དྲག་སྤྱོད་པས་ཇ་མུ་དང་ཀ་ཤི་མིར་ནང་དམར་གསོད་དོན་རྐྱེན་བཟོས།

རྒྱ་གར་བྱང་རྒྱུད་ཀྱི་ཇ་མུ་དང་ཀ་ཤི་མིར་མངའ་སྡེའི་པཱ་ཧལ་གྷམ་ས་ཁུལ་དུ་དྲག་སྤྱོད་རིང་ལུགས་པའི་འཇབ་རྒོལ་བྱས་ཏེ་ད་བར་མི་གྲངས་ ༢༦ རྐྱེས་འདས་དང་མི་གྲངས་ ༡༠ རྨས་སྐྱོན་ཕོག་འདུག

དེ་རིང་རྒྱ་གར་གྱི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཁ་སང་ཕྱི་ཚེས་ ༢༢ ཉིན་རྒྱ་གར་བྱང་རྒྱུད་ཀྱི་ཇ་མུ་དང་ཀ་ཤི་མིར་མངའ་སྡེའི་པཱ་ཧལ་གྷམ( Pahalgam )ཁུལ་དུ་མེ་མདའ་བཟུང་བའི་དྲག་སྤྱོད་པ་ཁག་ཅིག་གིས་འཇབ་རྒོལ་བྱས་ཏེ། མི་གྲངས་ ༢༦ རྐྱེས་འདས་དང་། ད་བར་ཉུང་མཐར་མི་གྲངས་ ༡༠ ལྷག་ལ་རྨས་སྐྱོན་ཚབས་ཆེན་ཐེབས་ཡོད་འདུག་ལ། ཡུལ་དངོས་ཀྱི་མི་ཚོས་དྲག་སྤྱོད་པ་བཞི་ནས་དྲུག་བར་ཡོད་ཅིང་ཁོ་ཚོའི་ལུས་ལ་དམག་ཆས་ལྟ་བུའི་འགྲིག་ཆས་གྱོན་ཡོད་སྐོར་བརྗོད་འདུག་ལ། ཡུལ་དངོས་ནས་བསད་པའི་དྲག་སྤྱོད་པ་གཅིག་པཱ་ཀི་སི་ཐན་ནང་ཡོད་པའི་ཨའེ་ཨེ་སི་དྲག་སྤྱོད་ཚོགས་པ་དང་ལག་འབྲེལ་ཡིན་པའི་ཚོད་དཔག་བྱེད་བཞིན་འདུག

གནད་དོན་དེའི་ཐད་སྲིད་བློན་མུ་དྷི་མཆོག་གིས། གདུག་རྩུབ་ཅན་གྱི་བྱ་ངན་འདིའི་རྒྱབ་ཏུ་ཡོད་མཁན་ཚོ་ཁྲིམས་ཐོག་ནས་ཐག་གཅོད་ནན་མོ་བྱ་རྒྱུ་ཡིན། ཞེས་གསུངས་ཡོད་པ་མ་ཟད།  རྒྱ་གར་དབུས་ནང་སྲིད་བློན་ཆེན་ཨ་མིཏ་ཤཱ་(Amit Shah ) མཆོག་དང་ལྷན་ཞལ་པར་བརྒྱུད། དོན་རྐྱེན་དེའི་ཐད་གདོང་ལེན་དང་མྱུར་སྐྱོབ་སོགས་ཀྱི་ལས་དོན་ལ་སྔར་ལས་ལྷག་པའི་འཐུས་སྒོ་ཚང་བ་དགོས་སྐོར་སོགས་གསུངས་ཡོད་འདུག་ལ། དེ་བཞིན་ཇ་མུ་དང་ཀ་ཤི་མིར་གྱི་སྤྱི་ཁྱབ་བློན་ཆེན་ཨོ་མར་ཨ་བྷུ་ལཱ་( Omar Abullah ) ལགས་ཀྱིས། འདི་ནི་ཉེ་བའི་ལོ་ཤས་རིང་ང་ཚོས་མཐོང་བའི་དམངས་ཚོགས་ལ་དམིགས་པའི་འཇབ་རྒོལ་ཆེ་ཤོས་དེ་ཡིན། ཞེས་གསུངས་འདུག

དེ་བཞིན་རྒྱ་གར་གྱི་སྲིད་འཛིན་ལྕམ་སྐུ་ཌོར་བྷ་ཌི་མུ་མར་(Droupadi Murmu) མཆོག་གིས། ཇ་མུ་དང་ཀ་ཤི་མིར་གྱི་པ་ཧལ་གྷམ་དུ་ཡུལ་སྐོར་བ་ཚོར་འཇིགས་སྐུལ་རྒོལ་རྡུང་བྱས་པ་ནི། ཧ་ཅང་ཡིད་སྐྱོ་བ་དགོས་པའི་གནད་དོན་ཞིག་རེད། ང་ཚོས་མི་སྤྱོད་ལས་འདས་པའི་དྲག་རྒོལ་དེ་དག་ལ་མཐའ་གཅིག་ཏུ་སྐྱོན་བརྗོད་བྱ་དགོས། ཞེས་དང་། ངས་འདས་པོ་རྣམས་ཀྱི་ཤུལ་ལུས་ནང་མི་རྣམས་ལ་ཐུགས་གསོ་དང་། རྨས་སྐྱོན་ཕོག་མཁན་རྣམས་གང་མགྱོགས་དྲག་སྐྱེད་ཡོང་བའི་སྨོན་ལམ་འདེབས།  ཞེས་གསུངས་འདུག

ད་ལྟ་རྒྱ་གར་དབུས་གཞུང་གིས་ཡུལ་སྐོར་བ་ཧ་ཅང་མང་བའི་ས་ཁུལ་དེར་འགོག་སྲུང་དང་། དྲག་སྤྱོད་རིང་ལུགས་པའི་འཇབ་རྒོལ་ལ་དོགས་གཟོན་ནན་མོ་བྱེད་མུས་ཡིན་འདུག་ལ། པ་ཧལ་གྷམ་ནི་ལོ་ལྟར་དབྱར་དུས་སོགས་རྒྱ་གར་གཙོས་ཡུལ་སྐོར་སྤྲོ་འཆམ་པ་རྒྱུན་མ་ཆད་པའི་ཡུལ་སྐོར་བའི་ས་ཚིགས་གལ་ཆེན་ཞིག་ཡིན་ཞིང་། ད་ལན་ཕྱི་ལོ་ ༢༠༡༩ རྗེས་སུ་ཇ་མུ་དང་ཀ་ཤི་མིར་དུ་དྲག་སྤྱོད་པས་འཇབ་རྒོལ་བྱས་པ་ཐེངས་དང་པོ་ཡིན་འདུག

ཕྱི་ལོ་༢༠༡༦ ཟླ་ ༩ ཚེས་ ༡༨ ཉིན་དྲག་སྤྱོད་པ་བཞི་ཡིས་ཇ་མུ་དང་ཀ་ཤི་མིར་གྱི་ཨུ་རིའི་(Uri) གྲོང་བརྡལ་དུ་ཆགས་པའི་རྒྱ་གར་གྱི་དམག་སྒར་ཞིག་ལ་འཇབ་རྒོལ་བྱས་ཏེ་དམག་མི་བཅུ་དགུ་བསད་པ་དང་དམག་མི་སུམ་ཅུ་ལ་རྨས་སྐྱོན་བྱུང་། ཕྱི་ལོ་ ༢༠༡༧ ཟླ་ ༧ ཚེས་ ༡༠ ཉིན་ཀུལ་གྷམ་( Kulgam ) ས་གནས་ཀྱི་སྤྱི་སྤྱོད་རླངས་འཁོར་ཞིག་ལ་འཇབ་རྒོལ་བྱས་ཏེ་མི་ ༨ བསད། དེ་བཞིན་ཕྱི་ལོ ༢༠༡༩ ཟླ་ ༢ ཚེས་ ༡༤ ཉིན་ཇ་མུ་དང་སི་རི་ན་གྷར་སྐྱོད་པའི་གཞུང་ལམ་ཞིག་ཏུ་རྒྱ་གར་གྱི་བདེ་སྲུང་རླངས་འཁོར་ཞིག་ལ་གཏོར་རྒོལ་བྱས་ཏེ། རྒྱ་གར་གྱི་དམག་མི་བཞི་བཅུ་བསད་པའི་ཛ་དྲག་དོན་རྐྱེན་བྱུང་ཡོད་པ་རེད།

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།