རྒྱ་ནག་གཞུང་ལ་༸གོང་ས་མཆོག་གི་ཡང་སྲིད་ཀྱི་བདག་དབང་རྩ་བ་ནས་མེད་པའི་ལན་འདེབས་གནང་།

བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས་ཀྱིས་རྒྱ་ནག་གཞུང་ལ་ལོ་རྒྱུས་དང་ཆོས་དང་རིག་གཞུང་སོགས་གང་ཅིའི་ཐད་ནས་༸གོང་ས་མཆོག་གི་ཡང་སྲིད་ཀྱི་བདག་དབང་གང་ཡང་མེད་པའི་ལན་འདེབས་གནང་།

རྒྱ་ནག་གི་གསར་འགྱུར་བརྒྱུད་ལམ་ཁག་ཅིག་གིས་གནས་ཚུལ་སྤེལ་བ་ལྟར་ན།  དེ་རིང་བོད་རང་སྐྱོང་ལྗོངས་ཟེར་བའི་དམར་ཤོག་དྲུང་ཆེ་གཞོན་པ་ཀརྨ་ཚེ་བརྟན་ཟེར་བས། བོད་ཀྱི་སྤྱི་ཚོགས་དང་དཔལ་འབྱོར་འཕེལ་རྒྱས་ཟེར་བའི་ཚོགས་འདུ་ཞིག་གི་སྟེང་ནས། ༸གོང་ས་རྒྱལ་བ་རིན་པོ་ཆེ་མཆོག་གི་༸སྐུའི་ཡང་སྲིད་ཀྱི་མཐའ་མའི་ཐག་གཅོད་ཀྱི་འགན་དབང་དེ་རྒྱ་ནག་དབུས་གཞུང་ལ་ཡོད་སྐོར་བསྒྲགས་འདུག་པར་བརྟེན། འདི་གའི་གསར་འགོད་པས་བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས་ཀྱིས་རྒྱ་ནག་གཞུང་ལ་ལན་འདེབས་གནང་སྐབས་ཁོང་གིས།  ༸སྐྱབས་མགོན་རིན་པོ་ཆེའི་བཀའ་སློབ་སྔ་རྗེ་བར་གསུམ་ཚང་མའི་ནང་། ༸སྐྱབས་མགོན་རིན་པོ་ཆེའི་ཡང་སྲིད་དང་འབྲེལ་བའི་སྐུ་དབང་དེ་༸སྐྱབས་མགོན་རིན་པོ་ཆེ་སྐུ་སྒེར་ཁོ་ནར་ཡོད་པའི་གནད་དོན་ཞིག་ཆགས་ཡོད་པ་ལས། རྒྱ་ནག་གཞུང་ལ་དེའི་བདག་དབང་རྩ་བ་ཉིད་ནས་མེད། ལོ་རྒྱུས་ཀྱི་བདག་དབང་ཡང་མེད་ལ། ནང་ཆོས་དང་འབྲེལ་བའི་ཐོག་ནས་རྒྱ་ནག་གཞུང་དེ་ཆོས་ཁས་མི་ལེན་པའི་གཞུང་ཞིག་ཡིན་དུས། ཆོས་ཕྱོགས་ཀྱི་བྱེད་སྒོའི་སྟེང་དུ་ཐེ་ཇུས་བྱེད་པའི་བདག་དབང་དེ་རྩ་བ་ཉིད་ནས་མེད།

གང་ལྟར་རྒྱ་ནག་གཞུང་གི་ངོས་ནས་དུས་དང་རྣམ་པ་ཀུན་ཏུ་ ༸གོང་ས་མཆོག་གི་ཡང་སྲིད་ཀྱི་སྟེང་དུ་རྩོད་ལེན་ཞིག་བྱས་བསྡད་ཡོད་ཀྱང་། ཁོ་ཚོར་རྩོད་ལེན་བྱེད་པའི་བདག་དབང་ཆུ་ཐིག་ཙམ་ཡང་མེད། རྒྱ་ནག་གཞུང་གིས་བཤད་བསྡད་པ་དེ། ༸གོང་ས་མཆོག་གི་ཡང་སྲིད་དེ་བོད་ནང་དུ་འཁྲུངས་དགོས་པ་དང་། གསེར་བུམ་དཀྲུགས་དགོས་པ། རྒྱ་ནག་གཞུང་གི་ངོས་ལེན་སྤྲོད་དགོས་པ་བཅས་ཆ་རྐྱེན་གསུམ་གྱི་ཐོག་ནས་བཤད་བསྡད་ཡོད་ཀྱང་། ཆ་རྐྱེན་གསུམ་གའི་བདག་དབང་དེ་རྒྱ་ནག་གཞུང་ལ་ཡོད་པ་མ་རེད་ཞུ་རྒྱུ་ཡིན། ༸སྐྱབས་མགོན་རིན་པོ་ཆེའི་ཡང་སྲིད་ཀྱི་བདག་དབང་དེ། ༸གོང་ས་མཆོག་ནས་ཕྱི་ལོ་ ༢༠༡༡ ལོར་ཕེབས་པའི་བཀའ་སློབ་ནང་བཞིན་དང་། ཉེ་ཆར་ཕྱི་ཟླ་ ༧ ཚེས་ ༢ ཉིན་བཀའ་སློབ་ཕེབས་པ་ནང་བཞིན། ༸སྐྱབས་མགོན་རིན་པོ་ཆེ་སྐུ་སྒེར་རང་ལ་ཡོད་པ་ལས་ལྷག་གི་གཞན་སུ་ལའང་མེད། ཚིག་ཐག་ཆོད་པོའི་ཐོག་ནས་ཞུ་རྒྱུ་ཡིན།

རྩ་བའི་རྒྱ་ནག་གཞུང་གི་ནང་དུ་བོད་མི་མགོ་ཁྲིད་བྱེད་མཁན་མང་པོ་ཞིག་ཡོད་ཀྱང་།  རྒྱ་ནག་གཞུང་དེ་མཁྲེགས་འཛིན་ཆེ་བའི་དམར་ཤོག་གི་གཞུང་ཞིག་ཆགས་བསྡད་ཡོད་སྟབས། རྒྱ་རིགས་ལ་སྐད་ཆ་བཤད་མ་བཅུག་པར་ད་རེས་ཆེད་དུ་བོད་མིར་སྐད་ཆ་བཤད་དུ་བཅུག་པ་ནི་བདག་དབང་རྩོད་ཐབས་བྱས་པའི་གནས་སྟངས་ཤིག་ཡིན་སྲིད་པ་རེད།  གང་ལྟར་ད་ལྟ་རྒྱ་ནག་གཞུང་གིས་བོད་རྒྱ་ཆེ་མི་མང་བོད་ནང་དུ་ཡོད་པ་དང་ང་ཚོར་བདག་དབང་ཡོད་ཟེར་བ་སོགས་ཀྱི་སྐད་ཆ་མང་པོ་བཤད་བསྡད་ཡོད་ཀྱང་། ༸སྐྱབས་མགོན་རིན་པོ་ཆེའི་ཡང་སྲིད་དེ་ལོ་རྒྱུས་ཀྱི་ཐོག་ནས་དང་ནང་པའི་རིག་གཞུང་སོགས་གང་ཅིའི་ཐད་ནས་རྒྱ་ནག་གཞུང་ལ་བདག་དབང་རྩ་བ་ནས་མེད་པ་དེ་ཐོག་ཆོད་པོས་ཞུ་ཐུབ་ཀྱི་འདུག གནད་དོན་དེའི་ཐོག་༸སྐྱབས་མགོན་རིན་པོ་ཆེའི་བཀའ་སློབ་རིམ་པ་ཕེབས་བསྡད་པ་རེད། དེར་བརྟེན། རྒྱ་ནག་གཞུང་གིས་༸གོང་ས་མཆོག་གི་ཡང་སྲིད་ཀྱི་བདག་དབང་ལ་ཐེ་ཇུས་བྱེད་པ་ནི་ལོ་རྒྱུས་ཀྱི་ནོར་འཁྲུལ་དང་ཆོས་ལུགས་ལ་ཐེ་ཇུས་བྱས་པའི་གནད་དོན་ཞིག་ཆགས་བསྡད་ཡོད།  དེ་ལྟར་བྱེད་མི་རུང་བའི་ཁར། རྒྱ་ནག་གིས་ཆོས་ལ་དགའ་བ་དང་ཆོས་ཁས་བླངས་པའི་ཐོག་ནས་བྱེད་ཀྱི་མེད། རྒྱ་ནག་གཞུང་གིས་ཆོས་དེ་ཆབ་སྲིད་ཀྱི་ལག་ཆའི་ཆེད་དུ་བེད་སྤྱོད་གཏོང་གི་ཡོད་སྟབས། དེ་ནི་ཆོས་ཕྱོགས་དང་འབྲེལ་བ་མེད་པའི་ཆབ་སྲིད་ཀྱི་ལག་ཆ་ཞིག་ཡིན་དུས།
ཆབ་སྲིད་ཀྱི་ཐོག་ནས་༸སྐྱབས་མགོན་རིན་པོ་ཆེའི་ཡང་སྲིད་ཀྱི་གནད་དོན་ཐོག་ཐེ་ཇུས་བྱ་རྒྱུ་ནི་ཡོང་མི་སྲིད་པ་ཞིག་རེད་ལ། ཐེ་ཇུས་བྱེད་ཐུབ་ཀྱི་མ་རེད། ཡང་སྲིད་ཀྱི་གནད་དོན་ནི་ཆོས་ཕྱོགས་ཀྱི་གནད་དོན་ཞིག་ཡིན་པས་ཆོས་ཕྱོགས་རང་གི་ཐོག་འཇོག་དགོས་ཀྱི་རེད། ཅེས་གསུངས་སོང་།

ཡང་བོད་རང་ལྗོངས་ཟེར་བའི་དམར་ཤོག་དྲུང་ཆེ་གཞོན་པ་ཀརྨ་ཚེ་བརྟན་ཟེར་བས། ༸གོང་ས་མཆོག་གི་ཡང་སྲིད་རྒྱ་ནག་ནང་ནས་བཙལ་ཏེ་དབུས་གཞུང་གི་ངོས་ལེན་དགོས། ༸གོང་ས་མཆོག་གི་ཡང་སྲིད་ཀྱི་མཐའ་མའི་ཐག་གཅོད་དེ་རྒྱ་ནག་དབུས་གཞུང་ལ་ཡོད་པ་ནི་རྩོད་མེད་ཡོངས་གྲགས་ཡིན་ཞེས་བསྒྲགས་འདུག

ཉེ་ལམ་ཕྱི་ཟླ་ ༧ ཚེས་ ༢ ཉིན་ བོད་ཀྱི་ཆོས་ཚོགས་ཐེངས་བཅོ་ལྔ་བའི་བཀའ་དབུས་སུ་༧གོང་ས་རྒྱལ་བ་རིན་པོ་ཆེ་མཆོག་ནས་༸རྒྱལ་དབང་སྐུ་ཕྲེང་རྒྱུན་མཐུད་ཕེབས་ངེས་ཡིན་པའི་ཡོངས་ཁྱབ་གསལ་བསྒྲགས་མཛད་པ་དང་། ཡང་སྲིད་ངོས་འཛིན་གྱི་བྱེད་སྒོའི་འགན་འཁུར་གཙོ་བོ་ཏཱ་ལའི་བླ་མའི་བླ་བྲང་དགའ་ལྡན་ཕོ་བྲང་ཡིད་ཆེས་དགེ་རྩའི་དབང་ལྡན་འགན་འཛིན་རྣམས་ལ་ཡོད་པ་དང། ཁོང་ཚོས་བོད་བརྒྱུད་ནང་བསྟན་ཆོས་བརྒྱུད་ཁག་གི་དབུ་ཁྲིད་བླ་ཆེན་རྣམ་པ་དང། ༸རྒྱལ་དབང་སྐུ་ཕྲེང་ན་རིམ་དང་ལུས་དང་གྲིབ་བཞིན་འགྲོགས་པའི་དམ་ལྡན་ཆོས་སྲུང་ཁག་ལ་སྐབས་བསྟུན་ལམ་སྟོན་ཞུས་ཏེ་ཡང་སྤྲུལ་རྩད་གཅོད་ངོས་འཛིན་སྔོན་སྲོལ་བཞིན་བྱ་རྒྱུ་ལས། གཞན་སུས་ཀྱང་ཐེ་བྱུས་མི་ཆོག་པའི་གནས་བབས་ལ་འགྱུར་བ་གང་ཡང་མེད་ཅེས་གསུངས་ཡོད།

གསར་འགོད་པ། སྐལ་བཟང་སྦྱིན་པ།