ཕྱི་ལོ་ ༢༠༢༥ ལོའི་དགེ་བཤེས་མའི་ཡིག་རྒྱུགས་ཁྲོད་རྒྱ་བལ་གཉིས་ཀྱི་བཙུན་དགོན་མང་ཤོས་དང་བཙུན་མ་མང་ཤོས་ཀྱིས་མཉམ་ཞུགས་བྱས་ཡོད་འདུག
དེ་རིང་འདི་གའི་གསར་འགོད་པས་ཁ་པར་བརྒྱུད་བོད་ཀྱི་བཙུན་མའི་ལས་འཆར་གྱི་འགན་འཛིན་སྣང་ས་ཆོས་སྒྲོན་ལགས་སུ་འདི་ལོའི་དགེ་བཤེས་མའི་ཡིག་རྒྱུགས་སྐོར་ལ་བཀའ་འདྲི་ཞུས་པར་ཁོང་མོས། དགེ་བཤེས་མའི་རྒྱུགས་སྤྲོད་དེ་ཧ་ཅང་གལ་ཆེན་པོ་ཡིན། ཏོག་དབྱིབས་གཉན་རིམས་ཀྱི་སྐབས་སུ་ལོ་གཉིས་རིང་དགེ་བཤེས་མའི་རྒྱུགས་སྤྲོད་ཀྱི་ལས་རིམ་གཉེར་ཐུབ་མེད། དེ་མིན་ལོ་རྟག་པར་བཙུན་དགོན་ཁག་རེས་མོས་བྱས་ཏེ་དགེ་བཤེས་མའི་རྒྱུགས་སྤྲོད་མུ་མཐུད་འགྲོ་བཞིན་ཡོད་ལ། འདི་ལོར་དགེ་བཤེས་མའི་རྒྱུགས་སྤྲོད་ནང་བཙུན་དགོན་ཁག་བརྒྱད་ནས་བཙུན་མ་ཁྱོན་ ༡༦༡ གིས་མཉམ་ཞུགས་བྱས་སྟབས། ད་སྔ་བར་དགེ་བཤེས་མའི་ཡིག་རྒྱུགས་ནང་ཞུགས་མཁན་གྱི་དགོན་པ་དང་བཙུན་མ་མང་ཤོས་དེ་ཆགས་ཡོད་ཅེས་གསུངས་བྱུང་།
སྣང་ས་ཆོས་སྒྲོན་ལགས་ཀྱིས་གསུངས་པ་ལྟར་ན། འདི་ལོར་དགེ་བཤེས་མའི་རྒྱུགས་སྤྲོད་ནང་བཞུགས་སྒར་དུ་རྟེན་གཞི་བྱས་པའི་སྒྲོལ་མ་གླིང་གི་བཙོན་མ་ཁྱོན་ ༤༢ དང་དགའ་ལྡན་ཆོས་གླིང་གི་བཙུན་མ་གྲངས་ ༧། འཇམ་དབྱངས་ཆོས་གླིང་གི་བཙུན་མ་ ༡༧ ། བྱང་ཆུབ་ཆོས་གླིང་གི་བཙུན་མ་གྲངས་ ༢༥ ། བྱང་སེམས་གླིང་གི་བཙུན་མ་ ༧ ། བལ་ཡུལ་ཀོ་པན་བཙུན་དགོན་གྱི་བཙུན་མ་གྲངས་ ༤༨ ། ཐེག་ཆེན་ཆོས་གླིང་གི་བཙུན་མ་ ༡༣ ། བྱམས་པ་ཆོས་གླིང་གི་བཙུན་མ་ ༢ བཅས་ཁྱོན་བཙུན་མ་ ༡༦༡ གིས་མཉམ་ཞུགས་བྱས་ཡོད་འདུག་ལ། ད་ལྟའི་ཆར་རྒྱུགས་སྤྲོད་ཀྱི་གྲུབ་འབྲས་ལ་ཞིབ་དག་བྱེད་མུས་ཡིན་སྟབས། འདི་ལོར་དགེ་བཤེས་མ་དང་སྔགས་རམས་དགེ་བཤེས་མ་ག་ཚོད་ཅིག་ཐོན་ཡོད་མེད་ཀྱི་གནས་སྟངས་དེ་འདི་ལོའི་ཕྱི་ཟླ་ ༡༡ བར་དུ་གསལ་ཁ་མེད་པ་རེད།
ཕྱི་ལོ་ ༡༩༩༥ ལོ་ནས་༧གོང་ས་མཆོག་གིས་དགེ་བཤེས་མའི་ཡིག་རྒྱུགས་གཏོང་གལ་ཆེ་བའི་བཀའ་སློབ་ཕེབས་པ་བཞིན། ཕྱི་ལོ་ ༢༠༡༢ ཟླ་ ༥ ཚེས་ ༡༨ ནས་ ༡༩ བར་དྷ་ས་བོད་ཀྱི་དཔེ་མཛོད་ཁང་དུ་བཙུན་དགོན་དྲུག་དང་། དྷ་ས་རིགས་ལམ་སློབ་གཉེར་ཁང་། བོད་ཀྱི་བཙུན་མའི་ལས་འཆར་བཅས་ཀྱི་སྐུ་ཚབ་ལྷན་འཛོམས་ཐོག་༼ བོད་ཀྱི་བཙུན་དགོན་དང་སློབ་གཉེར་ཁང་གི་གཞུང་ཆེན་བསླབ་པ་མཐར་སོན་བཙུན་མ་རྣམས་ལ་དགེ་བཤེས་མའི་རྒྱུགས་སྤྲོད་དང་ལག་འཁྱེར་འབུལ་ཕྱོགས་ཀྱི་སྒྲིག་གཞི་༽ གཏན་འབེབས་གནང་བ་གཞིར་བཟུང་། ཕྱི་ལོ་ ༢༠༡༣ ཟླ་ ༡ ཚེས་ ༧ ནས་ ༨ བར་དགེ་བཤེས་མའི་རྒྱུགས་སྤྲོད་དོ་དམ་ཚོགས་ཆུང་བསྡུ་བསྐོང་གིས་རྒྱུགས་སྤྲོད་གོ་སྒྲིག་ཚོགས་ཆུང་ཆེད་འཛུགས་གནང་། དེ་ནས་བཟུང་ལོ་འཆར་ཅན་དུ་སེར་འབྲས་དགའ་གསུམ་གྱི་དགེ་བཤེས་ལྷ་རམས་པ་ཁག་ཅིག་གིས་རྒྱུགས་སྤྲོད་ཀྱི་མཐུན་འགྱུར་དང་འབྲེལ། ཕྱི་ལོ་ ༢༠༡༣ ཟླ་ ༥ ཚེས་ ༢༠ ནས་ཟླ་ ༦ ཚེས་ ༣ བར་དྷ་ས་བཙུན་དགོན་འཇམ་དབྱངས་ཆོས་གླིང་དུ་སྐབས་དང་པོའི་རྒྱུགས་སྤྲོད་དབུ་ཚུགས་པ་ནས་ཕྱི་ལོ་ ༢༠༢༤ བར་དགེ་བཤེས་མ་ཁྱོན་ ༦༠ ཐོན་ཡོད་ཅིང་། ཕྱི་ལོ་ ༢༠༡༩ ལོར་༧དཔལ་ལྡན་རྒྱུད་སྟོད་གྲྭ་ཚང་དུ་ཆེས་ཐོག་མར་སྔགས་རམས་དགེ་བཤེས་མའི་བསླབ་པ་མཐར་སོན་གྱི་མཛད་སྒོ་འཚོགས་ཏེ་སྔགས་རམས་དགེ་བཤེས་མ་ཁྱོན་ ༤༨ བཅས་བྱུང་ཡོད་འདུག
གསར་འགོད་པ། སྐལ་བཟང་སྦྱིན་པ།
ཚེ་དཔག་རིག་འཛིན།
དང་ཐོག་འདི་ལོར་སླར་ཡང་བཙུན་མ་དགེ་བཤེས་ (ངས་ནམ་ཡང་ཁོང་ཚོར་བཙུན་མ་དགེ་བཤེས་ཟེར་བ་ལས་དགེ་བཤེས་མ་མི་ཟེར་ཁོ་ཐག་ཡིན) བསླབ་པ་མཐར་སོན་པ་རྣམས་ལ་འཚམས་འདྲིའི་བཀྲ་ཤིས་བདེ་ལེགས་ཞུ། བཙུན་མ་བསླབ་པ་མཐར་སོན་པ་ཚོར་དགེ་བཤེས་མ་དང་། བཙུན་མ་སྔགས་རམས་བསླབ་པ་མཐར་སོན་པ་ཚོར་སྔགས་རམས་མ་ཞེས་མཚན་དོད་ནས་འབོད་དགོས་པ་འདི་ལོ་རྒྱུས་ནང་། སྔ་དུས་བོད་ཀྱི་སྤྱི་ཚོགས་ལམ་ལུགས་རྙིང་པའི་ནང་ཕོ་མཆོག་མོ་དམན་དང་། ཕོ་མོ་དབྱེ་འབྱེད་ཀྱི་སྲོལ་ངན་ཆག་སྒོ་ཆེན་པོ་ཞིག་ད་དུང་རྒྱུན་མཐུད་དེ་གནས་ཡོད་པ་ཞིག་མཚོན་པ་ཡིན་པས། སྦེད་དེ་མ་འགྲིགས་པ་རེད་བསམ་གྱིན་ཡོད། འཛམ་གླིང་གང་སར་ཤེས་ཡོན་གྱི་གཙུག་ལག་སློབ་ཆེན་སྒྲོམ་གཞིའི་སྡེ་ཚན་གང་ཞིག་གི་ནང་ལ་ཐེག་པ་རིམ་འཛེགས་ཀྱིས་རང་ཉིད་བསླབ་པ་མཐར་སོན་ནས། གོ་ཐོབ་ངོ་བཞེས་ཀྱི་ཕྱག་འཁྱེར་གནང་བཞེས་གནང་ཡོད་ན། གོ་ས་ངོ་བཞེས་ཀྱི་ཕྱག་འཁྱེར་ཐོབ་པའི་མཚན་དོད་དེ་དག་ལ་ཕོ་མོའི་མིང་བརྡ་ཁྱད་མེད་ཡིན་དགོས་པ་གསལ་གསལ་ཐང་ཐང་རེད། དཔེར་ན། སྨན་རམས་པ་ཟེར་བ་ལས་སྨན་རམས་མ་དང་། སྨན་རམས་ཕ་སོགས་ནམ་ཡང་མི་ཟེར་རོ། དེ་བཞིན་ Ph.D Male དང་ Ph.D Female ཟེར་སྲོལ་ཡེ་ནས་མེད་པ་སོགས་རེད། འོན་ཀྱང་། ཁས་བླངས་པའི་བསླབ་སྡོམ་བཞེས་སྐབས། དགེ་ཚུལ་ཕ་མ་དང་། དགེ་སློང་ཕ་མ་ཟེར་སྲོལ་ཡོད་པས། དེ་ནི་གནད་དོན་ཐ་དད་རེད། གོང་གསལ་བཙུན་པ་དགེ་བཤེས་ཚོའི་མཚན་དོད་གནད་དོན་འདི་ལ་བསམ་ཞིབ་ངེས་པར་གནང་དགོས་འདུག་སྙམ། ལར་ནས་ལོ་རྒྱུས་རང་བཞིན་ཅན་གཞན་ཞིག་ནི།. ད་ཆ་མ་འོངས་པར་ཡང་། སྟོན་པ་ཐུབ་པའི་དབང་པོའི་དམ་ཆོས་ཀྱི་སྲོལ་ལུགས་ལ།. རིགས་རུས་དང་ཕོ་མོའི་དབྱེ་འབྱེད་མེད་དགོས་ན། དགེ་ལུགས་པའི་བཙུན་མ་སྔགས་རམས་པ་ཐོན་པ་རྣམས་རིམ་པས་དགའ་ལྡན་ཁྲི་པར་ཕེབས་ཆོག་པའི་ལམ་པོ་ཆེའི་སྲོལ་བཟང་གི་ལོ་རྒྱུས་ཤིག་རང་ཤུགས་ཀྱིས་ཆགས་སོང་བ་མ་རེད་དམ། ངོ་མ་ལོ་རྒྱུས་རང་བཞིན་གསར་གཏོད་ཅན་ཞིག་ཏུ་ལོས་འགྱུར་ངེས་ཡིན་པ་འདྲ། ཕྱི་གླིང་པ་བོད་རིག་པའི་ཐོག་མཁས་དབང་མང་པོས་དགོངས་འཆར་འདི་ལ་ཉིན་རེ་ནས་ཉིན་རེར་སྣོ་ངར་ལྡན་པར་གྱུར་བཞིན་འདུག. སྦྱིན་བདག་ཁོང་ཚོའོ་བཀའ་དགོངས་ནི་རྩ་ཆེན་མ་རེད་དམ།. ད་བར་བོད་མིའི་ལོ་རྒྱུས་ནང་སྦྱིན་བདག་ཟེར་བ་ནི་གལ་ཆེའི་གནོན་ཤུགས་ལྡན་པ་ཞིག་ཡིན་ཡིན་པ་རེད་འདུག. ལས་འཆར་འདི་ལ་དགའ་བསུ་ཚད་མེད་ཡོད། དོན་དུ་༧རྒྱལ་བ་རིན་པོ་ཆེའི་ཕུགས་ཀྱི་དགོངས་གཞི་དགོངས་པ་འདི་ནི་བླ་ན་མེད་པའི་རླབས་ཆེན་ཆེན་གྱི་མཛད་བཟང་ཞིག་ལོས་ཡིན། །