རྒྱ་ནག་ནང་མི་མང་གིས་ངོ་རྒོལ་བྱས་ཏེ་འཛིན་བཟུང་བྱས།

རྒྱ་ནག་གཞུང་གིས་སློབ་རའི་བརྙས་བཅོས་ཀྱི་གནད་དོན་ལ་ཐག་གཅོད་ནན་པོ་མ་བྱས་པར་བརྟེན་མི་མང་སྟོང་ཕྲག་གིས་ངོ་རྒོལ་བྱས་ཏེ་ལས་འགུལ་བ་མང་པོ་འཛིན་བཟུང་བྱས་འདུག

ཟླ་འདིའི་ཕྱི་ཚེས་ ༤ ནས་ ༥ ཞོགས་པའི་བར་དུ། རྒྱ་ནག་སི་ཁྲོན་ཅིང་ཡུག་གྲོང་ཁྱེར་སྲིད་གཞུང་གི་མདུན་དུ་མི་སྟོང་ཕྲག་གིས་ངོ་རྒོལ་བྱས་ཡོད་པ་དང་། ཉེན་རྟོག་པ་དང་དྲག་ཆས་དམག་མི་བརྒྱ་ཕྲག་འགས་ལས་འགུལ་བ་རྣམས་ལ་གང་བྱུང་གཅར་རྡུང་བཏང་སྟེ། མི་མང་པོ་འཛིན་བཟུང་བྱས་ཡོད་པ་མ་ཟད། སྤྱི་ཚོགས་དྲ་ལམ་གྱི་བརྙན་དང་པར་རིས་སོགས་ནག་གསུབ་བཏང་ནས་ངོ་རྒོལ་གྱི་ཡུལ་དངོས་ཆུ་ཚོད་གཅིག་ལྷག་གི་ནང་དུ་གཙང་བཟོ་བྱས་ཡོད་འདུག

ཕྱི་ཟླ་ ༧ ཚེས་ ༢༢ ཉིན་རྒྱ་ནག་སི་ཁྲོན་ཞིང་ཆེན་ཅིང་ཡུག་གྲོང་ཁྱེར་གྱི་རང་ལོ་ ༡༤ ཅན་གྱི་སློབ་ཕྲུག་བུ་མོ་ལའེ་མིང་ཅན་ཞིག་ལ་སློབ་གྲོགས་བུ་མོ་གསུམ་གྱིས་གཅར་རྡུང་དང་བརྙས་བཅོས་ཚད་མེད་བཏང་བའི་བརྙན་ཐུང་ཞིག་སྤྱི་ཚོགས་དྲ་ལམ་དུ་ཁྱབ་ཡོད་པ་དང་། དྲ་ལམ་ནས་མི་མང་གིས་གནད་དོན་དེ་རིགས་ལ་ཐག་གཅོད་ནན་པོ་དགོས་པའི་སྐྱོན་བརྗོད་བྱས་ཡོད་པ་རེད། ཡིན་ནའང་། ས་གནས་ཉེན་རྟོག་ཁང་གིས་གཅར་རྡུང་གཏོང་མཁན་བུ་མོ་གསུམ་བཀག་ཉར་བྱས་ཏེ། བུ་མོ་གཉིས་ལ་བདེ་འཇགས་ཉེས་ཆད་བཅད་པ་དང་། བུ་མོ་གཞན་གཅིག་ལ་སྐྱོན་བརྗོད་སློབ་གསོ་བཏང་རྗེས་ཀློད་གྲོལ་བཏང་ཡོད་པར་བརྟེན། ཉེས་རྡུང་ཕོག་པའི་བུ་མོ་དེའི་ཨ་མ་སོགས་ཀྱིས་སྲིད་གཞུང་གི་ཐག་གཅོད་དེ་དྲང་བདེན་མིན་པས་ཁྲིམས་ལྟར་ཐག་གཅོད་ནན་པོ་དགོས་སྐོར་བརྗོད་དེ། འབྲེལ་ཡོད་ལས་ཁུངས་ལ་ཡང་ཡང་དོགས་འདྲི་བདེ་སྡུག་ཞུས་ཡོད་ཀྱང་སྣང་མེད་དུ་བཏང་རྐྱེན། ཟླ་འདིིའི་ཕྱི་ཚེས་ ༤ ཉིན་ནས་མི་མང་སྟོང་ཕྲག་གིས་ངོ་རྒོལ་སྐད་འབོད་མ་བྱས་ཐབས་མེད་དུ་གྱུར་ཡོད་འདུག

ཏ་ཅི་ཡོན་(大纪元)གསར་ཁང་གིས་དེ་འབྲེལ་གནས་ཚུལ་སྤེལ་བའི་ནང་། གཅར་རྡུང་ཕོག་མཁན་ལའེ་ཡི་ཨ་མ་ལགས་ནི་ལྐུགས་པ་ཞིག་ཡིན་ལ། རྒྱུན་དུ་སློབ་གྲྭའི་ནང་བུ་མོ་ལའེ་ལ་སློབ་གྲོགས་ཚོས་བརྙས་བཅོས་དང་གཅར་རྡུང་ཡང་ཡང་ཕོག་གི་ཡོད་སྐོར་དང་། ད་ལན་ཁོང་མོར་གཅར་རྡུང་གཏོང་མཁན་བུ་མོ་གསུམ་དེ་ས་གནས་མངགས་གཏོང་ཁང་གིས་བཀག་ཉར་བྱས་ཡོད་ཀྱང་། ལོ་ཚད་མ་རན་པར་བརྗོད་དེ་ཀློད་གྲོལ་བཏང་ཡོད་སྐོར་སོགས་བརྗོད་ཡོད་པ་མ་ཟད། བུ་མོ་གསུམ་དེའི་ནང་གོང་རིམ་ལས་བྱེད་ཀྱི་བུ་ཕྲུག་ཡོད་སྐོར་ཡང་བརྗོད་འདུག

གནད་དོན་དེའི་ཐོག་ཨ་རིར་ཡོད་པའི་གནད་དོན་དབྱེ་ཞིབ་པ་ཆིན་ཕིན་(秦鹏) ལགས་ཀྱིས།  རྒྱ་ནག་དམར་ཤོག་ཚོགས་པས་ལོ་མང་རིང་དྲག་གནོན་བྱས་པའི་རྗེས་སུ། རྒྱ་ནག་གི་མི་མང་པོ་ཞིག་གིས་ཁོང་ཚོའི་མཐའ་འཁོར་གྱི་དོན་རྐྱེན་དག་སྣང་མེད་དུ་བཞག་ཡོད། ཐེངས་འདིའི་དོན་རྐྱེན་ཁྲོད་ཀྱི་སྐད་ཆ་བཤད་མཁན་རྣམས་ནི་བུ་མོ་དེ་དང་ཁོང་མོའི་ཁྱིམ་མིར་འབྲེལ་བ་གང་ཡང་ཡོད་པ་མ་རེད། ཁོང་ཚོས་དྲང་བདེན་གྱི་ཀུན་སློང་གིས་རྒྱ་ནག་གི་དབང་འཛིན་པར་སྐྱོན་བརྗོད་དང་ཁྲིམས་ལུགས་ལྟར་ལག་བསྟར་བྱ་དགོས་པའི་དགོས་འདུན་བཏོན་ཡོད་པ་རེད། ཡི་ནའང་། རྒྱ་གཞུང་གི་དབང་འཛིན་པ་ཚོས་ངོ་རྒོལ་བ་ཚོ་གཅར་རྡུང་བཏང་ནས་དུད་འགྲོ་བཞིན་འཛིན་བཟུང་བྱས་ཡོད།ཅེས་བརྗོད་འདུག

འདས་པའི་ལོ་མང་རིང་རྒྱ་ནག་ནང་ལོགས་དང་བོད་ནང་སོགས་སུ་སློབ་གྲྭ་ཆུང་འབྲིང་གི་སློབ་མ་ནང་ཁུལ་བརྙས་བཅོས་དང་གཅར་རྡུང་ཚད་མེད་བཏང་བའི་བརྙན་ཐུང་དང་པར་རིས་སོགས་སྤྱི་ཚོགས་དྲ་ལམ་དུ་མང་པོ་ཁྱབ་ཡོད་ལ། ཐ་ན་སློབ་ཕྲུག་ཆེ་བས་ཆུང་ཆུང་དང་ཉམ་ཆུང་ལ་གཅར་རྡུང་བཏང་ནས་དམར་གསོད་བཏང་བའི་གནས་ཚུལ་ཡང་ཐེངས་འགར་དྲ་ལམ་དུ་ཁྱབ་ཡོད་པ་རེད། ཕྱི་ལོ་ ༢༠༢༠ ལོར་རྒྱ་ནག་གིས་ནར་མ་སོན་པའི་མི་ལ་སྲུང་སྐྱོབ་བྱེད་པའི་བཅའ་ཁྲིམས་ཟེར་བར་བསྐྱར་བཅོས་གཏན་འབེབས་བྱས་ཡོད་ཀྱང་མུ་མཐུད་ནས་དོན་རྐྱེན་དེ་འབྱུང་བཞིན་ཡོད་པ་རེད།

དཔེར་ན། གནས་ཚུལ་གསར་ཤོས་ཤིག་ནི་ཕྱི་ལོ་ ༢༠༢༡ ཟླ་ ༣ ཚེས་ ༦ ཉིན་མཚོ་ལྷོ་ཁུལ་ལས་རིགས་ལག་རྩལ་སློབ་གྲྭའི་བུ་མོའི་ཉལ་ཁང་ཞིག་གི་ནང་དུ། བུ་མོ་ཆུང་ཆུང་ཞིག་ལ་བུ་མོ་ཁག་ཅིག་གིས་གཅར་རྡུང་དང་དམའ་འབེབ་ཚད་མེད་བྱེད་བཞིན་པའི་བརྙན་ཐུང་ཞིག་སྤྱི་ཚོགས་དྲ་ལམ་དུ་ཁྱབ་རྗེས། བོད་ཕྱི་ནང་གཉིས་སུ་གླེང་སློང་ཤུགས་ཆེན་བྱུང་སྟེ་ཐག་གཅོད་ནན་པོ་དགོས་པའི་སྐུལ་སློང་ཤུགས་ཆེན་བྱས་ཡོད། ཕྱིས་སུ་ཉེན་རྟོག་ཁང་གིས་འབྲེལ་ཡོད་བུ་མོ་གསུམ་འཛིན་བཟུང་བྱས་ཏེ་ཉེས་ཆད་པ་དང་། ཉེས་རྡུང་ཕོག་སའི་བུ་མོ་དེར་རྒྱབ་སྐྱོར་ཆེད་སློབ་སྦྱོང་གི་གོ་སྐབས་སྔར་ལས་ལེགས་པོ་བསྐྲུན་པའི་གནས་ཚུལ་ཐོན་ཡོད་པ་རེད།

ཕྱི་ལོ་ ༢༠༠༢ ལོར་ཧྲན་ཏུང་ཞིང་ཆེན་གྱི་གཙུག་ལག་སློབ་གྲྭ་ཆེན་མོས་རྒྱ་ནག་གི་སློབ་རའི་བརྙས་བཅོས་ཀྱི་གནད་དོན་ཐོག་ཞིབ་འཇུག་བྱས་ཏེ་སྙན་ཐོ་ཞིག་བཏོན་པའི་ནང་། རྒྱ་ནག་གི་སློབ་ཕྲུག་བརྒྱ་ཆ་ ༡༤།༩ ཙམ་ལ་སློབ་གྲྭའི་ནང་བརྙས་བཅོས་ཀྱི་དཀའ་ངལ་འཕྲད་ཀྱི་ཡོད་པ་དང་། སློབ་ཕྲུག་ཕལ་ཆེ་བར་ལུས་སེམས་གཉིས་དང་ལྷག་པར་དུ་ཁག་ཅིག་ལ་ཚེ་གང་དྲན་པ་བརྗེད་ཐབས་མེད་པའི་འཇིགས་སྐུལ་སོགས་ཀྱི་དཀའ་ངལ་འཕྲད་ཀྱི་ཡོད་སྐོར་བཀོད་ཡོད་པ་མ་ཟད།  སློབ་མའི་བདེ་འཇགས་སྲུང་སྐྱོབ་ཐད་ནས་རྒྱ་ནག་ནི་འཛམ་གླིང་སྟེང་གི་རྗེས་ལུས་ཀྱི་གྲས་སུ་ཡོད་སྐོར་བརྗོད་ཡོད་པ་རེད།

གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།