རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐོག་གྲོས་ཆོད་དོན་ཚན་ ༦ གཏན་འབེབས་བྱུང་།

བསྒྲགས་གཏམ་ཉེར་བཞི་དང་གྲོས་ཆོད་དྲུག་གཏན་འབེབས་ཀྱིས་ཐོག་ནས་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་དགུ་བ་མཇུག་བསྡུས།

ཁ་སང་དང་དེ་རིང་བཅས་ཉིན་གྲངས་གཉིས་རིང་ཉི་ཧོང་གི་རྒྱལ་ས་ཊོག་ཡོ་རུ། བོད་མི་མང་སྤྱི་འཐུས་ལྷན་ཚོགས་དང་ཉི་ཧོང་གྲོས་ཚོགས་བོད་དོན་རྒྱབ་སྐྱོར་ཚོགས་པ་གཉིས་མཉམ་འབྲེལ་གྱི་གོ་སྒྲིག་འོག རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་ ༩ པ་འཚོགས་ཡོད་ཅིང་། ད་ལན་གྱི་ཚོགས་ཐེངས་ཐོག་བསྒྲགས་གཏམ་དོན་ཚན་ ༢༤ དང་གྲོད་ཆོད་དོན་ཚན་ ༦ གཏན་འབེབས་བྱུང་བའི་ཁྲོད། ༧གོང་ས་རྒྱལ་བ་རིན་པོ་ཆེ་མཆོག་གི་༧སྐུའི་ཡང་སྲིད་ཀྱི་བདག་དབང་དེ་༧གོང་ས་རྒྱལ་བ་རིན་པོ་ཆེ་མཆོག་དང་དགའ་ལྡན་ཕོ་བྲང་ཁོ་ན་ལས་གཞན་སུ་ལའང་མེད་སྐོར་སོགས་གསལ་འདུག

ཡོངས་ཁྱབ་བསྒྲགས་གཏམ་དོན་ཚན་ ༢༤ ཡོད་པའི་ཁྲོད། ཕྱི་ལོ་ ༡༩༥༠ ནས་བཟུང་རྒྱ་ནག་གིས་བཙན་འཛུལ་མ་བྱས་གོང་། བོད་ནི་ལོ་རྒྱུས་ཐོག་རང་བཙན་ཡོད་པའི་རྒྱལ་ཁབ་ཅིག་ཡིན་པ་ངོས་འཛིན་བྱེད་ཀྱི་ཡོད། རྒྱ་ནག་གཞུང་གིས་བོད་ནང་གི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བ་དང་། དྲག་གནོན་གྱི་སྲིད་ཇུས་ལག་བསྟར་བྱེད་བཞིན་པར་རྒྱབ་སྐྱོར་མེད། བོད་མི་རྣམས་ཀྱིས་མུ་མཐུད་དུ་རང་དབང་དང་ཐོབ་ཐང་གི་ཆེད་འཐབ་རྩོད་བྱེད་པར་རྒྱབ་སྐྱོར་ཡོད། དབུ་མའི་ལམ་གྱི་ཐོག་ནས་བོད་རྒྱའི་དཀའ་རྙོག་སེལ་སླད། རྒྱ་ནག་གཞུང་གིས་ཆ་རྐྱེན་གང་ཡང་མེད་པའི་ཐོག་ནས་༧གོང་ས་རྒྱལ་བ་རིན་པོ་ཆེ་མཆོག་གི་སྐུ་ཚབ་དང་བོད་མིའི་སྒྲིག་འཛུགས་ཀྱི་སྲིད་སྐྱོང་དང་ལྷན་དུ་གྲོས་མོལ་བསྐྱར་གསོ་བྱ་དགོས་པའི་འབོད་སྐུལ་ཞུ་བཞིན་ཡོད། རྒྱ་ནག་གཞུང་གིས་བོད་ནང་གི་བོད་ཕྲུག་རྣམས་བཙན་གྱིས་བཅའ་སྡོད་སློབ་གྲྭར་བཅུག་སྟེ་རྒྱ་སྒྱུར་སློབ་གསོ་སྤྲོད་བཞིན་པ་དང་། བོད་མི་རིགས་རྩ་མེད་བཟོ་བའི་སྲིད་ཇུས་ལག་བསྟར། དེ་བཞིན་བོད་ནང་མུ་མཐུད་དུ་འགྲོ་བ་མིའི་ཐོབ་ཐང་རྡོག་རོལ་གཏོང་བར་སྐྱོན་བརྗོད་བྱེད་ཀྱི་ཡོད། ཅེས་འཁོད།

ཡང་བསྒྲགས་གཏམ་ཁྲོད། རྒྱ་ནག་གཞུང་གིས་བོད་ནང་རྒྱལ་མཚམས་ལས་བརྒལ་བའི་དྲག་གནོན་བྱས་ཏེ། བོད་མི་རྣམས་ལ་སོ་ལྟ་བྱེད་བཞིན་པ། ལྷག་པར་ཝི་ཏི་ནམ་དུ་སྤྲུལ་སྐུ་ཧཱུྃ་ཀར་རྡོ་རྗེ་མཆོག་སྐུ་དཀྲོངས་པའི་གནས་ཚུལ་སོགས་ཕྱིའི་རྒྱལ་ཁབ་ཁག་ཏུ་ཡོད་པའི་བོད་མི་རྣམས་ལ་ཐེ་ཇུས་བྱེད་བཞིན་པར་དོ་སྣང་བྱེད་ཀྱི་ཡོད། རྒྱ་གཞུང་གིས་༧པཎ་ཆེན་སྐུ་ཕྲེང་བཅུ་གཅིག་པ་མཆོག་དང་བོད་ཀྱི་ཆབ་སྲིད་བཙོན་པ་རྣམས་ཀློད་གྲོལ་གཏོང་དགོས་པ་དང་། རྒྱལ་ཁབ་ཁག་གིས་བོད་མི་རྣམས་ཀྱི་འཚེ་མེད་ཞི་བའི་འཐབ་རྩོད་དང་། བོད་ཀྱི་རིག་གཞུང་སྲུང་སྐྱོབ་དང་། རང་དབང་། བོད་མིའི་སྒྲིག་འཛུགས་ལ་ཕྱི་ནང་གཉིས་ཀའི་ཐོག་ནས་རྒྱབ་སྐྱོར་གནང་རོགས། ༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་ཡང་སྲིད་ངོས་འཛིན་གནང་ཕྱོགས་ནི་ཆོས་ལུགས་ཀྱི་གནད་དོན་ཞིག་ཡིན་པ་དང་། རྒྱ་ནག་གཞུང་གིས་ཐེ་ཇུས་བྱེད་ཆོག་གི་མེད། འཛམ་གླིང་ཁྱོན་ཡོངས་སུ་བོད་ཀྱི་ཁོར་ཡུག་གི་གལ་གནད་དང་། བོད་མིའི་ཐོབ་ཐང་སོགས་ཀྱི་སྐོར་ལ་གོ་རྟོགས་སྤེལ་རྒྱུ་ཡིན། གྲོས་ཚོགས་འཐུས་མི་རྣམས་ཀྱིས་མུ་མཐུད་དུ་བོད་དོན་རྒྱབ་སྐྱོར་གྱི་ཚོགས་ཆེན་འཚོག་རྒྱུ་དང་། རྒྱ་ནག་གཞུང་གིས་བོད་ནི་གནའ་སྔ་མོ་ནས་རྒྱ་ནག་དང་ཁ་བྲལ་ཐབས་མེད་པའི་ཆ་ཤས་ཤིག་ཡིན་ཚུལ་བརྗོད་པའི་འགྲེལ་ལོག་དང་འཁྱོག་བཤད་བྱེད་བཞིན་པ་རྣམས་ལ་ངོས་ལེན་མེད། རྒྱ་ནག་གཞུང་གིས་བོད་ཅེས་པའི་ཐ་སྙད་ཀྱི་ཚབ་ཏུ་ཞི་ཙང་ (Xizang) ཟེར་བའི་ཚིག་བེད་སྤྱོད་བྱེད་བཞིན་པར་ངོས་ལེན་མེད། ཅེས་སོགས་འཁོད་འདུག

དེ་བཞིན་གཏན་འབེབས་གྲོད་ཆོད་དྲུག་གི་ཁྲོད། ༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་གོ་སྟོན་སྲུང་གཙི་ཞུ་རྒྱུ་དང་། ༧མགོན་པོ་གང་ཉིད་མཆོག་གིས་འགྲོ་བ་མི་གཅིག་གྱུར་དང་། འཚེ་མེད་ཞི་བ། འགྲོ་བ་མིའི་ཐོབ་ཐང་། བཟོད་སྒོམ། ཁོར་ཡུག་གི་གོ་རྟོགས། དམངས་གཙོའི་དོན་དུ་ཕྱག་ལས་གནང་བར་ཆེ་བསྟོད་ཞུ་ཡི་ཡོད། བོད་མིའི་སྒྲིག་འཛུགས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་ཕྱི་ལུགས་ལྟར་དགུང་ལོ་ ༩༠ ཕེབས་པའི་༧སྐུའི་གོ་སྟོན་སྲུང་གཙི་དང་། བྱམས་བརྩེའི་ལོ་སྲུང་གཙི་ཞུ་རྒྱུར་མཉམ་ཞུགས་བྱ་རྒྱུ་དང་། ༧གོང་ས་མཆོག་ནས་འཛམ་གླིང་ཞི་བདེ་དང་། འགྲོ་བ་མིའི་ཐོབ་ཐང་། རིག་གཞུང་མི་ཉམས་རྒྱུན་འཛིན། ཆོས་ལུགས་ཕན་ཚུན་མཐུན་སྒྲིལ་སླད་ཕྱག་ལས་གནང་བར་ཆེ་བསྟོད་ཞུ་ཡི་ཡོད། ༧གོང་ས་མཆོག་གི་ཐུགས་བསྐྱེད་དམ་བཅའ་བཞི་ལ་ཆོད་སེམས་བརྟན་པོའི་རྒྱབ་སྐྱོར་བྱེད་ཀྱི་ཡིན། ༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་ཡང་སྲིད་ངོས་འཛིན་གྱི་བདག་དབང་༧གོང་ས་མཆོག་སྐུ་སྒེར་དང་དགའ་ལྡན་ཕོ་བྲང་ཁོ་ནར་ཡོད། ཅེས་གསལ་འདུག

སྤྱིར་ཉི་ཧོང་ནི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་མི་མང་ཤོས་ཤིག་ཡིན་པ་མ་ཟད། འདི་ལོར་འཛམ་གླིང་ས་ཕྱོགས་གང་སར་ནས་དངོས་ཤུགས་གཉིས་ནས་བོད་དོན་རྒྱབ་སྐྱོར་བ་མང་དག་ཅིག་གིས་མཉམ་ཞུགས་གནང་ཡོད་སྟབས། ཉི་ཧོང་གི་རྒྱལ་ས་ཊོག་ཡོར་རྟེན་གཞི་བྱས་པའི་རྒྱ་ནག་གཞུང་ཚབ་ཁང་གིས་ངོ་རྒོལ་གྱི་བསྒྲགས་གཏམ་སྤེལ་ནས་སྐྱོན་བརྗོད་ཤུགས་ཆེན་བྱས་ཡོད་ཀྱང་། དེ་རིང་བོད་ཀྱི་བརྙན་འཕྲིན་ཚན་པས་ཚོགས་ཞུགས་གྲོས་ཚོགས་འཐུས་མི་ཁག་ཅིག་ལ་བཅར་འདྲི་བྱས་པའི་ཁྲོད། གྲོས་ཚོགས་འཐུས་མི་དང་བོད་དོན་རྒྱབ་སྐྱོར་བ་སོགས་ཀྱིས་ད་ལན་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་དེ་དོན་སྙིང་ལྡན་པ་ཞིག་དང་བོད་དོན་ཐད་སྔར་ལས་ལྷག་པའི་བློ་སྐྱེས་མི་དམན་པ་ཞིག་བྱུང་ཡོད་སྐོར་སོགས་གསུངས་འདུག

འདི་ལོའི་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་དེ་ཉི་ཧོང་གི་རྒྱལ་ས་ཊོག་ཡོ་རུ་འཚོགས་ཡོད་ཅིང་། ད་ཐེངས་ཀྱི་ཚོགས་ཆེན་དེའི་ཐོག་འཛམ་གླིང་རྒྱལ་ཁབ་ ༢༩ ཡི་སྐུ་ཚབ་དང་གྲོས་ཚོགས་འཐུས་མི་ ༡༤༢ ཡིས་མཉམ་ཞུགས་བྱས་ཏེ། བོད་དོན་འཐབ་རྩོད་ཀྱི་འདས་མ་ད་གསུམ་སྐོར་ལ་བགྲོ་གླེང་གནང་ཡོད་འདུག་ལ། རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐོག་མ་དེ་ཕྱི་ལོ་ ༡༩༩༤ ལོར་རྒྱ་གར་གྱི་རྒྱལ་ས་ལྡི་ལིར་འཚོགས་ཡོད་ཅིང་། དེའི་རྗེས་རིམ་པས་ཕྱི་ལོ་ ༡༩༩༤ ལོར་ཡུ་རོབ་ཀྱི་ལི་ཐུ་ནིཡའི་རྒྱལ་ས་ཝིལ་ནུས་དང་། ཕྱི་ལོ་ ༡༩༩༧ ལོར་ཨ་རིའི་རྒྱལ་ས་ཝ་ཤིང་ཊོན། ཕྱི་ལོ་ ༢༠༠༥ ལོར་སི་ཀོ་ཊི་ལེན་ཌིའི་རྒྱལ་ས་ཨེ་ཌན་སྦ་རག་དང་། ཕྱི་ལོ་ ༢༠༠༩ ལོར་ཨི་ཊ་ལིའི་རྒྱལ་ས་རོམ། ཕྱི་ལོ་ ༢༠༡༢ ལོར་ཁེ་ན་ཌའི་རྒྱལ་ས་ཨོ་ཊ་ཝ་དང་། ཕྱི་ལོ་ ༢༠༡༩ ལོར་ལ་ཊི་ཝི་ཡའི་རྒྱལ་ས་རི་གྷ་དང་། ཕྱི་ལོ་ ༢༠༢༢ ལོར་ཨ་རིའི་རྒྱལ་ས་ཝ་ཤིང་ཊོན་དུ་འཚོགས་ཡོད་པ་རེད།

གསར་འགོད་པ། བསྟན་འཛིན་ཕུར་བུ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།