བོད་ཆབ་མདོ་སྟེང་ཆེན་ཁུལ་དུ་ས་རུད་ཀྱི་གོད་ཆག་བྱུང་ནས་ད་བར་ཉུང་མཐར་མི་གྲངས་ ༣ རྐྱེན་འདས་དང་མི་གྲངས་ ༧ གར་སོང་ཆ་མེད་དུ་གྱུར་བའི་གནས་ཚུལ་ཐོན་འདུག
Rescuers work at the site of the landslide in Muta Township, Dengqen County, southwest China’s Xizang Autonomous Region, June 2, 2025. (Xinhua)
ཟླ་འདིའི་ཕྱི་ཚེས་ ༡ ཉིན་བོད་ཆབ་མདོ་གྲོང་ཁྱེར་གྱི་སྟེང་ཆེན་རྫོང་ཁོངས་སུ་ས་རུད་བྱུང་ནས་ད་བར་ཉུང་མཐར་མི་གྲངས་ ༣ རྐྱེན་འདས་དང་མི་གྲངས་ ༧ གར་སོང་ཆ་མེད། དེ་བཞིན་མི་གྲངས་ ༢ ལ་རྨས་སྐྱོན་ཕོག་པའི་གནས་ཚུལ་ཐོན་ཡོད་སྟབས། རྒྱ་ནག་གཞུང་ཕྱོགས་ཀྱིས་ཉེན་སྐྱོབ་མི་སྣ་ ༥༠༠ ལྷག་ཡུལ་དངོས་སུ་ཆེད་གཏོང་གིས་མྱུར་སྐྱོབ་ཀྱི་ལས་དོན་ལ་གཞོལ་མུས་ཡིན་ལུགས་བསྒྲགས་པ་ལས། ཡུལ་དངོས་ཀྱི་དངོས་ཡོད་ཀྱི་གནས་སྟངས་ཐད་ལ་གསལ་ཆ་གང་ཡང་མེད་པ་རེད།
རྒྱ་ནག་གཞུང་ཕྱོགས་ཀྱིས། ད་ལྟ་རྨས་སྐྱོན་ཕོག་པའི་མི་རྣམས་སྨན་ཁང་དུ་བདེ་འཇགས་ཀྱི་ཐོག་ནས་སྨན་བཅོས་བྱེད་མུས་ཡིན་པའི་ཁར། གཞུང་འབྲེལ་གྱི་ཐོག་ནས་མེ་གསོད་རུ་ཁག་དང་། སྨན་བཅོས་ལྟ་སྐྱོང་ཚན་པ། མྱུར་སྐྱོབ་རུ་ཁག་ཚུད་པའི་མི་གྲངས་ ༥༠༠ ལྷག་ཡུལ་དངོས་སུ་ཆེད་གཏོང་བྱས་ཡོད་ལུགས་དང་། རང་བྱུང་གོད་ཆག་དེ་ལས་གྲོལ་སླད་ཆབ་མདོ་གྲོང་ཁྱེར་སྲིད་གཞུང་གིས་རྒྱ་སྒོར་ས་ཡ་ལྔ་ཡིས་རོགས་འདེགས་བྱས་ཡོད་ལུགས་བསྒྲགས་ཡོད་ཀྱང་། ས་ཁམས་ཆེད་མཁས་པ་དག་གིས་ཡུལ་དངོས་དེར་སླར་ཡང་ས་རུད་ཀྱི་གོད་ཆག་འབྱུང་ཉེན་ཡོད་པའི་ཉེན་བརྡ་བཏང་འདུག
འདི་གའི་གསར་འགོད་པས་བོད་ནང་གི་འབྲེལ་ཡོད་ཁག་ཅིག་ལ་འབྲེལ་བ་བྱས་ཏེ། བོད་སྟེང་ཆེན་ཁུལ་དུ་ས་རུད་ཀྱི་གོད་ཆག་བྱུང་བ་དང་འབྲེལ་བའི་སྐོར་ལ་འདྲི་སྐབས། རྒྱ་ནག་གཞུང་ཕྱོགས་ཀྱི་གསར་ལམ་ཁག་ཏུ་ས་རུད་སྐོར་གྱི་གནས་ཚུལ་ཐོན་པ་མ་གཏོགས། ཡོངས་ཁྱབ་ཀྱི་ཐོག་ནས་གོད་ཆག་དེ་དང་འབྲེལ་བའི་གནས་ཚུལ་སྐོར་ལ་དམ་དྲག་བྱེད་ཀྱིན་ཡོད་ནའང་། མི་སྒེར་གྱི་སྤྱི་ཚོགས་དྲ་ལམ་ཁག་ཏུ་ཐོན་པའི་བརྙན་པར་ཁྲོད། ཆེད་དུ་དབྱར་རྩ་བརྐོ་བར་ཡོང་མཁན་གྱི་སྡོད་གུར་ཡོད་ས་ཞིག་ཏུ། ས་རུད་བྱུང་ནས་མང་ཚོགས་ཀྱི་རླངས་འཁོར་རྣམས་ས་རུད་ཀྱིས་བཅག་པ་དང་། མི་མང་ལ་གནོད་འཚེ་ཐེབས་ཡོད་སྐོར་སོགས་བརྗོད་བྱུང་།
སྤྱིར་རྒྱ་ནག་གཞུང་གིས་བོད་ནང་དུ་ཆབ་སྲིད་ཀྱི་གནད་དོན་གཙོས། རང་བྱུང་གོད་ཆག་སོགས་དང་འབྲེལ་བའི་གནས་ཚུལ་མང་དག་ཅིག་གི་ཐད་ལ་འཁྱོག་བརྗོད་དང་། སྦས་སྐུང་སོགས་བྱེད་ཀྱི་ཡོད། དཔེར་ན། རྒྱ་ནག་གཞུང་གིས་འདས་པའི་ལོ་ཤས་རིང་ཧིན་བོད་མཐའ་མཚམས་ཁུལ་གྱི་གྲོང་བརྡལ་རྣམས་འཛུགས་སྐྲུན་གྱིས་སྤྱི་ཚོགས་གསར་པའི་ལམ་སྣེ་ཟིན་ཡོད་ལུགས་ཀྱི་དྲིལ་བསྒྲགས་ཤུགས་ཆེན་བྱས་ནའང་། འདི་ལོར་བོད་དིང་རི་ཁུལ་དུ་ས་ཡོམ་གྱི་གོད་ཆག་འབྱུང་སྐབས། རྒྱལ་སྤྱིའི་སྤྱི་ཚོགས་ཀྱིས་རྒྱ་ནག་གཞུང་གིས་བོད་ནང་འཛུགས་སྐྲུན་བྱས་ཡོད་ལུགས་བཤད་པ་ཁ་ཙམ་ཡིན་པའི་བདེན་དཔང་གསལ་པོ་རྙེད་ཡོད།
སྤྱིར་རྒྱ་ནག་གཞུང་གིས་བོད་ནང་དུ་ཤིང་ནགས་གཅོད་བྲེག་དང་། གཏེར་ཁ་སྔོག་འདོན། དེ་བཞིན་ཆུ་རགས་གསར་རྒྱག་བཅས་ཀྱི་དབང་གིས་བོད་ནང་དུ་གནམ་གཤིས་འགྱུར་ལྡོག་ཕྱིན་ནས། འདི་ལོ་གཅིག་པུར་རང་བྱུང་གོད་ཆག་གི་དཀའ་ངལ་མི་ཉུང་བ་ཞིག་ཕྲད་དང་འཕྲད་མུས་ཡིན་པའི་ཁྲོད། འདི་ལོའི་ལོ་མགོར་བོད་དིང་རི་ཁུལ་དང་ཁྱུང་མཆུ་ཁུལ་དུ་ས་ཡོམ་གྱི་གོད་ཆག་བྱུང་ནས་མི་རྒྱུ་གཉིས་ལ་གོད་ཆག་ཤུགས་ཆེན་ཐེབས་པ་དང་། བོད་ཛམ་ཐང་ཁུལ་དུ་ཚ་དྲོད་ཀྱི་དབང་གིས་ནགས་ཚལ་མེས་འཚིགས་པ་སོགས་ཀྱི་གནས་ཚུལ་ཐོན་ཡོད།
གསར་འགོད་པ། དཔལ་ལྡན།
