རྒྱལ་མཚན་ནོར་བུས་རྒྱ་ནག་དམར་ཤོག་ཚོགས་པའི་ལས་དོན་ལ་རྒྱབ་སྐྱོར་གྱིས། དམར་ཤོག་མགོ་ཁྲིད་ལ་བརྩི་བཀུར་དང་མེས་རྒྱལ་གཅིག་གྱུར་ཟེར་བ། བོད་བརྒྱུད་ནང་བསྟན་རྒྱ་ནག་ཅན་དུ་བསྒྱུར་བ་སོགས་སུ་ནུས་ཤུགས་འདོན་རྒྱུ་ཡིན་སྐོར་བརྗོད་འདུག
ཉིན་འདི་ཚོར་གསར་འགྱུར་བརྒྱུད་ལམ་ཁག་ཏུ་དུས་རབས་ཉེར་གཅིག་པའི་བླ་ན་མེད་པའི་སྟོན་པ་ཆེན་པོ། ༧གོང་ས་རྒྱལ་བ་རིན་པོ་ཆེ་མཆོག་གི་༧སྐུའི་གོ་སྟོན་གྱི་གསར་འགྱུར་དང་། ཁོང་གི་ཡང་སྲིད་སྐོར་ལ་དཔྱད་གཏམ་སྤེལ་བའི་གནས་ཚུལ་གྱིས་ཁེངས་འདུག ཡིན་ནའང་། རྒྱ་ནག་གཞུང་འབྲེལ་གྱི་གསར་ལམ་ཁག་ཏུ། ཟླ་འདིའི་ཕྱི་ཚེས་ ༦ ཉིན་རྒྱ་ནག་གིས་བསྐོ་གཞག་བྱས་པའི་པཎ་ཆེན་རྒྱལ་མཚན་ནོར་བུས་རྒྱ་ནག་གི་མགོ་ཁྲིད་ཞི་ཅིན་ཕིན་ཐུག་འཕྲད་བྱས་ཡོད་ཅིང་། སྐབས་དེར་རྒྱལ་མཚན་ནོར་བུས་བོད་བརྒྱུད་ནང་བསྟན་དེ་ཀྲུང་གོ་ཅན་དུ་བསྒྱུར་རྒྱུ་དང་ལེན་བྱས་ཡོད་པ་མ་ཟད། གསར་འགྱུར་གྱི་ཁ་བྱང་དུ་ཞི་ཅིན་ཕིན་གྱིས་རྒྱལ་མཚན་ནོར་བུའི་གུས་མཇལ་དང་ལེན་བྱས་ཡོད་ཅེས་རྒྱལ་མཚན་ནོར་བུ་ཞི་ཅིན་ཕིན་གྱི་འོག་གི་མི་ཡིན་པ་གསལ་སྟོན་བྱས་འདུག
གསར་འགྱུར་དེའི་ནང་དུ། ཞི་ཅིན་ཕིན་གྱིས་རྒྱལ་མཚན་ནོར་བུར་བློ་བརྟན་འགྱུར་མེད་ཀྱི་ཐོག་ནས་མེས་རྒྱལ་གཅིག་གྱུར་དང་། རྒྱ་ནག་རྒྱལ་ཁབ་ཆེད་དུ་སྤྱི་ཚོགས་ཀྱི་འདུ་ཤེས་བརྟན་པོ་བསྐྲུན་རྒྱུར་ལས་དོན་ཡག་པོ་བྱ་དགོས་པ་དང་། བོད་བརྒྱུད་ནང་བསྟན་དེ་ཀྲུང་གོ་ཅན་དུ་བསྒྱུར་བ། བོད་ལྗོངས་དེང་རབས་ཅན་དུ་འཛུགས་སྐྲུན་བྱེད་པར་མུ་མཐུད་དུ་ནུས་པ་འདོན་དགོས་ལུགས་ཀྱི་ལམ་སྟོན་བྱས་ཡོད་འདུག་ལ། རྒྱལ་མཚན་ནོར་བུས་ཞི་ཡི་ལམ་སྟོན་དེ་སེམས་སུ་བཅངས་ནས་དམར་ཤོག་ཚོགས་པའི་སྣེ་འཁྲིད་པའི་ལས་དོན་ལ་རྒྱབ་སྐྱོར་དང་ཀྲུང་ཧྭ་མི་རིགས་གཅིག་གྱུར། གྲངས་ཉུང་མི་རིགས་མཐུན་སྒྲིལ་བྱེད་པར་ནུས་ཤུགས་ཡོད་རྒུ་བཏོན་ནས་ཞབས་འདེགས་སྒྲུབ་རྒྱུ་ཡིན་ཚུལ་ཁས་ལེན་བྱས་ཡོད་སྐོར་བཀོད་འདུག
རྒྱ་ནག་གཞུང་གིས་རྒྱལ་མཚན་ནོར་བུ་པཎ་ཆེན་རིན་པོ་ཆེའི་ཡང་སྲིད་དུ་དྭང་ལེན་དང་ངོས་འཛིན་འཐོབ་སླད། བོད་ནང་གི་ས་གནས་ཁག་ལ་གཞུང་འབྲེལ་སྐོར་སྐྱོད་དུ་བཏང་ནས་ས་གནས་སེར་སྐྱ་མང་ཚོགས་ལ་བཙན་གྱིས་ཕེབས་བསུ་ཞུ་རུ་བཅུག་ཡོད་ལ། ཁོང་ངོས་ལེན་མ་བྱས་ན་ཁྲིམས་ཀྱི་ནག་ཉེས་འགེལ་གྱི་ཡོད་པའི་དཔེ་མཚོན་གསལ་ཤོས་ཤིག་ནི། ཉེ་ལམ་ཝེ་ཏི་ནམ་དུ་ཡོད་པའི་རྒྱ་ནག་གཞུང་ཚབ་ཁང་གིས་འཛིན་བཟུང་གཅར་རྡུང་བཏང་སྟེ་མཐར་སྐུ་བཀྲོངས་བའི་སྤྲུལ་སྐུ་ཧཱུྃ་ཀར་རྡོ་རྗེ་རིན་པོ་ཆེ་ཆགས་ཡོད། འདས་ལོའི་ཕྱི་ཟླ་ ༩ པའི་ནང་རྒྱ་ནག་གཞུང་གི་གོ་སྒྲིག་འོག རྒྱལ་མཚན་ནོར་བུ་བོད་མགོ་ལོག་ཁུལ་དུ་སྐོར་སྐྱོད་ལ་ཡོང་སྐབས། རྒྱ་གཞུང་གི་བཀོད་མངགས་ལྟར་ཕེབས་བསུ་མ་གནང་བའི་རྐྱེན་གྱིས་སྤྲུལ་སྐུ་ཧཱུྃ་ཀར་རྡོ་རྗེ་རིན་པོ་ཆེ་མཆོག་ལ་གོང་རིམ་གྱི་བཀའ་ལ་མ་ཉན་པའི་ནག་ཉེས་བཙུགས་རྐྱེན་ཉེན་ཡོལ་དུ་ཕེབས་དགོས་བྱུང་ཡོད་པ་རེད།
རྒྱལ་སྤྱིའི་ཐོག་ནས་ངོས་འཛིན་ཡོང་སླད་ཕྱིའི་རྒྱལ་ཁབ་ཀྱི་སྡིངས་ཆའི་ཐོག་ཏུ་གཏོང་ཐབས་རིམ་པར་བྱས་དང་བྱེད་བཞིན་ཡོད་པ་རེད། འདས་ལོར་རྒྱལ་མཚན་ནོར་བུ་དང་འབྲེལ་བའི་གནས་ཚུལ་གཞན་ཞིག་ཕྱིའི་བརྒྱུད་ལམ་དུ་ཐོན་པ་ནི། ཕྱི་ལོ་ ༢༠༢༤ ཟླ་ ༡༢ ཚེས་ ༡༢ ནས་ ༡༧ བར་དུ་སྟོན་པ་བཅོམ་ལྡན་འདས་སྐུ་འཁྲུངས་སའི་གནས་མཆོག་ལུམ་བི་ནིར་ལྷོ་རྒྱ་ནག་རྒྱ་མཚོའི་ནང་པའི་ལྷན་ཚོགས་ཐེངས་ ༩ པ་ཟེར་བ་ཞིག་རྒྱ་ནག་གིས་གོ་སྒྲིག་བྱས་ཡོད་པ་དང་། དེའི་ཐོག་རྒྱལ་མཚན་ནོར་བུ་ཡོང་གཏན་འཁེལ་ཡོད་སྐོར་ཀྱི་གནས་ཚུལ་གསར་འགྱུར་བརྒྱུད་ལམ་དུ་ཐོན་ཡོད་ཀྱང་། བལ་ཡུལ་གཞུང་གིས་གནས་ཚུལ་དེ་བདེན་པ་མིན་ལ། བལ་གཞུང་གིས་ཁོང་ཡོང་དུ་འཇུག་རྩིས་མེད་སྐོར་བརྗོད་ཡོད་པ་ལྟར། ཁོང་ལྷན་ཚོགས་དེའི་ཐོག་མཉམ་ཞུགས་བྱས་པའི་གནས་ཚུལ་གང་ཡང་ཐོན་མེད་པ་རེད།
ཕྱི་ལོ་ ༢༠༡༩ ཟླ་ ༥ དཀྱིལ་ཙམ་ནས་རྒྱལ་མཚན་ནོར་བུ་ཐའེ་ལན་ཌིར་གཞུང་འབྲེལ་སྐོར་སྐྱོད་དུ་ཕྱིན་ཏེ། ཐའེ་ལན་ཌའི་ནང་པའི་གཙུག་ལག་སློབ་ཆེན་གཙོ་བོར་གྱུར་བའི་ནང་པའི་བྱེད་སྒོ་ཁག་ཅིག་གི་ནང་མཉམ་ཞུགས་བྱས་ཡོད་པའི་གནས་ཚུལ་ཐོན་ཡོད། ཕྱི་ལོ་ ༢༠༡༢ ལོར་རྒྱལ་མཚན་ནོར་བུ་ལགས་ཧོང་ཀོང་ནང་སྐོར་སྐྱོད་དུ་ཕྱིན་ཡོད་ཀྱང་། གནས་ཚུལ་དེ་ཟླ་གཅིག་ཙམ་གྱི་རྗེས་སུ་གཞི་ནས་ཕྱིར་བསྒྲགས་བྱས་ཡོད་པ་རེད།
ཕྱི་ལོ་ ༡༩༩༥ ཟླ་ ༡༡ ཚེས་ ༡༡ ཉིན་རྒྱ་ནག་དམར་ཤོག་ཚོགས་པས་རྒྱལ་མཚན་ནོར་བུ་ཞེས་པ་ཞིག་པཎ་ཆེན་སྐུ་ཕྲེང་བཅུ་པའི་ཡང་སྲིད་དུ་ངོས་འཛིན་གསལ་བསྒྲགས་བྱས་ཤིང་། ཕྱི་ལོ་ ༡༩༩༥ ཟླ་ ༡༢ ནང་གདན་ས་བཀྲ་ཤིས་ལྷུན་པོའི་གཡས་གཡོན་དུ་དམག་མི་ལྔ་བརྒྱ་ལྷག་བཏང་ནས་ཉེན་སྲུང་བཙན་པོའི་ངང་ཁྲི་འདོན་བྱས་ཡོད་འདུག དེ་ཡང་ཕྱི་ལོ་ ༡༩༩༥ ཟླ་ ༥ ཚེས་ ༡༤ ཉིན་༧གོང་ས་རྒྱལ་བ་རིན་པོ་ཆེ་མཆོག་གིས་༧པཎ་ཆེན་སྐུ་ཕྲེང་བཅུ་གཅིག་པ་
ཕྱི་ལོ་ ༢༠༡༩ ཟླ་ ༦ ཚེས་ ༢༢ ཉིན་རྒྱལ་མཚན་ནོར་བུ་ཐོག་མར་བོད་རང་སྐྱོང་ལྗོངས་ཟེར་བའི་ནང་བསྟན་མཐུན་ཚོགས་ཀྱི་ཚོགས་གཙོར་བསྐོས་ཤིང་། འདི་ལོའི་ཕྱི་ཟླ་ ༩ ཚེས་ ༣ ཉིན་རྒྱལ་མཚན་ནོར་བུ་བསྐྱར་དུ་བོད་རང་སྐྱོང་ལྗོངས་ཟེར་བའི་ནང་བསྟན་མཐུན་ཚོགས་ཀྱི་ཚོགས་གཙོར་བསྐོ་བཞག་བྱས་ཡོད། ད་ལྟ་ཁོང་རྒྱ་ནག་ནང་བསྟན་མཐུན་ཚོགས་ཀྱི་ཚོགས་གཞོན་ཡང་ཡིན་འདུག
བློ་བཟང་སྒྲོལ་མ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
