རྒྱ་གར་དང་བོད་ས་འབྲེལ་ཡིན་པ་ལས་རྒྱ་ནག་ལ་འབྲེལ་བ་མེད་ཅེས་གསུངས།

ཟླ་འདིའི་ཕྱི་ཚེས་ ༡༠ ཉིན་རྒྱ་གར་བྱང་ཤར་ཨ་རུ་ནཱ་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་གིས་རྒྱ་གར་དང་བོད་གཉིས་མཐའ་མཚམས་འབྲེལ་ཡོད་པ་ལས་རྒྱ་ནག་ལ་མཐའ་འབྲེལ་མེད་སྐོར་གསུངས།

རྒྱ་ནག་གཞུང་གིས་ཨ་རུ་ནཱ་ཅལ་དང་ལ་དྭགས་སོགས་མཐའ་མཚམས་མངའ་སྡེ་ཁག་གི་ནང་སིམ་འཛུལ་གྱི་རྩོད་རྙོག་བསྟུད་མར་བཟོ་ཡི་ཡོད་པ་མ་ཟད། ཨ་རུ་ནཱ་ཅལ་གྱི་རི་ཆུ་མང་པོར་མིང་གསར་པ་བཏགས་ཏེ་བདག་དབང་རྩོད་ལེན་གྱི་དཀའ་རྙོག་སློང་བཞིན་ཡོད་པར་བརྟེན། ཟླ་འདིའི་ཕྱི་ཚེས་ ༡༠ ཉིན་ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་ལ་རྒྱ་གར་གསར་ཁང་ (Press Trust of India) གིས་བཅར་འདྲི་བྱེད་སྐབས།  ཁྱེད་ཚོས་ས་ཁྲ་ལ་བལྟས་པ་ན། རྒྱ་གར་གྱི་མངའ་སྡེ་གང་ཡང་རྒྱ་ནག་གི་ས་མཚམས་དང་ཐད་ཀར་འབྲེལ་བ་མེད། ང་ཚོ་བོད་གཅིག་པུར་འབྲེལ་བ་ཡོད། གཞུང་འབྲེལ་གྱི་ཐོག་ནས་བོད་དེ་རྒྱ་ནག་གི་ཆ་ཤས་སུ་ཡོད་པ་ཕྱིར་འཐེན་མི་ཐུབ་ཀྱང་། དོན་དངོས་ཐོག་བོད་དེ་ཕྱི་ལོ་ ༡༩༥༩ ལོར་རྒྱ་ནག་གིས་བཙན་བཟུང་བྱས་པ་ཞིག་རེད་ཅེས་གསུངས་འདུག

ཡང་ཁོང་གིས། རྒྱ་ནག་གཞུང་གིས་ཨ་རུ་ན་ཅལ་མངའ་སྡེའི་ས་མཚམས་ནས་སྤྱི་ལེ་ ༥༠ ཙམ་གྱི་སར་ཡོད་པའི་མེ་ཏོག་རྫོང་ཁོངས་ཀྱི་འཛམ་གླིང་གི་ཆུ་རགས་རིང་ཤོས་སུ་གྲགས་པའི་ལས་གཞི་དེས་འདབས་འབྲེལ་ས་གནས་ཀྱི་མི་མང་ལ་གནོད་སྐྱོན་བཟོ་རྒྱུ་ཡིན་པ་མ་ཟད། རང་བྱུང་ཁོར་ཡུག་ལ་གནོད་པའི་ཆུ་འབར་མདེལ་བཟོ་སྲིད་པའི་ཉེན་བརྡ་བཏང་གནང་འདུག

བཅར་འདྲིའི་སྐབས་སྤྱི་ཁྱབ་བློན་ཆེན་མཆོག་གིས། ཨ་རུ་ན་ཅལ་མངའ་སྡེས་བོད་དང་སྤྱི་ལེ ༡༢༠༠ དང་། འབྲུག་དང་སྤྱི་ལེ་ ༡༠༠ ། འབར་མ་དང་སྤྱི་ལེ་ ༥༥༠ ཡི་མཐའ་མཚམས་མཉམ་སྤྱོད་བྱེད་ཀྱི་ཡོད་ལ། ཁུལ་དེར་རྒྱ་ནག་གཞུང་གིས་ཧམ་འཛུལ་བྱེད་པར་སྣང་ཆུང་བྱེད་མི་རུང་སྐོར་གསུངས་འདུག

ཉིན་ཤས་གོང་དུ་སྤྱི་ཁྱབ་བློན་ཆེན་མཆོག་བཞུགས་སྒར་དྷ་རམ་ས་ལའི་༧སྐུའི་གོ་སྟོན་མཛད་སྒོའི་ཐོག་ཆེད་ཕེབས་གནང་ཡོད་པ་དང་། ཁོང་གིས་༧གོང་ས་རྒྱལ་བ་རིན་པོ་ཆེ་མཆོག་གི་རླབས་ཆེན་གྱི་མཛད་པར་ཆེད་བསྟོད་ཞུས་པ་དང་སྦྲགས། རྒྱ་གར་གཞུང་ལ་ཆེས་མཐོའི་གཟེངས་རྟགས་བྷ་ར་ཏི་རཱ་ཏ་ན་འབུལ་ལམ་ཞུ་དགོས་པའི་འབོད་སྐུལ་ཡང་གནང་ཡོད་འདུག

དེ་བཞིན་ཕྱི་ལོ་ ༢༠༢༠ ཟླ་ ༡༡ ཚེས་ ༡༧ ཉིན་རྒྱ་གར་གྱི་ (The New Indian Express) གསར་ཁང་གིས་ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་ལ་བཅར་འདྲི་ཞུ་སྐབས། སྤྱི་ཁྱབ་བློན་ཆེན་མཆོག་ནས་དོན་དངོས་སུ་ཨ་རུ་ན་ཅལ་ནི་ཐད་ཀར་རྒྱ་ནག་དང་ས་འབྲེལ་མེད་པར། ཐད་ཀར་ས་འབྲེལ་ཡོད་པ་དེ་བོད་རེད། སུས་ཀྱང་ལོ་རྒྱུས་ནག་གསུབ་གཏོང་ཐུབ་ཀྱི་མ་རེད། རྒྱ་ནག་གིས་བོད་བཙན་བཟུང་བྱས་པ་ནི་འཛམ་གླིང་ལ་ཡོངས་གྲགས་རེད། ཅེས་གསུངས་ཡོད་པ་རེད།

ཕྱི་ལོ་ ༢༠༢༤ ཟླ་ ༣ ཚེས་ ༢༠ ཉིན་རྒྱ་གར་དབུས་བློན་ཆེན་ཀི་རན་རི་ཇི་ཇུ་ (Kiren Rijiju) མཆོག་ལ་རྒྱ་གར་གྱི་པི་ཏི་ཨེས་ (PTI) བཅར་འདྲི་བྱེད་སྐབས་ཁོང་གིས། ལོ་རྒྱུས་ཐོག་ནས་བལྟས་ན་ང་ཚོ་དང་རྒྱ་ནག་བར་འབྲེལ་བ་གང་ཡང་མེད། བྱས་ཙང་ཨ་རུ་ནཱ་ཅལ་རྒྱ་ནག་གི་ཆ་ཤས་ཤིག་ཡིན་པར་དྲི་བ་སྤུ་ཙམ་ཡང་མེད། ང་ཚོའི་ལངས་ཕྱོགས་ཧ་ཅང་གསལ་པོ་རེད། ཨ་རུ་ནཱ་ཅལ་ནི་རྒྱ་གར་གྱི་མངའ་ཁོངས་རེད། ཅེས་གསུངས་ཡོད་པ་རེད།

ཉི་སྒྲོན་གྱིས་བྲིས། པདྨ་མཚོས་རྩོམ་སྒྲིག་བྱས།