༧གོང་ས་རྒྱལ་བ་རིན་པོ་ཆེ་མཆོག་ནས་ལྷོ་ཀོ་རི་ཡའི་སྲིད་འཛིན་ལ་འཚམས་འདྲི་མཛད།

༧གོང་ས་རྒྱལ་བ་རིན་པོ་ཆེ་མཆོག་ནས་ལྷོ་ཀོ་རི་ཡའི་དམངས་གཙོ་ཚོགས་པའི་ཚོགས་གཙོ་སྐུ་ཞབས་ལི་རྗེ་མུ་ཡུང་ལགས་ལྷོ་ཀོ་རི་ཡའི་སྲིད་འཛིན་དུ་འོས་འདེམས་བྱུང་བར་འཚམས་འདྲི་མཛད།

ཟླ་འདིའི་ཕྱི་ཚེས་ ༣ ཉིན་ལྷོ་ཀོ་རི་ཡའི་དམངས་གཙོ་ཚོགས་པའི་ཚོགས་གཙོ་སྐུ་ཞབས་ལི་རྗེ་མུ་ཡུང་ (Lee Jae-myung) ལགས་སུ་འདི་ལོའི་ལྷོ་ཀོ་རི་ཡའི་སྲིད་འཛིན་གྱི་འོས་བསྡུའི་ཁྲོད་རྒྱལ་ཁ་ཐོབ་ཡོད་པ་ལྟར། དེ་རིང་༧གོང་ས་རྒྱལ་བ་རིན་པོ་ཆེ་མཆོག་ནས་སྐུ་ཞབས་ཁོང་གི་མཚན་ཐོག་ཏུ་འཚམས་འདྲིའི་གསུང་འཕྲིན་ཞིག་སྩལ་ཏེ། ཁོང་གིས་མུ་མཐུད་དུ་ཕྱི་འབྲེལ་དང་གྲོས་མོལ་གྱི་ལམ་ནས་ཀོ་རི་ཡའི་ནང་ཞི་བདེ་ཡུན་གནས་ཡོང་བར་འབད་བརྩོན་བྱེད་པའི་ཡིད་ཆེས་ཡོད་སྐོར་གསུངས་འདུག

༸གོང་ས་རྒྱལ་བ་རིན་པོ་ཆེ་མཆོག་གི་འཚམས་འདྲིའི་གསུང་འཕྲིན་ནང་། དེང་སང་འཛམ་གླིང་འདི་ཧ་ཅང་དཀའ་ངལ་འཕྲད་བཞིན་པའི་དུས་སྐབས་ཤིག་ཏུ་ཡོད་ཀྱང་། འཛམ་གླིང་ཡོངས་སུ་ཕན་ཚུན་གཅིག་རྟེན་དང་འགྲོ་བ་མི་གཅིག་གྱུར་གྱི་འདུ་ཤེས་ཐོག་ཡར་རྒྱས་འགྲོ་བཞིན་ཡོད་པ་ལྟར། ལྷོ་ཀོ་རི་ཡའི་གླིང་ཕྲན་ཞི་བདེར་གནས་རྒྱུ་ནི་འཛམ་གླིང་ཡོངས་སུ་ཧ་ཅང་གལ་ཆེན་པོ་ཆགས་ཀྱི་ཡོད།  ངོས་རང་གིས་ཁྱེད་ཀྱིས་མུ་མཐུད་དུ་ཕྱི་འབྲེལ་དང་གྲོས་མོལ་གྱི་ལམ་ནས་ཀོ་རི་ཡའི་ནང་ཞི་བདེ་རྟག་བརྟན་ཡོང་བར་འབད་བརྩོན་བྱེད་པའི་ཡིད་ཆེས་ཡོད། ཉེ་བའི་ལོ་འགའི་ནང་ཀོ་རི་ཡའི་ནང་པ་མང་པོས་རྒྱ་གར་ནང་བསྐྱར་གསོ་བྱས་པའི་སློབ་གཉེར་ཁང་ཁག་ཏུ་སློབ་སྦྱོང་བྱེད་འདུན་ཡོད་པའི་གྲངས་ཀ་མང་དུ་འགྲོ་བཞིན་འདུག དེ་བཞིན་ངོས་རང་གིས་རྒྱུན་དུ་རྒྱ་གར་དུ་གནས་མཇལ་ལ་ཡོང་བའི་ཀོ་རི་ཡའི་ནང་པའི་གཅེན་གཅུང་རྣམས་དང་ཐུག་འཕྲད་བྱེད་བཞིན་ཡོད།

གསུང་འཕྲིན་གྱི་མཇུག་ཏུ། ངོས་ནས་ཁྱེད་ཀྱིས་ཀོ་རི་ཡ་མི་མང་གི་རེ་འདོད་དང་མངོན་འདོད་ཀྱི་ལས་དོན་བསྒྲུབ་པར་འཕྲད་པའི་དཀའ་ངལ་མཐའ་དག་ལས་རྣམ་པར་རྒྱལ་ཏེ། ཞི་བདེ་ལྡན་པའི་འཛམ་གླིང་ཞིག་བསྐྲུན་རྒྱུར་ཞབས་འདེགས་བསྒྲུབ་ཐུབ་པའི་སྨོན་འདུན་ཞུ་ཡི་ཡོད། ཅེས་གསུངས་འདུག

ལི་རྗེ་མུ་ཡུང་ལགས་ནི་ཕྱི་ལོ་ ༡༩༦༤ ཟླ་ ༡༢ ཚེས་ ༢༢ ཉིན་ལྷོ་ཀོ་རི་ཡའི་གྲོང་ཁྱེར་ཨན་ཌོང་ (Andong) དུ་སྐྱེས་ཤིང་། ཆུང་དུས་ནས་དབུལ་ཕོངས་ཀྱི་ཁྱིམ་ཚང་ཞིག་ཏུ་སྐྱེས་ཏེ། བཟོ་གྲྭའི་ནང་ལས་ཀ་བྱས། སྐབས་དེར་ཁོང་གི་ལག་པར་རྨས་སྐྱོན་ཕོག་ནས་དབང་པོ་སྐྱོན་ཅན་དུ་གྱུར། ལི་ཡིས་ཁྲུང་ཨང་མཐོ་རིམ་སློབ་གཉེར་ཁང་ (Chung-Ang University) དུ་འབྲིང་རིམ་དང་མཐོ་རིམ་སློབ་གྲྭའི་སློབ་སྦྱོང་བྱས། ཕྱི་ལོ་ ༡༩༨༦ ལོར་ཁྲིམས་ལུགས་རིག་པའི་ཐོག་ཉེ་བའི་གཙུག་ལག་རབ་འབྱམས་པའི་སློབ་མཐར་སོན། དེ་རྗེས་འགྲོ་བ་མིའི་ཐོབ་ཐང་དང་ངལ་རྩོལ་ཁྲིམས་རྩོད་པའི་ཕྱག་ལས་གནང་། ཕྱི་ལོ་ ༢༠༠༥ ནས་བཟུང་ཆབ་སྲིད་ནང་མཉམ་ཞུགས་གནང་མགོ་འཛུགས་ཏེ། ཕྱི་ལོ་ ༢༠༡༠ དང་ ༢༠༡༤ ལོར་ལྷོ་ཀོ་རི་ཡའི་སོང་ནམ་གྲོང་སྡེའི་སྤྱི་ཁྱབ་ཏུ་འདེམས་ཐོན་བྱུང་། ཕྱི་ལོ་ ༢༠༡༧ དང་ ༢༠༢༢ ལོར་སྲིད་འཛིན་གྱི་འོས་མིར་ལངས་ཀྱང་འོས་བསྡུའི་རྒྱལ་ཁ་ཐོབ་མི་འདུག ཕྱི་ལོ་ ༢༠༡༨ ལོར་གྷོང་གྷི་ཞིང་ཆེན་གྱི་སྤྱི་ཁྱབ་ཀྱི་ལས་གནས་ཁུར། ཕྱི་ལོ་ ༢༠༢༥ ལོར་ལྷོ་ཀོ་རི་ཡའི་སྲིད་འཛིན་གྱི་འོས་བསྡུའི་ནང་ཞུགས་ཏེ། ལི་ལ་འོས་གྲངས་བརྒྱ་ཆ་ ༤༩།༤༢ ཐོབ་སྟེ་སྲིད་འཛིན་དུ་འདེམས་ཐོན་བྱུང་འདུག

གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།