རྒྱ་གཞུང་གི་བསྐྱར་གསོ་འཛུགས་སྐྲུན་གྱིས་བོད་མི་རྣམས་ལ་གྱོང་གུད་ཆེན་པོ་ཐེབས་རྒྱུ་ཡིན་པ་ཉམས་ཞིབ་པས་བརྗོད།

བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་གཞོན་པ་ཛམ་ལྷ་བསྟན་པ་རྒྱལ་མཚན་ལགས་ཀྱིས་རྒྱ་ནག་གཞུང་གིས་དིང་རིར་བསྐྱར་གསོ་འཛུགས་སྐྲུན་ལ་ཁ་གཡར་ནས་ས་མཚམས་ཀྱི་ཐབས་ཇུས་ལས་དོན་དང་རྒྱ་རིགས་མང་པོ་གནས་སྡོད་བྱེད་པའི་ལམ་ཞིག་བསྐྲུན་སྲིད་སྐོར་བརྗོད།

ཉེ་ལམ་རྒྱ་ནག་གི་གཞུང་འབྲེལ་གསར་ལམ་ཁག་ཏུ། བོད་དིང་རིའི་ས་ཡོམ་གནོད་ཐེབས་ས་ཁུལ་དུ་བསྐྱར་གསོ་འཛུགས་སྐྲུན་བྱེད་བཞིན་པའི་གནས་ཚུལ་སྤེལ་བའི་ནང་།   ཕྱི་ཟླ་ ༥ པའི་ནང་དིང་རི་རྫོང་གི་ས་ཡོམ་སླར་གསོ་བསྐྱར་སྐྲུན་གཞུང་ལས་ཁང་ཟེར་བས་མང་ཚོགས་ཀྱི་སྡོད་ཁང་འཛུགས་སྐྲུན་ནང་གཅིག་གྱུར་འཆར་འགོད་འཛུགས་སྐྲུན་དང་། གཅིག་གྱུར་འཆར་འགོད་དང་ཁག་བགོས་འཛུགས་སྐྲུན། ཉམས་བཟོ་བརྟན་གཏོང་བཅས་ལས་གཞི་གསུམ་གྱི་ཐོག་ནས་འཛུགས་སྐྲུན་བྱེད་ཀྱི་ཡོད་ཅིང་། བསྐྱར་གསོ་འཛུགས་སྐྲུན་བྱས་པའི་སྡོད་ཁང་ཚང་མར་ས་ཡོམ་རིམ་པ་ ༨ འགོག་པའི་ནུས་པ་ཡོད་ལུགས་དང་། ཕྱི་ཟླ་ ༡༠ བའི་ཟླ་མཇུག་ཏུ་མང་ཚོགས་ཚང་མ་སྤོ་ཐུབ་པ་བྱ་རྒྱུ་ཡིན་ཚུལ་བསྒྲགས་འདུག

འདི་གའི་གསར་འགོད་པས་བོད་ཀྱི་སྲིད་བྱུས་ཉམས་ཁང་གི་འགན་འཛིན་གཞོན་པ་ཛམ་ལྷ་བསྟན་པ་རྒྱལ་མཚན་ལགས་སུ་ད་ལྟའི་ཆར་དིང་རིའི་བསྐྱར་གསོ་འཛུགས་སྐྲུན་གྱི་གནས་སྟངས་ག་འདྲ་ཆགས་ཀྱི་ཡོད་མེད་དང། ས་གནས་བོད་མི་རྣམས་ཀྱི་དགོས་མཁོ་དང་མཐུན་པའི་ཐོག་ནས་བསྐྱར་གསོ་འཛུགས་སྐྲུན་བྱེད་ཀྱི་ཡོད་མེད་དྲིས་པར་ཁོང་གིས། བོད་ཀྱི་དིང་རི་ནང་ས་ཡོམ་གྱི་གོད་ཆག་ཆེན་པོ་བྱུང་ཡོད་པ་རེད། རྒྱ་ནག་གཞུང་གིས་དཔལ་འབྱོར་དང་ཐབས་ཇུས་མཁས་པོའི་ཐོག་ནས་འཛུགས་སྐྲུན་བྱེད་པར་དཀའ་ངལ་གང་ཡང་ཡོད་པ་མ་རེད། ཡིན་ནའང་། རྒྱ་ནག་གཞུང་གི་བསྐྱར་གསོ་འཛུགས་སྐྲུན་དེས་དོ་ཕོག་བྱུང་ཡུལ་གྱི་ས་གནས་མི་མང་ལ་ཁེ་ཕན་ཐོབ་མིན་དཀའ་ངལ་ཆེན་པོ་རེད་བསམ་གྱི་འདུག  ང་ཚོས་འདས་བའི་ས་ཡོམ་གོད་ཆག་བྱུང་ཡུལ་གྱི་ལོ་རྒྱུས་ལ་བལྟས་ཚེ། རྒྱ་ནག་གཞུང་གིས་གོད་ཆག་བྱུང་ཡུལ་དུ་བསྐྱར་གསོའི་འཛུགས་སྐྲུན་ཤུགས་ཆེན་བྱས་པའི་རྐྱེན་གྱིས། སྔོན་མ་ས་གནས་དེར་འཚོ་སྡོད་བྱེད་བཞིན་པའི་བོད་མི་རྣམས་ཀྱི་སྡོད་གནས་དང་ས་ཆ་ཤོར་ཡོད་པ་མ་ཟད། དེའི་ཚབ་ཏུ་རྒྱ་རིགས་མང་པོ་སྡོད་ས་དང་ཚོང་གི་ལས་གཞི་སོགས་སུ་ཁེ་ཕན་སྤྲད་པ་བྱུང་ཡོད། ཅེས་འགྲེལ་བརྗོད་གནང་བྱུང་།

ཡང་ཁོང་གིས་། ད་ལན་དིང་རིའི་ནང་དུ་བསྐྱར་གསོའི་འཛུགས་སྐྲུན་བྱེད་པའི་སྐབས་སུ། རྒྱ་ནག་གི་ཚོང་པ་མང་པོ་ཞིག་ལ་ཁེ་ཕན་རག་གི་རེད། དིང་རི་དེ་འཕགས་བོད་གཉིས་ཀྱི་གནད་འགག་གི་ས་མཚམས་ཤིག་ཏུ་ཁེལ་ཡོད་དུས། རྒྱ་ནག་གི་མི་འབོར་མང་པོ་རོགས་སྐྱོར་ལ་ཁ་གཡར་ནས་ས་གནས་སུ་སྤོས་ཏེ། སྡོད་ས་སོགས་སྤྲད་དེ་ཡུལ་མི་འཆག་གི་འཇུག་སྲིད་པ་ཞིག་རེད། རྒྱ་ནག་གཞུང་གིས་ཕྱི་ཟླ་ ༡༠ བའི་ཟླ་མཇུག་ཏུ་བསྐྱར་གསོ་འཛུགས་སྐྲུན་ཚར་ཟིན་གྱི་ཡོད་ཚུལ་བཤད་ཀྱང་། བོད་མི་རྣམས་ཀྱི་སྔོན་མའི་འཚོ་བ་བཞིན་བསྐྱར་གསོ་དོན་དང་ལྡན་པ་ཞིག་ཡོང་རྒྱུ་ཧ་ཅང་ཁག་པོ་རེད་བསམ་གྱི་འདུག  གནས་སྟངས་ཁག་ཅིག་གི་ཐོག་ནས་ཅུང་ཙམ་ཕན་ཐོགས་ཡོད་སྲིད་ཀྱང་། སྤྱི་ཡོངས་ཀྱི་ཐོག་ནས་རྒྱ་ནག་གཞུང་གི་བསྐྱར་གསོ་དེའི་བརྒྱུད་རིམ་ནང་བོད་མི་རྣམས་ལ་སྔར་ལས་གྱོང་གུད་ཆེ་བ་ཐེབས་ཀྱི་རེད་བསམ་གྱི་འདུག རྒྱ་ནག་གཞུང་གི་གཞུང་འབྲེལ་གནས་ཚུལ་ལ་བལྟས་ན། ས་གནས་མི་མང་ལ་ཕན་ཐོགས་ཡོད་པའི་དྲིལ་བསྒྲགས་བྱེད་བཞིན་ཡོད་ཅིང་། བསྐྱར་གསོ་འཛུགས་སྐྲུན་ཁྲོད་ཁང་པའི་སྤུས་ཚད་སྔོན་མ་ལས་ཡག་ཏུ་འགྲོ་ཡི་ཡོད་ཚུལ་བརྗོད་ཀྱང་། ས་གནས་བོད་མི་རྣམས་ལ་ཁེ་ཕན་རག་མིན་དཀའ་ངལ་ཆེ་ཤོས་ཤིག་རེད་བསམ་གྱི་འདུག ཅེས་འགྲེལ་བརྗོད་གནང་བྱུང་།

དེ་བཞིན་ཁོང་གིས། དིང་རི་ནི་འཕགས་བོད་གཉིས་ཀྱི་ས་མཚམས་སུ་ཁེལ་ཡོད་པས། རྒྱ་ནག་གཞུང་གིས་ཀྱང་ཧ་ཅང་གནད་འགག་ཆེན་པོ་བརྩི་ཡི་རེད། ཐེངས་འདིར་ས་ཡོམ་གྱི་དོ་ཕོག་བྱུང་བ་ལ་བརྟེན་ནས་རྒྱ་ནག་གཞུང་གིས་རང་ཉིད་ཀྱི་ཁེ་ཕན་ཡོད་པའི་ལས་དོན་ཞིག་བསྒྲུབ་སྲིད་པ་རེད་བསམ་གྱི་འདུག དོན་ངོ་མར་རྒྱ་ནག་གཞུང་གིས་ས་གནས་བོད་མི་རྣམས་ལ་ཁེ་ཕན་སྒྲུབ་ཀྱི་མ་རེད། རྒྱ་གཞུང་གིས་ས་མཚམས་ཐབས་ཇུས་ལས་དོན་བསྒྲུབ་སྲིད་པ་དང་། མ་འོངས་པར་རྒྱ་རིགས་མང་པོ་གནས་སྡོད་བྱེད་པའི་ལམ་ཞིག་བསྐྲུན་སྲིད་པ་རེད། ད་ལྟའི་ཆར་དིང་རི་ནང་ས་ཡོམ་བརྒྱབ་སྟེ་བསྐྱར་གསོ་བྱེད་བཞིན་པའི་ཧ་ཅང་ཟང་ཟིང་གི་སྐབས་ཤིག་རེད། ཟང་ཟིང་དེའི་ཁྲོད་ནས་རྒྱ་ནག་གཞུང་གིས་བསྐྱར་གསོ་འཛུགས་སྐྲུན་གྱི་མིང་འཁྱེར་ཏེ་ལས་ཀ་གང་ཡང་བྱེད་ཆོག་ཆོག་རེད། ཅེས་འགྲེལ་བརྗོད་གནང་བྱུང་།

གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། བསྟན་འཛིན་ཕུར་བུ།