ད་ལྟའི་ཆར་བོད་ནང་དུ་མིས་བཟོས་དབྱར་རྩྭ་དགུན་འབུ་བཙོང་མཁན་ཇེ་མང་འགྲོ་བཞིན་པའི་གནས་སྟངས་འོག བོད་མིའི་དབྱར་རྩྭའི་ཁྲོམ་རྭར་གཏོར་བརླག་དང་འཚོ་གནས་ལ་གྱོང་གུད་ཆེན་པོ་ཐེབས་ཀྱིན་ཡོད་འདུག
ལོ་རེའི་ཕྱི་ཟླ་ ༤ ཟླ་མཇུག་ཙམ་ནས་ཕྱི་ཟླ་ ༦ པའི་བར་ཟླ་གཅིག་ལྷག་གི་རིང་ལ་བོད་ནང་དུ་དབྱར་རྩྭ་དགུན་འབུ་རྐོ་བའི་དུས་ཚིགས་ཡིན་ཞིང་། དབྱར་རྩྭ་དགུན་འབུ་ནི་བོད་ནང་གི་རོང་འབྲོག་མང་ཚོགས་ཀྱི་ལོ་རེའི་འཚོ་བའི་ཡོང་འབབ་ཆེ་ཤོས་ཤིག་ཏུ་གྱུར་ཡོད་པ་ལྟར། བོད་ནང་གི་མཚོ་སྔོན་དང་ཀན་ལྷོ། སི་ཁྲོན་སོགས་བོད་ཀྱི་ས་ཁུལ་མང་དག་ཅིག་ཏུ་དབྱར་རྩྭ་དགུན་འབུ་བརྐོ་མགོ་བཙུགས་མ་ཐག་པའི་སྐབས་འདིར། ད་ལྟ་རྒྱ་རིགས་མང་པོ་ཞིག་གིས། མིང་ལ་བཀྲ་ཤིས་དང་སྒྲོལ་མ་ཟེར་བ་སོགས་བོད་མིང་འཁྱེར་ནས་མིས་བཟོས་འདེབས་འཛུགས་བྱས་པའི་དབྱར་རྩྭ་དགུན་འབུ་བཙོང་མགོ་བཙུགས་ཡོད་པར་བརྟེན། དེས་བོད་མིའི་དབྱར་རྩྭའི་ཁྲོམ་རྭར་གཏོར་བརླག་དང་འཚོ་གནས་ལ་གྱོང་གུད་ཆེན་པོ་སྤྲོད་ཀྱི་ཡོད་སྟབས། ད་ལྟ་བོད་ནང་གི་བོད་མི་མང་པོ་ཞིག་གིས། རྒྱ་མི་ཚོས་བོད་ཀྱི་དབྱར་རྩྭའི་མིང་འོག་ནས་དབྱར་རྩྭ་རྫུན་མ་བཙོང་བ་ནི་མགོ་གཡོག་མགོ་སྐོར་གྱི་བྱ་བ་ཡིན་པས། བོད་མི་ཚང་མ་རྡོག་རྩ་གཅིག་སྒྲིལ་བྱས་ཏེ་རྒྱའི་མིས་བཟོས་དབྱར་རྩྭའི་གནད་དོན་ཞུ་གཏུགས་བྱེད་དགོས་པ་དང་དབྱར་རྩྭ་རྫུན་མའི་ཁྲོམ་རྭ་ཇེ་ཆུང་དུ་གཏོང་ཐབས་བྱེད་དགོས་པའི་འབོད་སྐུལ་ཞུ་བཞིན་འདུག
ད་ལྟ་བོད་ནང་གི་བོད་མི་མང་པོ་ཞིག་སྤྱི་ཚོགས་བརྒྱུད་ལམ་ཁག་ཏུ་ཐོན་ཏེ། རྒྱའི་མིས་བཟོས་དབྱར་རྩྭའི་གནད་དོན་གླེང་སློང་གནང་བཞིན་པའི་ཁྲོད་ཀྱི་བོད་མི་ཞིག་གིས། རྒྱ་མི་ཚོས་བོད་མིང་གི་ཐོག་ནས་མཚོ་སྔོན་དང་ཡུལ་ཤུལ། ནག་ཆུ་སོགས་ས་བབ་མཐོ་སའི་བོད་ཀྱི་དབྱར་རྩྭ་དགུན་འབུ་ཡིན་ཁུལ་བརྗོད་ནས་དབྱར་རྩྭ་རྫུན་མའི་ཚོང་རྒྱག་གི་ཡོད་ཅིང་། དེ་ནི་ལུག་མགོ་བཀལ་ནས་ཁྱི་ཤ་བཙོང་བ་དང་ཁྱད་རྩ་བ་ནས་མེད། འོན་ཀྱང་། རྒྱ་མི་དེ་ཚོས་གཱང་ཏུང་དང་ཟི་ལིང་སོགས་ན་ཁྲིམས་མཐུན་དེབ་སྐྱེལ་བྱས་པའི་དབྱར་རྩྭ་དགུན་འབུའི་བཟོ་གྲྭ་ཆེན་པོ་བཙུགས་ཡོད་སྟབས། ཁོ་ཚོའི་ཚོང་སྒོ་རྒྱག་ཐབས་མེད། འོན་ཀྱང་། དབྱར་རྩྭ་བཙོང་ནའང་བཟོ་གྲྭས་འདེབས་འཛུགས་བྱས་པའི་མིས་བཟོས་དབྱར་རྩྭ་ཡིན་པ་ཕྱི་གསལ་བཟོས་ཏེ་བཙོང་དགོས་པ་ལས། བོད་ཀྱི་དབྱར་རྩྭ་ཡིན་ཚུལ་གྱིས་ཚོང་བརྒྱབ་ན་ཁྲིམས་འགལ་ཡིན་པས། དེའི་རིགས་ཞུ་གཏུགས་བྱས་ཏེ་བཀག་འགོག་བྱེད་དགོས་སྐོར་བརྗོད་འདུག་ལ། བོད་མི་ཁག་ཅིག་དངོས་སུ་མིས་བཟོས་དབྱར་རྩ་འདེབས་འཛུགས་བྱེད་སའི་བཟོ་གྲྭའི་སྒོ་འགྲམ་དུ་ཕྱིན་ནས་བོད་མིའི་དབྱར་རྩྭའི་ཁྲོམ་རྭར་གཏོར་བརླག་མ་གཏོང་ཞེས་སེམས་ཚོར་ཆེན་པོས་འབོད་ཚིག་སྒྲོག་མཁན་ཡང་མཐོང་རྒྱུ་འདུག
ད་ལྟ་རྒྱ་ནག་གི་བཟོ་གྲྭ་ཁག་གིས་འདེབས་འཛུགས་བྱེད་བཞིན་པའི་དབྱར་རྩྭ་དགུན་འབུ་ནི། ཀུ་ཤུ་ཁ་པར་ནང་བཞིན་ལོ་རེར་དབྱར་རྩྭ་ཐོན་གསར་འདེབས་འཛུགས་བྱེད་བཞིན་ཡོད་ཅིང་། ད་སྔ་བར་མིས་བཟོས་དབྱར་རྩའི་ཐོན་རིམ་བདུན་པའི་བར་བསླེབས་ཡོད་པ་དང་། རྒྱ་ནག་གི་གྲོང་ཁྱེར་ཁག་ཏུ་བྲིན་རྒྱུག་ཆེ་ཁར། དབྱར་རྩྭ་དེ་བོད་པའི་སྤྱི་ཚོགས་ནང་ཚོང་བསྒྱུར་བྱེད་བཞིན་པ་དེས་རྩོད་གླེང་སྣ་ཚོགས་བཟོ་བཞིན་ཡོད་པ་རེད་ལ། བོད་མི་ཚོས་མིས་བཟོས་དབྱར་རྩྭའི་ཕན་ནུས་ཞན་ཞིང་བོད་ཀྱི་དབྱར་རྩྭ་དང་བསྡུར་ན་གནམ་སའི་ཁྱད་པར་ཡོད་སྐོར་ཡང་རྗོད་ཀྱིན་འདུག
འདི་གའི་གསར་འགོད་པར་བོད་མི་ཞིག་གིས། རྒྱ་ནག་གཞུང་གིས་དབྱར་རྩ་དགུན་འབུ་རྫུན་མ་བཙོང་མཁན་དག་ལ་དམ་དྲག་གི་སྲིད་ཇུས་མེད་ཁར། ཁོ་ཚོར་དྲ་ལམ་དུ་ཡོངས་གྲགས་ཀྱི་ཐོག་ནས་ཚོང་རྒྱག་ཆོག་པའི་རང་དབང་སྤྲོད་ཀྱིན་ཡོད་མོད། བོད་མི་དབྱར་རྩ་དགུན་འབུའི་ཚོང་རྒྱག་མཁན་དག་ལ་དྲ་ལམ་ནས་སྟངས་འཛིན་བྱས་ཏེ་ཚོང་གི་དྲིལ་བསྒྲགས་སོགས་ནག་བསུབ་ཏུ་གཏོང་གི་ཡོད་པ་དང་། དམིགས་བསལ་རྒྱའི་མིའི་བཟོས་དབྱར་རྩའི་སྐོར་ལ་སྐད་ཆ་བཤད་མཁན་བོད་མི་རྣམས་ཀྱི་དྲ་བྱང་གཏན་འགོག་བྱེད་པ་སོགས་འདྲ་མཉམ་མིན་པའི་གནས་སྟངས་ཀྱང་བྱུང་དང་འབྱུང་མུས་ཡིན་སྐོར་བརྗོད་བྱུང་།
དེ་རིང་འདི་གའི་གསར་འགོད་པར་འབྱོར་བའི་གནས་ཚུལ་ལྟར་ན། སྟེང་ཆེན་རྫོང་གིས་ཕྱི་ནས་ཡོང་བའི་དབྱར་རྩ་དགུན་འབུ་བརྐོ་མཁན་ ༡༦ ངོས་འཛིན་རྩད་གཅོད་བྱུང་སྟེ་འཛིན་བཟུང་བྱས་ཡོད་འདུག ཀན་ལྷོ་ཁུལ་མདོ་ལ་རྫོང་ཁྲིམས་ཁང་གིས། མ་མོ་རྒྱལ་ཞུ་བའི་བོད་རིགས་ཤིག་གིས། ཀྲུང་ཧཱ་མི་རིགས་སྤྱི་མཐུན་རྒྱལ་ཁབ་ཀྱི་རི་སྐྱེས་རྩི་ཤིང་སྲུང་སྐྱོང་སྲོལ་ཡིག་ཟེར་བའི་རིམ་པ་གཉིས་པའི་ཁོངས་གཏོགས་མདོ་ལ་རི་རྒྱུད་ཀྱི་དབྱར་རྩྭ་དགུན་འབུ་ ༥༦༣༢ ཁྲིམས་འགལ་ངང་ཉོ་ཚོང་བྱས་པའི་ཉེས་མིང་འོག་ནས་མ་མོ་རྒྱལ་ལ་ལོ་གཅིག་དང་ཕྱེད་ཀའི་བཙོན་འཇུག་ཁྲིམས་ཐག་དང་ལོ་གཉིས་རིང་ཆབ་སྲིད་སློབ་གསོ་ཟེར་བ་བརྒྱུད་དགོས་པ། ད་དུང་རྒྱ་སྒོར་དྲུག་སྟོང་གི་ཉེས་ཆད་དང་རྒྱ་སྒོར་ ༡༨༠༢༢༤ རིན་འབབ་ཡིན་པའི་དབྱར་རྩྭ་ཡོངས་རྫོགས་གཞུང་བཞེས་བཏང་ཡོད་འདུག
གནད་དོན་འདིའི་སྐོར་ལ་བོད་གནས་ལྟ་ཞིབ་ཁང་གི་ཉམས་ཞིབ་པ་པདྨ་རྒྱལ་ལགས་ཀྱིས། རྒྱ་ནག་གཞུང་གིས་ཕྱུག་ཟོག་དང་རྩྭ་ས་དོ་སྙོམས། སྐྱེས་ཁམས་ཁོར་ཡུག་སྲུང་སྐྱོབ་ཟེར་བ་སོགས་སྲིད་ཇུས་འདྲ་མིན་ལག་བསྟར་གྱི་འོག་ནས་མི་མང་ལ་དབང་བའི་རྩྭ་སའི་བདག་དབང་གི་ཐོབ་ཐང་འཕྲོག་ཐབས་དང་། དེ་བཞིན། དབྱར་རྩྭ་ལ་སོགས་པའི་བོད་ཀྱི་རང་བྱུང་ཐོན་ཁུངས་ཀྱི་བདག་དབང་འཕྲོག་སྟེ། གཞན་བརྟེན་མི་དགོས་པའི་བོད་མིའི་སྲོལ་རྒྱུན་གྱི་འཚོ་གནས་ལ་བསྒྱུར་བཅོས་ཀྱིས། རིམ་བཞིན་བོད་མི་ཚོ་རྒྱ་ནག་གཞུང་ལ་མི་བརྟེན་ཀ་མེད་ཆགས་ཐབས་བཟོ་བཞིན་ཡོད་ཅེས་བརྗོད་བྱུང་།
དེ་བཞིན། དབྱར་རྩྭ་དགུན་འབུ་རྐོ་བའི་གནད་དོན་དང་འབྲེལ་ནས། ཟླ་འདིའི་ནང་བོད་མཚོ་སྔོན་གྱི་མགོ་ལོག་ཁུལ་དར་ལག་རྫོང་དང་བྲག་དཀར་རྫོང་། ཁྲི་འདུ་རྫོང་། དེ་བཞིན་ནག་ཆུ་དང་ཡུལ་ཤུལ་ཁུལ་སོགས་ཀྱིས་ས་གནས་གཞན་གྱི་མི་རྫོང་ཁོངས་དེ་དག་གི་ནང་དབྱར་རྩྭ་བརྐོ་བར་ཡོང་མི་ཆོག་པའི་གསལ་བསྒྲགས་སྤེལ་འདུག་པ་དང་། གསལ་བསྒྲགས་ནང་དུ་ཕྱི་མིས་དབྱར་རྩྭ་བརྐོ་རྒྱུ་བཀག་འགོག་བྱ་རྒྱུ་དང་། ཕྱི་མིར་དབྱར་རྩྭ་རྐོ་བཅུག་ཚེ་ཞིབ་བཤེར་གྱིས་ཐག་གཅོད་ནན་མོ་བྱ་རྒྱུ། གྲོང་རྡལ་དང་སྡེ་བ། ལས་ཁུངས། མི་སྒེར་བཅས་ལ་དབྱར་རྩྭ་རྐོ་བའི་གྲོས་མཐུན་འཇོག་པའི་དབང་ཆ་མེད་པ། དབྱར་རྩྭ་རྐོ་བའི་བཀག་སྡོམ་ལ་ཆ་འཇོག་མི་བྱེད་པར་ཁྲིམས་འགལ་གྱིས་དབྱར་རྩྭ་བརྐོ་མཁན་ལ་རྡུང་རྡེག་ནན་མོ་བྱ་རྒྱུ་ཡིན་སྐོར་སོགས་བརྗོད་འདུག་ལ། དབྱར་རྩ་རྐོ་བའི་སྐབས་སུ་ས་གནས་རང་གི་མི་མང་ནས་དབྱར་རྩྭའི་ཆོག་མཆན་ལག་འཁྱེར་ལག་ཏུ་འཛིན་དགོས་སྐོར་བརྗོད་འདུག
ད་ལྟ་བོད་ཁུལ་གྱི་ཞིང་འབྲོག་མང་ཚོགས་ཀྱིས་ནངས་སྔ་ལངས་དང་དགོང་ཕྱི་ཉལ་གྱིས་དབྱར་རྩྭ་དགུན་འབུ་རྐོ་བའི་ལས་ལ་བྲེལ་བཞིན་ཡོད་ཅིང་། ད་ལོའི་དབྱར་རྩྭ་དགུན་འབུའི་གོང་ཚད་མར་ཆག་སྲིད་པར་སེམས་འཚབ་བྱེད་མཁན་མང་པོ་འདུག་ལ། བོད་ཁུལ་དུ་ལོ་རེ་བཞིན་དབྱར་རྩྭ་དགུན་འབུ་བརྐོ་མཁན་ཇེ་མང་དང་དབྱར་རྩྭ་དགུན་འབུ་མང་བའི་ས་ཁུལ་ཁག་ཏུ་དཀའ་རྙོག་མང་པོ་བྱུང་གི་ཡོད་སྟབས། དབྱར་རྩྭ་དགུན་འབུ་རྐོ་ཚོང་དང་འབྲེལ་བའི་སྒྲིག་གཞི་བཟོས་ཡོད་པ་དཔེར་ན། ས་གནས་འགའ་རེ་ནས་སྤྱི་སྙོམ་ཡོང་ཆེད་ཉིན་བརྒྱ་དུས་གཅིག་ལ་དབྱར་རྩྭ་རྐོ་མགོ་འཛུགས་པ་སོགས་ཡོད་འདུག
གསར་འགོད་པ། སྐལ་བཟང་སྦྱིན་པ།
