སྲིད་སྐྱོང་མཆོག་གིས་༧སྐུའི་ཡང་སྲིད་ཀྱི་གནད་དོན་ཐོག་རྒྱ་ནག་གཞུང་གིས་ཐེ་གཏོགས་བྱེད་སྲིད་པས་རྒྱལ་སྤྱིའི་སྤྱི་ཚོགས་ནས་དམིགས་བསལ་དོ་སྣང་གནང་དགོས་སྐོར་གསུངས་འདུག
བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ཨ་རི་ནང་གཞུང་འབྲེལ་ཕྱོགས་ཕེབས་གནང་བཞིན་ཡོད་པ་ལྟར། ཁ་སང་ཕྱི་ཚེས་ ༨ ཉིན་སྲིད་སྐྱོང་སྤེན་པ་ཚེ་རིང་མཆོག་གིས་ཨ་རིའི་གྲོས་ཚོགས་འཐུས་མི་སྐུ་ཞབས་ཇོ་ཝིལ་སོན་ (Joe Wilson) མཆོག་དང་མཇལ་འཕྲད་གནང་ཡོད་ཅིང་། སྐབས་དེར་ཁོང་གིས་༧གོང་ས་རྒྱལ་བ་རིན་པོ་ཆེ་མཆོག་ལ་གུས་བཀུར་ཆེན་པོ་ཡོད་པ་དང་བོད་མི་མང་ལ་རྒྱབ་སྐྱོར་མུ་མཐུད་གནང་རྒྱུ་ཡིན་སྐོར་གསུངས་འདུག དེ་བཞིན་ཨ་རིའི་ཕྱི་འབྲེལ་ལྷན་ཚོགས་ (Council on Foreign Relations) ཞིབ་འཇུག་ལྟེ་གནས་ཁང་གི་ཕྱི་འབྲེལ་ཆབ་སྲིད་ཀྱི་ཆེད་མཁས་པ་སྐུ་ཞབས་ཨེ་ལི་ཡོ་ཊི་ཨེབ་རམ་སི་ (Elliott Abrahms) ལགས་དང་མཇལ་མོལ་གནང་འདུག ཁོང་གིས་ཨ་རིའི་རྒྱལ་ཡོངས་བདེ་འཇགས་ལྷན་ཁང་གི་སློབ་སྟོན་པ་གཞོན་པ་ཨི་རཱན་དང་ཝེ་ནེ་ཛུ་ལཱ་གཉིས་ཀྱི་ཨ་རིའི་དམིགས་བསལ་སྐུ་ཚབ་བཅས་ཀྱི་ལས་འཁུར་ཞུས་མྱོང་ཡོད་འདུག
ཟླ་འདིའི་ཕྱི་ཚེས་ ༧ ཉིན་ཨ་རིའི་རྒྱལ་ས་ཝ་ཤིང་ཊོན་དུ་རྟེན་གཞི་བྱས་པའི་བྷི་རུའུ་ཁིན་སི་བསམ་མཛོད་བསྟི་གནས་ཁང་ (Brookings Institution) དུ་བཞུགས་མོལ་ཚོགས་འདུ་ཞིག་འཚོགས་ཡོད་ཅིང་། ཚོགས་ཐོག་ཏུ་སྲིད་སྐྱོང་སྤེན་པ་ཚེ་རིང་མཆོག་གི་གཙོས་བྱང་ཨ་རི་སྐུ་ཚབ་དོན་ཁང་དང་། རྒྱལ་སྤྱིའི་བོད་དོན་ལས་འགུལ་ཁང་གི་ལས་བྱེད་རྣམ་པ། ཨེ་ཤེ་ཡ་དང་རྒྱ་ནག་གི་གནད་དོན་ཐོག་དམིགས་བསལ་ཆེད་མཁས་པ་དང་ཉམས་ཞིབ་པ་བརྒྱད་བཅས་མཉམ་ཞུགས་གནང་སྟེ། བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་དང་། རྒྱ་གཞུང་གིས་མི་རིགས་རྒྱ་བསྒྱུར་གྱི་སྲིད་ཇུས། ༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་ཡང་སྲིད་ཀྱི་གནད་དོན་སོགས་བགྲོ་གླེང་གནང་ཡོད་འདུག སྐབས་དེར་སྲིད་སྐྱོང་མཆོག་གིས་༧གོང་ས་མཆོག་གི་༧སྐུའི་ཡང་སྲིད་ཀྱི་གནད་དོན་དང་འབྲེལ་བའི་ཐོག་རྒྱ་ནག་གཞུང་གིས་ཐེ་གཏོགས་བྱེད་སྲིད་པ་ཞིག་ཡིན་པས། རྒྱལ་སྤྱིའི་སྤྱི་ཚོགས་ཀྱིས་གནད་དོན་དེའི་ཐོག་དམིགས་བསལ་དོ་སྣང་གནང་དགོས་པའི་གལ་གནད་སྐོར་གསུངས་འདུག
དེ་རྗེས་སྲིད་སྐྱོང་མཆོག་གིས་འགྲོ་བ་མིའི་ཐོབ་ཐང་དང་ཆོས་དད་རང་དབང་ཐོག་ཡུན་རིང་རྒྱབ་སྐྱོར་གནང་མཁན་གྲོས་ཚོགས་འཐུས་མི་སྐུ་ཞབས་ཇེ་མི་རཱ་སི་ཀིན་ལགས་དང་མཇལ་འཕྲད་གནང་ཡོད། ཁོང་གིས་བོད་ཀྱི་རྩོམ་པ་པོ་རྣམས་ལ་ཉེས་མེད་འོག་འཛིན་བཟུང་བྱས་པར་ཀློད་གྲོལ་གཏོང་དགོས་པའི་འབོད་སྐུལ་གནང་མྱོང་ཡོད་པ་དང་། བོད་ནང་གི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པར་སེམས་འཚབ་བཏོན་འདུག སྐབས་དེར་སྲིད་སྐྱོང་མཆོག་གིས་བོད་ཀྱི་འཚེ་མེད་ཞི་བའི་ཐབས་ལམ་ཐོག་རྩ་དོན་རྒྱུན་འཁྱོངས་བྱ་རྒྱུ་ཡིན་པ་དང་། བོད་མིའི་སྒྲིག་འཛུགས་ཀྱི་ལས་རིམ་འདྲ་མིན་ཐོག་དཔལ་འབྱོར་རྒྱབ་སྐྱོར་བསྐྱར་གསོ་དགོས་པའི་སྐོར་གསུངས་འདུག
གཞན་ཡང་སྲིད་སྐྱོང་སྤེན་པ་ཚེ་རིང་མཆོག་གིས་ཨ་རིའི་གྲོས་ཚོགས་འཐུས་མི་མེ་ཁེ་ལའོ་ལར་ (Mike Lawler) ལགས་དང་མཇལ་འཕྲད་ཀྱིས་འདི་ལོའི་༧གོང་ས་མཆོག་གི་གོ་སྟོན་སླད་བྱམས་བརྩེའི་ལོ་སྲུང་གཙི་བྱེད་པར་ཆབ་སྲིད་ཚོགས་པ་ཁག་ནས་རྒྱབ་སྐྱོབ་ཐོབ་ཐབས་སྐོར་དང་། ཨ་རིའི་ཕྱི་སྲིད་ལས་ཁུངས་ནང་བོད་དོན་དམིགས་བསལ་འབྲེལ་མཐུད་པ་བསྐྱར་དུ་བསྐོ་བཞག་དགོས་པའི་སྐོར་གསུངས་འདུག དེ་བཞིན་སྲིད་སྐྱོང་མཆོག་གིས་བཞུགས་སྒར་དུ་༧གོང་ས་མཆོག་ལ་མཇལ་བཅར་ཞུས་མྱོང་ཡོད་པའི་ཨ་རིའི་གྲོས་ཚོགས་འཐུས་མི་ཨ་མི་བྷེ་ར་ལགས་ཀྱིས་མཇལ་འཕྲད་ཀྱིས་༧གོང་ས་རྒྱལ་བ་རིན་པོ་ཆེ་མཆོག་གི་༧སྐུའི་ཡང་སྲིད་གནད་དོན་དང་འབྲེལ་བའི་ཐུགས་དགོངས་སྐོར་ལ་གྲོས་མོལ་ལྷུག་པོར་གནང་ཡོད་པ་མ་ཟད། ཁོང་གིས་བོད་དོན་ཐོག་མུ་མཐུད་རྒྱབ་སྐྱོར་གནང་རྒྱུ་ཡིན་ཚུལ་གསུངས་འདུག
ཟླ་འདིའི་ཕྱི་ཚེས་ ༦ ཉིན་ཨ་རིའི་གྲོས་ཚོགས་གོང་མའི་ལས་ཁུངས་སུ། སྲིད་སྐྱོང་མཆོག་གིས་གྲོས་ཚོགས་གོང་མའི་འཐུས་མི་ཊེ་ཌི་ཁུ་རུ་ཛི་ (Ted Cruz) ལགས་དང་མཇལ་འཕྲད་གནང་སྟེ། ཨེ་ཤ་ཡ་རང་དབང་རླུང་འཕྲིན་ཁང་དང་ཨ་རིའི་རླུང་འཕྲིན་ཁང་གཉིས་ཀྱིས་བོད་ནང་གི་བོད་མི་ཚོའི་གནས་ཚུལ་གསལ་སྟོན་བྱེད་བཞིན་ཡོད་པའི་སྐོར་གསུངས་འདུག་ལ། སྲིད་སྐྱོང་མཆོག་གིས་ཨ་རིའི་ཕྱི་སྲིད་ལྷན་ཁང་གི་དམངས་གཙོ་དང་འགྲོ་བ་མིའི་ཐོབ་ཐང་། ངལ་རྩོལ་གོང་འཕེལ་ལས་དོན་ཚན་པ་ (DRL) དང་། ལྷོ་དང་དབུས་ཨེ་ཤ་ཡའི་ས་ཁུལ་གྱི་ལས་དོན་ཚན་པ་ (SCA)། ཤར་ཨེ་ཤ་ཡ་དང་ཞི་བདེ་རྒྱ་མཚོ་ས་ཁུལ་གྱི་ལས་དོན་ཚན་པ་ (EAP) བཅས་ཀྱི་མཐོ་རིམ་མི་སྣ་བརྒྱད་དང་མཇལ་འཕྲད་གནང་འདུག སྐབས་དེར་སྲིད་སྐྱོང་མཆོག་གིས་བོད་ནང་གི་ཛ་དྲག་ཆེ་བའི་གནས་སྟངས་དང་། བོད་མིའི་སྒྲིག་འཛུགས་ཀྱི་རྒྱལ་སྤྱིའི་འབྲེལ་ལམ་གྱི་ལས་དོན་ཐད་འགྲེལ་བརྗོད་གནང་ཡོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། བསྟན་འཛིན་ཕུར་བུ།
