རྒྱ་ནག་ལྷོ་ནུབ་རྒྱུད་ཀྱི་ཀོ་ཀྲུས་ཞིང་ཆེན་ཆིན་ཤི་གྲོང་ཁྱེར་གྱི་གཙང་པོའི་ཁུལ་དུ་མཚོ་གྲུ་བཞི་ཆུའི་ནང་ཁ་སྦུབས་ནས་ནུབ་སྟེ་མི་གྲངས་ ༡༠ རྐྱེན་འདས་དང་། མི་གྲངས་ ༧༠ ལྷག་ལ་རྨས་སྐྱོན་ཕོག
An aerial drone photo of the rescue operation in Qianxi City in southwest China’s Guizhou Province on May 4, 2025. Photo:Xinhua/Shutterstock
ཟླ་འདིའི་ཕྱི་ཚེས་ ༤ ཉིན་རྒྱ་ནག་ལྷོ་ནུབ་རྒྱུད་ཀྱི་ཀོ་ཀྲུས་(Guizhou) ཞིང་ཆེན་གྱི་ཆིན་ཤི་( Qianxi ) གྲོང་ཁྱེར་གྱི་གཙང་པོར་མཚོ་རླུང་དང་གནམ་གཤིས་འགྱུར་ལྡོག་གི་དབང་གིས་མཚོ་གྲུ་བཞི་ཆུའི་ནང་ཁ་སྦུབས་ནས་ནུབ་སྟེ། མི་གྲངས་ ༨༤ ཆུའི་ནང་ལྷུང་ཡོད་པའི་ཁྲོད། ཉུང་མཐར་མི་གྲངས་ ༡༠ རྐྱེན་འདས་དང་། མི་གྲངས་ ༧༠ ལྷག་ལ་རྨས་སྐྱོན་ཕོག་ནས་སྨན་ཁང་དུ་བསྐྱལ་ཡོད་ཅིང་། ད་ལྟའང་རྐྱེན་འདས་སུ་གྱུར་བའི་མི་གཅིག་གི་ཕུང་པོ་ལག་སོན་བྱུང་མེད་པ་རེད།
གནད་དོན་དེའི་ཐད་རྒྱ་ནག་གི་མགོ་ཁྲིད་ཞི་ཅིན་ཕིན་གྱིས། ང་ཚོས་ཚད་མཐོ་བོའི་ཐོག་ནས་མྱུར་སྐྱོབ་དང་ཕུང་པོ་འཚོལ་ཞིབ་ཀྱི་ལས་དོན་ལ་གཞོལ་དགོས་པའི་སྐུལ་མ་བྱས་ཡོད། ཉེ་ལམ་འདི་དང་འདྲ་བའི་དོན་རྐྱེན་ཁག་ཅིག་འབྱུང་གི་འདུག་པས། ཚང་མས་བདེ་འཇགས་ཀྱི་ཆེད་སྐྱོབ་ཐག་རིགས་གདག་རྒྱུ་གལ་ཆེན་པོ་རེད། ཅེས་བཤད་འདུག་ལ། དེ་བཞིན་རྒྱ་ནག་གཞུང་འབྲེལ་གྱིས་རྒྱ་ནག་གི་ཡུལ་སྐོར་བའི་ས་ཚིགས་ཁག་ཏུ་རྩེད་རིགས་དང་སྤྲོ་འཆམ་གྱི་ལས་ལ་འཇུག་སྐབས། ངེས་པར་དུ་ཉེན་སྲུང་དང་བདེ་འཇགས་ཀྱི་ལས་དོན་རྣམས་གཉེར་དགོས་པའི་ནན་སྐུལ་བྱས་འདུག
ཕྱི་ཚེས་ ༤ ཉིན་དོན་རྐྱེན་འབྱུང་སའི་ཡུལ་དངོས་སུ་གློ་བུར་དུ་གནམ་གཤིས་འགྱུར་ལྡོག་བྱུང་ནས་དྲག་ཆར་བབས་པ་དང་མཚོ་ངོས་སུ་སྨུག་པ་འཐིབས་ཡོད་ཅིང་། རྒྱ་ནག་གི་གནམ་དཔྱད་ཚན་པས་(China Meteorological Administration ) ཉིན་དེར་རྒྱ་ནག་གི་ལྷོ་རྒྱུད་དང་ལྷོ་ནུབ་ཁུལ་དུ་དྲག་ཆར་ཤུགས་ཆེན་འབབ་ཉེན་ཡོད་པས་ཉེན་སྲུང་བྱ་དགོས་པའི་སྔོན་བརྡའང་བཏང་ཡོད་འདུག རྒྱ་ནག་གཞུང་གིས་དོན་རྐྱེན་འབྱུང་སྐབས། ཉེན་རྟོག་པ་དང་མེ་གསོད་རུ་ཁག དེ་བཞིན་སྨན་པ་སོགས་ཚུད་པའི་མི་གྲངས་ ༥༠༠ ལྷག་ཆེད་གཏོང་བྱས་ཏེ། མྱུར་སྐྱོབ་ཀྱི་ལས་དོན་ལ་གཞོལ་ཡོད་སྐོར་སོགས་བསྒྲགས་འདུག
དེ་བཞིན་འདས་ལོའི་ཕྱི་ཟླ་ ༡༢ ནང་རྒྱ་ནག་ལྷོ་ནུབ་རྒྱུད་ཀྱི་ཀོ་ཀྲུས་ཞིང་ཆེན་གྱི་མཚོ་གླིང་ཁུལ་དུ། མཚོ་རླབས་རྒྱས་པ་དང་གནམ་གཤིས་འགྱུར་ལྡོག་ལ་བརྟེན་ནས། མཚོ་གྲུ་ཁ་སྦུབས་ནས་ཆུར་ནུབ་སྟེ། མི་གྲངས་ ༨ རྐྱེན་འདས་སུ་གྱུར་བའི་དོན་རྐྱེན་བྱུང་ཡོད་པའི་མུར། ཟླ་འདིའི་ཕྱི་ཚེས་ ༢ ཉིན་རྒྱ་ནག་གི་ཝུ་གྲོང་(Wuzhong) རྫོང་ཁུལ་དུ་ཐད་འཕུར་གནམ་གྲུ་ཞིག་ལ་དོན་རྐྱེན་བྱུང་ནས་མི་གཅིག་རྐྱེན་འདས་དང་བཞི་ལ་རྨས་སྐྱོན་ཕོག་ཡོད་པ་རེད།
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
