རྒྱ་ནག་ནང་མིང་དུ་གྲགས་པའི་ཧྲའོ་ལིན་དགོན་པའི་མཁན་པོ་ཧྲི་ཡུང་ཞིན་གྱིས་དགོན་པའི་རྒྱུ་ནོར་སྒེར་སྤྱོད་དང་། བུད་མེད་དང་ཕྲུ་གུར་ལྐོག་ཏུ་གསོ་སྐྱོང་བྱས་པའི་དོགས་གཞིའི་བརྟག་དཔྱད་བྱས་འདུག
ཟླ་འདིའི་ཕྱི་ཚེས་ ༢༧ ཉིན་རྒྱ་ནག་གི་ཧྲའོ་ལིན་ (Shaolin) དགོན་པའི་དོ་དམ་ཁང་གིས་གསལ་བསྒྲགས་ཤིག་སྤེལ་པ་ལྟར་ན། ཧྲའོ་ལིན་དགོན་པའི་ཁྲི་པ་ཧྲི་ཡུང་ཞིན་(释永信) ལ་ཉེས་དོན་ཉེས་པ་བསགས་པའི་དོགས་པ་ཡོད་པ་དང་། རྣམ་གྲངས་ཀྱི་མ་དངུལ་དང་དགོན་པའི་རྒྱུ་ནོར་སྒེར་སྤྱོད་ཧམ་བཟུང་། ནང་བསྟན་གྱི་འདུལ་ཁྲིམས་དང་རྒྱབ་འགལ་ཚབས་ཆེན་པོ་བྱས་པ། ཡུན་རིང་པོར་བུད་མེད་མང་པོ་ཞིག་དང་ཚུལ་མིན་གྱི་འབྲེལ་བ་མཚམས་མ་ཆད་པར་མ་ཟད། ལྐོག་ཏུ་ཕྲུ་གུ་གསོ་སྐྱོང་བྱས་ཡོད། མིག་སྔར་སྡེ་ཁག་མང་པོའི་མཉམ་འབྲེལ་བརྟག་དཔྱད་བྱེད་བཞིན་ཡོད་པ་དང་། འབྲེལ་ཡོད་གནས་ཚུལ་དུས་ཐོག་ཏུ་སྤྱི་ཚོགས་ལ་ཁྱབ་བསྒྲགས་བྱ་རྒྱུ་ཡིན་ཚུལ་བསྒྲགས་འདུག
དེའི་སྐོར་ལ་རྒྱ་ནག་ནང་བསྟན་མཐུན་ཚོགས་ཀྱིས་ཧྲི་ཡུང་ཞིན་གྱི་བྱ་ལུགས་སྤྱོད་སྟངས་མི་ཆོས་དང་མི་མཐུན་ལ་སྒྲིལ་འགལ་ཡིན་པས་ནང་བསྟན་ལས་རིགས་ཀྱི་མཚན་སྙན་ལ་གནོད་པ་ཚབས་ཆེན་བཏང་བ་དང་དགོན་པའི་གྲྭ་བའི་མཚན་སྙན་ལ་གནོད་པ་ཐེབས་ཡོད། རྒྱ་ནག་ནང་བསྟན་མཐུན་ཚོགས་ཀྱིས་ཧྲི་ཡུང་ཤིན་ལ་ཁྲིམས་ལྟར་ཐག་གཅོད་བྱ་རྒྱུའི་གཏན་འབེབས་ལ་བརྩི་བཀུར་དང་རྒྱབ་སྐྱོར་མཐའ་གཅིག་ཏུ་བྱ་རྒྱུ་དང་། ཉིན་ཤས་གོང་དུ་རྒྱ་ནག་ནང་བསྟན་མཐུན་ཚོགས་ལ་ཧི་ནན་ཞིང་ཆེན་ནང་བསྟན་མཐུན་ཚོགས་ཀྱིས་བསྐུར་བའི་ཧྲི་ཡུང་ཤིན་གྱི་གྲྭ་བའི་ཐོབ་ཐང་ལེན་པའི་སྐོར་གྱི་སྙན་ཞུ་ཞེས་པ་འབྱོར་ཡོད། འབྲེལ་ཡོད་གཏན་འབེབས་གཞིར་བཟུང་རྒྱ་ནག་ནང་བསྟན་མཐུན་ཚོགས་ཀྱིས་ཧྲི་ཡུང་ཞིན་ནམ་སྐྱ་མིང་ལ་ལིའུ་དབྱིན་ཁྲེན་ཟེར་བ་གྲྭ་བའི་མིང་ཐོ་ལས་ཕུད་རྒྱུར་མོས་མཐུན་བྱས་ཡོད་ཅེས་བརྗོད་འདུག
ཧྥ་རན་སིའི་རླུང་འཕྲིན་ཁང་གི་རྒྱ་སྐད་སྡེ་ཚན་གྱི་གནས་ཚུལ་སྤེལ་བ་ལྟར་ན། ཧྲི་ཡུང་ཞིན་གྱིས་ནམ་རྒྱུན་ཝི་པོད་སྤྱི་ཚོགས་དྲ་ལམ་དུ་ནང་ཆོས་སྐོར་སྤེལ་བཞིན་ཡོད་པ་དང་། ཁོང་གི་དྲ་ལམ་ལ་ལྟ་ཀློག་བྱེད་མཁན་མི་གྲངས་ ༨༨༠༠༠ ལྷག་ཡོད་འདུག ཟླ་འདིའི་ཕྱི་ཚེས་ ༢༤ ཉིན་གྱི་ཞོགས་པའི་ཆུ་ཚོད་ ༦།༥༨ ཙམ་ལ་ཁོང་གིས་བརྩམས་ཆོས་མཐའ་མ་དེ་སྤེལ་ཡོད་ཅིང་། གསར་འགྱུར་བརྒྱུད་ལམ་ཁག་གིས་ཧྲའོ་ལིན་དགོན་པའི་ཕྱི་འབྲེལ་འགན་འཛིན་ཧྲི་ཡུང་ཞིན་གྱི་སྐོར་རྒྱུས་ལོན་བྱེད་རྩིས་བྱས་ཀྱང་།ཉེ་ལམ་ནས་བཟུང་ཁོང་མཐོང་རྒྱུ་མེད་པ་དང་། གཞུང་འབྲེལ་གྱི་གསར་འགྱུར་ལ་སྒུག་བསྡད་ཡོད་སྐོར་འགྲེལ་བརྗོད་གནང་འདུག་ལ། གཟའ་ཉི་མའི་ཉིན་ཧྲའོ་ལིན་དགོན་པའི་དྲ་ཚིགས་ཐོག་ཏུ་ཡོད་པའི་ཧྲི་ཡུང་ཞིན་དང་འབྲེལ་བའི་རྩོམ་ཡིག་མང་པོ་ཞིག་ནག་གསུབ་བཏང་ཡོད་པ་ཤེས་རྟོགས་བྱུང་ཡོད་འདུག
འདི་ལོའི་ཕྱི་ཟླ་ ༢ ནང་ཧྲི་ཡུང་ཞིན་གྱིས་ཡེ་ཤུའི་བླ་ཆེན་འདས་པོ་ཧྥ་རན་སི་སི་(Pope Francis) དང་མཇལ་འཕྲད་གནང་རྗེས། རྒྱ་ནག་ནས་ཕྱིའི་རྒྱལ་ཁབ་ཁག་ཏུ་འགྲོ་མི་ཆོག་པའི་བཀག་སྡོམ་བྱས་ཡོད་པ་དང་། འདི་ལོའི་ཕྱི་ཟླ་ ༥ པའི་ནང་ཀྲིན་ཀྲོའུ་གྲོང་ཁྱེར་གྱི་ཆོས་ལུགས་ལས་དོན་ཁང་དང་། འཐབ་ཕྱོགས་ལས་དོན་ཁང་གི་མི་སྣས་ཧྲའོ་ལིན་དགོན་པར་ཞིབ་བཤེར་བྱས་ཡོད་འདུག
ཧྲི་ཡུང་ཞིན་ནི་ཕྱི་ལོ་ ༡༩༦༥ ལོར་རྒྱ་ནག་ཨན་ཧེ་ཞིང་ཆེན་ཡན་ཧྲང་རྫོང་དུ་སྐྱེས་ཡོད་ཅིང་། ཕྱི་ལོ་ ༡༩༨༡ ལོར་ཕ་མའི་མོས་མཐུན་ལྟར་རྒྱ་ནག་ཧི་ནན་ཞིང་ཆེན་དུ་ཡོད་པའི་ཧྲའོ་ལིན་དགོན་པར་རབ་བྱུང་བསྒྲུབས། ཕྱི་ལོ་ ༡༩༩༩ ལོར་ཧྲའོ་ལིན་དགོན་པའི་མཁན་པོ་ཐེངས་ ༣༠ པའི་ལས་འགན་འཁུར། ཕྱི་ལོ་ ༢༠༠༦ ལོར་ཨ་རིའི་ལུས་རྩལ་སློབ་གླིང་ནས་རྒྱལ་སྤྱིའི་འབུམ་རམས་པའི་གཟེངས་རྟགས་བླངས། ཕྱི་ལོ་ ༢༠༡༢ ལོར་རྒྱ་ནག་གི་རིམ་དང་པོའི་ནང་བསྟན་མཐོ་སློབ་ལས་ཧི་ནན་ནང་བསྟན་སློབ་གླིང་གི་སློབ་གཙོའི་འགན་འཁུར། གཞན་ཡང་རྒྱ་ནག་ནང་བསྟན་མཐུན་ཚོགས་ཀྱི་ཚོགས་གཙོ་གཞོན་པ་དང་། རྒྱ་ནག་དམངས་འཐུས་ཚོགས་ཆེན་སྐབས་དགུ་བ་ནས་བཅུ་བཞིའི་བར་གྱི་འཐུས་མི། ཧྲའོ་ལིན་དགོན་པའི་གློག་བརྙན་ནང་དྲག་རྩལ་འཁྲབ་ཁྲིད་པའི་ལས་ཀ་བྱས། དེ་བཞིན་ངའི་སེམས་ཀྱི་ཧྲའོ་ལིན་དགོན་པ་དང་། བདེ་སྐྱིད་ཀྱི་ཞི་གནས། བྱང་ཆུབ་སེམས་མདོ། ཧྲའོ་ལིན་རིག་གཞུང་ཞིབ་འཇུག་ཆེད་རྩོམ་སོགས་ཀྱི་བརྩམས་ཆོས་ཁག་པར་སྐྲུན་བྱས་ཡོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
