རྒྱ་གར་གྲོས་ཚོགས་གོང་མའི་འཐུས་མི་རྡོ་རྗེ་ཚེ་རིང་ལེབ་ཆ་ལགས་ཀྱིས་རྒྱ་གར་དབུས་གཞུང་གི་ལམ་སྟོན་འོག་མཐའ་སྲུང་ཉེན་རྟོག་པ་དང་དམག་མི་སོགས་ཀྱིས་ཧིན་བོད་ས་མཚམས་ཞེས་པའི་ཐ་སྙད་བེད་སྤྱོད་གཏོང་དགོས་པའི་འབོད་སྐུལ་ཞུས།
ཟླ་འདིའི་ཕྱི་ཚེས་ ༡༢ ཉིན་རྒྱ་གར་བྱང་ཤར་ཁུལ་གྱི་འབྲས་ལྗོངས་མངའ་སྡེའི་བྷི་རྗེ་པི་ཆབ་སྲིད་ཚོགས་པའི་སྣེ་ཁྲིད་པ་དང་། རྒྱ་གར་གྱི་གྲོས་ཚོགས་གོང་མའི་འཐུས་མི་རྡོ་རྗེ་ཚེ་རིང་ལེབ་ཆ་ (Dorjee Tshering Lepcha) ལགས་ཀྱིས། རྒྱ་གར་དབུས་གཞུང་གིས་རྒྱ་དཀར་ནག་གི་ས་མཚམས་ (Indo-China Border) ཟེར་བ་དེ་འཕགས་བོད་ས་མཚམས་ (Indo-Tibet Border) ཞེས་མིང་བསྒྱུར་དགོས་པའི་འབོད་སྐུལ་ཞུས་ཡོད་པ་མ་ཟད། རྒྱ་གར་གྱི་དམག་མི་དང་མཐའ་སྲུང་ཉེན་རྟོག་པ་སོགས་ལ་འཕགས་བོད་ས་མཚམས་ཞེས་པའི་ཐ་སྙད་བེད་སྤྱོད་གཏོང་དགོས་པའི་ལམ་སྟོན་གནང་རྒྱུའི་འབོད་སྐུལ་ཞུས་འདུག
དེ་སྔ་རྒྱ་གར་ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་ནས་རྒྱ་དཀར་ནག་གི་ས་མཚམས་དེ་འཕགས་བོད་ས་མཚམས་ཞེས་མིང་བསྒྱུར་དགོས་སྐོར་གསུངས་ཡོད་པ་ལྟར། གྲོས་ཚོགས་འཐུས་མི་རྡོ་རྗེ་ཚེ་རིང་ལེབ་ཆ་ལགས་ཀྱིས་བསྐྱར་དུ་རྒྱ་གར་དབུས་གཞུང་ལ་མིང་བསྒྱུར་གནང་དགོས་པའི་འབོད་སྐུལ་ཞུས་ཡོད་པ་མ་ཟད། ཧིན་བོད་མཐའ་མཚམས་ས་ཐིག་ (LAC) དེ་རྒྱ་གར་དང་བོད་གཉིས་མཐའ་འབྲེལ་ཡིན་པ་ལས་རྒྱ་ནག་ལ་མཐའ་འབྲེལ་མེད། ཅེས་འགྲེལ་བརྗོད་གནང་འདུག
ཡང་གྲོས་ཚོགས་འཐུས་མི་ལེབ་ཆ་ལགས་ཀྱིས། ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་མཆོག་གིས་བོད་དང་རྒྱ་གར་གཉིས་མཐའ་འབྲེལ་ཡིན་པ་ལས་རྒྱ་ནག་ལ་མཐའ་འབྲེལ་མེད་སྐོར་གསུངས་པ་དེར་རྒྱབ་སྐྱོར་ཡོད། ད་ལྟའི་ཆར་ཐ་སྙད་ནོར་བ་དེ་བཅོས་ནས་དོན་དམ་དང་དངོས་ཡོད་ལོ་རྒྱུས་ཁས་ལེན་བྱེད་དགོས་པའི་དུས་ལ་བབ་ཡོད། རྒྱ་གར་དབུས་གཞུང་གིས་རྒྱ་གར་གྱི་དམག་མི་དང་། འཕགས་བོད་ས་མཚམས་ཀྱི་མཐའ་སྲུང་ཉེན་རྟོག་པ་ (Indo Tibetan Border Police)། མཐའ་མཚམས་གཞུང་ལམ་འཛུགས་སྐྲུན་ཚོགས་པ་ (Border Roads Organisation) སོགས་གཞུང་འབྲེལ་དང་གཞུང་འབྲེལ་མིན་པའི་ཚོགས་སྡེ་ཁག་ཚང་མར་འཕགས་བོད་ས་མཚམས་ཞེས་པའི་ཐ་སྙད་བེད་སྤྱོད་གཏོང་དགོས་པའི་ལམ་སྟོན་གནང་རྒྱུའི་འབོད་སྐུལ་ཞུ་ཡི་ཡོད། ཐ་སྙད་དེ་ནི་དོན་འགྲེལ་གྱི་འགྱུར་བ་ཙམ་མ་ཡིན་པར་ལོ་རྒྱུས་ཀྱི་དངོས་ཡོད་གནས་ཚུལ་ཁས་ལེན་པ་ཞིག་རེད། ཅེས་ནན་བརྗོད་གནང་འདུག
ཟླ་འདིའི་ཕྱི་ཚེས་ ༡༠ ཉིན་ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་ལ་རྒྱ་གར་གསར་ཁང་ (Press Trust of India) གིས་བཅར་འདྲི་བྱེད་སྐབས། ཁྱེད་ཚོས་ས་ཁྲ་ལ་བལྟས་པ་ན། རྒྱ་གར་གྱི་མངའ་སྡེ་གང་ཡང་རྒྱ་ནག་གི་ས་མཚམས་དང་ཐད་ཀར་འབྲེལ་བ་མེད། ང་ཚོ་བོད་གཅིག་པུར་འབྲེལ་བ་ཡོད། གཞུང་འབྲེལ་གྱི་ཐོག་ནས་བོད་དེ་རྒྱ་ནག་གི་ཆ་ཤས་སུ་ཡོད་པ་ཕྱིར་འཐེན་མི་ཐུབ་ཀྱང་། དོན་དངོས་ཐོག་བོད་དེ་ཕྱི་ལོ་ ༡༩༥༩ ལོར་རྒྱ་ནག་གིས་བཙན་བཟུང་བྱས་པ་ཞིག་རེད། ཅེས་གསུངས་ཡོད་པ་རེད།
རྩ་བའི་ལ་དྭགས་སོགས་སུ་འཕགས་བོད་ས་མཚམས་ཞེས་པའི་མིང་བེད་སྤྱོད་གཏོང་བཞིན་ཡོད་ཀྱང་ཀུན་ལ་ཁྱབ་པ་ཞིག་ཡོང་གི་མེད་ལ། ལྷག་པར་དུ་ཨ་རུ་ནཱ་ཅལ་མངའ་སྡེ་དང་བོད་ས་ཁྱོན་སྤྱི་ལེ ༡༡༠༠ ཙམ་མཉམ་སྤྱོད་གནང་བཞིན་ཡོད་པ་རེད།
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། པདྨ་མཚོ།
