བོད་མི་གཉིས་ཀྱིས་ཧྥ་རན་སིའི་ནང་ཞི་བའི་གོམ་བགྲོད་བྱེད་བཞིན་འདུག

བོད་མི་བསོད་ནམས་དབང་འདུས་དང་བསོད་ནམས་སྟོབས་རྒྱལ་གཉིས་ཀྱིས་ཧྥ་རན་སི་བྷི་རན་སོན་མངའ་སྡེ་ནས་རྒྱལ་ས་པེ་རི་སི་བར་དུ་ཞི་བའི་གོམ་བགྲོད་ཀྱི་ལམ་ནས་བོད་དོན་དྲིལ་བསྒྲགས་བྱེད་བཞིན་འདུག

ཟླ་འདིའི་ཕྱི་ཚེས་ ༢༢ ཉིན་ཧྥ་རན་སིའི་མངའ་སྡེ་བྷི་རན་སོན་ ( birancon) ནས་བོད་མི་བསོད་ནམས་དབང་འདུས་དང་བསོད་ནམས་སྟོབས་རྒྱལ་གཉིས་ཀྱིས་བོད་ནང་གི་ཛ་དྲག་གནས་སྟངས་དྲིལ་བསྒྲགས་ཆེད་ཞི་བའི་གོམ་བགྲོད་ཅིག་མགོ་བཙུགས་ཏེ།  ཕྱི་ཚེས་ ༢༧ ཉིན་ཧྥ་རན་སིའི་བྱང་ཕྱོགས་མངའ་སྡེ་གྷ་རེན་ནོ་བྷེལ་( grenoble ) ལ་འབྱོར་ཡོད་པ་དང་།  ཕྱི་ཚེས་ ༢༩ ཉིན་ནས་ཧྥ་རན་སིའི་མངའ་སྡེ་ལེ་ཨོན་( Lyon ) ནས་པེ་རི་སི་( paris ) བར་སྤྱི་ལེ་ ༧༠༠ ལྷག་གོམ་བགྲོད་བྱེད་བཞིན་ཡོད་ཅིང་། ད་ལྟའི་ཆར་བོད་མི་བསོད་ནམས་དོན་གྲུབ་ཁོང་གཉིས་དང་ལྷན་དུ་ཞི་བའི་གོམ་བགྲོད་བྱེད་བཞིན་ཡོད་འདུག

འདི་གའི་གསར་འགོད་པས་ཁ་པར་བརྒྱུད་ཐེངས་འདིའི་ཞི་བའི་གོམ་བགྲོད་ཀྱི་དམིགས་ཡུལ་སྐོར་དྲིས་པར་བསོད་ནམས་དབང་འདུས་ལགས་ཀྱིས། ད་ལྟའི་ཆར་བོད་ནང་གི་བོད་མིའི་གནས་སྟངས་ཧ་ཅང་ཛ་དྲག་ཆགས་ཡོད་པས། ཐེངས་འདིའི་ལས་འགུལ་ཁྲོད་རྒྱ་ནག་གཞུང་གིས་བོད་ཀྱི་བྱིས་པ་ས་ཡ་གཅིག་བཙན་གྱིས་བཅའ་སྡོད་སློབ་གྲྭར་བཅུག་སྟེ་རྒྱ་སྒྱུར་སློབ་གསོ་སྤེལ་བཞིན་ཡོད་པ་དང་། དེས་བོད་མིའི་སྐད་ཡིག་དང་ངོ་བོ་བཅས་རྩ་མེད་གཏོང་གི་ཡོད་པ་མ་ཟད། རྒྱལ་སྤྱིའི་ཚོགས་སྡེ་ཁག་གིས་ཀྱང་རྒྱ་ནག་གིས་བོད་ཀྱི་བྱིས་པ་རྣམས་བཙན་གྱིས་བཅའ་སྡོད་སློབ་གྲྭར་འཇུག་བཞིན་པ་དེ་ནི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་གནད་དོན་ཚབས་ཆེན་ཞིག་ཡིན་པའི་སེམས་འཚབ་བསྟན་ཡོད། ༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་རྗེ་བཙུན་བསྟན་འཛིན་དགེ་འདུན་ཡེ་ཤེས་འཕྲིན་ལས་ཕུན་ཚོགས་དཔལ་བཟང་པོ་མཆོག་གང་མགྱོགས་ཀློད་གྲོལ་གཏོང་དགོས་པ། རྒྱ་ནག་གཞུང་གིས་བོད་ནང་གི་འབྲོག་པ་རྣམས་རྒྱ་ནག་གིས་འཛུགས་སྐྲུན་བྱས་པའི་ཁང་པའི་ནང་གནས་སྤོར་བྱེད་དུ་བཅུག་སྟེ། འབྲོག་པའི་འཚོ་བའི་གནས་སྟངས་ཐོག་དྲག་གནོན་དང་དཀའ་ངལ་ཤུགས་ཆེན་སྤྲོད་བཞིན་ཡོད་པ་སོགས་མཚམས་འཇོག་དགོས་པར་དམིགས་ནས་ལས་འགུལ་སྤེལ་བ་ཞིག་ཡིན་ལ།  དེ་བཞིན་བོད་ཀྱི་གཞོན་སྐྱེས་རྣམས་དམིགས་བསལ་བོད་དོན་ཐོག་སེམས་ཤུགས་འཕར་མ་ཞིག་སྐྱེ་དགོས་པའི་འབོད་སྐུལ་ཞུ་བཞིན་ཡོད། ཅེས་འགྲེལ་བརྗོད་གནང་བྱུང་།

དེ་བཞིན་ཁོང་གིས། ང་ཚོས་ཐེངས་འདིའི་ལས་འགུལ་ཧྥ་རན་སིའི་བྷི་རན་སོན་མངའ་སྡེ་ནས་མགོ་བཙུགས་པ་ཡིན། དེ་ནི་བོད་ནང་བཞིན་ས་ཆ་ཚང་མ་གངས་རིས་བསྐོར་ཡོད། ཉིན་དང་པོའི་ནང་སྤྱི་ལེ་ ༢༦ རིང་ཞི་བའི་གོམ་བགྲོད་བྱས་པ་ཡིན། རྗེས་སུ་ཉིན་རེའི་ནང་སྤྱི་ལེ་ ༣༠ ལྷག་རིང་གོམ་བགྲོད་བྱེད་ཐུབ་པ་བྱུང་། གོམ་བགྲོད་རྒྱུན་རིང་བྱས་ཏེ་མི་མེད་སའི་ལམ་ཁར་སླེབས་དུས་ངལ་གསོ་རྒྱག་གི་ཡོད། ལམ་ཁ་ཁག་ཅིག་ཏུ་ཆུ་འཐུང་རྒྱུ་རག་གི་མི་འདུག དེ་མ་གཏོགས་དམིགས་བསལ་དཀའ་ངལ་ཅི་ཡང་འཕྲད་མ་སོང་། ཧྥ་རན་སིའི་ས་གནས་བོད་མི་རྣམས་ཀྱིས་རྒྱབ་སྐྱོར་ཡག་པོ་བྱས་བྱུང་། དེ་བཞིན་གོམ་བགྲོད་ཀྱི་སྐབས་སུ་ཧྥ་རན་སིའི་མི་མང་རྣམས་ཀྱིས་དོ་སྣང་ཡག་པོ་བྱེད་ཀྱི་འདུག  བོད་དོན་ཐོག་སྐད་ཆ་མང་པོ་དྲིས་ཏེ་བོད་དོན་ལ་རྒྱབ་སྐྱོར་ཡོད་པའི་རྣམ་འགྱུར་སྟོན་གྱི་འདུག ཅེས་འགྲེལ་བརྗོད་གནང་བྱུང་།

སྤྱིར་ཐེངས་འདིའི་བོད་མི་བསོད་ནམས་དབང་འདུས་དང་བསོད་ནམས་སྟོབས་རྒྱལ་གཉིས་ཀྱི་བོད་དོན་དྲིལ་བསྒྲགས་ཀྱི་ལས་འགུལ་ཁྲོད། བོད་དེ་ནང་པའི་རིག་གཞུང་གིས་ཕྱུག་པའི་རང་བཙན་གཙང་མའི་རྒྱལ་ཁབ་ཅིག་ཡིན་པ་ནས། ཕྱི་ལོ་ ༡༩༥༠ ཡས་མས་སུ་རྒྱ་ནག་གཞུང་གིས་བཙན་འཛུལ་བྱས་ཏེ། ༧གོང་ས་མཆོག་དང་བོད་མིའི་སྒྲིག་འཛུགས་རྒྱ་གར་ནང་སྐྱབས་བཅོལ་དུ་གནས་དགོས་བྱུང་བའི་བརྒྱུད་རིམ། ད་ལྟའི་བོད་ནང་གི་བཅའ་སྡོད་སློབ་གྲྭའི་གནས་སྟངས། བོད་མི་ཞིང་འབྲོག་མང་ཚོགས་བཙན་གྱིས་གནས་སྤོར་བྱེད་དུ་འཇུག་བཞིན་པའི་སྲིད་ཇུས་ཀྱི་ཤུགས་རྐྱེན། ༧ཀུན་གཟིགས་པཎ་ཆེན་རིན་པོ་ཆེ་མཆོག་འཛིན་བཟུང་བཙན་ཁྲིད་བྱས་ཏེ། ཚབ་ཏུ་རྒྱལ་མཚན་ནོར་བུ་བསྐོ་གཞག་གིས་བོད་བརྒྱུད་ནང་བསྟན་གྱི་སྤྲུལ་སྐུའི་ལམ་ལུགས་ལ་ཐེ་གཏོགས་བྱེད་བཞིན་པ། རྒྱ་གཞུང་གིས་དངོས་ཤུགས་བརྒྱུད་གསུམ་གྱི་ཐོག་ནས་བོད་ཀྱི་ལོ་རྒྱུས་དང་བོད་དོན་སྐོར་ལ་འཁྱོག་བཤད་དང་ལོག་འགྲེལ་འདྲ་མིན་བྱས་ཏེ། རྒྱལ་སྤྱིའི་སྟེང་བོད་དེ་རྒྱ་ནག་གི་ཆ་ཤས་ཤིག་ཡིན་ཚུལ་སྒྲུབ་བཞིན་པ་སོགས་ཀྱི་གནས་ཚུལ་ཧྥ་རན་སིའི་མི་མང་ལ་ངོ་སྤྲོད་གནང་གི་ཡོད་འདུག

གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།