བོད་ཀྱི་ཆབ་སྲིད་བཙོན་པ་རྡོ་རྗེ་བཀྲ་ཤིས་ལགས་ཀྱི་ནང་མིས་ཁྲིམས་མཐུན་གྱིས་རྡོ་རྗེ་བཀྲ་ཤིས་ལགས་སུ་ཐུག་ཐུབ་པའི་ཞུ་ཡིག་སྤྲད་དེ་ཐོག་མར་ཐུག་ཆོག་པའི་སྐད་ཆ་བྱུང་ཡོད་ཀྱང་། ཕྱིས་སུ་རྡོ་རྗེ་བཀྲ་ཤིས་ཀྱིས་བཙོན་ཁང་དུ་སྒྲིག་འགལ་བྱས་ཡོད་པར་ཁ་གཡར་ནས་ཐུག་གི་བཅུག་མི་འདུག
བོད་ཀྱི་ཆབ་སྲིད་བཙོན་པ་རྡོ་རྗེ་བཀྲ་ཤིས་ལགས་སུ་ཐུག་འཕྲད་ཡོང་ཐབས་སུ། ཁོང་གི་གཅེན་མོ་མགོན་པོ་སྐྱིད་ལགས་དང་གཅེན་པོ་རྡོ་རྗེ་ཚེ་བརྟན་ལགས་གཉིས་ནས་ཁྲིམས་རྩོད་པ་བརྒྱུད་ཁྲིམས་སྒྲིག་གི་བྱ་རིམ་ཆ་ཚང་བསྒྲུབས་ཏེ། འདི་ལོའི་ཕྱི་ཟླ་ ༤ ནང་རྡོ་རྗེ་ཚེ་བརྟན་དང་ནང་མི་ཁག་ཅིག་ཁྲིམས་རྩོད་པ་དང་ལྷན་དུ་བཙོན་ཁང་དུ་ཕྱིན་སྐབས། གྲྭ་བཞི་བཙོན་ཁང་དོ་དམ་ཁང་གི་འབྲེལ་ཡོད་མི་སྣས། རྡོ་རྗེ་བཀྲ་ཤིས་ལགས་ཀྱིས་བཙོན་ཁང་ནང་ནས་སྒྲིག་འགལ་གྱི་བྱ་སྤྱོད་སྤེལ་ཡོད་པས་ཁྲིམས་རྩོད་པ་དང་ནང་མིར་ཐུག་ཆོག་གི་མེད་པའི་ཉེས་ཆད་བཏང་སྐོར་བརྗོད་ནས། རྡོ་རྗེ་བཀྲ་ཤིས་ལགས་སུ་ཐུག་འཕྲད་བྱེད་དུ་བཅུག་མེད་པ་རེད།
ཕྱི་ཟླ་ ༤ ཚེས་ ༢༩ ཉིན་གནད་དོན་དེའི་སྐོར་ལ་རྡོ་རྗེ་བཀྲ་ཤིས་ལགས་ཀྱི་གཅེན་པོ་རྡོ་རྗེ་ཚེ་བརྟན་ལགས་ཀྱིས། ང་ཚོས་ཁྲིམས་ལུགས་ལྟར་རྡོ་རྗེ་བཀྲ་ཤིས་ལ་ཐུག་ཆོག་པའི་ཆོག་མཆན་ཞུས་ཡོད་ཀྱང་། བཙོན་ཁང་གི་ངོས་ནས་རྡོ་རྗེ་བཀྲ་ཤིས་ཀྱིས་སྒྲིག་འགལ་བྱས་ཚུལ་བརྗོད་ནས་ཐུག་གི་མ་བཅུག་པ་ནི་ཁ་གཡར་ས་ཡིན་པ་མ་ཟད། ཁྲིམས་འགལ་ཡང་ཡིན། ཞེས་བརྗོད་འདུག་ལ། གྲྭ་བཞི་བཙོན་ཁང་གི་དོ་དམ་པ་ཚོས་དེ་སྔོན་ནས་རྒྱུ་མཚན་འདྲ་མིན་དྲངས་ཏེ་རྡོ་རྗེ་བཀྲ་ཤིས་ལགས་སུ་ཐུག་གི་འཇུག་གི་མེད་པ་རེད།
རྡོ་རྗེ་བཀྲ་ཤིས་ལགས་སུ་ཐུག་ཐབས་སུ། ཁོང་གི་ནང་མིས་ཕྱི་ལོ་ ༢༠༡༩ ཟླ་ ༡༢ ཚེས་ ༢༣ ཉིན་ཐོག་དང་པོར་སྙན་ཞུ་སྤྲད་ནས་ད་སྔ་བར་ལོ་ངོ་དྲུག་རིང་སྙན་ཞུ་མཚམས་ཆད་མེད་དུ་སྤྲད་ཡོད་ཀྱང་། བོད་རང་སྐྱོང་ལྗོངས་ཟེར་བའི་གྲྭ་བཞི་བཙོན་ཁང་གི་དོ་དམ་འབྲེལ་ཡོད་ལས་བྱེད་ཚོས་ཁ་གཡར་ས་འདྲ་མིན་ལ་བསྙད་བཏགས་ནས་རྡོ་རྗེ་བཀྲ་ཤིས་ལུགས་སུ་ཐུག་གི་བཅུག་མེད་པ་རེད་ལ། རྡོ་རྗེ་བཀྲ་ཤིས་འཛིན་བཟུང་བྱས་པ་ནས་ཁོང་གི་གཅེན་པོ་རྡོ་རྗེ་ཚེ་བརྟན་དང་གཅེན་མོ་མགོན་པོ་སྐྱིད། ད་དུང་མགོན་པོ་སྐྱིད་ཀྱི་བཟའ་ཟླ་ཆོས་སྐྱོང་སོགས་ཀྱིས་ཁྲིམས་གཏུགས་དང་ཞི་རྒོལ་ལས་འགུལ་རིམ་པ་སྤེལ་ནའང་། རྒྱ་ནག་གཞུང་གིས་རྡོ་རྗེ་བཀྲ་ཤིས་ལ་བཅད་པའི་དྲང་བདེན་མིན་པའི་ཐག་གཅོད་ལ་འགྱུར་བ་གང་ཡང་བཏང་མེད་ཁར། རྡོ་རྗེ་ཚེ་བརྟན་དང་མགོན་པོ་སྐྱིད། ཆོས་སྐྱོང་གསུམ་ལྷ་སའི་ཉེན་རྟོག་པས་རྡུང་རྡེག་དང་འཛིན་བཟུང་སོགས་བྱས་མྱོང་ཡོད་པ་རེད།
རྡོ་རྗེ་བཀྲ་ཤིས་ལགས་ནི་ལྷ་སའི་གཡག་མགྲོན་ཁང་གི་སྦྱིན་བདག་ཡིན་ཞིང་། ཕྱི་ལོ་ ༢༠༠༨ ལོའི་ས་བྱི་ཞི་རྒོལ་ཆེན་མོ་བྱུང་བའི་ཟླ་བ་འགའི་རྗེས་སུ་རྒྱ་ནག་གཞུང་གིས་ངོ་རྒོལ་བར་མཐུན་འགྱུར་བསྐྲུན་པ་དང་༧གོང་ས་རྒྱལ་བ་རིན་པོ་ཆེ་མཆོག་ལ་སྐྱབས་རྟེན་ཕུལ་ཡོད་ལུགས་སོགས་བརྗོད་དེ་འཛིན་བཟུང་བྱས་ནས་ཟླ་ ༨ ཙམ་རིང་གར་སོང་ཆ་མེད་དུ་གྱུར་ཡོད་པ་དང་། ཁོང་གི་ཕུ་བོ་རྡོ་རྗེ་ཚེ་བརྟན་ལགས་ཀྱང་འཛིན་བཟུང་བྱས་ནས་ལོ་གཉིས་ཙམ་རིང་བཀག་ཉར་བྱས་རྗེས། ཕྱི་ལོ་ ༢༠༡༠ ཟླ་ ༥ ཚེས་ ༡༧ ཉིན་ལྷ་ས་འབྲིང་རིམ་མི་མང་ཁྲིམས་ཁང་ཟེར་བ་དེས་ཁུངས་སྐྱེལ་ར་སྤྲོད་གང་ཡང་མེད་པར་གསང་བའི་ཐོག་ནས་རྒྱ་སྒོར་ཁྲི་ ༡༥༠ ཙམ་གྱི་དངུལ་བུན་གཡོ་ལེན་བྱས་ཚུལ་བརྗོད་དེ། རྡོ་རྗེ་བཀྲ་ཤིས་ལགས་ལ་ཚེ་བཙོན་དང་། ཁོང་གི་ཕུ་བོ་རྡོ་རྗེ་ཚེ་བརྟན་ལགས་ལ་ལོ་དྲུག་གི་ཁྲིམས་ཐག་བཅད་དེ། བོད་རང་སྐྱོང་ལྗོངས་ཟེར་བའི་བཙོན་ཁང་ཆེ་ཤོས་དང་རྒྱལ་ཁབ་ཀྱི་བདེ་འཇགས་ལ་གནོད་འཚེ་བཏང་བ་ཟེར་བའི་ཉེས་མིང་ཕོག་པའི་བཙོན་པ་བཅུག་སའི་གྲྭ་བཞི་བཙོན་ཁང་དུ་བཅུག་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
