ཟླ་འདིའི་ཕྱི་ཚེས་ ༦ ཉིན་བོད་ནང་གི་ཕྱི་དྲོའི་ཆུ་ཚོད་ ༥ པ་ཙམ་ལ་ཧཱུྃ་ཀར་རྡོ་རྗེ་རིན་པོ་ཆེ་མཆོག་གི་ཡུམ་གདུགས་དཀར་སྒྲོལ་མ་ལགས་ལུང་སྔོན་དགོན་པའི་མཐའ་རུ་ཡོད་པའི་གཟིམ་ཤག་ཏུ་སྐུ་གྲོངས་ཡོད་འདུག
འབྲེལ་ཡོད་བོད་མི་ཞིག་གིས་འདི་ག་བོད་ཀྱི་དུས་བབ་གསར་ཁང་ལ་ཁུངས་ལྡན་གནས་ཚུལ་མཁོ་སྤྲོད་གནང་བ་ལྟར་ན། འདས་ལོར་མཆོག་སྤྲུལ་ཧཱུྃ་ཀར་རྡོ་རྗེ་རིན་པོ་ཆེ་མཆོག་གར་སོང་ཆ་མེད་དུ་གྱུར་ནས་ཟླ་གསུམ་ཙམ་གྱི་རྗེས་སུ། མ་ཡུམ་གདུགས་དཀར་སྒྲོལ་མ་ལགས་ཐུགས་ཁྲལ་གྱིས་སྙུང་གཞི་བཞེས་ཏེ། ཟི་ལིང་གི་སྨན་ཁང་ཞིག་ཏུ་སྨན་པར་བསྟེན་གཏུག་གནང་ནས་ཟླ་ ༣ ལྷག་རིང་སྨན་བཅོས་གནང་ཡོད་ཀྱང་། ཉེ་སྔོན་ནས་ཐུགས་ཁྲལ་སོགས་ཀྱིས་སྐུ་གཟུགས་གནས་སྟངས་ཧ་ཅང་ཛ་དྲག་ཆགས་པར་བརྟེན། ཉིན་བཅུ་ལྷག་གི་གོང་དུ་སྨན་བཅོས་ཀྱིས་ཕན་འབྲས་མ་ཐོན་པར་ཕྱིར་ཕ་ཡུལ་དུ་ཕེབས་ནས་སྐུ་གྲོངས་ཡོད་སྐོར་འགྲེལ་བརྗོད་གནང་བྱུང་།
འདི་ལོའི་ཕྱི་ཟླ་དང་པོའི་ནང་སྤྲུལ་སྐུ་ཧཱུྃ་ཀར་རྡོ་རྗེ་རིན་པོ་ཆེ་མཆོག་གིས་ཁོང་གི་མ་ཡུམ་གདུགས་དཀར་སྒྲོལ་མ་ལགས་ལ་གཏམ་རྒྱུད་ཀྱི་རྣམ་པ་ཅན་གྱི་འཕྲིན་ཡིག་ཅིག་འབྱོར་ཡོད་པའི་ནང་དུ། རྔོན་པ་དང་རི་དྭགས་ཀྱི་དཔེར་བླངས་ནས་ཁོང་དགོན་སློབ་འབངས་དང་ཞལ་གྱེས་ནས་ཐག་རིང་དུ་ཕེབས་དགོས་བྱུང་ཡོད་ཀྱང་། མུ་མཐུད་ཁོང་ལ་རྗེས་འདེད་རྩད་གཅོད་བཏང་ནས་ལག་ཏུ་ཐེབས་གྲབས་ཡོད་སྐོར་གསུངས་ཡོད་འདུག་ལ། ཕྱི་ཕྱོགས་སུ་ཡོད་པའི་རིན་པོ་ཆེ་མཆོག་གི་སློབ་འབངས་རྣམ་པས་འཕྲིན་ཡིག་དེ་དང་འབྲེལ་ཡོད་ཡིག་ཆ་རྣམས་ཕྱོགས་བསྡུས་གནང་བཞིན་ཡོད་འདུག
གོང་གི་གནས་ཚུལ་མཁོ་སྤྲོད་པས་འདི་གའི་གསར་འགོད་པར། ཕྱི་ཟླ་ ༤ ཚེས་ ༡༩ ཉིན་ནས་བཟུང་ཝེ་ཐི་ནམ་དུ་ཆེད་ཕེབས་གནང་བའི་ལུང་སྔོན་དགོན་པའི་སྐུ་ཚབ་རྣམ་པའི་ཞལ་པར་རྣམས་བཙན་གྱིས་ཡར་བསྡུས་པ་སོགས་དམ་དྲག་བྱས་ཡོད་པ་མ་ཟད། ཕྱི་ཚེས་ ༢༠ ཉིན་ཝེ་ཐི་ནམ་གྱི་རྒྱལ་སྤྱིའི་སྨན་ཁང་ནས་སྐུ་ཕུང་ཞུགས་འབུལ་ཁང་དུ་སྐུ་ཕུང་གདན་འདྲེན་ཞུ་སྐབས་ཀྱང་སྐུ་ཚབ་རྣམ་པར་རིན་པོ་ཆེ་མཆོག་གི་ཞལ་ཙམ་ཡང་མཇལ་དུ་བཅུག་མེད་པ་དང་། ཕྱིས་སུ་གདུང་རུས་དཀར་རྩི་ཡིན་ཟེར་བ་ཞིག་ཕུལ་ཡོད་ཀྱང་དེར་ཡིད་ཆེས་རྩ་བ་ནས་བྱེད་མི་ཐུབ་པ་ཞིག་ཡིན་སྐོར་དང་། རྒྱ་ནག་གཞུང་ཚབ་ཁང་གིས་ཝེ་ཐི་ནམ་གཞུང་གིས་སྐུ་ཕུང་སྤྲོད་ཀྱི་མི་འདུག་ཅེས་ལབ་སྟེ། གཞུང་ཚབ་ཁང་གི་བཀོད་ཇུས་འོག་ལུང་སྔོན་དགོན་པའི་སྐུ་ཚབ་རྣམ་པར་དབང་ཆ་གང་ཡང་མེད་རྐྱེན་ཝེ་ཐི་ནམ་གྱི་གནད་ཡོད་མི་སྣ་གཅིག་ལའང་ཐུག་ཏུ་བཅུག་མེད་ཀྱང་། ཕྱིའི་འབྲེལ་ཡོད་ནས་ཝེ་ཐི་ནམ་གྱི་གནད་ཡོད་མི་སྣར་སྐད་ཆ་དྲིས་དུས། རྒྱ་ནག་གཞུང་ཚབ་ཁང་གིས་རིན་པོ་ཆེའི་དགོན་པ་དང་ཁྱིམ་མིའི་ངོས་ནས་སྐུ་ཕུང་ཝེ་ཐི་ནམ་དུ་ཞུགས་འབུལ་ཞུ་དགོས་པའི་རེ་སྐུལ་གནང་ཡོད་ཚུལ་བརྗོད་དེ་ཞུགས་འབུལ་ཞུས་ཡོད་སྐོར་ལན་འདེབས་གནང་ཡོད་འདུག
མ་ཡུམ་གདུགས་དཀར་སྒྲོལ་མ་ལགས་ནི་ད་ལོ་དགུང་གྲངས་ ༨༥ ཡིན་འདུག་ལ། སྤྲུལ་སྐུ་པདྨ་གཏུམ་པོ་རིན་པོ་ཆེ་ཁོང་རྣམ་གཉིས་ལ་སྲས་ཧཱུྃ་ཀར་རྡོ་རྗེ་རིན་པོ་ཆེ་མཆོག་དང་ཁོང་གི་གཅུང་པོ་གཅིག་ཡོད་པ་ད་ལྟ་ཉི་ཧོང་དུ་ཡོད་འདུག་ལ། སྲིང་མོ་གཉིས་ཡོད་པ་ལས་གཅིག་ལོ་གཅིག་གཉིས་ཀྱི་གོང་དུ་གྲོངས་ཡོད་འདུག
རྒྱབ་ལྗོངས་ཀྱི་གནས་ཚུལ།
འདས་ལོའི་ཕྱི་ཟླ་ ༨ པའི་ནང་རྒྱ་ནག་གཞུང་གིས་ངོས་འཛིན་བྱས་པའི་པཎ་ཆེན་རྒྱལ་མཚན་ནོར་བུ་ལགས་མགོ་ལོག་ཁུལ་དུ་བསླེབས་སྐབས། ཧཱུྃ་ཀར་རྡོ་རྗེ་རིན་པོ་ཆེ་མཆོག་གིས་རྒྱ་གཞུང་གི་རེ་འདོད་ལྟར་སྣེ་ལེན་ཟབ་རྒྱས་མ་ཞུས་པ་དང་། གོང་རིམ་གྱི་བཀའ་ལ་མི་ཉན་པར་དགོན་པ་དང་སློབ་གྲྭ་མང་པོ་བཙུགས་པ། ཉམ་ཆུང་དབུལ་ཕོངས་ཀྱི་ཐོབ་ཐང་རྩོད་ལེན་གནང་ནས་རྙོག་ཟིང་བསླངས་ཡོད་སྐོར་བརྗོད་ནས་སུན་གཙེར་ཡང་ཡང་བཟོས་ཏེ་སྐབས་ཤིག་རིང་གར་སོང་ཆ་མེད་དུ་གྱུར། འདི་ལོའི་ཕྱི་ཟླ་ ༣ ཚེས་ ༢༨ ཉིན་རྒྱ་ནག་གཞུང་གིས་མགོ་ལོག་ལུང་སྔོན་དགོན་པའི་གནད་ཡོད་མི་སྣར་རིན་པོ་ཆེ་མཆོག་ཝེ་ཐི་ནམ་གྱི་རྒྱལ་སྤྱིའི་སྨན་ཁང་(Vinmec Central Park International Hospital ) དུ་སྐུ་གྲོངས་ཟིན་སྐོར་གྱི་གསལ་ཁ་གང་ཡང་མེད་པའི་གཏམ་ངན་བཤད། དེ་ནས་མགོ་ལོག་དགའ་བདེ་རྫོང་ལུང་སྔོན་དགོན་པའི་སྐུ་ཚབ་དགེ་འདུན་པ་ལྔ་ཆེད་དུ་ཝེ་ཐི་ནམ་དུ་ཕེབས་ཏེ་རྩད་གཅོད་གནང་ཡོད་ཀྱང་། ཕྱི་ཟླ་ ༤ ཚེས་ ༡༠ ཉིན་གྱི་ཕྱི་དྲོར་རིན་པོ་ཆེ་མཆོག་གི་ཞལ་ཁོ་ན་ཙམ་མཇལ་དུ་བཅུག ཕྱི་ཟླ ༤ ཚེས་ ༢༠ ཉིན་ཝེ་ཐི་ནམ་དུ་སྐུ་ཕུང་གསང་བའི་ཐོག་ནས་ཞུགས་འབུལ་ཞུས་ཡོད་པ་རེད།
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།
