ངལ་སེལ་ཆེད་གྷ་ཛར་སྐྱོད་མཁན་གྱི་ལས་འགུལ་བ་རྣམས་འཛིན་བཟུང་བྱས།

ཨི་ཛི་རེལ་གྱིས་གྷ་ཛའི་ཁུལ་དུ་རྒྱལ་སྤྱིའི་འགྲོ་བ་མིའི་རོགས་སྐྱོར་ཚན་པ་ཞིག་འཛིན་བཟུང་བྱས་པར་འཛམ་གླིང་གི་འགྲོ་བ་མིའི་ཐོབ་ཐང་རྩོད་ལེན་པ་མང་དག་ཅིག་གིས་ངོ་རྒོལ་བྱས།

Crew members of the “Madleen” are seen with their hands in the air as Israeli forces come aboard, in this image from the Freedom Flotilla Coalition. Freedom Flotilla Coalition/Freedom Flotilla Coalition/Teleg

ཟླ་འདིའི་ཕྱི་ཚེས་ ༩ ཉིན་ཨི་ཛི་རེལ་གྱི་དམག་མིས་གྷ་ཛའི་དམག་འཁྲུག་གི་ཁྲོད་ནས་བཀྲེས་སྐོམ་གྱིས་མནར་བའི་མི་གྲངས་མི་འབོར་ས་ཡ་ ༢།༡ ལྷག་ལ་རོགས་རམ་སླད། རྒྱལ་སྤྱིའི་ལས་འགུལ་བ་གྷེ་ཊ་ཐན་བྷག་(Greta Thunberg)ལགས་ཚུད་པའི་ལས་འགུལ་བ་རྣམས་ཡོད་པའི་གྲུ་གཟིངས་ཤིག་བཀག་སྡོམ་བྱས་ཏེ། རོགས་རམ་དང་ངལ་སེལ་ཆེད་ཡོང་མཁན་གྱི་ལས་འགུལ་བ་རྣམས་འཛིན་བཟུང་བྱས་ནས་ཨི་ཛི་རེལ་ལ་ཕྱིར་སློག་བྱས་འདུག

དེའི་ཐད་ཧ་མ་སིས་གསར་འགོད་བསྒྲགས་གཏམ་ཞིག་སྤེལ་བའི་ནང་། ལས་འགུལ་བ་རྣམས་འཛིན་བཟུང་དང་། དང་བླངས་ཀྱི་ལས་འགུལ་བ་རྣམས་ལ་འཐབ་རྒོལ་བྱས་པ་དེ་རྒྱལ་སྤྱིའི་ཁྲིམས་སྒྲིག་དང་འགལ་ཡོད་པའི་སྐྱོན་བརྗོད་བྱས་པ་དང་སྦྲགས། ལས་འགུལ་བ་རྣམས་འཕྲལ་དུ་ཀློད་གྲོལ་གཏང་དགོས་སྐོར་བརྗོད་འདུག

ཨི་ཛི་རེལ་ཕྱི་སྲིད་ལས་ཁུངས་ཀྱིས། གྲུ་གཟིངས་དེ་ཉེན་ཁ་མེད་པའི་ཐོག་ནས་ཨི་ཛི་རིལ་གྱི་མཚོ་མཐའ་རུ་འབྱོར་ཡོད། འགྲུལ་བ་རྣམས་རང་ཉིད་ཀྱི་རྒྱལ་ཁབ་ལ་ཕྱིར་ལོག་བྱ་རྒྱུ་དང་། རྒྱལ་སྤྱིའི་ཁྲིམས་ལུགས་གཞིར་བཟུང་ཨི་ཛེ་རེལ་གྱིས་གྷ་ཛའི་ནང་མཚོ་གྲུ་དེ་བསྐྱོད་པར་བཀག་འགོག་བྱས་ཡོད་ཅིང་། ཁོང་ཅག་ནི་སྙན་གྲགས་ཅན་གྱི་མི་སྣ་ཡིན་སྟབས། རང་ཉིད་སྐད་གྲགས་འགྲོ་བའི་ཆེད་དུ་སྤྱི་ཚོགས་དྲ་ལམ་དུ་འཁྲུག་རྐྱེན་སློང་བའི་གནས་ཚུལ་སྤེལ་ནས་དྲིལ་བསྒྲགས་བྱེད་ཀྱིན་ཡོད་པ་རེད། ཨི་ཛི་རེལ་གྱི་བདེ་སྲུང་དམག་སྡེ་ལ་མེ་ཌི་ལིན་གྱི་གྲུ་གཟིངས་དེ་གྷ་ཛའི་ནང་གཏོང་མི་ཆོག་ལུགས་བཤད་འདུག་ལ། དེའི་ཐད་ཧྥ་རན་སིའི་ཕྱི་སྲིད་ལས་ཁུངས་ཀྱིས། མེ་ཌི་ལིན་གྱི་གྲུ་གཟིངས་ནང་ཧྥ་རན་སིའི་མི་སེར་དྲུག་པོ་དེ་ཕྱིར་ལོག་གཏོང་སླད། ཨི་ཛི་རེལ་གྱི་དཔོན་རིགས་རྣམས་ལ་འབྲེལ་ལམ་བྱས་དང་བྱེད་མུས་ཡིན། ཧྥ་རན་སིའི་གཞུང་གིས་དེ་སྔ་ནས་ལས་འགུལ་བ་དེ་དག་ལ་ལས་འགུལ་དེ་འདྲ་སྤེལ་བར་ཉེན་ཁ་ཡོད་པའི་སྔོན་བརྡ་བཏང་ཡོད། ཅེས་བསྒྲགས་འདུག

ཨི་ཛི་རེལ་གྱིས་ཕྱི་ཟླ་ ༣ ཚེས་ ༢ ཉིན་ནས་རྒྱལ་སྤྱིའི་འགྲོ་བ་མིའི་ཐོབ་ཐང་རྩོད་ལེན་པ་རྣམས་བཀག་སྡོམ་བྱས་ཡོད་པ་མ་ཟད། བཟའ་ཆས་དང་། སྨན་བཅོས། མངའ་ཁོངས་དེར་སྡོད་མཁན་གྱི་པ་ལི་སི་ཐན་ས་ཡ་ ༢ ལྷག་ལ་བདུན་ཕྲག་ ༡༡ གི་རིང་རོགས་སྐྱོར་མཚམས་འཇོག་བྱས་ཡོད་ཀྱང་། རྒྱལ་སྤྱིའི་གནོན་ཤུགས་ལ་བརྟེན་ནས་ཨི་ཛི་རེལ་གྱིས་ཕྱི་ཟླ་ལྔ་པའི་ཟླ་མཇུག་ནས་རོགས་སྐྱོར་ཧ་ཅང་ཉུང་ཉུང་བྱེད་བཅུག་ཡོད་ནའང་། འདི་ལོའི་ཕྱི་ཟླ་ ༤ མཉམ་འབྲེལ་རྒྱལ་ཚོགས་ཀྱིས་བཏོན་པའི་སྙན་ཐོའི་ནང་མི་ལྔ་ནས་གཅིག་བཀྲེས་སྐོམ་གྱིས་མནར་ཡོད་སྐོར་སོགས་གསལ་འདུག ད་ལྟ་ཨི་ཛི་རེལ་གྱིས་གྷ་ཛར་སྐྱོད་མཁན་གྱི་མཚོ་གྲུ་དེ་བཀག་སྡོམ་དང་འགྲོ་བ་མིའི་ཐོབ་ཐང་རྩོད་ལེན་པ་དག་འཛིན་བཟུང་བྱས་པའི་ཐད། རྒྱལ་སྤྱིའི་ཁྱོན་ཡོངས་ནས་དྲང་ལྡོག་གཉིས་ཀྱི་ཐོག་ནས་ཚ་གླེང་ཤུགས་ཆེན་བྱེད་མུས་ཡིན་འདུག

ཕྱི་ལོ་ ༢༠༢༣ ཟླ་ ༡༠ ཚེས་ ༧ ཉིན་པ་ལི་སི་ཐན་གྱི་ཧ་མ་སི་དམག་དཔུང་གིས་གློ་བུར་དུ་ཨི་ཛི་རེལ་གྱི་སྟེང་དུ་དྲག་རྒོལ་བྱས་པར་བརྟེན། ད་སྔའི་བར་རྒྱལ་ཁབ་གཉིས་ཀྱི་དམག་འཁྲུག་མཚམས་མ་ཆད་པར་མུ་མཐུད་མེ་ཤུགས་འཕུར་མདའ་འཕེན་རེས་བྱས་དང་བྱེད་མུས་ཡིན་ལ། རྒྱལ་ཁབ་གཉིས་ཀྱི་དམག་འཁྲུག་ཁྲོད་མི་གྲངས་ ༥༧༠༠༠ ལྷག་རྐྱེན་འདས་སུ་གྱུར་བའི་ཁྲོད། པ་ལི་སི་ཐན་གྱི་མི་གྲངས་ ༥༤༧༢༢ དང་ཨི་ཛི་རེལ་གྱི་མི་གྲངས་ ༡༧༠༦ རྐྱེན་འདས་སུ་ཕྱིན། ཕྱི་ལོ་ ༢༠༢༤ ལོའི་ཟླ་ ༡༡ ནང་མཉམ་འབྲེལ་རྒྱལ་ཚོགས་ཀྱིས་དམག་འཁྲུག་དེའི་ནང་རྐྱེན་འདས་སུ་ཕྱིན་པའི་མི་གྲངས་ལ་ཞིབ་འཇུག་བྱས་པའི་ཁྲོད། རྐྱེན་འདས་སུ་ཕྱིན་པའི་པ་ལི་སི་ཐན་གྱི་མིའི་གྲངས་འབོར་ལས་བརྒྱ་ཆ་ ༧༠ བུད་མེད་དང་བྱིས་པ་ཡིན་པ་ཤེས་རྟོགས་བྱུང་འདུག

ཨི་ཛི་རེལ་དང་པ་ལི་སི་ཐན་བར་གྱི་རྩོད་རྙོག་དེ་ནི་ལོ་ངོ་སྟོང་ཕྲག་རིང་མཚམས་ཆད་མ་མྱོང་བའི་རྩོད་རྙོག་ཅིག་སྟེ། ཕྱི་ལོ་ ༡༩༦༧ ལོར་དཀྱིལ་ཤར་ཨེ་ཤ་ཡའི་དམག་འཁྲུག་སྐབས་གྲོང་ཁྱེར་དེ་ཨི་ཛི་རལ་གྱིས་དབང་བསྒྱུར་བྱས་ཡོད། ཕྱི་ལོ་ ༡༩༩༣ ལོར་ཨི་ཛི་རེལ་དང་པ་ལི་སི་ཐན་བར་ལ་ཞི་བའི་གྲོས་མཐུན་ཞིག་བཞག་སྟེ། ཇེ་རོ་སཱ་ལམ་གྱི་གནད་དོན་དེ་རྗེས་སུ་ཞི་མཐུན་གྱི་ངང་ནས་ཐག་གཅོད་བྱས་ནས་ས་མཚམས་ཁུལ་གྱི་ཟིང་འཁྲུག་ཅུང་ཞི་འཇགས་སུ་ཕྱིན་ཡོད་ཀྱང་། ཕྱི་ལོ་ ༢༠༡༧ ལོར་ཨ་རིའི་སྲིད་འཛིན་ཊོམ་ཕུ་ཡིས་ས་ཆ་དེ་ཨི་ཛི་རལ་གྱི་ཡིན་སྐོར་ཡོངས་བསྒྲགས་གནང་སྟེ་ཡུལ་གཉིས་བར་གྱི་ཟིང་འཁྲུག་བསྐྱར་དུ་བསླངས་ཡོད་འདུག