བོད་རིགས་ཨ་རི་བ་ཨ་ཧྥ་ཊབ་ཀརྨ་སིང་པུ་རི་ཝལ་ལགས་བསྐྱར་དུ་སིན་སིན་ན་ཊི་གྲོང་ཁྱེར་གྱི་སྤྱི་ཁྱབ་པའི་འོས་མིར་ལངས་ཏེ་སྔོན་འགྲོའི་འོས་བསྡུའི་ཁྲོད་ཚད་མཐོའི་རྒྱལ་ཁ་ཐོབ་འདུག
ཉེ་ལམ་ནས་ཨ་རིའི་ཨོ་ཧ་ཡོ་ (Ohio) མངའ་སྡེའི་ནང་གི་སིན་སིན་ན་ཊི་ (Cincinnati) གྲོང་ཁྱེར་གྱི་སྤྱི་ཁྱབ་པའི་འོས་མིའི་སྔོན་འགྲོ་འོས་བསྡུ་བྱེད་སྐབས། བོད་རིགས་ཨ་རི་བ་ཨ་ཧྥ་ཊབ་ཀརྨ་སིང་པུ་རི་ཝལ་ (Aftab Karma Singh Pureval) ལགས་བསྐྱར་དུ་སིན་སིན་ན་ཊི་ (Cincinnati) གྲོང་ཁྱེར་གྱི་སྤྱི་ཁྱབ་པའི་འོས་མིར་ལངས་ཏེ་འོས་བསྡུའི་ཁྲོད་རྒྱལ་ཁ་ཐོབ་ཡོད་འདུག
འདི་ལོའི་སིན་སིན་ན་ཊི་གྲོང་ཁྱེར་སྤྱི་ཁྱབ་ལ་ལང་མཁན་འོས་མི་གསུམ་ཡོད་པའི་ཁྲོད། ཨ་ཧྥ་ཊབ་ཀརྨ་སིང་པུ་རི་ཝལ་ལགས་སུ་འོས་བསྡུའི་བརྒྱ་ཆ་ ༨༢།༥༣ ཐོབ་ཡོད་ཅིང་། འོས་གྲངས་དེ་ནི་ཁོང་གྲོང་ཁྱེར་སྤྱི་ཁྱབ་པ་ཆགས་པར་རྒྱབ་སྐྱོར་ཚད་མཐོ་བོ་ཞིག་ཡིན་པར་ངོས་འཛིན་བྱེད་ཀྱིན་འདུག་ལ། ད་ལན་ཁོང་གི་ཁ་གཏད་དུ་ལང་མཁན་གོ་རེ་ཝན་སི་ (Cory Vance) ལགས་སུ་འོས་གྲངས་བརྒྱ་ཆ་ ༡༢།༩༡ དང་བྷི་རེན་ཧྥི་རན་ཁུ་ (Brian Frank) ལགས་སུ་འོས་གྲངས་བརྒྱ་ཆ་ ༤།༤༥ བཅས་ཙམ་ལས་ཐོབ་མེད་པ་དང་། གོ་རེ་ཝན་སི་ལགས་ནི་ཨ་རིའི་སྲིད་འཛིན་གཞོན་པ་ཇའེ་ཌི་ཝན་སིའི་ (J.D. Vance) བུ་སྤུན་ཡིན་འདུག
ཟླ་འདིའི་ཚེས་ ༦ ཉིན་ཨ་ཧྥ་ཊབ་ཀརྨ་སིང་པུ་རི་ཝལ་ལགས་ཀྱིས་ཨེག་སི་དྲ་ཚིགས་སྟེང་། འདི་ལོའི་ཕྱི་ཟླ་ ༡༡ པའི་ནང་གི་དངོས་གཞི་འོས་བསྡུའི་ཆེད་འོས་བླུག་རྒྱུ་བྱུང་བར་དགའ་སྤོབས་བྱུང་ལ། ད་དུང་ང་ཚོར་སིན་སིན་ན་ཊིའི་ནང་བྱ་དགོས་པའི་ལས་ཀ་མང་པོ་མདུན་དུ་ཡོད། འོན་ཀྱང་། འདས་པའི་ལོ་ངོ་འགའི་རིང་ང་ཚོས་ལས་དོན་མང་པོ་ཞིག་བསྒྲུབས་ཐུབ་པ་ནི་ཧ་ཅང་དགའ་སྤོབས་སྐྱེས་འོང་བ་ཞིག་ཡིན། ཞེས་བརྗོད་འདུག
འདི་ལོའི་སིན་སིན་ན་ཊི་གྲོང་ཁྱེར་སྤྱི་ཁྱབ་པའི་དངོས་གཞིའི་འོས་བསྡུ་དེ་ཕྱི་ཟླ་ ༡༡ ཚེས་ ༤ ཉིན་བྱེད་གཏན་ཁེལ་ཞིང་། དངོས་གཞིའི་འོས་བསྡུའི་ནང་ ཨ་ཧྥ་ཊབ་ཀརྨ་སིང་པུ་རི་ཝལ་ལགས་དང་། གོ་རེ་ཝན་སི་ལགས་གཉིས་བར་འོས་འགྲན་བྱ་རྒྱུ་ཡིན་པ་རེད། བྷི་རེན་ཧྥི་རན་ཁུ་ (Brian Frank) ལགས་སུ་འོས་གྲངས་ཀྱི་བརྒྱ་ཆ་ ༤།༤༥ ཙམ་ལས་ཐོབ་མེད་པས་དངོས་གཞིའི་ནང་ཞུགས་པའི་ཆ་རྐྱེན་མ་ཚང་སྟབས་འོས་བསྡུ་ལས་རང་བཞིན་གྱིས་ཕུད་ཡོད་འདུག
ཨ་ཧྥ་ཊབ་ཀརྨ་སིང་པུ་རི་ཝལ་ལགས་ཐོག་མར་ཕྱི་ལོ་ ༢༠༢༡ ལོར་སིན་སིན་ན་ཊི་གྲོང་ཁྱེར་གྱི་སྤྱི་ཁྱབ་པའི་འོས་མི་ལངས་ཏེ། ལོ་དེའི་ཟླ་ ༡༡ ཚེས་ ༣ ཉིན་དངོས་གཞིའི་ཁྲོད་རྒྱལ་ཁ་ཐོབ་སྟེ། བོད་རིགས་ཨ་རི་བ་ཞིག་ཐེངས་དང་པོར་ཨ་རིའི་གྲོང་ཁྱེར་ཆེ་གྲས་ཤིག་གི་སྤྱི་ཁྱབ་པར་འོས་འདེམས་བྱུང་བའི་ཟིན་ཐོ་བཀོད་ཡོད། ཨ་ཧྥ་ཊབ་ཀརྨ་སིང་པུ་རི་ཝལ་ལགས་ཀྱིས་དེ་སྔ་ཨ་རིའི་ཨོ་ཧའོ་མངའ་སྡེའི་ཧ་མིལ་ཊོན་ (Hamilton County) རྫོང་ཁྲིམས་ཁང་གི་ཁྲིམས་དྲུང་ཆེན་མོའི་ལས་འཁུར་ཞུས་མྱོང་འདུག་ལ། དེ་ནི་ས་གནས་སུ་ལོ་ངོ་ ༡༠༠ ལྷག་གི་རིང་ཨ་རིའི་དམངས་གཙོ་ཚོགས་པའི་ཚོགས་མི་ཞིག་ཁྲིམས་དྲུང་ཆེན་མོར་བསླེབས་པ་ཐོག་མ་དེ་ཆགས། དེ་བཞིན་ཕྱི་ལོ་ ༢༠༡༨ ལོར་ཁོང་ཨ་རིའི་གྲོས་ཚོགས་འོག་མའི་འཐུས་མིར་ལངས་ཏེ་བོད་མི་ཨ་རི་བ་ཞིག་ཨ་རིའི་གྲོས་ཚོགས་འཐུས་མིར་ལངས་བ་ཐེངས་དང་པོ་ཆགས་ཡོད་པ་དང་། འོས་བསྡུའི་དྲིལ་བསྒྲགས་སྐབས་ཁོང་གིས་རང་ཉིད་ཀྱི་ཕ་མའི་མི་རིགས་ལ་བརྟེན་ནས། རང་ཉིད་བོད་མི་ཨ་རི་བ་དང་རྒྱ་གར་ཨ་རི་བ་ཞིག་ཡིན་པར་སྤོབས་པ་སྐྱེས་ཀྱི་ཡོད་སྐོར་སོགས་བརྗོད་འདུག
ཕྱི་ལོ་ ༢༠༢༢ ཟླ་ ༡༢ པའི་ནང་སིན་སིན་ན་ཊི་གྲོང་ཁྱེར་སྤྱི་ཁྱབ་པ་ཨ་ཧྥ་ཊབ་ཀརྨ་སིང་པུ་རི་ཝལ་ལགས་ཀྱིས་སྣེ་འཁྲིད་དེ་གྲོང་ཁྱེར་དེའི་གནད་ཡོད་མི་སྣ་ཁག་ཅིག་བཞུགས་སྒར་དྷ་རམ་ས་ལར་ཆེད་དུ་ཕེབས་ནས། ༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་ཁ་ཞུས་པ་དང་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པར་ཐུག་འཕྲད་དང་བོད་མིའི་སྒྲིག་འཛུགས་ཀྱི་ལྷན་ཁང་ཁག་ལ་གཟིགས་སྐོར་དུ་ཕེབས་ཡོད།
ད་ལྟ་རང་ལོ་ ༤༢ ཡིན་པའི་ཀརྨ་ལགས་ཀྱི་ཨ་མ་ལགས་ཀྱིས་རྒྱ་གར་ལྷོ་ཕྱོགས་མེ་སོར་དུ་སློབ་སྦྱོང་བྱས་ཏེ། ཕྱིས་སུ་ལྡི་ལི་མཐོ་སློབ་ནང་སློབ་སྦྱོང་བྱེད་སྐབས། རྒྱ་གར་པན་ཇབ་མི་རིགས་ཡིན་པ་བྷི་རིག་ཨ་རྗེ་ཐི་སིང་ (Brig Ajit Singh) ཞེས་པ་དང་ཐུག་ནས་གཉེན་སྒྲིག་བྱས། ཕྱིས་སུ་ཨ་རིར་གནས་སྤོར་བྱས་ཏེ་ཕྱི་ལོ་ ༡༩༨༢ ལོར་ཀརྨ་ལགས་ཨོ་ཧའོ་ཞེ་ནི་ཡ་ (Xenia) གྲོང་ཁྱེར་དུ་སྐྱེས་ཡོད་པ་དང་། ཁོང་གིས་ཁྲིམས་ལུགས་རིག་པར་སློབ་སྦྱོང་བྱས་ཡོད་འདུག ཕྱི་ལོ་ ༡༩༩༤ ལོར་ཁོང་དགུང་གྲངས་ ༡༣ སྟེང་བོད་ཀྱི་རྒྱལ་ས་ལྷ་སར་ཕྱིན་ཡོད་འདུག ཕྱི་ལོ་ ༢༠༡༨ ལོར་ཁོང་གིས་(Dr. Whitney June Whitis)དང་གཉེན་སྒྲིག་བྱས་ཏེ། བུ་ཆུང་བྷོ་དྷི་ (Bodhi) ཞེས་པ་ཞིག་ཡོད་འདུག
གསར་འགོད་པ། སྐལ་བཟང་སྦྱིན་པ།
