འཇར་མན་གྱི་རོགས་ཚོགས་ཤིག་གིས་མཇལ་བཅར་ཞུས།

བཞུགས་སྒར་རྒྱལ་བའི་ཕོ་བྲང་དུ་འཇར་མན་གྱི་རོགས་ཚོགས་ (Friedrich Naumann Foundation for Freedom South Asia) ཀྱི་འཐུས་མི་ཁག་ཅིག་དང་། ཝེ་ཐི་ནམ་རིགས་ལམ་སློབ་གཉེར་ཁང་གི་སློབ་མ་གྲངས་ ༦༠ གཙོས་དད་ལྡན་མི་ཚོགས་གྲངས་ ༥༣༠ ཙམ་གྱིས་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུས་སོང་།

འཇར་མན་གྱི་རོགས་ཚོགས་(Friedrich Naumann Foundation for Freedom South Asia) གསར་འཛུགས་གནང་མཁན་དང་ཨོ་སི་ཊོ་རི་ཡའི་གྲོས་ཚོགས་འཐུས་མི་སྐུ་ཞབས་ཝེ་ཡེ་དྷེང་ལིར་(Veit Dengler) ལགས་ཀྱིས་འདི་ག་བོད་ཀྱི་དུས་བབ་གསར་ཁང་གི་གསར་འགོད་པར། ༧གོང་ས་རྒྱལ་བ་རིན་པོ་ཆེ་མཆོག་ནི་འཛམ་གླིང་ཞི་བདེ་འདོད་མཁན་གྱི་ཆོས་ཀྱི་དེད་དཔོན་ཞིག་རེད། མགོན་པོ་གང་ཉིད་ཀྱིས་གསུངས་པ་བཞིན་ཁོང་ཉིད་དགུང་ལོ་ ༡༡༣ ལྷག་བཞུགས་རྒྱུའི་སྨོན་ལམ་འདེབས་ཀྱིན་ཡོད། མཇལ་ཁ་ཞུ་སྐབས་༧གོང་ས་རྒྱལ་བ་རིན་པ་ཆེ་མཆོག་ནས་དམིགས་བསལ་བཀའ་སློབ་སྩལ་མ་སོང་། ཞེས་དང་། ད་ལན་གྱི་ཕྱོགས་སྐྱོད་འདི་དང་བསྟུན་སྲིད་སྐྱོང་དང་བཀའ་བློན་རྣམས་ཀྱིས་དབུས་བོད་མིའི་སྒྲིག་འཛུགས་ཀྱི་མཛད་གཙོ་རྣམས་དང་མཇལ་འཕྲད་བྱས་ཏེ་སྟེ་བོད་མིའི་དཀའ་ངལ་དང་། བཙན་བྱོལ་བོད་མིའི་གནས་བབ། བོད་ཀྱི་རིག་གཞུང་སོགས་ལ་རྒྱུས་ལོན་བྱ་རྒྱུ་ཡིན། ཞེས་བརྗོད་བྱུང་།

དེ་བཞིན་རོགས་ཚོགས་དེའི་ཚོགས་མི་དང་ཡུ་རོབ་རང་དབང་དམངས་གཙོ་ཚོགས་པའི་(FDP) ཕྱི་སྲིད་མགྲིན་ཚབ་པ་ལྕམ་ཨེ་ལི་ན་(Alena FInk-Trauschek MdL) ལགས་ཀྱིས་འདི་གའི་གསར་འགོད་པར། ༧གོང་ས་རྒྱལ་བ་རིན་པོ་ཆེ་མཆོག་ནས་བརྒྱུད་པའི་ལོ་རྒྱུས་ཀྱི་གནད་དོན་དག་ཤེས་ནས། དེ་རིང་དངོས་སུ་ཁོང་ཉིད་མཇལ་སྐབས་སྔར་མེད་ཀྱི་ཚོར་སྣང་དམིགས་གསལ་ཞིག་དང་སེམས་འགུལ་ཐེབས་སོང་། སླད་མར་༧མགོན་པོ་གང་ཉིད་ལ་སྐུ་བགེགས་གང་ཡང་མེད་པའི་སྨོན་ལམ་བཏབ་ཡོད་སྐོར་དང་། ངས་ད་ལན་༧གོང་ས་རྒྱལ་བ་རིན་པོ་ཆེ་མཆོག་ནས་སྐུ་ལས་ཚད་མེད་བསྐྱོན་ནས་འཛམ་གླིང་ཞི་བདེ་བསྐྲུན་ཐབས་གནང་བར་བཀའ་དྲིན་ཧ་ཅང་ཆེན་པོ་ཡིན་སྟབས། ངས་གོ་སྐབས་འདི་བརྒྱུད་ནས་མགོན་པོ་གང་ཉིད་ལ་ཐུགས་རྗེ་ཆེ་ཞུ་ན་འདོད། ཅེས་བརྗོད་བྱུང་།

ཟླ་འདིའི་ཕྱི་ཚེས་ ༢༧ ནས་ལྷོ་ཨེ་ཤ་ཡའི་འཇར་མན་གྱི་རོགས་ཚོགས་(Friedrich Naumann Foundation for Freedom South Asia) ཡི་སྐུ་ཚབ་ཚོགས་ཆུང་གིས་བཞུགས་སྒར་དྷ་རམ་ས་ལར་ཆེད་ཕེབས་ཀྱིས། དབུས་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པར་མཇལ་འཕྲད་དང་། བཙན་བྱོལ་བོད་མིའི་གནས་སྟངས་དང་། བོད་ཀྱི་ཐུན་མོང་མ་ཡིན་པའི་རིག་གཞུང་བཅས་ཀྱི་ཐད་ལ་རྒྱུས་ལོན་གནང་བཞིན་ཡོད་འདུག

ཕྱི་ལོ་ ༢༠༢༣ ལོར་བོད་མིའི་འཇར་མན་རོགས་ཚོགས་ (Friedrich Naumann Foundation for Freedom) ཀྱི་སྐུ་ཚབ་ཚོགས་ཆུང་ཡུ་རོབ་གྲོས་ཚོགས་འཐུས་མི་ཁག་ཅིག་བཞུགས་སྒར་དུ་གསུམ་བཅུའི་དུས་དྲན་གྱི་མཛད་སྒོར་མཉམ་ཞུགས་གནང་ཡོད་པ་མ་ཟད།  ཉིན་རྒྱབ་ཕྱི་དྲིལ་ལྷག་པ་ཚེ་རིང་ཚོགས་ཁང་དུ་གྲོས་ཚོགས་འཐུས་མི་དྲུག་ལས་གྲུབ་པའི་སྐུ་ཚབ་ཚོགས་ཆུང་དེས། བོད་དོན་རྒྱབ་སྐྱོར་དང་བོད་མིར་གདུང་སེམས་མཉམ་སྐྱེད་མཚོན་ཆེད་གསར་འགོད་གསལ་བསྒྲགས་ཤིག་ཀྱང་གནང་ཡོད་པ་རེད།

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།