ཞི་ཅིན་ཕིན་དང་པུ་ཊིན་གཉིས་དངོས་སུ་ཐུག་འཕྲད་བྱས།

ཞི་ཅིན་ཕིན་དང་པུ་ཊིན་གཉིས་ཐུག་འཕྲད་བྱས་ཏེ་མཉམ་འབྲེལ་རྒྱལ་ཚོགས་ཀྱི་འགན་དབང་དང་གནས་བབ་སོགས་གླེང་སློང་གིས་རྒྱལ་ཁབ་གཉིས་ཀྱི་མངོན་འདོད་དང་ཐོབ་ཐང་སྲུང་སྐྱོབ་བྱ་རྒྱུ་ཡིན་ཟེར།

Russian President Vladimir Putin shakes hands with his Chinese counterpart Xi Jinping during a welcoming ceremony before their talks at the Kremlin in Moscow, Russia, May 8, 2025. REUTERS/Evgenia Novozhenina

སང་ཉིན་ཏེ། ཕྱི་ཟླ་ ༥ ཚེས་ ༩ ཉིན་ཨུ་རུ་སུར་འཛམ་གླིང་དམག་ཆེན་གཉིས་པའི་ཁྲོད་འཇར་མན་སོགས་ཀྱི་འོག་ནས་རྒྱལ་ཁ་ཐོབ་སྟེ་ལོ་ངོ་ ༨༠ འཁོར་བའི་ཉིན་མོ་ཡིན་པ་དང་བསྟུན། འཛམ་གླིང་རྒྱལ་ཁབ་ཁ་ཤས་ཀྱི་མགོ་ཁྲིད་ཨུ་རུ་སུར་སྐྱོད་མུས་ཡིན་པ་ལྟར། ཟླ་འདིའི་ཕྱི་ཚེས་ ༧ ཉིན་རྒྱ་ནག་གི་སྲིད་འཛིན་ཞི་ཕིན་ཨུ་རུ་སུའི་ནང་རྒྱལ་སྲིད་ཐུག་འཕྲད་ཀྱི་ངོ་བོར་འབྱོར་ཡོད་ཅིང་། དེ་རིང་ཞི་ཅིན་ཕིན་དང་པུ་ཊིན་གཉིས་དངོས་སུ་ཐུག་སྟེ། ཨ་རི་དང་ཡུ་རོབ་མཐུན་ཚོགས་སོགས་ཀྱི་ཚོང་འབྲེལ་དཔྱ་ཁྲལ་ལ་ཁ་གཏད་གཅོག་ཐབས་སུ། རྒྱ་ནག་དང་ཨུ་རུ་སུའི་ཚོང་སྲིད་དམག་གསུམ་གྱི་མཉམ་འབྲེལ་གྱི་ནུས་པ་གོང་མཐོར་བཏང་སྟེ། དུས་སྐབས་གསར་པ་ཟེར་བའི་ཕྱོགས་གཉིས་ཀྱི་མཉམ་འབྲེལ་ཐོག་ཤུགས་སྣོན་གཙོ་འདོན་བྱ་རྒྱུ་ཡིན་འདུག

ཡོ་ཁུ་རེན་གྱི་སྲིད་འཛིན་ཛེ་ལན་སི་ཁེ་ཡིས། འཛམ་གླིང་གི་མགོ་ཁྲིད་ཁག་ནས་ཨུ་རུ་སུའི་རྒྱལ་སྟོན་མཛད་སྒོར་མཉམ་ཞུགས་མི་བྱེད་པའི་རེ་སྐུལ་དང་སྦྲགས། ཨུ་རུ་སུའི་དུས་སྟོན་དེར་མཉམ་ཞུགས་བྱས་པ་དེས་འཛམ་གླིང་རྒྱལ་ཁབ་ཁག་ཅིག་ལ་དམག་འཁྲུག་མི་རྒྱག་ཐབས་མེད་ཀྱི་དཀའ་རྙོག་སློང་གིན་ཡོད་པས། ཨུ་རུ་སུ་ལྟ་བུ་བཙན་རྒྱལ་རིང་ལུགས་ལག་བསྟར་བྱེད་མཁན་གྱི་མཛད་སྒོར་མཉམ་ཞུགས་བྱེད་མཁན་དག་ལ་སྐྱོན་བརྗོད་ཡོད་སྐོར་བརྗོད་འདུག་ལ། ཟླ་འདིའི་ཕྱི་ཚེས་ ༧ ཉིན་ཡོ་ཁུ་རེན་གྱིས་ཨུ་རུ་སུའི་རྒྱལ་ས་དྲག་རྒོལ་བྱས་ཏེ་དུས་སྟོན་དེར་གནོད་སྐྱོན་གཏོང་ཐབས་བྱས་ཡོད་འདུག་ལ། དྲག་རྒོལ་གྱི་དོན་རྐྱེན་དང་འབྲེལ་ནས་སཱར་བྷེ་ཡ་སྤྱི་མཐུན་རྒྱལ་ཁབ་(Serbia) ཀྱི་སྲིད་འཛིན་ (Aleksandar Vučić) གྱི་གནམ་གྲུ་ཁ་བསྒྱུར་བྱེད་དགོས་བྱུང་བ་སོགས་ད་ལྟ་ཡོ་ཁུ་རེན་གྱིས་ཨུ་རུ་སུར་ཕར་རྒོལ་བྱས་དང་བྱེད་མུས་ཡིན་འདུག

ཞི་ཅིན་ཕིན་གྱིས། མཉམ་འབྲེལ་རྒྱལ་ཚོགས་ཀྱི་གཏན་འཇགས་འཐུས་མི་ཡིན་པའི་ང་ཚོའི་རྒྱལ་ཁབ་གཉིས་ཀྱིས། གཅིག་གྱུར་ལ་འབད་པ་དང་བརྙས་བཅོས་ལ་གདོང་ལེན་བྱེད་དགོས། འཛམ་གླིང་དམག་ཆེན་གཉིས་པའི་ལྟ་ཚུལ་དངོས་དེ་ཁྱབ་སྤེལ་བྱེད་དགོས། མཉམ་འབྲེལ་རྒྱལ་ཚོགས་ཀྱི་དབང་ཆ་དང་གནས་བབ་སྲུང་སྐྱོབ་བྱས་ཏེ། རྒྱ་ནག་དང་ཨུ་རུ་སུའི་ཐོབ་ཐང་དང་མངོན་འདོད་སྲུང་སྐྱོབ། དེ་བཞིན་འཕེལ་རྒྱས་འགྲོ་བཞིན་པའི་འཛམ་གླིང་རྒྱལ་ཁབ་ཁག་དང་ལྷན་དུ་མཉམ་ལས་ལ་གཞོལ་ནས་འདྲ་མཉམ་འཕེལ་རྒྱས་དང་གོ་ལ་རང་བཞིན་གྱི་ཚོང་ལས་དར་སྤེལ་གཏོང་བར་འབད་དགོས་ཟེར་བ་སོགས་བརྗོད་འདུག

ཐེངས་འདིའི་ཞི་དང་པུ་ཊིན་གཉིས་ཀྱི་ཐུག་འཕྲད་སྐབས། ཨ་རི་དང་ཡུ་རོབ་མཐུན་ཚོགས་སོགས་ནས་རྒྱ་ནག་ལ་ཚོང་འབྲེལ་དཔྱ་ཁྲལ་གྱི་ཐོག་ནས་དཀའ་ངལ་སྤྲོད་བཞིན་པ་དང་དེ་བཞིན་ཨུ་རུ་སུར་ཆབ་དཔལ་གཉིས་ཀྱི་ཐོག་ནས་ཉེས་ཆད་གཅོད་བཞིན་པ་སོགས་རྒྱལ་སྤྱིའི་གནད་དོན་ཁག་དང་། རྒྱ་ནག་དང་ཨུ་རུ་སུའི་མཉམ་འབྲེལ་སྤྱི་དང་བྱེ་བྲག་ཏུ་རྒྱལ་ཁབ་གཉིས་ཀྱི་ས་འབྲེལ་མངའ་ཁུལ་གྱི་གནད་དོན་ཁག། དེ་བཞིན། དཔལ་འབྱོར་འཕེལ་རྒྱས་སུ་འགྲོ་བཞིན་པའི་རྒྱལ་ཁབ་ལྔ་ (BRICS) ཡི་གནད་དོན་དང་སྟོབས་ཆེན་རྒྱལ་ཁབ་ ༢༠ སྐོར་ལ་གླེང་སློང་བྱ་རྒྱུ་ཡིན་པ་མ་ཟད། ཨུ་རུ་སའི་མངའ་སྡེ་ (Siberia) ནས་རྒྱ་ནག་ཏུ་དབོར་འདྲེན་བྱེད་བཞིན་པའི་སྣུམ་གྱི་ཐོན་ཁོངས་གཉིས་ཀྱི་སྐོར་ལ་མཉམ་འབྲེལ་བསྒྲགས་གཏམ་སྤེལ་རྒྱུ་ཡིན་འདུག

གཞན་ཡང་ཁ་སང་རྒྱ་ནག་གིས། ཐེངས་འདིའི་མགོ་ཁྲིད་གཉིས་ཀྱི་ཐུག་འཕྲད་དེ་ནི་ཁྱིམ་མཚེས་བཟང་པོ་དང་དགའ་སྐྱོ་མཉམ་སྤྱོད་བྱེད་པའི་གྲོགས་པོ་གཉིས་ཐུག་གི་ཡོད་སྟབས། ཐུག་འཕྲད་དེ་བརྒྱུད་དུས་སྐབས་གསར་བ་ཟེར་བའི་རྒྱ་ནག་དང་ཨུ་རུ་སུའི་མཉམ་ལས་ཀྱི་འབྲེལ་ལམ་ལ་གཙོ་འདོན་བྱ་རྒྱུ་དང་། ལྷག་པར་ཨུ་རུ་སུའི་དུས་ཆེན་སྟེང་རྒྱ་ནག་བཅིང་གྲོལ་དམག་གི་རུ་ཁག་ཅིག་གིས་རྔམ་སྟོན་མཛད་སྒོར་མཉམ་ཞུགས་བྱས་ཏེ། དམག་ཤུགས་ངོམ་པ་བརྒྱུད་ཨུ་རུ་སུ་དང་རྒྱ་ནག་གི་འབྲེལ་ལམ་ཧ་ཅང་ཉེ་བོ་ཡིན་པ་གསལ་སྟོན་བྱ་རྒྱུ་ཡིན་སྐོར་སོགས་བསྒྲགས་འདུག་ལ། ཨུ་རུ་སུས་ཀྱང་ཞི་ཅིན་ཕིན་ཨུ་རུ་སུའི་དུས་སྟོན་མཛད་སྒོར་མཉམ་ཞུགས་བྱས་པ་དེ་ནི་འདི་ལོའི་རྒྱལ་ཁབ་གཉིས་བར་གྱི་འབྲེལ་ལམ་གལ་ཆེ་ཤོས་ཤིག་ཏུ་བརྩི་རྒྱུ་ཡིན་པ་མ་ཟད། ཞི་ཅིན་ཕིན་གྱིས་རྒྱལ་ཁབ་གཉིས་བར་གྱི་མཉམ་ལས་ཀྱི་གན་རྒྱ་མང་པོ་ཞིག་ལ་མིང་རྟགས་འགོད་རྒྱུ་དང་། རྒྱ་ནག་དང་ཨུ་རུ་སུའི་བར་གྱི་འབྲེལ་ལམ་ལ་ཚད་བཀག་མེད་པ་ཡོངས་བསྒྲགས་བྱ་རྒྱུ་ཡིན་སྐོར་སོགས་བསྒྲགས་འདུག

ད་ལན་ནི་ཕྱི་ལོ་ ༢༠༡༣ ལོར་ཞི་ཅིན་ཕིན་སྲིད་འཛིན་ཆགས་པ་ནས་ཨུ་རུ་སུར་བསྐྱོད་པ་ཐེངས་བཅུ་གསུམ་པ་དེ་ཡིན་ཞིང་། ཞི་ཅིན་ཕིན་དང་ལྷན་དུ་རྒྱ་ནག་གི་ཕྱི་སྲིད་བློན་ཆེན་ཝང་ཡེ་དང་དྲུང་ཆེ་ཚའེ་ཆི་སོགས་ཡོད་འདུག་ལ། ཞི་ཅིན་ཕིན་ཟླ་འདིའི་ཕྱི་ཚེས་ ༡༠ བར་ཉིན་གྲངས་བཞིའི་རིང་ཨུ་རུ་སུར་སྡོད་ཀྱི་ཡོད་འདུག

གསར་འགོད་པ། སྐལ་བཟང་སྦྱིན་པ།