མཉམ་འབྲེལ་རྒྱལ་ཚོགས་ཀྱི་ཕྱི་ལོ་ ༢༠༢༥ ལོའི་འགྲོ་བ་མིའི་ཐོབ་ཐང་གི་ལྷན་ཚོགས་ཐེངས་ ༥༩ པའི་སྟེང་རྒྱ་ནག་གཞུང་གིས་བོད་དང་། ཤར་ཊུར་ཀི་སི་ཐན། ཧོང་ཀོང་སོགས་སུ་ཚད་ལས་འདས་པའི་བཙན་གནོན་བྱེད་མུས་ཡིན་པའི་ཐད་སེམས་འཚབ་ཆེན་པོ་ཡོད་པ་གླེང་སློང་བྱས་འདུག
UN High Commissioner for Human Rights Volker Türk at the 59th session of the UN Human Rights Council (photo:DRM News)
ཟླ་འདིའི་ཕྱི་ཚེས་ ༡༧ ཉིན་འདི་ལོའི་མཉམ་འབྲེལ་རྒྱལ་ཚོགས་ཀྱི་ཕྱི་ལོ་ ༢༠༢༥ ལོའི་འགྲོ་བ་མིའི་ཐོབ་ཐང་གི་ལྷན་ཚོགས་ཐེངས་ ༥༩ པའི་སྟེང་། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་འགན་འཛིན་སྐུ་ཞབས་ཝལ་ཀིར་ཊག་(Volker Türk) མཆོག་གིས། རྒྱ་ནག་གཞུང་གིས་བོད་དང་། ཤར་ཊུར་ཀི་སི་ཐན། ཧོང་ཀོང་སོགས་སུ་ཚད་ལས་འདས་པའི་བཙན་གནོན་བྱེད་མུས་ཡིན་པའི་ཐད་སེམས་འཚབ་ཆེན་མོ་བྱེད་ཀྱི་ཡིན་སྐོར་དང་། རྒྱ་ནག་གཞུང་གིས་འཛིན་བཟུང་བཀག་ཉར་བྱས་པའི་ཆབ་སྲིད་བཙོན་པ་རྣམས་ཀློད་གྲོལ་གཏོང་དགོས་སྐོར་སོགས་གསུངས་འདུག
གནད་དོན་དེ་དང་འབྲེལ་ནས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་འགན་འཛིན་སྐུ་ཞབས་ཝལ་ཀིར་ཊག་མཆོག་གིས། ངས་ཐད་ཀར་རྒྱ་ནག་གཞུང་ལ་འབྲེལ་འདྲིས་བྱས་ཏེ་གནད་དོན་མང་པོ་ཞིག་གི་ཐད་ལ་གོ་བསྡུར་བྱས་པ་ཡིན། རྒྱ་ནག་གཞུང་གིས་རྒྱལ་སྤྱིའི་ཁྲིམས་སྒྲིག་གཞིར་བཟུང་ཁྲིམས་སྒྲིག་བསྐྱར་བཅོས་མ་བྱས་པར་སེམས་འཚབ་ཡོད་ལ། ངའི་ལས་ཁུངས་ཀྱིས་མི་སྒེར་གྱི་གནད་དོན་ཐད་སྐད་ཆ་དྲིས་པ་དག་ལ། རྒྱ་ནག་གཞུང་གིས་ཡ་ལན་གང་ཡང་མ་སྤྲད་པར་སེམས་འཚབ་ཆེན་པོ་ཡོད། ངའི་ལས་ཁུངས་ལ་རྒྱ་ནག་གཞུང་གིས་མུ་མཐུད་དུ་ཤར་ཊུར་ཀི་སི་ཐན་དུ་དྲང་བདེན་མིན་པའི་བཙོན་འཇུག་ཁྲིམས་ཆད་དང་། གར་སོང་ཆ་མེད་དུ་གྱུར་བའི་འཛིན་བཟུང་བཀག་ཉར། གཞི་རྩའི་འགྲོ་བ་མིའི་ཐོབ་ཐང་ལ་དྲག་གནོན་བྱེད་མུས་ཡིན་པ་སོགས་ཚུད་པའི་གནད་དོན་མང་དག་ཅིག་འབྱོར་གྱིན་འདུག དེ་བཞིན་ཧོང་ཀོང་ནང་དུའང་མུ་མཐུད་དུ་རྒྱལ་ཁབ་བདེ་འཇགས་ཀྱི་ཁྲིམས་སྒྲིག་ལག་བསྟར་ཀྱིས་མི་མང་གི་འདུ་འཛོམས་སོགས་ཀྱི་ཐད་ལ་དམ་དྲག་བྱས་པར་སེམས་འཚབ་ཡོད། ཅེས་གསུངས་འདུག
ཡང་ཁོང་གིས། རྒྱ་ནག་གཞུང་གིས་བོད་ནང་ཁྲིམས་སྒྲིག་དང་འགལ་ནས་རིག་གཞུང་དང་གཞི་རྩའི་ཐོབ་ཐང་ཁག་ལ་དྲག་གནོན་བྱེད་མུས་ཡིན་པས། ངས་རྒྱ་ནག་གཞུང་གིས་རྒྱལ་སྤྱིའི་ཁྲིམས་སྒྲིག་གི་དགོངས་དོན་གཞིར་བཞག་གིས། མི་སྒེར་གྱི་གཞི་རྩའི་རང་དབང་གི་སླད་དུ་འབོད་སྒྲ་བསྒྲགས་ནས་འཛིན་བཟུང་བྱས་པ་རྣམས་ཀློད་གྲོལ་དགོས་པའི་ཉེན་བརྡ་གཏོང་གིན་ཡོད། ཅེས་དང་། དེ་བཞིན་ཁོང་གིས་མུ་མཐུད་ཨུ་ཡུ་གཉིས་ཀྱི་གནད་དོན་དང་། དཀྱིལ་ཤར་ཨེ་ཤ་ཡའི་གྷ་ཛར་འབྱུང་མུས་ཡིན་པའི་གནད་དོན། འཛམ་གླིང་གི་ས་ཕྱོགས་གང་སར་འབྱུང་མུས་ཡིན་པའི་འགྲོ་བ་མིའི་ཐོབ་ཐང་གི་གནད་དོན་དང་། ཆོས་དད་རང་མོས། ལྷག་པར་བྱིས་པ་དང་བུད་མེད་ཀྱི་གནས་བབ་དང་ཐོབ་ཐང་སོགས་ཀྱི་ཐད་ལ་གླེང་སློང་གནང་བ་དང་སྦྲགས། གཞི་རྩའི་འགྲོ་བ་མིའི་ཐོབ་ཐང་གི་གནས་བབ་ལ་རྡོག་རོལ་གཏོང་མཁན་གྱི་རྒྱལ་ཁབ་དང་། རྒྱལ་ཕྲན། རང་སྐྱོང་ས་ཚིགས་ཁག་གིས་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམས་སྒྲིག་གཞིར་བཟུང་གཞི་རྩའི་ཐོབ་ཐང་སྲུང་སྐྱོབ་བྱ་དགོས་པའི་ནན་སྐུལ་གནང་འདུག
འདས་ལོའི་ཕྱི་ཟླ་ ༨ པའི་ནང་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ཚན་པས་རྒྱ་ནག་གི་རྒྱལ་ཁབ་བདེ་འཇགས་སྒྲོམ་གཞིར་བསྐྱར་ཞིབ་དང་རྟོག་ཞིབ་བྱ་དགོས་པ་དང་འབྲེལ་བའི་འབོད་སྐུལ་ཡིག་ཆ་ཞིག་སྤེལ་ཡོད་ཅིང་། རྒྱ་ནག་གཞུང་གིས་བོད་དང་ཤར་ཊུ་ཀི་སི་ཐན་གྲངས་ཉུང་མི་རིགས་ཀྱི་ཐོབ་ཐང་དང་ཆོས་ལུགས་རང་དབང་སོགས་ལ་གནོད་སྐྱོན་བཟོ་ཐབས་ཀྱི་སྲིད་ཇུས། དྲག་སྤྱོད་རིང་ལུགས་བཀག་སྡོམ་གྱི་ཁྲིམས་དང་སྲིད་ཇུས་ཟེར་བ། ཉེས་ཁྲིམས། དེ་བཞིན་ཧོང་ཀོང་ནང་འདྲ་མཉམ་ཡོང་བ་དང་དབྱེ་འབྱེད་མེད་པ། རྒྱལ་ཁབ་བདེ་འཇགས་ཀྱི་ཁྲིམས་དང་། སེམས་འཚབ་ཆེ་བའི་འགྲོ་བ་མིའི་ཐོབ་ཐང་གི་གནས་སྟངས་སོགས་ཀྱི་སྐོར་ལ་གླེང་སློང་ཤུགས་ཆེན་གནང་ཡོད།
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
