སི་ཀོ་ཊི་ལན་ཌིས་༧གོང་ས་མཆོག་གི་ཡང་སྲིད་ཀྱི་བདག་དབང་ཐད་ལངས་ཕྱོགས་བརྟན་པོ་བཟོས་འདུག

སི་ཀོ་ཊི་ལན་ཌི་གཞུང་གིས་༧གོང་ས་མཆོག་དགུང་གྲངས་ ༩༠ ཕེབས་པའི་༧སྐུའི་འཁྲུངས་སྐར་ལ་འཚམས་འདྲི་དང་སྦྲགས། ༧གོང་ས་མཆོག་གི་ཡང་སྲིད་ཀྱི་བདག་དབང་དེ་བོད་ཀྱི་ནང་པའི་ཚོགས་སྡེ་ཁག་ཁོ་ན་ལ་ཡོད་པའི་ལངས་ཕྱོགས་གསལ་བོ་བཟོས་འདུག

དེ་རིང་དབྱིན་ཇིའི་རྒྱལ་ཁབ་སི་ཀོ་ཊི་ཤིའི་གྲོས་ཚོགས་ནང་། འཛམ་གླིང་གི་ཆོས་ལུགས་ཁག་གི་དཀའ་ངལ་དང་འབྲེལ་བའི་གནད་དོན་གླེང་སློང་གནང་སྐབས། སི་ཀོ་ཊི་ཤིའི་གྲོས་ཚོགས་འཐུས་མི་སྐུ་ཞབས་རོ་སི་གྷིར་མཆོག་གིས། ནང་པ་དང་འབྲེལ་ནས་༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་ཡང་སྲིད་ཀྱི་གནད་དོན་དང་༧གོང་ས་མཆོག་དགུང་གྲངས་དགུ་བཅུ་བདག་གེར་བཞེས་པའི་གོ་སྟོན་གྱི་འཁྲུངས་སྐར་སོགས་གླེང་སློང་གནང་འདུག

སྐབས་དེར་སི་ཀོ་ཊི་ཤིའི་གྲོས་ཚོགས་འཐུས་མི་སྐུ་ཞབས་རོ་སི་གྷིར་ (Ross Greer) མཆོག་གིས། སི་ཀོ་ཊི་ལན་ཌི་གཞུང་གིས་རྒྱལ་ཁབ་འདིའི་ནང་གནས་པའི་ཆོས་ལུགས་ཚང་མར་རྒྱབ་སྐྱོར་བྱེད་ཀྱིན་ཡོད་སྟབས། སི་ཀོ་ཊི་ལན་ཌིའི་ནང་ཡོད་པའི་ནང་པའི་ཚོགས་སྡེ་ཁག་གིས་འདི་ལོའི་ཕྱི་ཟླ་ ༧ ཚེས་ ༥ ཉིན་༧གོང་ས་ཏཱ་ལའི་བླ་མ་མཆོག་དགུང་གྲངས་ ༩༠ ཕེབས་པའི་འཁྲུངས་སྐར་སྲུང་གཙི་ཞུ་རྒྱུ་ཡིན་པར་རྒྱབ་སྐྱོར་ཇི་ལྟར་བྱ་རྒྱུ་ཡིན་ནམ་ཞེས་བཀའ་འདྲི་ཞུས་འདུག

སི་ཀོ་ཊི་ལན་ཌིའི་སྤྱི་སྙོམས་དྲང་བདེན་གྱི་བློན་ཆེན་སི་ཊི་ཝར་ (Kaukab Stewart) ལགས་ཀྱིས། སི་ཀོ་ཊི་ལན་ཌིའི་ནང་ཡོད་པའི་ནང་པའི་ཚོགས་སྡེ་ཁག་གི་གཙོས་ཆོས་ལུགས་ཚང་མས་སི་ཁོ་ལན་ཌིར་ཞབས་འདེགས་རླབས་ཆེན་ཞུ་བཞིན་པར་ཆེ་མཐོང་ཆེན་པོ་བྱེད་བཞིན་ཡོད། དེར་བརྟེན། ངས་སི་ཀོ་ཊི་ལན་ཌི་གཞུང་གི་ཚབ་བྱས་ཏེ། ༧གོང་ས་ཏཱ་ལའི་བླ་མའི་དམིགས་བསལ་ཁྱད་པར་ཅན་གྱི་གོ་སྟོན་འཁྲུངས་སྐར་ལ་༧གོང་ས་ཏཱ་ལའི་བླ་མ་མཆོག་དང་སི་ཀོ་ཊི་ལན་ཌིའི་ནང་པའི་ཚོགས་སྡེ་ཁག་ལ་རྟེན་འབྲེལ་ཞུ་རྒྱུ་ཡིན། ཁོང་ཅག་གིས་རྒྱལ་ཁབ་འདིའི་ནང་ཞི་བདེ་དང་བྱམས་སྙིང་རྗེ། རིག་གཞུང་སྣ་མང་གིཆ་ཤས་བཅས་གོང་འཕེལ་བཏང་ཡོད། ཅེས་ལན་འདེབས་བྱས་འདུག

ཡང་སི་ཀོ་ཊི་ཤིའི་གྲོས་ཚོགས་འཐུས་མི་སྐུ་ཞབས་རོ་སི་གྷིར་ (Ross Greer) མཆོག་གིས། ད་ལྟ་ནང་པའི་ཚོགས་སྡེ་དང་འབྲེལ་ནས། སི་ཀོ་ཊི་ལན་ཌི་དང་འཛམ་གླིང་ལ་མཚོན་ན་འདི་ལོར་༧གོང་ས་ཏཱ་ལའི་བླ་མ་མཆོག་གི་གོ་སྟོན་འཁྲུངས་སྐར་སྲུང་གཙི་ཞུ་བཞིན་པ་དེ་རེད། ༧གོང་ས་ཏཱ་ལའི་བླ་མའི་༧སྐུའི་ཡང་སྲིད་ཀྱི་གནད་དོན་ཡང་རེད། ལོ་ངོ་སུམ་ཅུའི་ཡར་སྔོན་དུ་༧པཎ་ཆེན་སྐུ་ཕྲེང་བཅུ་པ་མཆོག་སྐུ་ཞིང་ལ་ཕེབས་རྗེས། རྒྱ་ནག་གཞུང་གིས་༧པཎ་ཆེན་རིན་པོ་ཆེའི་ཡང་སྲིད་དུ་ངོས་འཛིན་གནང་བའི་༧པཎ་ཆེན་སྐུ་ཕྲེང་བཅུ་གཅིག་པ་མཆོག་གི་དབུས་པའི་ནང་མི་སྐུ་འཁོར་དང་བཅས་པ་འཛིན་བཟུང་བཙན་འཁྲིད་བྱས་ཡོད་པ་མ་ཟད། རྒྱ་ནག་གཞུང་གིས་པཎ་ཆེན་རིན་པོ་ཆེ་རྫུན་མ་ཞིག་བསྐོ་གཞག་བྱས་ཡོད་པས། དབྱིན་ཇིའི་མི་མང་དང་སི་ཀོ་ཊི་ལན་ཌི་ལ་རྒྱ་ནག་གཞུང་གིས་༧པཎ་ཆེན་རིན་པོ་ཆེའི་ཡང་སྲིད་རྫུན་མ་བསྐོ་གཞག་བྱས་པ་ལྟར་༧གོང་ས་ཏཱ་ལའི་བླ་མའི་ཡང་སྲིད་ཀྱང་ད་ལྟར་བྱ་སྲིད་པར་སེམས་འཚབ་ཡོད། སི་ཀོ་ཊི་ལན་ཌིས་འཛམ་གླིང་གི་ཆོས་ལུགས་འདྲ་མིན་གྱི་དབུ་འཁྲིད་རྣམས་དང་བཟང་ཕྱོགས་ཀྱི་འབྲེལ་བ་འཛིན་འདོད་ཡོད་སྟབས། ༧གོང་ས་ཏཱ་ལའི་བླ་མ་མཆོག་སི་ཀོ་ཊི་ལན་ཌིའི་ནང་ཐེངས་མང་རིང་ཆིབས་བསྒྱུར་བསྐྱངས་ཡོད། ཅེས་དང་། སི་ཀོ་ཊི་ལན་ཌི་གཞུང་གིས་བོད་ཀྱི་ནང་པའི་རྗེས་འཇུག་པ་དག་གིས་ནང་པའི་སྲོལ་རྒྱུན་བཞིན་ངོས་འཛིན་བྱས་པའི་༧གོང་ས་ཏཱ་ལའི་བླ་མ་མཆོག་གི་ཡང་སྲིད་ལ་རྒྱབ་སྐྱོར་བྱེད་དམ་ཞེས་བཀའ་འདྲི་ཞུས་སོང་།

སི་ཀོ་ཊི་ལན་ཌིའི་སྤྱི་སྙོམས་དྲང་བདེན་གྱི་བློན་ཆེན་སི་ཊི་ཝར་ (Kaukab Stewart) ལགས་ཀྱིས། སི་ཁོ་ལན་ཌིས་ཆོས་ལུགས་དད་མོས་རང་དབང་དང་འགྲོ་བ་མིའི་ཐོབ་ཐང་ལ་རྒྱབ་སྐྱོར་བྱས་པའི་ཐོག་ནས། གཞན་གྱིས་ཐེ་གཏོགས་གང་ཡང་མེད་པར་བོད་ཀྱི་ནང་པའི་ཚོགས་སྡེ་ཁག་ལ་༧གོང་ས་ཏཱ་ལའི་བླ་མ་མཆོག་གི་༧སྐུའི་ཡང་སྲིད་ངོས་འཛིན་བྱེད་པའི་ཐོབ་ཐང་ཡོད་ཅེས་ལན་འདེབས་གནང་འདུག

གསར་འགོད་པ། སྐལ་བཟང་སྦྱིན་པ།