གྲོས་ཚོགས་འཐུས་མི་ཞིག་གི་བཙན་གཡེམ་གྱི་ནག་ཉེས་ལྷང་ལ་བུད།

ཨོ་གླིང་གི་གྲོས་ཚོགས་འཐུས་མི་ཞིག་གིས་སྐྱེས་པ་གཉིས་ལ་བཙན་གཡེམ་བྱས་རྐྱེན་གྲོས་ཚོགས་ནས་རྩ་དགོངས་ཞུས་ཡོད་པ་མ་ཟད། ཟླ་རྗེས་མའི་ནང་ཁོ་ལ་བཙོན་འཇུག་གི་ཉེས་ཆད་གཅོད་རྒྱུ་ཡིན་འདུག

བྷི་བྷི་སི་གསར་ཁང་སོགས་ཀྱིས་གནས་ཚུལ་སྤེལ་བ་ལྟར་ན། རང་ལོ་ ༤༤ ཡིན་པའི་ཨོ་གླིང་གི་གྲོས་ཚོགས་འཐུས་མི་གྷེ་རེ་ཌི་ཝར་ཌི་ལགས་སུ་བཙན་གཡེམ་དོན་རྐྱེན་ཁྲིམས་གཏུགས་ཀྱི་བརྒྱུད་རིམ་ཁྲོད་ཕམ་ཁ་བྱུང་སྟེ། ཁོས་བཙན་གཡེམ་བྱས་པའི་ནག་ཉེས་ར་སྤྲོད་བྱུང་བར་བརྟེན། དེ་རིང་ཕྱི་ཚེས་ ༨ ཉིན་གྷེ་རེ་ཐི་ཝར་ཌི་ (Gerath Ward) ཡིས་གྲོས་ཚོགས་འཐུས་མིའི་གོ་གནས་ནས་རྩ་དགོངས་ཞུས་ཡོད་འདུག

སྤྱིར་དེ་རིང་ཕྱི་ཚེས་ ༨ ཉིན་ནེའུ་སའོ་ཐི་ཝེལ་སི་ (New South Wales) མངའ་སྡེའི་གྲོས་ཚོགས་ཀྱིས་གྷེ་རེ་ཐི་ཝར་ཌི་ལགས་གྲོས་ཚོགས་ནས་ཕྱིར་ཕུད་གཏོང་གཏན་ཁེལ་ཡོད་ཀྱང་། ཁོས་གྲོས་ཚོགས་མ་འཚོག་གོང་གི་ཆུ་ཚོད་གཉིས་ཙམ་གྱི་སྔོན་དུ་དགོངས་ཞུའི་སྙན་ཞུ་ཕུལ་བར་བརྟེན། ད་ལྟ་མངའ་སྡེ་དེའི་གྲོས་ཚོགས་ཀྱིས་ཁོའི་སྙན་ཞུ་ལ་དང་ལེན་བྱེད་ཀྱི་མེད་ཁར་གྲོས་ཚོགས་ནང་ཁོ་དང་འབྲེལ་བའི་གླེང་རྙོག་མང་དག་ཅིག་འབྱུང་བཞིན་ཡོད་འདུག་ལ། ཟླ་རྗེས་མར་གྷེ་རེ་ཐི་ཝར་ཌི་ལགས་སུ་བཙན་གཡེམ་གྱི་ནག་ཉེས་དང་འབྲེལ་ནས་ཁྲིམས་ཐག་གཅོད་རྒྱུ་ཡིན་འདུག

གྲོས་ཚོགས་འཐུས་མི་གྷེ་རེ་ཐི་ཡིས། ཕྱི་ལོ་ ༢༠༡༣ ཟླ་ ༢ པའི་ནང་མི་རོ་མེ་ཌོའོ་ (Meroo Meadow) ནས་ཡིན་པའི་རང་ལོ་ ༡༨ ཅན་གྱི་སྐྱེས་པ་ཞིག་ལ་ཚུལ་མཐུན་མིན་པའི་འཁྲིག་སྤྱོད་ཀྱི་བྱ་སྤྱོད་ངན་པ་སྤེལ་བའི་ཉེས་འཛུགས་དང་། ཕྱི་ལོ་ ༢༠༡༥ ཟླ་ ༩ པའི་ནང་སི་ཌི་ནེ་ (Sydney) ནས་ཡིན་པའི་རང་ལོ་ ༢༤ ཅན་གྱི་སྐྱེས་པ་གཞན་ཞིག་ལ་བཙན་གྱིས་འཁྲིག་སྤྱོད་བྱས་པའི་ཉེས་འཛུགས་བྱས་ཡོད་ཅིང་། ཆབ་སྲིད་པ་ཁོ་ལ་བཙན་གཡེམ་བྱས་པའི་ཉེས་མིང་གཡོགས་པ་ལ་བརྟེན་ནས། ཡུལ་མི་དང་ཨོ་གླིང་གྲོས་ཚོགས་ཀྱི་ར་བའི་ནང་གླེང་རྙོག་དུ་མ་བྱུང་ཡོད་འདུག་ལ། དེ་འབྲེལ་ཕྱི་ལོ་ ༢༠༢༡ ཟླ་ ༥ ཚེས་ ༡༤ ཉིན་ཨོ་གླིང་གི་ནེའུ་སའོ་ཐི་ཝེལ་སི་མངའ་སྡེའི་ཉེན་རྟོག་ཁང་གི་བྱིས་པར་རྩུབ་སྤྱོད་དང་བཙན་གཡེམ་གྱི་སྡེ་ཁག་ཅིག་གིས་དེ་འབྲེལ་ཞིབ་འཇུག་བྱས་ཡོད་པ་རེད།

ཕྱི་ལོ་ ༢༠༢༢ ཟླ་ ༣ ཚེས་ ༢༢ ཉིན་གྷེ་རེ་ཐི་ལ་ཚུལ་མཐུན་མིན་པའི་བཙན་ཤེད་ཀྱི་རྩུབ་སྤྱོད་སྤེལ་བའི་ནག་ཉེས་གསུམ་དང་། མོས་མཐུན་མེད་པར་བཙན་གཡེམ་བྱས་པའི་ནག་ཉེས་གཅིག་བཅས་ར་སྤྲོད་བྱུང་སྟེ། ཕྱི་ལོ་ ༢༠༢༢ ཟླ་ ༣ པ་ནས་ ༢༠༢༣ ཟླ་ ༣ བར་ལོ་ངོ་གཅིག་རིང་ནེའུ་སའོ་ཐི་ཝེལ་སི་མངའ་སྡེའི་གྲོས་ཚོགས་ནས་ཕྱིར་ཕུད་བཏང་། དེ་རྗེས་ཨོ་གླིང་ཁྲིམས་ཁང་ཞིག་གིས་ཁྲིམས་གཏུགས་ཐེངས་བཞི་ལྔ་ཙམ་བྱས་པའི་ཐོག མངའ་སྡེའི་ཉེན་རྟོག་ཁང་གིས་ཞིབ་འཇུག་བྱས་མཐར། ད་ལོའི་ཕྱི་ཟླ་ ༧ པའི་ནང་ཁོས་བཙན་གཡེམ་བྱས་པའི་ནག་ཉེས་ར་སྤྲོད་ཀྱིས་གྲོས་ཚོགས་འཐུས་མིའི་གླ་ཕོགས་ཀྱི་ཁེ་དབང་མེད་པར་བཟོ་རྒྱུའི་ཁྲིམས་ཐག་བཅད་ཡོད་པ་དང་། མི་འགྱངས་བར་བཙོན་འཇུག་གི་ཁྲིམས་ཐག་ཀྱང་གཅོད་རྒྱུ་ཡིན་པ་རེད།

གྷེ་རེ་ཐི་ཝར་ཌི་ནི་ཕྱི་ལོ་ ༡༩༨༡ ལོར་སྐྱེས་ཤིང་། ཨོ་གླིང་གི་མངའ་སྡེ་ནིའུ་སའོ་ཐི་ཝེལ་སི་ (New South Wales) རུ་ཡོད་པའི་བྷོ་མ་ཌེ་རི་སློབ་ཆེན་ (Bomaderry) དུ་སློབ་སྦྱོང་བྱས། དེ་ནས་མངའ་སྡེ་དེའི་ནང་ཡོད་པའི་ཝོ་ལོན་གྷོང་སློབ་ཆེན་ (University of Wollongong) དུ་ཚོང་རིག་དང་སྐད་ཡིག་ཐོག་སློབ་སྦྱོང་བྱས་རྗེས། དབྱིན་ཡུལ་གྱི་སློབ་ཆེན་ (University of New England) ནས་ཁྲིམས་དོན་རིག་པའི་ཐོག་ཉེ་བའི་གཙུག་ལག་རབ་འབྱམས་པའི་བསླབ་པ་མཐར་སོན། སི་ཌི་ནིའི་སློབ་ཆེན་ (University of Sydney) དུ་ཁྲིམས་དོན་རིག་པའི་ཐོག་གཙུག་ལག་རབ་འབྱམས་པའི་ལག་འཁྱེར་བླངས་ཡོད་པ་རེད། ཕྱི་ལོ་ ༢༠༠༤ ནས་ ༢༠༡༢ བར་ནེའུ་སའོ་ཐི་ཝེལ་སི་མངའ་སྡེའི་ལྷོ་མཚོའི་ཁུལ་གྱི་ལས་ཁུངས་སུ་སློབ་སྟོན་པའི་ལས་འགན་འཁུར་ཡོད་པ་མ་ཟད། མངའ་སྡེའི་གྲོས་ཚོགས་ཀྱི་ཤེས་ཡོན་དང་ཕྱི་ལོ་ ༢༠༡༧ ནས་ ༢༠༡༩ བར་ཨི་ལ་ཝ་ར་དང་ལྷོ་མཚོའི་ཁུལ་གྱི་གྲོས་ཚོགས་དྲུང་ཆེའི་ལས་འགན་འཁུར།

གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།