རྒྱལ་སྤྱིའི་འགྲོ་བ་མིའི་ཐོབ་ཐང་ལྟ་ཞིབ་ཁང་གིས། ནང་པའི་རྒྱལ་ཁབ་ཁག་གིས་པཎ་ཆེན་སྐུ་ཕྲེང་བཅུ་གཅིག་པ་བསྟན་འཛིན་དགེ་འདུན་ཡེ་ཤེས་འཕྲིན་ལས་མཆོག་གར་སོང་ཆ་མེད་དུ་གྱུར་ནས་ལོ་ངོ་སུམ་ཅུ་འཁོར་བའི་ཉིན་མོ་སྲུང་གཙི་ཞུས་ཏེ། རྒྱ་ནག་གཞུང་ལ་བོད་ནང་གི་བོད་མིའི་འགྲོ་བ་མིའི་ཐོབ་ཐང་དང་ཆོས་དད་རང་དབང་སོགས་ཀྱི་སྐོར་ལ་གླེང་སློང་ནན་ཏན་བྱ་དགོས་པའི་སྐུལ་མ་བྱས་འདུག
རྒྱལ་སྤྱིའི་གསར་ལམ་ཁག་ཏུ་གནས་ཚུལ་ཐོན་པ་ལྟར་ན། ཟླ་འདིའི་ཕྱི་ཚེས་ ༡༧ ཉིན་རྒྱ་ནག་གཞུང་གིས་༧ཀུན་གཟིགས་༧པཎ་ཆེན་སྐུ་ཕྲེང་བཅུ་གཅིག་པ་རྗེ་བཙུན་བསྟན་འཛིན་དགེ་འདུན་ཡེ་ཤེས་འཕྲིན་ལས་ཕུན་ཚོགས་དཔལ་བཟང་པོ་མཆོག་འཛིན་བཟུང་བཙན་ཁྲིད་བྱས་ཏེ་གར་སོང་ཆ་མེད་དུ་གྱུར་ནས་ལོ་ངོ་ ༣༠ འཁོར་ཡོད་སྟབས། ཨ་རིའི་གྲོང་ཁྱེར་ནེའུ་ཡོག་ཏུ་རྟེན་གཞི་བྱས་པའི་རྒྱལ་སྤྱིའི་འགྲོ་བ་མིའི་ཐོབ་ཐང་ལྟ་ཞིབ་ཁང་གིས། རྒྱ་ནག་གཞུང་ནས་༧པཎ་ཆེན་རིན་པོ་མཆོག་དང་ནང་མི་སྐུ་འཁོར་དང་བཅས་པ་འཕྲལ་མ་མྱུར་དུ་ཀློད་གྲོལ་གཏོང་དགོས་པའི་སྐུལ་མ་བྱས་འདུག
རྒྱལ་སྤྱིའི་འགྲོ་བ་མིའི་ཐོབ་ཐང་ལྟ་ཞིབ་ཁང་གིས། དམིགས་བསལ་ནང་པའི་མི་འབོར་མང་བའི་འཛམ་གླིང་རྒྱལ་ཁབ་ཉི་ཧོང་དང་ལྷོ་ཀོ་རི་ཡ། སོག་པོ། ཐའེ་ཝན་དང་རྒྱ་གར་སོགས་ནས་༧པཎ་ཆེན་རིན་པོ་ཆེ་མཆོག་གར་སོང་ཆ་མེད་དུ་གྱུར་ནས་ལོ་ངོ་སུམ་ཅུ་འཁོར་བའི་ཉིན་མོ་སྲུང་གཙི་ཞུས་ཏེ། བོད་མིའི་འགྲོ་བ་མིའི་ཐོབ་ཐང་གི་གཙོས་ཆོས་དད་རང་དབང་སོགས་ཀྱི་སྐོར་ལ་གླེང་སློང་ནན་མོ་བྱེད་དགོས་པའི་འབོད་སྐུལ་བྱས་ཡོད་པ་མ་ཟད། འཛམ་གླིང་རྒྱལ་ཁབ་ཁག་ལ་མཚོན་ན་༧པཎ་ཆེན་རིན་པོ་ཆེ་མཆོག་གར་སོང་ཆ་མེད་དུ་གྱུར་ནས་ལོ་ངོ་སུམ་ཅུ་འཁོར་བའི་ཉིན་མོ་དེ་ནི། རྒྱ་ནག་གཞུང་ནས་འདས་པའི་ལོ་ངོ་ ༦༦ རིང་བོད་མི་མང་གི་ཐོག་ཏུ་སྤེལ་བཞིན་པའི་དྲག་གནོན་མཚམས་འཇོག་བྱེད་དགོས་པར་སྐུལ་མ་གཏོང་བའི་གོ་སྐབས་གལ་ཆེན་ཞིག་ཡིན་སྐོར་ཡང་བརྗོད་འདུག
རྒྱལ་སྤྱིའི་འགྲོ་བ་མིའི་ཐོབ་ཐང་ལྟ་ཞིབ་ཁང་གི་རྒྱ་ནག་ཉམས་ཞིབ་པ་ཡལ་ཀུན་ཝུ་ཨོལ་ལགས་ཀྱིས། རྒྱ་ནག་གཞུང་གིས་༧པཎ་ཆེན་རིན་པོ་ཆེ་དགུང་ལོ་དྲུག་ཡིན་སྐབས། ཁོང་གི་ཡབ་ཡུམ་གཉིས་དང་ནང་མི་སྐུ་འཁོར་བཅས་པ་འཛིན་བཟུང་བཙན་ཁྲིད་བྱས་ཏེ། འདས་པའི་ལོ་ངོ་ ༣༠ རིང་༧གོང་ས་རྒྱལ་བ་རིན་པོ་ཆེ་མཆོག་གི་ཡང་སྲིད་འདེམས་སྒྲུག་དང་བོད་ཀྱི་ནང་ཆོས་ཐོག་དམ་དྲག་བྱས་ཡོད། ཅེས་དང་། དོ་ཁུར་ཆེ་བའི་འབྲེལ་ཡོད་གཞུང་དང་ཚོགས་སྡེ་ཁག་གིས་རྒྱ་ནག་གཞུང་ལ་གནོན་ཤུགས་སྤྲད་དེ་གདུག་རྩུབ་ཆེ་བའི་དྲག་གནོན་གྱི་བྱ་སྤྱོད་དེ་དག་མཚམས་འཇོག་གིས་༧པཎ་ཆེན་རིན་པོ་ཆེ་དང་ཁོང་གི་ནང་མི་སྐུ་འཁོར་བཅས་ཀྱི་རང་དབང་སྲུང་སྐྱོབ་བྱེད་དགོས། ཞེས་བརྗོད་འདུག
འགྲོ་བ་མིའི་ཐོབ་ཐང་ལྟ་ཞིབ་ཁང་གི་གནས་ཚུལ་ནང་། ༧གོང་ས་མཆོག་དང་༧པཎ་ཆེན་རིན་པོ་ཆེ་མཆོག་རྣམ་གཉིས་ནི་བོད་ཀྱི་ཆོས་ཕྱོགས་ཀྱི་དབུ་འཁྲིད་ཡིན་པ་དང་། བོད་བརྒྱུད་ནང་བསྟན་གྱི་བླ་སྤྲུལ་ངོས་འཛིན་བྱེད་པར་ལོ་རྒྱུས་ཡུན་རིང་ལྡན་པའི་འགན་གལ་ཆེན་བཞེས་ཡོད། ཕྱི་ཟླ་ ༧ ཚེས་ ༦ ཉིན་༧གོང་ས་རྒྱལ་བ་རིན་པོ་ཆེ་མཆོག་དགུང་གྲངས་དགུ་བཅུ་བདག་གེར་བཞེས་པའི་གོ་སྟོན་འཁྲུངས་སྐར་ཡིན་པས། ༧མགོན་པོ་གང་ཉིད་ཀྱི་སྐུའི་ཡང་སྲིད་དང་བོད་བརྒྱུད་ནང་བསྟན་གྱི་མ་འོངས་པ། དེ་བཞིན། བོད་མི་མང་གི་ལས་དབང་བཅས་ཀྱི་གནས་སྟངས་ཛ་དྲག་ཅན་དུ་འགྱུར་བཞིན་ཡོད། ཅེས་བརྗོད་འདུག
ཕྱི་ལོ་ ༢༠༢༠ ལོར་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་དང་འབྲེལ་བའི་ཚོགས་སྡེ་ལྔ་ཡིས། ༧ཀུན་གཟིགས་༧པཎ་ཆེན་རིན་པོ་ཆེ་གར་སོང་ཆ་མེད་དུ་གྱུར་ནས་ལོ་ངོ་ཉེར་ལྔ་འགོར་བར་རྒྱ་ནག་གཞུང་ལ་སྐྱོན་བརྗོད་དྲག་པོ་བྱས་ཡོད་ལ། ཉེ་ལམ་ཕྱི་ཟླ་ ༥ ཚེས་ ༨ ཉིན་ཡུ་རོབ་མཉམ་འབྲེལ་མཐུན་ཚོགས་ཀྱིས་རྒྱ་ནག་གཞུང་ནས་བོད་ཀྱི་ཆོས་དད་ལ་རྡོག་རོལ་གཏོང་མུས་ཡིན་པའི་གནས་བབ་གླེང་སློང་བྱས་ཡོད་པ་མ་ཟད། ༧པཎ་ཆེན་རིན་པོ་ཆེ་མཆོག་གང་དུ་འཚོ་བཞུགས་ཡིན་མིན་གྱི་གནས་ཚུལ་མཁོ་སྤྲོད་དགོས་པའི་སྐུལ་མ་བྱས་ཡོད། དེ་བཞིན། རྒྱལ་སྤྱིའི་འགྲོ་བ་མིའི་ཐོབ་ཐང་ལྟ་ཞིབ་ཁང་གིས། ད་ལྟ་རྒྱ་ནག་གཞུང་ནས་མཉམ་འབྲེལ་རྒྱལ་ཚོགས་ཀྱི་སྐུ་ཚབ་དང་རང་དབང་ཅན་གྱི་འགྲོ་བ་མིའི་ཐོབ་ཐང་གི་ཚོགས་སྡེ། ད་དུང་གསར་འགོད་པ་སོགས་བོད་ནང་རང་དབང་གི་ཐོག་ནས་བསྐྱོད་དུ་འཇུག་དགོས་འབོད་སྐུལ་ཡང་བྱས་འདུག
༧པཎ་ཆེན་རིན་པོ་ཆེ་དང་ལྷན་དུ་༧པཎ་ཆེན་རིན་པོ་ཆེའི་ཡང་སྲིད་ངོས་འཛིན་གྱི་ཕྱག་ལས་གནང་མཁན་བཀྲ་ཤིས་ལྷུན་པོའི་མཁན་པོ་བྱ་བྲལ་རིན་པོ་ཆེ་དང་། བཀྲ་ཤིས་ལྷུན་པོའི་དགེ་འདུན་པ་སུམ་ཅུ་ལྷག་འཛིན་བཟུང་བྱས་ཏེ། ད་ལྟའང་བྱ་བྲལ་རིན་པོ་ཆེ་སྐུ་འཚོ་བཞུགས་ཡིན་མིན་དང་བདེ་འཇགས་ཡིན་མིན། གང་དུ་འཛིན་བཟུང་བཀག་ཉར་བྱས་ཡོད་མེད་ཀྱི་གནས་ཚུལ་སོགས་ཤེས་རྟོགས་གང་ཡང་ཐུབ་ཀྱི་མེད་པ་རེད།
ཕྱི་ལོ་ ༡༩༩༥ ཟླ་ ༥ ཚེས་ ༡༧ ཉིན་༧གོང་ས་མཆོག་གིས་ངོས་འཛིན་གནང་བའི་༧པཎ་ཆེན་དགེ་འདུན་ཡེ་ཤེས་འཕྲིན་ལས་ཕུན་ཚོགས་མཆོག་གར་སོང་ཆ་མེད་དུ་གྱུར་བ་དང་། ཕྱི་ལོ་ ༡༩༩༥ ཟླ་ ༡༡ ཚེས་ ༡༡ ཉིན་རྒྱ་ནག་གཞུང་གིས་བཀྲ་ཤིས་ལྷུན་པོའི་དགེ་འདུན་པ་ཁག་ཅིག་ལ་བཙན་བཀའ་བཏང་སྟེ། རྒྱལ་མཚན་ནོར་བུ་༧པཎ་ཆེན་སྐུ་ཕྲེང་བཅུ་གཅིག་པའི་ཡང་སྲིད་ལ་ངོས་འཛིན་བྱེད་དུ་བཅུག་ཡོད་པ་དང་རྒྱལ་མཚན་ནོར་བུའི་ཕ་མ་གཉིས་ནི་རྒྱ་ནག་དམར་ཤོག་གི་ཚོགས་མི་ཡིན་པ་འགྲོ་བ་མིའི་ཐོབ་ཐང་ལྟ་ཞིབ་ཁང་གིས་བརྗོད་འདུག
ཡང་། ཕྱི་ལོ་ ༢༠༡༥ ལོར་རྒྱ་ནག་གཞུང་གིས་༧གོང་ས་མཆོག་ནས་ངོས་འཛིན་གནང་བའི་༧པཎ་ཆེན་རིན་པོ་ཆེ་སྐུ་འཚོ་བཞུགས་ཡིན་པ་དང་ཁོང་མི་སུ་གཅིག་ཀྱང་ཐུག་འདོད་མེད་སྐོར་གྱི་གནས་ཚུལ་ཞིག་ཕྱིར་བསྒྲགས་ཡོད། འོན་ཀྱང་། ད་སྔ་བར་༧པཎ་ཆེན་རིན་པོ་ཆེ་མཆོག་དངོས་འབྲེལ་སྐུ་འཚོགས་ཡིན་མིན་དང་རྒྱ་ནག་གཞུང་གིས་ཁོང་མི་ག་འདྲ་ཞིག་ཏུ་སྐྱེད་བསྲིང་བྱས་ཡོད་མེད་ཐད་བསམ་ཚུལ་འདྲ་མིན་བྱུང་དང་འབྱུང་མུན་ཡིན་ལ། བོད་མིའི་སྒྲིག་འཛུགས་ཀྱི་གཙོས་བོད་པའི་གཞུང་འབྲེལ་མིན་པའི་ཚོགས་སྡེ་ཁག དེ་བཞིན་འཛམ་གླིང་མཉམ་འབྲེལ་རྒྱལ་ཚོགས་ཀྱི་གཙོས་རྒྱལ་ཁབ་ཁག་དང་འགྲོ་བ་མིའི་ཐོབ་ཐང་དང་ཆོས་དད་རང་དབང་གི་ཚོགས་སྡེ་ཁག་གཅིག་གིས་ཀྱང་༧པཎ་ཆེན་རིན་པོ་ཆེའི་གནས་སྟངས་སྐོར་ལ་ད་དུང་ཡང་ཤེས་རྟོགས་གསར་པ་གང་ཡང་བྱེད་མ་ཐུབ་པར་ལྷག་ཡོད།
གསར་འགོད་པ། སྐལ་བཟང་སྦྱིན་པ།
