པཱ་ཀི་སི་ཐན་གྱི་སྲིད་བློན་ཟུར་བ་ཨིམ་རཱན་ཁཱན་གྱི་སྲིད་དོན་ཚོགས་པའི་ཚོགས་མི་ ༡༠༨ ཀྱིས་ཕྱི་ལོ་ ༢༠༢༣ ལོའི་གྱེན་ལངས་ཁྲོད་མཉམ་ཞུགས་དང་ཐེ་ཇུས་བྱས་ཡོད་པའི་ཉེས་མིང་གཡོགས་ནས་མི་ལོ་ ༡༠ རེའི་བཙོན་འཇུག་ཁྲིམས་ཐག་བཅད།
ཁ་སང་ཕྱི་ཚེས་ ༣༡ ཉིན་པཱ་ཀི་སི་ཐན་གྱི་ཤར་ཁུལ་ཁྲིམས་ཁང་ (court in eastern Pakistan) གིས། པཱ་ཀི་སི་ཐན་གྱི་སྲིད་བློན་ཟུར་བ་ཨིམ་རཱན་ཁཱན་གྱི་སྲིད་དོན་ཚོགས་པའི་ཚོགས་མི་ ༡༠༨ ཀྱིས་ཕྱི་ལོ་ ༢༠༢༣ ལོའི་གྱེན་ལངས་ཁྲོད་མཉམ་ཞུགས་དང་ཐེ་ཇུས་བྱས་ཡོད་པའི་ཉེས་མིང་གཡོགས་ནས། བཙོན་འཇུག་ཁྲིམས་ཐག་ལོ་བཅུ་རེའི་བཅད་ཡོད་ཅིང་། དེ་ནི་པཱ་ཀི་སི་ཐན་གྱི་ཉེ་རབས་སྲིད་དོན་ལོ་རྒྱུས་ཁྲོད་ཆབ་སྲིད་ཚོགས་པ་ཞིག་གི་ཚོགས་མི་རྣམས་ལ་ཁྲིམས་ཐག་བཅད་པ་ཐེངས་དང་པོར་གྱུར་འདུག
དེའི་ཐད་ཨིམ་རཱན་ཁཱན་གྱི་སྲིད་དོན་ཚོགས་པ་པཱ་ཀི་སི་ཐན་རྒྱལ་ཡོངས་དྲང་བདེན་ལས་འགུལ་ཚོགས་པས་ (Pakistan Tehreek-e-Insaf) ཨེག་སི་(X) སྤྱི་ཚོགས་དྲ་ལམ་སྟེང་། དེ་རིང་པཱ་ཀི་སི་ཐན་གྱི་ཁྲིམས་ལུགས་ལོ་རྒྱུས་ཁྲོད་ཆེས་ཐོག་མར་ཁ་གཏད་ཚོགས་པའི་གྲོས་ཚོགས་གོང་འོག་གཉིས་ཀྱི་འཐུས་མི་རྣམས། པཱ་ཀི་སི་ཐན་གྱི་སྲིད་བློན་ཟུར་བ་ཨིམ་རཱན་ཁཱན་གྱི་སྲིད་དོན་ཚོགས་པར་ཡིད་ཆེས་བློ་གཏད་དང་། འཐུས་མིར་ལངས་པ། རྩ་ཁྲིམས་ཀྱི་སླད་དུ་འཐབ་རྩོད་བྱས་པ་སོགས་ནག་ཉེས་སུ་རྩིས་ནས། ཁྲིམས་ཐག་བཅད་པ་ནི་ཆེས་ངོ་གནོང་དགོས་པ་དང་ཡིད་སེམས་སྨྲེང་བའི་རྒྱུ་རུ་གྱུར། ཞེས་བརྗོད་འདུག དེ་བཞིན་པཱ་ཀི་སི་ཐན་གྱི་སྲིད་བློན་ཟུར་བ་ཨིམ་རཱན་ཁཱན་གྱི་སློབ་སྟོན་པ་ཛུལ་ཧྥི་(Zulfi Bukhari ) ཡིས། དེ་ནི་དམངས་གཙོའི་ལོ་རྒྱུས་ཁྲོད་ཀྱི་ཉི་མ་ནག་པོ་ཞིག་ཡིན། ཞེས་བརྗོད།
འདི་ལོའི་ཕྱི་ཟླ་ ༧ ཚེས་ ༢༢ ཉིན་པཱ་ཀི་སི་ཐན་གྱི་ཆེས་མཐོའི་ཁྲིམས་ཞིབ་ཁང་གིས། ལྐོག་ཟ་རུལ་སུངས་དང་། ཆབ་སྲིད་ཀྱི་གོ་གནས་བེད་སྤྱོད་ལོག་པ་བྱས་པ་སོགས་ཀྱི་ཉེས་མིང་འོག པཱ་ཀི་སི་ཐན་རྒྱལ་ཡོངས་དྲང་བདེན་ལས་འགུལ་ཚོགས་པའི་འཐུས་མི་ ༢༦ ལ་མི་ལོ་བཅུ་ལྷག་གི་བཙོན་འཇུག་ཁྲིམས་ཐག་བཅད་འདུག་ལ། དེ་དག་གི་ཁྲོད་དུ་བློན་ཆེན་ཟུར་བ་ཡཱ་ཤི་མིན་(Yasmin Rashid) དང་གྲོས་ཚོགས་འཐུས་མི་ཨཱ་མ་ཐི་ཆོ་ཏི་རི་(Ejaz Ahmed Chaudhary) སོགས་ཚུད་འདུག
ཕྱི་ལོ་ ༢༠༢༢ ཟླ་ ༤ ཚེས་ ༡༠ ཉིན་པཱ་ཀི་སི་ཐན་གྱི་གྲོས་ཚོགས་འོག་མས་ཡུལ་དེའི་སྲིད་བློན་ཨིམ་རཱན་ཁཱན་གྱིས་དཔལ་འབྱོར་འཛིན་སྐྱོང་དང་ཕྱི་འབྲེལ་སྲིད་ཇུས་ཐད་བྱེད་འཛོལ་ཤོར་བའི་དོགས་གཞིའི་འོག་ཡིད་རྟོན་མེད་པའི་འོས་ཤོག་ (No-Confidence Vote) བསྡུས་ཏེ་མང་མོས་ཀྱི་ཐོག་ནས་ཁོ་པ་སྲིད་བློན་ནས་གནས་དབྱུང་བཏང་ཡོད་ལ། སྐབས་དེར་ཕྱིའི་རྒྱལ་ཁབ་ཀྱི་བུ་ལོན་སྤྲོད་འཇལ་མ་ཐུབ་པ་དང་། དངུལ་གྱི་ཡུལ་ཐང་ཆག་སྟེ་སྣུམ་དང་བཟའ་ཅའི་རིན་གོང་འཕར་བའི་རྐྱེན་གྱིས། མང་ཚོགས་ཁྲོད་ཨིམ་རཱན་ཁཱན་གྱིས་སྣེ་ཁྲིད་པའི་པཱ་ཀི་སི་ཐན་གྱི་གཞུང་ལ་འདོད་པ་མེད་པའི་རྣམ་པ་ཤུགས་ཆེན་བསྟན། འོན་ཀྱང་། སྐབས་དེར་པཱ་ཀི་སི་ཐན་གྱི་སྲིད་བློན་ཟུར་བ་ཨིམ་རཱན་ཁཱན་གྱིས་པཱ་ཀི་སི་ཐན་འདི་ཉིད་ཕྱི་ལོ་ ༡༩༤༧ ལོར་རང་བཙན་ཐོབ་ཡོད། འོན་ཀྱང་། དེ་རིང་ཕྱིའི་རྒྱལ་ཁབ་ཀྱི་ངན་ཇུས་འོག་ནས་གཞུང་འཛིན་བརྗེ་བསྒྱུར་ལ་འགོག་རྒོལ་བྱེད་པའི་རང་དབང་འཐབ་རྩོད་བསྐྱར་དུ་མགོ་ཚུགས་ཡོད། རྒྱལ་ཁབ་ཀྱི་བདག་དབང་དང་དམངས་གཙོ་སྲུང་སྐྱོབ་བྱེད་མཁན་ནི་དུས་ནམ་ཡང་མི་མང་ཡིན། ཞེས་བརྗོད་འདུག
ཕྱི་ལོ་ ༢༠༢༣ ལོར་པཱ་ཀི་སི་ཐན་གྱི་སྲིད་བློན་ཟུར་བ་ཨིམ་རཱན་ཁཱན་ཟེར་བ་པཱ་ཀི་སི་ཐན་གྱི་ཨི་སི་ལ་མ་བྷ་ཐི་ཆེས་མཐོའི་ཁྲིམས་ཞིབ་ཁང་ (Islamabad High Court) ནས་ལྐོག་ཟ་རུལ་སུངས་ཀྱི་ཉེས་མིང་འོག་འཛིན་བཟུང་བཀག་ཉར་བྱས་ཡོད་སྟབས། ཁོང་གི་རྒྱབ་སྐྱོར་བ་དང་སྲིད་དོན་ཚོགས་པས་ཆེས་མཐོའི་ཁྲིམས་ཁང་གཙོས་སྲིད་གཞུང་ལ་ངོ་རྒོལ་ཤུགས་ཆེན་བྱས། ཕྱིས་སུ་ཞིབ་བཤེར་དང་འདྲི་བརྩད་རིམ་པ་བྱས་ཏེ་ཀློད་གྲོལ་བཏང་ཡང་། སྔ་གཞུག་ཏུ་འཛིན་བཟུང་དང་ཞིབ་བཤེར་མང་དག་ཅིག་བྱས་རྗེས། འདི་ལོའི་ཕྱི་ཟླ་ ༡ ནང་ཁོས་ལྐོག་ཟ་རུལ་སུངས་བྱས་པའི་ཉེས་མིང་འོག་མི་ལོ་བཅུ་བཞི་ཡི་བཙོན་འཇུག་ཁྲིམས་ཆད་དང་ཁོའི་བཟའ་ཟླ་ལ་མི་ལོ་བདུན་གྱི་ཁྲིམས་ཐག་བཅད།
གསར་འགོད་པ། དཔལ་ལྡན།
