ཊོམ་ཕུས་རྒྱལ་སྤྱིའི་ཉེས་དོན་ཁྲིམས་ཁང་གི་ཁྲིམས་དཔོན་བཞི་ལ་ཉེས་ཆད་བཏང་།

ཨ་རིའི་སྲིད་འཛིན་ཊོམ་ཕུ་གཞུང་གིས་རྒྱལ་སྤྱིའི་ཉེས་དོན་ཁྲིམས་ཁང་གི་ཁྲིམས་དཔོན་བཞིས་ཨ་རི་དང་མཐུན་ཕྱོགས་རྒྱལ་ཁབ་ལ་ཁྲིམས་འགལ་དང་གཞི་མེད་སྙོན་འཛུགས་བྱས་པར་ཉེས་ཆད་བཏང་འདུག

ཁ་སང་ཕྱི་ཚེས་ ༥ ཉིན་ཨ་རིའི་ཕྱི་སྲིད་བློན་ཆེན་མར་ཁོ་རོ་བྷིའོ་མཆོག་གིས་གསར་འགོད་བསྒྲགས་གཏམ་ཞིག་སྤེལ་བའི་ནང་། རྒྱལ་སྤྱིའི་ཉེས་དོན་ཁྲིམས་ཁང་ (International Criminal Court) གི་ཨ་ཧྥི་རི་ཁའི་ཨུ་གྷན་ཌ་རྒྱལ་ཁབ་ཀྱི་ཁྲིམས་དཔོན་སོ་ལོ་མི་ (Solomy Balungi Bossa) ལགས་དང་། པེ་རུའི་ (Peru) ཁྲིམས་དཔོན་ལུ་ཛི་ཌེལ་ཁར་མན་ (Luz del Carmen Ibáñez Carranza)། ནུབ་ཨ་ཧྥི་རི་ཁའི་བྷེ་ནིན་ (Benin) རྒྱལ་ཁབ་ཀྱི་ཁྲིམས་དཔོན་རེན་ཨ་ཌི་ལེ་ཌི་ (Reine Adelaide Sophie Alapini Gansou)། ཡུ་རོབ་ཀྱི་རྒྱལ་ཁབ་སོ་ལོ་ཝི་ནི་ཡའི་ཁྲིམས་དཔོན་བྷེ་ཊི་ཧོ་ལར་ (Beti Hohler) ལགས་བཅས་ཀྱིས་ཆོག་མཆན་གང་ཡང་མེད་པའི་ཐོག་ནས་ཨ་རི་དང་མཐུན་ཕྱོགས་རྒྱལ་ཁབ་ཨི་ཛི་རེལ་གྱི་མི་སེར་རྣམས་ལ་རྟོག་ཞིབ་དང་། ནག་ཉེས་གཡོག་པ། བཙོན་འཇུག་སོགས་བྱེད་པའི་ལས་དོན་གཉེར་བར་བརྩོན་པ་བྱེད་ཀྱིན་ཡོད་པར་བརྟེན། ཁྲིམས་དཔོན་དེ་དག་ཨ་རིར་ཡོང་མི་ཆོག་པའི་ཁར། ཨ་རིའི་ནང་ཡོད་པའི་ཁོང་ཚོའི་རྒྱུ་དངོས་ཚང་མ་བཀག་སྡོམ་བྱ་རྒྱུའི་ཉེས་ཆད་གཏོང་གི་ཡིན། ཞེས་གསལ་འདུག

བསྒྲགས་གཏམ་ནང་། ཐག་གཅོད་དེ་ནི་རྒྱལ་སྤྱིའི་ཉེས་དོན་ཁྲིམས་ཁང་གིས་ཁྲིམས་མེད་དང་གཞི་མེད་ཀྱི་བྱ་སྤྱོད་ཅིག་ཡིན་པ་མ་ཟད། ཁྲིམས་དཔོན་དེ་དག་གིས་དབང་ཆ་ལོག་སྤྱོད་དང་། ཨ་རི་དང་མཐུན་ཕྱོགས་རྒྱལ་ཁབ་ཀྱི་བདག་དབང་དང་རྒྱལ་ཁབ་ཀྱི་བདེ་འཇགས་ལ་ཐེ་ཇུས་བྱེད་བཞིན་འདུག དེར་བརྟེན་ཨ་རིའི་གཞུང་གིས་ཨི་ཛི་རེལ་དང་ཨ་རིའི་མཐུན་ཕྱོགས་རྒྱལ་ཁབ་ཀྱི་བདག་དབང་སྲུང་སྐྱོབ་དང་། རྒྱལ་སྤྱིའི་ཉེས་དོན་ཁྲིམས་ཁང་གིས་ཁྲིམས་འགལ་གྱི་བྱ་སྤྱོད་ཅི་སྤེལ་ཚང་མ་བཀག་འགོག་བྱེད་ངེས་ཡིན། ཞེས་འཁོད་འདུག

དེ་འབྲེལ་རྒྱལ་སྤྱིའི་ཉེས་དོན་ཁྲིམས་ཁང་ (International Criminal Court) གིས་བསྒྲགས་གཏམ་ཞིག་སྤེལ་བའི་ནང་། ཁྲིམས་ཁང་གིས་ཁྲིམས་དཔོན་རྣམས་ལ་རྒྱབ་སྐྱོར་ཡོད་པ་དང་། ཊོམ་ཕུ་གཞུང་གི་ཐག་གཅོད་དེ་ལ་བློ་ཕམ་ཡོད། ཨ་རིའི་གཞུང་གི་ཐག་གཅོད་དེས་རྒྱལ་སྤྱིའི་ཉེས་དོན་ཁྲིམས་ཁང་ལ་མཐོང་ཆུང་དང་ཁྱད་གསོད་བྱེད་བཞིན་ཡོད་པ་གསལ་བོ་ཡིན་ལ། ཐག་གཅོད་དེས་སྤྱི་དམངས་ལ་ཕན་ཐོགས་གང་ཡང་བྱུང་གི་མེད་པ་དང་། དེ་ལས་ལྡོག་སྟེ་ཉེས་ཅན་རྣམས་ལ་གང་ཡང་བྱ་ཆོག་པའི་བློ་སྤོབས་སྤྲོད་ཀྱི་རེད། ཁྲིམས་ཁང་འདིས་འཛམ་གླིང་གི་རྒྱལ་ཁབ་ ༡༢༥ ཡི་བཀའ་རྒྱའི་འོག་ནས་ལས་དོན་བྱེད་བཞིན་ཡོད། ཅེས་གསལ་འདུག

ཨི་ཛི་རེལ་གྱི་སྲིད་བློན་བྷན་ཇ་མིན་ (Benjamin Netanyahu) གྱིས། ཨ་རིའི་སྲིད་འཛིན་ཊོམ་ཕུ་མཆོག་དང་ཕྱི་སྲིད་བློན་ཆེན་མར་ཁོ་རོ་བྷིའོ་མཆོག་གིས་རྒྱལ་སྤྱིའི་ཉེས་དོན་ཁྲིམས་ཁང་གི་ཁྲིམས་དཔོན་རྣམས་ལ་ཉེས་ཆད་བཀལ་བར་ཐུགས་རྗེ་ཆེ་ཞུ་རྒྱུ་ཡིན། ཨི་ཛི་རེལ་དང་ཨ་རི། དེ་བཞིན་དམངས་གཙོའི་རྒྱལ་ཁབ་རྣམས་འཇིགས་སྐུལ་ལས་རང་སྲུང་བྱེད་པའི་ཐོབ་ཐང་གི་ཆེད་དུ་དྲང་བདེན་གྱིས་རྒྱབ་སྐྱོར་བྱས་ཡོད། ཅེས་བརྗོད་འདུག

དེ་སྔ། ཕྱི་ལོ་ ༢༠༠༡ ནས་ ༢༠༢༡ བར་ཨ་རིས་ཨབ་གྷ་ནི་སི་ཐན་ནང་དམག་འཁྲུག་བརྒྱབ་ཡོད་པར་བརྟེན། རྒྱལ་སྤྱིའི་ཉེས་དོན་ཁྲིམས་ཁང་གིས་ཨ་རིའི་དམག་དཔུང་དང་རྒྱལ་སྤྱིའི་གསང་མྱུལ་ལས་ཁུངས་ཀྱི་ཚོགས་མི་རྣམས་ལ་ཞིབ་འཇུག་བྱེད་དགོས་པའི་ཆོག་མཆན་སྤྲོད་པ་དང་། ཨ་རི་ནི་ཨི་ཛི་རེལ་གྱི་མཐུན་ཕྱོགས་རྒྱལ་ཁབ་རྙིང་ཤོས་ཤིག་ཡིན་ཞིང་། ད་ལྟའི་ཆར་གྷ་ཛའི་ནང་དམག་འཁྲུག་འབྱུང་བཞིན་ཡོད་ལ། ད་བར་པ་ལི་སི་ཐན་གྱི་མི་གྲངས་ ༥༤,༦༠༤ བསད་ཡོད་འདུག་ལ། འདས་ལོའི་ཕྱི་ཟླ་ ༡༡ ནང་རྒྱལ་སྤྱིའི་ཉེས་དོན་ཁྲིམས་ཁང་གིས་ཨི་ཛི་རེལ་གྱི་སྲིད་བློན་བྷན་ཇ་མིན་ (Benjamin Netanyahu) དང་། ཨི་ཛི་རེལ་གྱི་རྒྱལ་སྲུང་བློན་ཆེན་ཟུར་པ་གྷེ་ལེན་ཌི་ (Yoav Gallant) གཉིས་ཀྱིས་གྷ་ཛའི་ནང་དམག་འཁྲུག་སྐབས་མང་ཚོགས་ལ་འཐབ་རྒོལ་བྱས་པའི་ནག་ཉེས་འོག་འཛིན་བཟུང་བྱ་རྒྱུའི་བཀའ་རྒྱ་བཏང་ཡོད་པ་སོགས་ལ་ཨ་རིའི་གཞུང་གིས་ངོས་ལེན་བྱེད་ཀྱིན་མེད་པ་རེད།

གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།