ཞིག་ལུང་སྔོན་དགོན་པར་སྤྲད་ཡོད་ཚེ། དེ་ལ་དགོན་པ་དང་ནང་མིས་ཡིད་ཆེས་བྱེད་སྲིད་མིན་སྐོར་ལ་ཁོང་གིས། ཡིད་ཆེས་བྱ་རྒྱུ་ཁག་པོ་རེད། མཚན་མོའི་ཆུ་ཚོད་བཅུ་གཉིས་ཙམ་ལ་ཝི་ཏི་ནམ་གྱི་སྨན་ཁང་ནས་རིན་པོ་ཆེ་མཆོག་གི་སྐུ་ཕུང་ཞུགས་འབུལ་བྱེད་སར་འཁྱེར་སྐབས། ལུང་སྔོན་དགོན་པའི་དགེ་འདུན་པ་རྣམས་བཀག་ཉར་བྱས་ཏེ་གཅིག་ཀྱང་དེར་འགྲོ་རུ་བཅུག་མི་འདུག  ཆུ་ཚོད་དང་པོ་ཙམ་ལ་རིན་པོ་ཆེའི་སྐུ་ཕུང་ཞུགས་འབུལ་ཞུས་འདུག ལུང་སྔོན་དགོན་པའི་དགེ་འདུན་པ་ལྔས་གང་ཡང་མཐོང་མེད་པས་ཡིད་ཆེས་བྱ་རྒྱུ་ཧ་ཅང་ཁག་པོ་རེད། གལ་སྲིད་ཁོང་ཚོའི་འགྲམ་དུ་སྐུ་ཕུང་ཞིག་འཁྱེར་ཡོང་ཚེ། དེ་རིན་པོ་ཆེ་མཆོག་གི་སྐུ་ཕུང་ཡིན་མིན་དོགས་པ་ཆེན་པོ་རེད། དེའི་སྐོར་གྱི་གནས་ཚུལ་ཁུངས་གསལ་གང་ཡང་ཧ་གོ་ཡི་མི་འདུག དགེ་འདུན་པ་ལྔ་དང་འབྲེལ་ཡོད་ཀྱི་སྐད་ཆ་གང་ཡང་རག་མ་བྱུང་།  ལུང་སྔོན་དགོན་པའི་མིང་ཐོག་ནས་གསལ་བསྒྲགས་གཉིས་སྤེལ་ཡོད་པ་མཐུན་གྱི་མི་འདུག དེ་གཉིས་ཀྱི་ཡིག་གཟུགས་དང་ཤོག་བུ་ཡང་གཅིག་པ་མ་རེད། གསལ་བསྒྲགས་མ་འདྲ་བ་དེ་གཉིས་ལས་གང་ཞིག་དངོས་གནས་ཡིན་མིན་ཤེས་ཀྱི་མི་འདུག རྒྱ་ནག་གཞུང་གིས་བསམ་བཞིན་དུ་གང་བྱུང་ང་ཚོར་དོགས་པ་སྐྱེ་བའི་ཆེད་དུ་གསལ་བསྒྲགས་སྤེལ་བཞིན་ཡོད་པ་འདྲ། གསལ་བསྒྲགས་དེ་དག་ལ་ཡིན་རྟོན་གང་ཡང་མི་འདུག འབྲེལ་ཡོད་ཀྱི་གནས་ཚུལ་གསར་བ་གང་ཡང་གོ་ཡི་མི་འདུག གཅིག་བྱས་ན་ཉིན་འགའི་རྗེས་སུ་གནས་ཚུལ་གོ་སྲིད་པ་རེད་ལ། གཅིག་བྱས་ན་རྦད་དེ་གནས་ཚུལ་གོ་མི་སྲིད་པ་ཞིག་རེད། དེ་ང་ཚོས་བཤད་ཚོད་ཐིག་གི་མི་འདུག ཅེས་འགྲེལ་བརྗོད་གནང་བྱུང་།

རིན་པོ་ཆེ་མཆོག་གི་གྲོངས་རྐྱེན་གསལ་བོ་ཆགས་པར་ཐབས་ལམ་གང་དག་ཡོད་མེད་ཐད་ཁོང་གིས། རིན་པོ་ཆེ་མཆོག་གི་སྐུ་གྲོངས་རྐྱེན་གསལ་བོ་ཆགས་པར་ཐབས་ལམ་ཡོད་བསམ་གྱི་འདུག ཝི་ཏི་ནམ་དུ་རིན་པོ་ཆེ་མཆོག་བཀག་ཉར་བྱས་པའི་རིང་མི་ཁ་ཤས་མཉམ་དུ་ཡོད་པ་རེད། ད་ལྟའི་ཆར་དངོས་ཡོད་གནས་ཚུལ་མཐོང་མཁན་གྱི་མི་དེ་དག་ལས་གཅིག་ཀྱང་ཕྱི་ལོགས་སུ་ཐོན་ཡོད་པ་མ་རེད། གཙོ་བོ་མི་དེ་དག་གིས་རིན་པོ་ཆེ་མཆོག་གི་སྐུ་ཕུང་བདག་པོ་རྒྱག་སྟངས་དང་། སྐུ་ཕུང་ཞུགས་འབུལ་ཞུ་སྟངས། སྐུ་ཕུང་མི་ལ་བསྟན་སྟངས་ཐད་ཞིབ་འཇུག་བྱ་དགོས། ང་ཚོས་མགྱོགས་པོ་གནས་ཚུལ་གསལ་བོ་བཟོ་མི་ཐུབ་ནའང་རིམ་བཞིན་མི་དེ་དག་ལ་འབྲེལ་བ་བྱས་ཏེ། རིན་པོ་ཆེ་མཆོག་རྒྱུན་ལྡན་མིན་པའི་ཐོག་ནས་དགོངས་པ་རྫོགས་པར་ར་སྤྲོད་བྱ་ཐུབ་ཀྱི་རེད་བསམ་གྱི་འདུག ཅེས་འགྲེལ་བརྗོད་གནང་བྱུང་།

དེ་བཞིན་རྒྱལ་སྤྱིའི་བོད་དོན་འབྲེལ་མཐུད་ཁང་གི་འབྲེལ་མཐུད་པ་བློ་བཟང་དབྱངས་མཚོ་ལགས་ཀྱིས། འདི་ནི་རྒྱ་ནག་གཞུང་གི་རྒྱལ་མཚམས་ལས་བརྒལ་བའི་གཉའ་གནོན་ཞིག་ཆགས་ཀྱི་ཡོད་དུས།  རྒྱལ་སྤྱིའི་བོད་དོན་འབྲེལ་མཐུད་ཁང་གིས་འཛམ་གླིང་མཉམ་འབྲེལ་རྒྱལ་ཚོགས་དང་། རྒྱལ་སྤྱིའི་རང་དབང་ལྡན་པའི་ཚོགས་པ་ཁག རྒྱལ་ཁབ་ཁག་གི་གཞུང་ཚབ་ཁང་བཅས་སུ་འབྲེལ་བ་ཞུས་ཏེ། སྤྲུལ་སྐུ་ཧཱུྃ་ཀར་རྡོ་རྗེ་མཆོག་གི་གྲོངས་རྐྱེན་ཐད་གསལ་ཁ་བཟོ་བའི་ཞུ་གཏུགས་བྱེད་བཞིན་ཡོད། ཅེས་འགྲེལ་བརྗོད་གནང་བྱུང་།

གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།