བོད་ནང་དང་ཤར་ཊུ་ཀི་སི་ཐན་སོགས་སུ་རྒྱ་ནག་དམར་ཤོག་ཚོགས་པའི་དྲུང་ཆེ་གཞོན་པ་ཞིག་ལ་ཚེ་བཙོན་གྱི་བཙོན་འཇུག་ཁྲིམས་ཐག་བཅད་འདུག
དེ་འབྲེལ་ཧྲན་ཞི་ཞིང་ཆེན་པོ་ཇི་གྲོང་ཁྱེར་མི་དམངས་འབྲིང་རིམ་ཁྲིམས་ཁང་གིས། ལི་ཕིང་ཞིན་གྱིས་ཕྱི་ལོ་ ༡༩༩༩ ནས་ ༢༠༢༣ བར་གཞུང་གི་གོ་གནས་ཁག་སྤྱད་དེ་དམིགས་བསལ་དངུལ་འབོར་ཆེན་གསོག་སྒྲུབ་བྱས་ཡོད། ཁོས་གོ་གནས་ཀྱི་སྟབས་བདེར་བསྟུན་ནས་གཏེར་ཁ་སྔོག་འདོན་དང་། ཚོང་ལས་དང་ལས་བྱེད་བསྐོ་གཞག་སོགས་དང་འབྲེལ་བའི་ཚོགས་པ་དང་མི་སྒེར་གྱི་ལག་ནས་ལྐོག་རྔན་བླངས་ཏེ་རོགས་རམ་བྱས་ཡོད། ཅེས་བསྒྲགས་ཡོད་འདུག
རྒྱ་ནག་གཞུང་འབྲེལ་གྱི་སི་སི་ཊུབ་གསར་འགྱུར་ལ་གཞིགས་ན། ལི་ཕིང་ཞིན་གྱིས་སྤྱི་ཚོགས་ཐོག་བཞག་པའི་ཤུགས་རྐྱེན་ཧ་ཅང་ངན་པ་ཡིན་པས། ཁོའི་ནག་ཉེས་ནི་དེ་བས་ཀྱང་ལྕི་མོ་ཡིན་པ་དང་། ཡང་ཁོས་ནག་ཉེས་ངོས་ལེན་བྱས་པ་དང་འདྲི་རྩད་གཅོད་སྐབས་ཞིབ་བཤེར་བ་དག་ལ་མཉམ་འབྲེལ་བྱས་པའི་རྐྱེན་གྱིས། སྲོག་ཐོག་ཉེས་ཆད་ཕར་འགྱངས་བྱས་ཡོད་ཀྱང་། ཚེ་བཙོན་གྱི་ཁྲིམས་ཐག་ལ་ཆག་ཡང་ཁྱོན་ནས་གཏོང་རྒྱུ་མིན་པ་རེད། ཕྱི་ལོ་ ༢༠༢༣ ལོར་ལིར་དབུས་སྒྲིག་ཁྲིམས་ཞིབ་བཤེར་ལས་ཁུངས་ཀྱིས་ཐོག་མར་ཞིབ་བཤེར་བྱེད་མགོ་བཙུགས་ཡོད་འདུག
ལི་ཕིང་ཞིན་ཕྱི་ལོ་ ༡༩༦༠ ལོར་སྐྱེས་ཤིང་། ཕྱི་ལོ་ ༡༩༩༩ ནས་ ༢༠༢༣ བར་མཚོ་ནུབ་སོག་རིགས་བོད་རིགས་རང་སྐྱོང་ཁུལ་ཨུ་ཡོན་ལྷན་ཁང་གི་དྲུང་ཆེ་གཞོན་པ་དང་དྲུང་ཆེ། ན་གོར་མོ་གྲོང་ཁྱེར་གྱི་དམར་ཤོག་ཚོགས་པའི་དྲུང་ཆེ། མཚོ་སྔོན་ཞིང་ཆེན་དམར་ཤོག་ཚོགས་པའི་རྒྱུན་ལས་ལྷན་ཁང་གི་འཐུས་མི་དང་ནང་སོག་རང་སྐྱོང་ལྗོངས་དམར་ཤོག་ཚོགས་པའི་རྒྱུན་ལས་ལྷན་ཁང་གི་འཐུས་མི། དེ་བཞིན། འཛུགས་སྐྲུན་ལས་ཁུངས་ཀྱི་དྲུང་ཆེ་དང་ཡུ་གུར་རང་སྐྱོང་ལྗོངས་ཀྱི་དམར་ཤོག་དྲུང་ཆེ་གཞོན་པ། མཚོ་སྔོན་ཞིང་ཆེན་གྱི་ཞིང་ཆེན་རིམ་པའི་ལས་བྱེད་གཞོན་པ་སོགས་ཀྱི་གོ་གནས་བཟུང་། བརྒྱུད་རིམ་དེའི་ཁྲོད་ཁོས་རྒྱ་སྒོར་ས་ཡ་ ༨༢༢ ཀྱི་ལྐོག་རྔན་བླངས་ཡོད་འདུག
གསར་འགོད་པ། སྐལ་བཟང་སྦྱིན་པ།
