རྒྱ་ནག་དམར་གཞུང་གིས་མཐོ་འབྲིང་ཐོན་ཟིན་པའི་སློབ་ཕྲུག་རྣམས་དམར་དམག་ནང་ཞུགས་ཆེད་ཨན་ཧྥེ་ཞིང་ཆེན་དང་ཝུའུ་ཧན་གྲོང་ཁྱེར། ཁྲུང་ཆིང་གྲོང་ཁྱེར་བཅས་ཀྱི་ནང་མི་དམངས་བཅིངས་གྲོལ་དམག་གི་སློབ་ཆེན་ཁག་གསུམ་གསར་འཛུགས་ལེགས་སྒྲིག་བྱ་རྒྱུ་ཡིན་སྐོར་བསྒྲགས་འདུག
རྒྱ་ནག་བདེ་སྲུང་བློན་ཆེན་ལས་ཁུངས་ཀྱི་མགྲིན་ཚབ་པ་ཅང་པིན་(Jiang Bin)། དྲ་ལམ་གྱི་པར།
ཉེ་ལམ་རྒྱ་ནག་གཞུང་གིས་ཇིང་བྷིན་(Jiang Bin) ཟེར་བ་ཞིག་རྒྱ་ནག་བདེ་སྲུང་བློན་ཆེན་ལས་ཁུངས་ཀྱི་མགྲིན་ཚབ་པར་བསྐོས་ཏེ། ཁོའི་ཐོག་དང་པོའི་རྒྱུན་ལྡན་གྱི་གསར་འགོད་གསལ་བསྒྲགས་ཤིག་གི་སྟེང་། རྒྱ་ནག་བདེ་སྲུང་བློན་ཆེན་ལས་ཁུངས་ཀྱིས་རྒྱ་ནག་གི་ཨན་ཧྥེ་ཞིང་ཆེན་དང་། ཝུ་ཧན་གྲོང་ཁྱེར། ཁྲུང་ཆིང་གྲོང་ཁྱེར་བཅས་སུ་རྒྱ་ནག་མི་དམངས་བཅིངས་གྲོལ་དམག་ཟེར་བའི་སྐམ་དམག་དམག་རིགས་སློབ་གྲྭ་ཟེར་བ་ཞིག་དང་། རྒྱ་ནག་མི་དམངས་བཅིངས་འགྲོལ་དམག་ཆ་འཕྲིན་རོགས་སྐྱོར་དཔུང་སྡེའི་བཟོ་སྐྲུན་སློབ་ཆེན། རྒྱ་ནག་མི་དམངས་བཅིངས་འགྲོལ་དམག་མཉམ་སྒྲུབ་འགན་སྲུང་དཔུང་སྡེའི་བཟོ་སྐྲུན་སློབ་ཆེན་བཅས་སློབ་ཆེན་གསུམ་གསར་འཛུགས་དང་ལེགས་སྒྲིག་ཟེར་བ་ཞིག་བྱས་ཏེ་མཐོ་འབྲིང་སློབ་ཐོན་སློབ་མ་རྣམས་བསྡུ་འཆར་འདུག
རྒྱ་ནག་གཞུང་གིས་ཧིན་བོད་མཐའ་མཚམས་སོགས་སུ་མཐའ་མཚམས་བདེ་སྲུང་སོགས་ཀྱི་སླད། བོད་མི་གཙོས་གྲངས་ཉུང་མི་རིགས་རྣམས་ཆེད་དུ་དམག་ཁོངས་སུ་ཞུགས་བཅུག་གི་ཡོད་ཅིང་། འདི་གའི་གསར་འགོད་པར་འབྲེལ་ཡོད་ཀྱིས་ཁུངས་ལྡན་གནས་ཚུལ་མཁོ་སྤྲོད་གནང་བའི་ནང་། རྒྱ་ནག་གཞུང་གི་དམག་དོན་གྱི་དོན་ཚན་ ༡༥ པའི་དགོངས་དོན་ཇི་བཞིན། ཕྱི་ལོ་ ༢༠༢༤ ཟླ་ ༡༢ ཚེས་ ༣༡ ནས་ཕོ་ལོ་བཅོ་བརྒྱད་སོན་པའི་སྐྱེས་པ་དག་གིས། རྒྱལ་ཁབ་ཀྱི་དམག་དོན་ཞབས་ཞུ་ཆེད་ཕྱི་ལོ་ ༢༠༢༥ ཟླ་ ༦ ཚེས་ ༣༠ སྔོན་ལ་ཐོ་འགོད་བྱས་ཟིན་པ་དགོས་པ་བཞིན། འདི་ལོའི་ཕྱི་ཟླ ༢ པ་ཙམ་ནས་རྒྱ་ནག་གཞུང་གིས་ཆེད་དུ་བོད་མངའ་རིས་སྤུ་ཧྲེང་དང་། རུ་ཐོག་རྫོང་ཁོངས་ཀྱི་བོད་མི་གཞོན་སྐྱེས་རྣམས་ཆེད་དུ་དམག་ལ་ཞུགས་དགོས་པའི་བཀའ་ཕབ་ཡོད་པ་མ་ཟད། གཞོན་སྐྱེས་དེ་དག་གི་ཕ་མ་སོགས་ལ་ས་གནས་སྲིད་གཞུང་གི་མི་སྣས་ཁ་པར་བཏང་ནས་དམག་ཁོངས་སུ་ཞུགས་ན། རྒྱལ་ཁབ་ཀྱིས་ས་མཚམས་གྲོང་བརྡལ་གྱི་རོགས་དངུལ་གཙོས། རོགས་དངུལ་གཞན་ཁག་དང་། བུ་ཕྲུག་གི་སློབ་ཡོན་ལའང་རོགས་རམ་བྱ་རྒྱུ་ཡིན་ལུགས་སོགས་བཤད་འདུག
ཡང་ཁོང་གིས། འདས་པའི་ཟླ་ཤས་རིང་རུ་ཐོག་ས་གནས་སྲིད་གཞུང་དང་མཐའ་སྲུང་དམག་མི་མཉམ་འབྲེལ་གྱི་ཐོག་ནས། རུ་ཐོག་རྫོང་ཁོངས་སུ་རྒྱ་ནག་དམག་ཤོག་གི་དུས་དྲན་ཟེར་བ་མང་པོ་ཞིག་སྲུང་གཙི་བྱེད་འཇུག་གི་ཡོད་ཅིང་། གཞོན་སྐྱེས་མང་དག་ཅིག་བསྡུ་སྐོང་བྱས་ཏེ། དེ་སྔ་རྒྱ་ནག་བཅིངས་གྲོལ་དམག་ནང་ཞུགས་ནས་མཐའ་སྲུང་གི་ལས་དོན་གཉེར་མྱོང་བའི་རྒན་འཁོགས་ཁག་ཅིག་ལ་ཆེད་དུ། གཞོན་སྐྱེས་རྣམས་དམག་ལ་ཞུགས་དགོས་པའི་དགེ་མཚན་དང་། མཐའ་སྲུང་གི་འགན་འཁྲི་ཟེར་བ་སོགས་ཀྱི་ཐད་ནས་སྐད་ཆ་བཤད་དུ་བཅུག་ནས། གཞོན་སྐྱེས་མང་དག་ཅིག་ཆེད་དུ་དམག་ཁོངས་སུ་ཞུགས་རྒྱུར་ཤུགས་རྒྱག་གི་ཡོད་སྐོར་སོགས་བརྗོད་བྱུང་།
དེ་བཞིན་འདི་གའི་གསར་འགོད་པར་རྒྱ་ནག་གཞུང་གིས་དམག་མི་མཁོ་བསྡུ་བྱེད་ཕྱོགས་དང་འབྲེལ་བའི་གསལ་བསྒྲགས་ཀྱི་ཡིག་ཆ་ཞིག་ལག་སོན་བྱུང་བའི་ཁྲོད། རྒྱ་ནག་གཞུང་གིས་འདི་ལོའི་ཕྱི་ཟླ་ ༨ པའི་ཚེས་ ༡༠ ཉིན་ཤེས་ཡོན་གྱི་ལག་ཁྱེར་རང་བཞིན་ལྡན་པའི་སློབ་འབྲིང་དང་། སློབ་ཆེན་སློབ་ཐོན་པ་རྣམས་ལ་དམིགས་པའི་དམག་མི་བསྡུ་ལེན་བྱ་རྒྱུ་ཡིན་ཞིང་། དམག་ཁོངས་སུ་ཞུགས་འདོད་ཡོད་མཁན་རྣམས་རང་ལོ་ ༡༨ ནས་ ༢༤ བར་ཡིན་དགོས་ཚུལ་གསལ་འདུག
དེ་བཞིན་རྒྱ་ནག་གིས་བོད་ཕྲུག་རྣམས་ལ་རྒྱ་ནག་དམར་ཤོག་གཞུང་ལ་ཤ་ཞེན་དང་རྒྱལ་སྲུང་འགན་འཁྲི་ཟེར་བ་སོགས་དྲིལ་བསྒྲགས་སྣ་ཚོགས་ཀྱི་ཐོག་ནས། བོད་ནང་གི་བོད་ཕྲུག་མང་པོ་དབྱར་དགུན་གུང་སེང་སྐབས། ཆེད་དུ་དམག་སྒར་ཁག་དང་དམག་གི་སློབ་གྲྭ་ཁག་ཏུ་དམག་སྦྱོང་བཏང་དང་གཏོང་གིན་ཡོད་པའི་ཁར། ཕྱི་ལོ་ ༢༠༠༧ ལོར་རྒྱ་ནག་དབུས་སྲིད་ལྷན་ཁང་གི་རྒྱུན་ལས་དང་། རྒྱ་ནག་དམངས་སྲིད་གྲོས་མོལ་ལྷན་ཁང་གི་རྒྱལ་ཡོངས་ཚོགས་གཙོ་ཟུར་པ་ལི་རེ་ཧེ་ཡིས་སྣེ་འཁྲིད་དེ་དམར་པོའི་མི་རབས་རྒན་པ་ཁག་ཅིག་གིས་ལས་གཞི་དེ་མགོ་འཛུགས་བྱས་ཡོད་པ་དང་། སྲིད་གཞུང་གིས་སློབ་གསོའི་ལས་རིགས་ཁྲོད་ཀྱི་དམར་པོའི་སློབ་གསོའི་མཚོན་རྟགས་ལྟ་བུར་འཛུགས་སྐྲུན་དང་སྐུལ་འདེད་ཤུགས་ཆེན་བྱེད་མགོ་བཙུགས་ནས། དམར་དམག་སློབ་ཆུང་གསར་འཛུགས་ཀྱི་ལས་གཞི་མགོ་བཙུགས་ནས་ཕྱི་ལོ་ ༢༠༡༧ ཟླ་ ༥ བར་ལོ་བཅུའི་ནང་དུ། རྒྱ་ནག་གི་ཞིང་ཆེན་དང་གྲོང་ཁྱེར་ཁག་ ༢༩ ནང་གསར་བརྗེའི་ཁུལ་རྙིང་པ་ཞེས་པར་ཁྱོན་དམར་དམག་སློབ་ཆུང་ ༢༣༡ དང་། ཕྱི་ལོ་ ༢༠༢༢ ལོའི་ཟླ ༡༢ བར་དུ་དམར་སློབ་ཁྱོན་ ༤༢༤ ལྷག་བཙུགས་ཟིན་འདུག་ལ། 《ཏང་གི་རྗེས་སུ་འགྲོ་》དང་། 《སྐར་མ་དམར་པོའི་འོད་སྣང་འཚེར་འཚེར》། དམར་དམག་སློབ་ཆུང་གི་གླུ་ཞེས་པ་སོགས་ཀྱི་དམར་གླུ་བླངས་ཏེ། སོ་སོའི་ཐོག་མའི་འབྱུང་ཁུངས་ཤེས་པར་བྱས་ཏེ། དམར་པོའི་སྙིང་སྟོབས་ཟེར་བ་རྒྱུན་འཛིན་དར་སྤེལ་གཏོང་དུ་འཇུག་དགོས་པ་ནི་དམར་སློབ་དེ་དག་གི་ཉིན་རེའི་བྱ་གཞག་དང་ཐོག་མཐའ་བར་གསུམ་གྱི་དམིགས་ཡུལ་དུ་གྱུར།
འདི་ལོའི་ཕྱི་ཟླ་ ༣ ཚེས་ ༦ ཉིན་རྒྱ་ནག་གཞུང་གི་མགྲིན་ཚབ་པ་ལྟ་བུར་གྱུར་བའི་རྒྱ་ནག་གོ་ལའི་དུས་བབ་ཀྱི་གནས་ཚུལ་ལྟར་ན། རྒྱ་ནག་གཞུང་གིས་ཕྱི་ལོ་ ༢༠༢༡ ལོར་དམག་དོན་དང་རྒྱལ་སྲུང་གི་ཆེད་མ་དངུལ་བརྒྱ་ཆ་ ༦།༨ དེ་རྒྱ་སྒོར་ཐེར་འབུམ་ ༡༣༥༥།༣༤༣ དང་། ཕྱི་ལོ་ ༢༠༢༢ ལོར་བརྒྱ་ཆ་ ༧།༡ རྒྱ་སྒོར་ཐེར་འབུམ་ ༡༤༥༠།༤༥། ཕྱི་ལོ་ ༢༠༢༣ དང་། ༢༠༢༤། ༢༠༢༥ བཅས་སུ་དམག་དོན་དང་རྒྱལ་སྲུང་གི་ཆེད་མ་དངུལ་བརྒྱ་ཆ་ ༧།༢ བཅས་ཏེ། རྒྱ་སྒོར་ཐེར་འབུམ་ ༡༥༥༣།༧ དང་། ༡༦༦༥། ༥༤ དང་ ༡༧༨༤།༦༦༥ བཅས་བཏང་དང་གཏོང་གི་ཡོད་ལུགས་གསལ་འདུག་ཀྱང་། གནད་དོན་དབྱེ་ཞིབ་པ་ཚོས། རྒྱ་ནག་གིས་དམག་དོན་གྱི་འགྲོ་གྲོན་རིགས་སྦས་གསང་ཆེད་མ་དངུལ་མི་འདྲ་བའི་རྩིས་ཁྲར་བགོས་ཡོད་སྟབས། རྒྱ་ནག་གིས་རྒྱལ་སྲུང་གི་འགྲོ་གྲོན་གསལ་བསྒྲགས་བྱས་པ་དེ་ལས་བརྒྱ་ཆ་ ༤༠ ནས་ ༥༠ བར་མང་བ་གཏོང་གི་ཡོད་ཅིང་། རྒྱ་ནག་གཞུང་གི་རྒྱལ་སྲུང་སྔོན་རྩིས་དེ་རྒྱ་གར་ལས་ཨ་སྒོར་ཐེར་འབུམ་ ༧༩ ལས་ལྡབ་གསུམ་ལྷག་གིས་མང་བ་ཡོད་པའི་ཚོད་དཔག་བྱེད་ཀྱིན་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།
