བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱིས་བཙན་བྱོལ་བོད་མི་སྡོད་ཁང་དཀའ་ངལ་ཅན་རྣམས་ཀྱི་དཀའ་ངལ་སེལ་སླད། ཕྱི་ལོ་ ༢༠༢༢ ནས་བཟུང་རུབ་སྡོད་གཞིས་སྒར་བསྐྱར་གསོའི་ལས་གཞི་མགོ་འཛུགས་གནང་སྟེ། ཕྱི་ལོ་ ༢༠༢༤ ནས་ས་ཆ་རྣམས་བགོ་འགྲེམས་གནང་འདུག ད་ལྟའི་ཆར་ས་གནས་ཁག་ ༢༧ ནས་རང་བདག་སྡོད་ཁང་མེད་པའི་ཁྱིམ་ཚང་ཁྱོན་ ༡༧༨༦ གིས་ཐོ་འགོད་བྱས་ཡོད་པ་དང་། ད་བར་དུ་གཞིས་ཆགས་ཁག་ ༧ ནང་ཁྱིམ་ཚང་ ༧༩༠ ཙམ་ལ་ས་བགོས་བྱས་ཟིན་ཡོད་འདུག་ལ། ཐོ་གསར་དུ་རྒྱག་མཁན་ཁྱིམ་ཚང་ ༥༩ ཡོད་འདུག
འདི་གའི་གསར་འགོད་པས་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་གཞིས་སྤོས་ལས་གཞིའི་འགན་འཛིན་དངོས་གྲུབ་འོད་ཟེར་ལགས་སུ་དེ་འབྲེལ་གནད་དོན་ཁག་ཅིག་ཐོག་བཅར་འདྲི་བྱས་ཡོད།
དྲི་བ། སྐབས་བཅུ་དྲུག་པའི་བཀའ་ཤག་གིས་བཙན་བྱོལ་བོད་མི་སྡོད་ཁང་མེད་མཁན་རྣམས་ལ་གཞིས་ཁང་གསར་རྒྱག་ཆེད་ཐོ་གཞུང་རིམ་པ་དུ་མའི་ཐོག་ནས་ཡར་བསྡུས་སོང་། ད་ལྟ་སྡོད་ཁང་མེད་མཁན་ག་ཚོད་ཅིག་གིས་ཐོ་འགོད་བྱས་འདུག དེ་བཞིན་བོད་མི་འདུས་སྡོད་ཀྱི་ས་གནས་ག་ཚོད་ཅིག་ནས་མིང་གཞུང་བསྡུ་རུབ་བྱས་ཡོད་པ་རེད།
ལན། ང་ཚོ་བོད་མིའི་སྒྲིག་འཛུགས་ཀྱི་རུབ་སྡོད་གཞིས་སྒར་བསྐྱར་གསོའི་གཙོ་གནད་ཀྱི་ལས་གཞི་དེ་མདོར་བསྡུས་ནས་བཤད་ན་གཞིས་སྤོས་ལས་གཞི་ཞུ་ཡི་ཡོད་པ་རེད། ལས་གཞི་འདི་སྤྱི་ཡོངས་ནས་ཕྱི་ལོ་ ༢༠༢༢ ནས་མགོ་བཙུགས་ཏེ། ཐོག་མར་རྗེས་འབྱོར་བའི་ཐོ་གཞུང་བསྡུ་རྒྱུའི་ལས་འགུལ་སྤེལ་ཡོད་ལ། དེའི་རྗེས་ཁ་འཐོར་ཇི་ཙམ་ཡོད་པའི་ཐོ་གཞུང་བསྡུས་ཏེ། ཐོ་གཞུང་རབ་དང་རིམ་པ་མང་པོ་བསྡུས་ཡོད་པ་རེད། ད་ལྟའི་ཆར་ཐོ་གཞུང་ཕྱོགས་བསྡོམས་བྱེད་པའི་སྐབས་ཁྱིམ་ཚང་ ༡༧༨༦ ཡོད་པའི་ཁྲོད། རྗེས་འབྱོར་པ་ ༩༨༩ དང་ཁ་འཐོར་བ་ ༧༩༧ ཡོད་པའི་གནས་སྟངས་ཆགས་ཡོད་པ་རེད། མི་འབོར་གྱི་ཆ་ནས་ ༤༧༦༥ ཆགས་ཀྱི་ཡོད་རེད། སྤྱིར་བཏང་གིས་ནང་སྲིད་ལས་ཁུངས་ཀྱི་ཁྱབ་ཁོངས་སུ་ས་གནས་ཁག་ ༣༧ ཡོད་པའི་ནང་ནས་ས་གནས་ ༢༧ ནས་སྡོད་ཁང་མེད་ཟེར་མཁན་གྱི་རྗེས་འབྱོར་བ་དང་ཁ་འཐོར་བའི་ཐོ་འབྱོར་ཡོད་པ་རེད།
དྲི་བ། དྷ་རམ་ས་ལ་ལྟ་བུར་མཚོན་ན། ཁ་འཐོར་བོད་མི་མང་པོ་ཡོད་ས་ཞིག་རེད། ངས་ངོ་ཤེས་པའི་ནང་དུའང་གཞིས་ཁང་གསར་རྒྱག་གི་ཐོ་ལེན་གྱི་ཡོད་པ་ཧ་མ་གོ་མཁན་འདུག ད་ལྟ་སྐད་ཆ་འདྲི་དུས་ཐོ་ལེན་གྱི་མ་རེད་ཟེར་ནས་ཁང་པ་མེད་མཁན་དེ་ཚོས་བློ་འཚབ་བྱེད་ཀྱི་འདུག དེ་ཚོའི་རིགས་ལ་སྒུག་ཐོའི་ནང་དུ་འཇོག་པ་ལྟ་བུའི་དགོངས་བཞེས་གནང་གི་ཡོད་དམ།
ལན། དོན་དངོས་སུ་དྷ་རམ་ས་ལ་ནས་ལྷག་མི་དགོས་པ་འདྲ་པོ་རེད། ང་ཚོས་དྷ་སའི་ནང་བརྒྱུད་རིམ་མང་པོ་ཞེ་དྲགས་འགྲོ་ཚར་བ་རེད། དྷ་སའི་ས་གནས་མགོ་འཛིན་གྱིས་གསལ་བསྒྲགས་མང་པོ་བྱས་ཟིན་པ་མ་ཟད། ང་ཚོ་ས་གནས་མགོ་འཛིན་ལས་ཁུངས་སུ་ཕྱིན་ནས་མི་རེ་རེར་ཞིབ་འཇུག་དང་གསལ་བསྒྲགས་བྱས་པ་རེད། དངོས་གནས་བྱས་ན་དྷ་སར་ལྷག་མི་དགོས་པ་ཞིག་རེད་དེ། ད་ལྟའི་ཆར་ཡང་བསྐྱར་ཁྱིམ་ཚང་ ༥༩ ཡི་ཐོ་བསླེབས་ཡོད་ཅིང་། ཐོ་དེ་ལ་བརྒྱུད་ལམ་ཞིག་བརྒྱུད་ནས་ཞིབ་འཇུག་མང་པོ་བྱ་དགོས་ཀྱི་ཡོད། དེ་ཡང་དང་པོ་ཐོ་འབྱོར་བ་དང་ཞིབ་འཇུག་བྱ་རྒྱུ་དང་། ས་སྐལ་ཡོད་མེད་ཞིབ་འཇུག་བྱ་དགོས་པ། ད་དུང་མི་མང་ལ་མར་བཀྲམ་ནས་ཁང་པ་ཡོད་དང་མེད་ཀྱི་དགག་བྱ་ཡོད་མེད་བལྟ་དགོས་ཀྱི་ཡོད་པ་སོགས་རིམ་པ་ཆ་ཚང་ལ་བལྟས་ནས་ཐོ་གཞུང་ནང་དུ་འཇུག་གི་ཡོད་པ་རེད། ད་ལྟའི་ཆར་ང་ཚོས་ཞིབ་འཇུག་བྱེད་བཞིན་པ་ ༥༩ ཡོད།
ངས་གོང་དུ་ཞུས་པའི་མི་ཚང་ ༥༩ ནང་ནས་ཕལ་ཆེར་ ༢༧ དྷ་རམ་ས་ལ་ནས་ཡང་བསྐྱར་བསླེབས་པ་རེད། དེར་བརྟེན་འགྲོ་ས་མེད་པ་ཞིག་མ་རེད། འོན་ཀྱང་། ས་གནས་ས་ཐོག་ནས་དངོས་ཡོད་ཀྱིས་མི་དེ་ལ་དཀའ་ངལ་ཡོད་མེད་བལྟ་རྒྱུ་དང་། དེ་ཛ་དྲག་གི་དཀའ་ངལ་ཡིན་པ། ཁོ་རང་གིས་ཧ་མ་གོ་བ། དེ་བཞིན་ཁ་ཤས་དུས་ཡུན་རིང་པོར་ཕྱི་ལོགས་སུ་གནས་སྐོར་སོགས་ལ་ཕྱིན་ཏེ་ཡར་བསླེབས་ནས་མ་གཏོགས་ཧ་གོ་མ་སོང་ཟེར་མཁན་ཡོད་པ་དེ་དག་ཐོ་ལེན་གྱི་ཡོད་པ་རེད། ཡིན་ནའང་། ཆ་རྐྱེན་ཞིག་ཡོད་པ་དེ་དང་ལྡན་པ་ཞིག་དགོས་ཀྱི་ཡོད་རེད། ཆ་རྐྱེན་དེའི་ནང་ཚུད་པ་ཞིག་དགོས་ཀྱི་ཡོད་པ་རེད། སོ་སོར་ཁང་པ་ཡོད་བཞིན་པ་ཞིག་ཡིན་རུང་ཐོ་བརྒྱབ་པ་ཡིན་ན་འགྲིག་གི་མ་རེད། དེར་བརྟེན་ཆ་རྐྱེན་ལྡན་ན་ཐོ་ལེན་གྱི་ཡོད་ལ། ཛ་དྲག་དང་དཀའ་ངལ་སོགས་སོ་སོས་རྒྱུ་མཚན་བཤད་དགོས་ཀྱི་རེད། རྒྱུ་མཚན་ཡང་དག་ཅིག་ཡོད་ན་ང་ཚོས་ལེན་གྱི་ཡོད་པ་རེད། དཔེ་མཚོན་ཞུས་ན་ཁྱིམ་ཚང་ ༥༩ དེའང་རྗེས་ལ་བསླེབས་པ་རེད།
དྲི་བ། ད་ལྟ་བར་དུ་ས་ཆ་ག་ཚོད་ཅིག་བགོ་འགྲེམས་གནང་ཟིན་པ་རེད།
ལན། ང་ཚོས་ཕྱི་ལོ་ ༢༠༢༤ ནས་ས་བགོས་ལས་གཞི་དེ་ལྷོ་ཕྱོགས་ནས་མགོ་བཙུགས་ཏེ། ལྷོ་ཕྱོགས་ཀྱི་གཞིས་ཆགས་ཧོན་སུར་དང། ཀོ་ལི་གྷལ། མོན་གྷོ། དེའི་རྗེས་མན་སྤར་དང་། ཏི་ཛུ་སོགས་རིམ་པ་བྱས་ནས་ས་བགོས་བྱས་ཏེ། ཉེ་ཆར་ཟླ་བ་གཉིས་རིང་ལྷོ་ཕྱོགས་སྦེལ་ཀོབ་ལུགས་བསམ་དུ་ཕྱིན་པ་དང་། དེའི་སྔོན་ལ་བདེ་སྐྱིད་སླར་གསོ་ཚར་བ་རེད། ད་ལྟ་བར་དུ་བསྡོམས་ནས་ཁྱིམ་ཚང་ ༧༩༠ ཙམ་ལ་ས་བགོས་བྱས་ཟིན་པ་རེད། དེའི་ནང་ནས་བགོས་སྤྲོད་ཟིན་པ་དེ་ ༣༣༢ ཡོད་པའི་ཁྲོད། ལུགས་བསམ་དུ་འགྲོ་མཁན་ཕོན་ཆེན་པོ་ཞེ་དྲགས་ཆགས་འདུག ཁྱིམ་ཚང་ཕལ་ཆེར་ ༤༦༢ ཙམ་མར་སྤོ་ཡི་ཡོད་པ་རེད། དེའི་སྒང་ལ་ད་ལྟ་ངས་གོང་དུ་ཞུས་པ་ནང་བཞིན་ཐོ་བསླེབས་པའི་མི་ཚང་ ༥༩ དེའི་ནང་ནས་མང་ཆེ་བ་ལུགས་བསམ་དུ་འགྲོ་ཡི་ཡིན་ལབ་མཁན་རྐྱང་རྐྱང་རེད། དེར་བརྟེན་ས་བགོས་དེ་ PLOT ཕལ་ཆེར་ ༥༠༠ གྲ་སྒྲིག་བྱེད་དགོས་ཀྱི་ཡོད་པ་རེད། ང་ཚོ་ལུགས་བསམ་དུ་ཟླ་བ་གཉིས་རིང་བསྡད་དེ་ ༣༡༨ མ་གཏོགས་གྲ་སྒྲིག་ཐུབ་མ་སོང་། དེ་ནས་ཆར་པ་བབས་ཏེ་ང་ཚོས་ཞིང་ཁའི་དཀྱིལ་དུ་ལས་ཀ་བྱེད་དགོས་པ་དང་། དངོས་སུ་ཐང་སྟེང་ལ་འཐོན་དགོས་ཀྱི་ཡོད་པས་གནད་དོན་མང་པོ་ཞིག་གི་རྐྱེན་བྱས་ནས་ཐུབ་མ་སོང་། ད་ལྟ་ཡང་བསྐྱར་ཕྱི་ཟླ་ ༩ དང་ ༡༠ པའི་ནང་མར་འགྲོ་རྒྱུ་དང་། དེ་དག་ཆ་ཚང་བསྒྲུབ་རྒྱུའི་འབད་བརྩོན་ཞུ་རྒྱུ་རེད།
དོ་བདག་སོ་སོ་འགྲོ་ཐུབ་དང་མི་ཐུབ་ཟེར་བ་དེ་ཐོག་མ་ཉིད་ནས་བོད་མིའི་སྒྲིག་འཛུགས་ཀྱི་དགོངས་གཞིའི་ནང་ཡོད་རེད། དེ་འདྲ་ཆགས་ཀྱི་རེད། དེར་བརྟེན་ང་ཚོས་དང་པོ་ཉིད་ནས་མི་མང་ལ་འདོད་པ་གཞིར་བཟུང་སྤྲད་ཡོད་པ་རེད། ཁྱེད་རང་ཚོས་དངུལ་ཁྱོན་ནས་གཏོང་ཐུབ་ཀྱི་མེད་ཚེ། མན་སྤར་དང་ཨོ་ཌི་ཤ་ལ་རྒྱུགས། བོད་མིའི་སྒྲིག་འཛུགས་ཀྱིས་ཁང་པ་ཆ་ཚང་བརྒྱབ་ནས་སྤྲོད་ཀྱི་ཡིན་ཞུས་ཡོད། དེ་ནས་མན་སྤར་དུ་འགྲོ་ཐུབ་ས་མ་རེད། དངུལ་ཏོག་ཙམ་གཏོང་རྒྱུ་ཡོད་ལབ་ན་ཧོན་སུར་དང་ཀོ་ལི་གྷལ་དུ་འགྲོ་ན་གཞུང་གིས་རོགས་དངུལ་འབུམ་བདུན་དང་ཕྱེད་ཀ་སྤྲོད་ཀྱི་ཡོད་པ་རེད། དེར་བརྟེན་དེའི་ཐོག་སོ་སོས་སྣོན་པ་ཏོག་ཙམ་བརྒྱབ་ན་ཁང་པ་བཟོ་མི་ཐུབ་པའི་གནས་སྟངས་མེད་པ་རེད། གཞི་བཞག་ས་དེ་སྤྱིར་བཏང་གིས་མི་མང་སོ་སོའི་འདོད་པ་དང་། གཉིས་པ་ནས་སོ་སོའི་དཔལ་འབྱོར་གྱི་གནས་སྟངས་ལ་དཔག་པའི་སོ་སོས་གདམ་ཁ་བྱ་རྒྱུ་ཡོད་པའི་གནས་སྟངས་ཆགས་ཡོད། ཅོ་གུ་དང་མོན་གྷོ་རུ་འགྲོ་བ་ཡིན་ན། གཞུང་ནས་འབུམ་ལྔ་འབུལ་གྱི་ཡོད་པ་དེའི་ཐོག་སོ་སོས་གཏང་རྒྱུ། དེ་བཞིན་བདེ་སླར་དང་ལུགས་བསམ་དུ་འབུམ་གཉིས་དང་ཕྱེད་ཀ་འབུལ་གྱི་ཡོད་པ་རེད། ས་ཆ་གྷུན་ཌ་ (Gunda) ལྔ་ལབ་དུས་ཧྥི་ཌི་གྲུ་བཞི་མ་ལྔ་སྟོང་ཙམ་ཡོད་ལ། སྨི་ཊར་གྲུ་བཞི་མར་རྩིས་ན་ ༥༠༦ ཙམ་བསླེབས་ཀྱི་ཡོད་པ་རེད། ད་ལྟ་ང་ཚོའི་ཞིབ་འཇུག་ནང་དོ་བདག་རང་ལ་ལབ་ཀྱི་ཡོད་པ་རེད། དང་པོ་དོ་བདག་རང་གིས་བདམས་པ་རེད། བདམས་པ་གཞིར་བཟུང་གིས་ས་ཆ་སྤྲད་པ་རེད། མཐའ་མ་དེར་ང་ཚོས་ས་ཆ་སྤྲོད་པའི་སྐབས་དོ་བདག་དངོས་སུ་ཡོང་ནས་ས་ཆར་བལྟ་རོགས་བྱོས་ཞུས་པ་རེད། དཔེར་ན། མན་སྤར་དུ་མི་ཚང་མ་སྐད་བཏང་བ་རེད། ཕྱི་ཟླ་ ༡༡ ཚེས་ ༣༠ ཡས་མས་སུ་བགོ་བཤའ་བརྒྱབ་པ་རེད། དང་ཐོག་གཞིས་ཆགས་ཡོངས་སུ་སྐོར་བ་བརྒྱབ་སྟེ་གཞིས་ཆགས་ཀྱི་གནས་སྟངས་རྒྱུས་ལོན་བྱས། སོ་སོ་དངོས་སུ་ཕྱིན་ནས་ང་ཚོས་ས་བགོས་བྱས་པའི་ས་ཆའི་གནས་སྟངས་དང་ཡུལ་གྱི་གནས་སྟངས་སོགས་བལྟས་ཏེ། ཁོང་ཚོར་བགོ་བཤའ་རྒྱག་སྐབས་ཁོང་ཚོས་བློ་བདེ་པོ་ཞེ་དྲགས་གནང་བ་མ་ཟད། ང་ཚོས་ཆ་ཚང་ཧ་གོ་སོང་། དེ་སྔ་གང་འདྲ་ཡོད་མེད་ཧ་མི་གོ་བ་དང་། མན་སྤར་དུ་ཚ་བ་ཡོད་རེད་ཟེར་གྱི་འདུག དེ་འདྲ་ཡིན་གྱི་མ་རེད་ཞུས་ཡིན། དཔེར་ན་སྦན་དྷ་ར་ཡིན་ན་ཚ་བ་ཚ་པོ་ཡོད་རེད། མན་སྤར་དེ་ནོར་ཡིན་གྱི་རེད་ལབ་ཡིན། ཁ་ཤས་ཀྱིས་དེ་འདྲའི་དཀྲོག་གཏམ་དང་། གནས་ཚུལ་དངོས་སུ་ཧ་མི་གོ་བའི་གནས་སྟངས་ཀྱི་ཆ་ནས་དེ་འདྲ་ཆགས་ཡོང་གི་འདུག དངོས་སུ་ས་གནས་ལ་སླེབས་དུས་ཁོང་ཚོ་སྤྲོ་པོ་ཞེ་དྲགས་བྱུང་སོང་ལ། དངོས་གནས་ཀྱིས་ཞི་འཇམ་པོ་དང་ལས་ཀ་བྱེད་ན་བྱེད་བདེ་པོ། ཁོང་ཚོས་ཁོར་ཡུག་ཡག་པོ་འདུག་གསུང་གི་འདུག དེར་བརྟེན་སོ་སོའི་འདོད་མོས་རེད། ད་ལྟའི་ང་ཚོའི་ལས་གཞི་འདིའི་ནང་དུ་གཞུང་གིས་བཙན་བཀའ་བཏང་སྟེ་ཁྱེད་རང་དེ་རང་མ་གཏོགས་མ་འགྲོ་ན་ང་ཚོས་སྤྲོད་ཀྱི་མིན་ཟེར་བ་དེ་འདྲ་མེད་པ་རེད། རྒྱས་ཤིང་རྒྱས་པར་ཞུས་ན། ཁ་ཤས་ཀྱིས་དང་པོ་ཨོ་ཌི་ཤ་འགྲོ་ཡི་ཡིན་ལབ། དེ་ནས་ཡོང་ས་མ་རེད་ལབ་སྟེ་ངའི་ངོ་ཤེས་པ་དེ་མན་སྤར་དུ་འགྲོ་ཡི་འདུག་ལབ་ནས་མན་སྤར་དུ་བསྒྱུར་རོགས་བྱས་ལབ་མཁན་གྱི་གནས་ཚུལ་ཡང་བྱུང་རེད་ལ། བདེ་སླར་སོགས་ས་གནས་གཞན་དུ་འགྲོ་ཡི་ཡིན་ལབ་མཁན་གྱི་ཁྱིམ་ཚང་ཕལ་ཆེར་ ༦༩ ཡོད་པ་དེ་དག་གིས་སོ་སོའི་འདོད་པ་བཞིན་ཞུས་པ་དང་། ད་རེས་ང་ཚོས་སྤྲད་པ་དེ་ང་རང་གིས་བསམ་པ་བཞིན་རག་སོང་བསམ་པའི་ཚོར་བ་ཞིག་སྤྲོད་རྒྱུ་དང་། ང་ཚོས་གང་ཐུབ་ཐུབ་ཀྱིས་ཚང་མའི་དགོས་མཁོ་ཞུ་བཞིན་པའི་ཐོག འཛིན་སྐྱོང་གིས་གྲོས་ཆོད་འཇོག་གིན་ལས་དོན་འགྲུབ་བཞིན་ཡོད་པ་རེད། ད་ལྟ་འགྲོ་དང་མི་འགྲོ། དཔལ་འབྱོར་གྱི་གནས་སྟངས་དེ་དག་ཆ་ཚང་དོ་བདག་རང་ལ་གཞི་བཅོལ་བ་ལས། གཞུང་གི་ངོས་ནས་རོགས་དངུལ་དང་རོགས་པ་གང་བྱ་དགོས་པ་དེ་དག་བྱ་རྒྱུའི་གནས་སྟངས་ཆགས་ཡོད།
དྲི་བ། གཞིས་ཁང་གསར་རྒྱག་གི་སྒྲིག་གཞིའི་ནང་དུ་ས་ཆ་བགོ་འགྲེམས་ཟིན་ནས་ལོ་ ༢ ནང་ཚུད་དུ་ཁང་པ་འཛུགས་སྐྲུན་དགོས་སྐོར་བྲིས་འདུག་ག། ཡིན་ནའང་། ལོ་གཉིས་ཀྱི་ནང་ཁང་པ་རྒྱག་མ་ཐུབ་ན་ག་འདྲ་བྱེད་དགོས་རེད།
ལན། གཞིས་སྤོས་ལས་གཞིའི་སྒྲིག་གཞི་དེ་འདྲ་མེད་པ་རེད། སྤྱིར་བཏང་གིས་བཙན་བྱོལ་བོད་མིའི་གཞིས་ཆགས་ཁག་གིས་ས་ཁང་བདག་འཛིན་དང་བེད་སྤྱོད་བྱེད་ཕྱོགས་ཀྱི་སྒྲིག་གཞི་ཞིག་ཡོད་པ་རེད། དེའི་ནང་དུ་གཞིས་ཆགས་གཅིག་ཏུ་སྡོད་མཁན་དང་ཐོབ་ཐང་ཡོད་བཞིན་པ་ཞིག་ཕྱི་ལོགས་ལ་ཕྱིན་ནས་ལོ་གཉིས་རིང་མ་བསླེབས་པ་ཡིན་ན་དེའི་ས་ཆ་ཡར་བསྡུ་རྒྱུའི་སྒྲིག་གཞི་ཞིག་ཡོད་པ་རེད། དེ་མིན་ད་ལྟའི་གཞིས་སྤོས་ལས་གཞི་འདི་ལ་དོ་བདག་དང་ང་ཚོའི་དབར་ལ་གན་ཡིག་ཅིག་འཇོག་གི་ཡོད་པ་དེའི་ནང་དོན་ཚན་གསུམ་ཡོད་པ་ནི། ༡། བཙན་བྱོལ་བོད་མིའི་གཞིས་ཆགས་ཁག་གི་ས་ཁང་བདག་འཛིན་དང་བེད་སྤྱོད་བྱེད་ཕྱོགས་ཀྱི་སྒྲིག་གཞིའི་འབྲུ་དོན་ཁག་ལ་གཞིས་མི་སྤྱི་མཚུངས་ལྟར་སྲུང་བརྩིས་དང་བསྒྲུབ་བྱ་ཞུ་རྒྱུའི་ལས་དོན་མཐའ་དག་གཡས་ཁག་གཡོན་དཀྲི་མེད་པར་འགན་འཁུར་རྐང་ལེན་ཞུ་རྒྱུའི་ཁས་ལེན་ཞུས།
༢། སྡོད་ཁང་མེད་པའི་དཀའ་ངལ་སེལ་སླད་སྡོད་ཁང་གསར་རྒྱག་བྱ་ཡུལ་ས་ཆ་བགོ་འགྲེམས་གནང་བ་ཞིག་དང་ཆ་རྐྱེན་ལྟར་རོགས་དངུལ་གནང་རྒྱུ་ཡིན་སྟབས་མ་འོངས་པར་བོད་མིའི་སྒྲིག་འཛུགས་ལ་བསྐྱར་དུ་གཞིས་ཁང་གི་ཐོབ་ཐང་རྩོད་ལེན་ཞུ་རྒྱུ་མིན།
༣། སོ་སོར་བགོ་འགྲེམས་བྱུང་བའི་ས་ཚད་ཇི་ཐོབ་བདག་གཉེར་གྱིས་སྡོད་ཁང་གདམ་ག་ལྟར་དུས་ཐོག་རྒྱག་དགོས་པ་བཅས་ཡོད་པ་རེད། དེ་མིན་སྒྲིག་གཞི་གང་ཡང་མེད་པ་རེད། ང་ཚོས་གང་ཐག་གཅོད་པ་དེ་ནང་སྲིད་ཀྱིས་འཛིན་སྐྱོང་ནང་དུ་གྲོས་ཆོད་བཞག་སྟེ་བཀའ་ཤག་ལ་ཡར་བཀའ་འཁྲོལ་ཞུས་ནས་བཀའ་འཁྲོལ་ཐོབ་པ་སོགས་བརྒྱུད་ལམ་ཞིག་བརྒྱུད་ནས་གནས་སྟངས་ལ་དཔག་པའི་འགྲོ་མུས་ཡིན་པའི་གནས་སྟངས་ཆགས་ཡོད།
དྲི་བ། དོན་ཚན་གསུམ་པ་དང་འབྲེལ་ནས་ཁང་པ་རྒྱག་པར་དུས་ཚོད་ག་ཚོད་སྤྲོད་ཀྱི་ཡོད་པ་རེད།
ལན། སྤྱི་ཡོངས་ཀྱིས་ང་ཚོས་དང་ཐོག་ནས་འགེངས་ཤོག་གཏན་འབེབས་བཟོས་ཏེ། ཁྱེད་རང་གིས་ག་དུས་རྒྱག་གི་ཡིན། ༢༠༢༤ ནས་ ༢༠༢༥ བར་དང་། ༢༠༢༥་་་༢༠༢༦ ༢༠༢༦་་་༢༠༢༧ སོགས་ལ་ཁང་པ་རྒྱག་གི་ཡིན་མིན་དྲིས་ཏེ་ཁོང་ཚོར་གདམ་ཀ་སྤྲོད་ཀྱི་ཡོད་པ་མ་ཟད། གདམ་ཀ་སྤྲད་པ་གཞིར་བཟུང་གིས་སོ་སོས་འདེམས་ཀྱི་ཡོད་པ་རེད། འོན་ཀྱང་། ད་ལོ་ལྟ་བུར་ཆ་མཚོན་ན་དོན་དངོས་སུ་ཁང་པ་མང་པོ་རྒྱག་དགོས་ཀྱི་ཡོད་ཀྱང་། ལོ་ནག་འཁེལ་ནས་ཏི་ཛུ་རུ་ཁང་པ་ ༣༡ ཕྱོགས་གཅིག་ཏུ་རྒྱག་རྒྱུའི་འཆར་གཞི་བསྒྲིགས་ཡོད་ཀྱང་། མི་མང་ཡར་ཡོང་ནས་ད་ལོ་ལོ་ནག་འཁེལ་འདུག་པས། ད་ལོ་ཁང་པ་རྒྱག་གི་མེད་ཟེར་ནས་ད་ལོ་ཁང་པ་མ་བརྒྱབ་པའི་རྒྱུ་མཚན་ལྟེ་བ་དེ་ལོ་ནག་ལ་འཁེལ་བར་བརྟེན་ས་སློག་རྡོ་སློག་བྱེད་དུས། མ་འོངས་པར་དཀའ་ངལ་འཕྲད་མི་ཡོང་ངམ་བསམས་ནས་མི་མང་གིས་ཞེད་སྣང་བྱེད་ཀྱི་འདུག གཉིས་ནས་ད་ལྟ་སོ་སོས་བདམས་པའི་ས་ཆ་དེར་གཏན་ནས་རྒྱག་མི་ཐུབ་ཚེ་རྒྱུ་མཚན་དང་བཅས་ཕར་འགྱངས་བྱེད་ཀྱི་ཡོད་པ་རེད། དཔེར་ན་ད་ལོ་ལོ་ནག་རེད། ངས་རྒྱག་ཐུབ་ས་མ་རེད་ཞུས་ན་རྒྱུ་མཚན་ཞིག་ཡིན་པས་ལོ་རྗེས་མར་རྒྱག་ཆོག་གི་རེད། དེར་བརྟེན་སོ་སོས་རྒྱག་ཐུབ་རྒྱུའི་དུས་ཚེས་ངེས་ཅན་ཞིག་བཟོ་ཡི་ཡོད་པ་རེད། ཡིན་ནའང་། ང་ཚོར་གཞུང་གི་དངུལ་རྩིས་འགྲོ་དགོས་ཀྱི་ཡོད་པས། དངུལ་རྩིས་ནང་ད་ལོ་འདི་ཙམ་འགྲོ་ཡི་ཡོད་པ་ལབ་དགོས་ཀྱི་ཡོད་པར་བརྟེན། ད་ལོ་ལོ་ནག་རྐྱེན་གྱིས་ཁང་པ་ ༨༠ ཙམ་རྒྱག་རྒྱུའི་དངུལ་རྩིས་ནང་ཡོད་ཀྱང་། ད་ལོར་ཁང་པ་གཉིས་དང་གསུམ་མ་གཏོགས་རྒྱག་མཁན་མི་འདུག ཁོང་ཚོས་བློ་ཁོག་བཙོང་ནས་རྒྱག་གི་ཡོད་ས་རེད། དེ་མིན་ད་ལོ་ལོ་ནག་འཁེལ་ནས་ཚང་མས་དེ་ལྟར་རྩིས་ཀྱི་འདུག ཁ་ཤས་ཀྱིས་ད་ལོ་ལོ་ནག་ཡིན་དུས་ས་སློག་རྡོ་སློག་བྱ་རྒྱུ་མེད་པ་བཤད་དུས། ནང་སྲིད་ཀྱིས་ཁང་པ་རྒྱག་དགོས་པ་སོགས་མུ་མཐུད་ནས་རྒྱག་གི་ཡོད་ལ། ལོ་ནག་ཡིན་པའི་ཆ་ནས་ཟློག་ཕྱོགས་ཀྱི་མཆོད་པ་དེ་དག་ཆ་ཚང་གྲུབ་ཡོད། དེ་ཡང་སྨན་རྩིས་ཁང་ནས་རྩིས་བསྐོར་ཏེ་ཞབས་རིམ་གང་བྱ་དགོས་པ་རྣམས་བྱས་ཡོད། ས་གནས་གང་དུ་ལས་འགུལ་ག་རེ་སྤེལ་རུང་ཞབས་བརྟན་དེ་དག་བྱས་ཡོད་པ་རེད། ད་ལྟ་བོད་མིའི་སྒྲིག་འཛུགས་ཀྱི་ངོས་ནས་བྱེད་དགོས་པ་དེ་དག་མུ་མཐུད་དུ་བྱེད་བཞིན་པ་རེད། ང་ཚོ་ས་གནས་སུ་ཕྱིན་ནས་ས་སློག་རྡོ་སློག་བྱ་དགོས་པ་དང་། ཁོད་སྙོམས་པོ་བཟོ་དགོས་པ་སོགས་བྱེད་དགོས་ཀྱི་རེད། དེ་བཞིན་ཁང་པ་རྒྱག་དགོས་ཀྱི་རེད། ཁང་པ་དུས་ཐོག་ཏུ་མི་རྒྱག་ཚེ་མཇུག་ཏུ་མང་པོ་སྤུངས་ཡོང་གི་རེད། དེར་བརྟེན་ང་ཚོས་དུས་ཚོད་དང་བསྟུན་ནས་འགྲོ་རྒྱུའི་ཐབས་ཤེས་བྱེད་བཞིན་ཡོད།
ཨོ་ཌི་ཤ་རུ་ཁང་པ་ ༡༠ གསར་རྒྱག་བྱས་ཟིན་པ་དང་མི་མང་ལ་བགོ་འགྲེམས་ཟིན་པ་རེད། གཞིས་སྤོས་ལས་གཞིའི་ཐོ་ནང་དུ་མེད་རུང་ལ་དྭགས་སུ་ཁྱིམ་ཚང་ ༥༤ ཡི་ས་ཆ་མཁོ་སྒྲུབ་བྱས་ཏེ་ཕལ་ཆེར་གཞིས་ཁང་ ༢༧ ཙམ་ནང་སྲིད་ཀྱིས་བརྒྱབ་ཚར་བ་རེད། མན་སྤར་དུ་དཀའ་ངལ་ག་རེ་འདུག་ཟེར་ན། སྤྱིར་བཏང་མི་འགྲོ་མཁན་མང་པོ་ཡོད་པའི་ཐོག ས་ཆ་ས་མཐོ་བོ་ཡོད་པ་དང་ཨར་ལས་པ་མཁོ་སྒྲུབ་བྱ་རྒྱུ་ཁག་པོ་ཞེ་དྲགས་འདུག ང་ཚོས་ཁང་པ་ ༦༠ རྒྱག་དགོས་པ་སོགས་ཕོན་ཆེན་པོ་རྒྱག་དགོས་པས་མི་གཅིག་གིས་ཁང་པ་གཉིས་དང་གསུམ་ཙམ་ལས་རྒྱག་ཐུབ་ཀྱི་མེད་པར་བརྟེན། ལོ་མང་པོ་འགོར་རྒྱུའི་དཀའ་ངལ་འདུག་པས། དཀའ་ངལ་དེ་དག་སེལ་སླད་ཐབས་ཤེས་རབ་དང་རིམ་པ་བྱེད་བཞིན་ཡོད། ད་ལོ་ང་ཚོས་མགོ་འཛུགས་ཐུབ་རྒྱུའི་རེ་བ་ཞུ་ཡི་ཡོད།
དྲི་བ། ཧོན་སུར་དང་ཀོ་ལི་གྷལ་དུ་གཞིས་སྤོས་ལས་གཞིའི་གནས་སྟངས་གང་འདྲ་འདུག
ལན། ཧོན་སུར་དུ་མི་ཚང་གཅིག་གིས་ཁང་པ་བརྒྱབ་ཟིན་པ་རེད། ཀོ་ལི་གྷལ་དུ་མི་ཚང་གཅིག་གིས་རྒྱག་བཞིན་པ་རེད། དེ་ཚོ་སོ་སོས་རྒྱག་རྒྱུ་རེད། ང་ཚོས་དེ་དང་འབྲེལ་ནས་རོགས་དངུལ་སྤྲོད་དགོས་པ་ཆགས་ཀྱི་ཡོད་ལ། རོགས་དངུལ་འབུམ་བདུན་དང་ཕྱེད་ཀ་དེ་དང་ཐོག་ནས་སྤྲད་པ་ཡིན་ན་དཀའ་ངལ་ཞིག་རེད། ཁོས་ཁང་པ་རྒྱག་གི་ཡོད་དང་མེད་ཀྱི་དཀའ་ངལ་ཞིག་འཕྲད་ཀྱི་རེད། དེར་བརྟེན་དེ་ལའང་ལམ་སྟོན་ཞིག་བཟོས་ནས་ཁྱེད་རང་གིས་ཁང་པ་བཟོ་མགོ་བཙུགས་ནས་ཉི་གཡོལ་ (སྒེའུ་ཁུང་གི་སྒང་དུ་ཉི་མ་གཡོལ་རྒྱུའི་) བར་དུ་བསླེབས་དུས་བརྒྱ་ཆ་ ༥༠ ཡང་ན་ ༣༧༥,༠༠༠ སྤྲོད་ཀྱི་ཡོད་ལ། དེའི་རྗེས་ཆ་ཚང་ཚར་བ་ཡིན་ན་ཚར་སོང་ཟེར་ནས་ས་གནས་མགོ་འཛིན་གྱིས་ང་ཚོར་པར་དང་བཅས་པ་ཚང་མ་བསྐུར་ཡོང་གི་རེད། དེ་དུས་ཕྱེད་ཀ་དེ་སྤྲད་ནས་ཁོང་ཚོར་རག་དགོས་པ་ཆ་ཚང་ང་ཚོས་འབུལ་གྱི་ཡོད་པ་རེད། གང་ལྟར་ངས་གོང་དུ་ཞུས་པ་བཞིན་སོ་སོའི་དཔལ་འབྱོར་གྱི་གནས་སྟངས་ལ་དཔག་པའི་ཁང་པ་གང་འདྲ་རྒྱག་རུང་འབུམ་ ༢༠ དང་ ༡༠ འབུམ་ ༡༥ སོགས་ཀྱིས་རྒྱག་ནའང་སོ་སོའི་འདོད་པ་རེད།
དྲི་བ། མོན་གྷོ་འདོད་རྒུ་གླིང་གཞིས་ཆགས་ཀྱི་གནས་སྟངས་གང་འདྲ་ཡིན་ན།
ལན། མོན་གྷོ་རུ་ཁང་པ་གསར་རྒྱག་བྱེད་པར་དཀའ་ངལ་བྱུང་བ་ནི། ཁུལ་དེར་འགྲོ་ལམ་རག་གི་མེད་པའི་རྐྱེན་གྱིས་དཀའ་ངལ་བྱུང་སོང་། ཉེ་ཆར་འགྲོ་ལམ་དེ་བཟོས་ཚར་བ་རེད། མོན་གྷོ་རུ་འགྲོ་མཁན་ཁྱིམ་ཚང་ ༡༠༩ ཡོད་པའི་ནང་ནས། དེ་སྔ་ཁྱིམ་ཚང་ ༤༣ བགོས་ཟིན་པ་རེད། འཕྲོས་དེ་ཕྱི་ཟླ་ ༩ པའི་ནང་མོན་གྷོ་དང་བདེ་སླར་སོགས་ལ་ལྷག་མ་ཆ་ཚང་བགོ་བཤའ་རྒྱག་རྒྱུ་རེད། དེར་བརྟེན་ང་ཚོས་ཚར་བ་ཆ་ཚང་བགོ་བཤའ་རྒྱག་གི་ཡོད།
དྲི་བ། གཞིས་ཁང་གསར་རྒྱག་གི་ཐོ་གཞུང་ནང་ཐོ་འགོད་བྱས་ཏེ། ས་ཆ་རག་ཟིན་པའམ་ཡང་ན་ས་ཆ་རག་རྒྱུར་སྒུག་བསྡད་ཡོད་པ་དེ་འདྲ་སྒེར་ངོས་ནས་ཕྱི་རྒྱལ་དུ་ཕྱིན་པ་ཡིན་ན། ག་འདྲ་གནང་གི་རེད།
ལན། སྤྱི་ཡོངས་ཀྱིས་ས་ཁང་སྒྲིག་གཞི་དང་གང་བཀོད་པ་ཆ་ཚང་ནང་གཏན་དུ་བསྐྱོད་འགྲོ་མཁན་ཞིག་ཡིན་ན་རང་བཞིན་གྱིས་མེད་པ་ཆགས་ནས་ཡར་བསྡུ་དགོས་ཀྱི་ཡོད་པ་རེད། དཔེར་ན། ད་ལན་འདིའི་ནང་ཨོ་གླིང་དུ་འགྲོ་མཁན་ཡིན་པ་མ་ཟད་གཞིས་སྤོས་ནང་ཡོད་མཁན་ཕལ་ཆེར་ཁྱིམ་ཚང་ ༤༩ འདུག དེར་བརྟེན་ཁྱིམ་ཚང་ ༤༩ དེ་དག་ཆ་ཚང་མར་བཏོན་པ་རེད། རྒྱུ་མཚན་ནི་ཁོང་ཚོའི་ཐོ་ཐོན་ཚར་འདུག་ལ། སང་ཉིན་གནངས་ཉིན་འགྲོ་མཁན་རེད་པཱ། འགྲོ་མཁན་ཞིག་ལ་སྤྲད་ནས་རྒྱུ་མཚན་མེད་པ་དང་ཆ་རྐྱེན་དང་ལྡན་གྱི་མེད། ཆ་རྐྱེན་གྱི་ནང་དུའང་དེ་ལྟར་བྲིས་ཡོད་པ་ལྟར། ཕྱི་རྒྱལ་དུ་འགྲོ་ལ་ཉེ་བ་དང་འགྲོ་ཟིན་པ་དེ་དག་ཆ་ཚང་འཁོད་ཡོད་པ་རེད། དེ་ལ་བཟང་ཕྱོགས་ནས་ལྟ་ཕྱོགས་ཤིག་འདུག ཁ་ཤས་ཕྱི་རྒྱལ་དུ་འགྲོ་ཡི་ཡོད་ཀྱང་མ་ལབ་ནས་སྡོད་མཁན་ཁག་ཅིག་འདུག ཁ་ཤས་ཀྱིས་ཁོ་འགྲོ་ལ་ཉེ་བ་དང་ཕྱིན་ཚར་འདུག་ཟེར་བའི་གནས་ཚུལ་ཡོད་པ་དེ་དག་ལ་ང་ཚོས་དངོས་ཡོད་ཡིན་མིན་རྩད་གཅོད་བྱེད་ཀྱི་ཡོད། དེ་འདྲ་ཡོད་པ་ཡིན་ན། དཔེར་ན་ད་ལྟ་ངས་གོང་དུ་ཞུས་པ་བཞིན། དེ་གཞུང་འབྲེལ་ཆགས་ཀྱི་ཡོད་པས་ང་ཚོས་ལམ་སེང་ཧ་གོ་ཡི་རེད། དེ་མིན་གཞུང་འབྲེལ་མ་ཡིན་པར་སོ་སོ་སྒེར་གྱི་ངོས་ནས་འགྲོ་མཁན་ཁ་ཤས་ཤིག་འདུག ང་ཕྱི་རྒྱལ་དུ་འགྲོ་ཡི་ཡིན་ཟེར་མཁན་འདུག ཕྱི་རྒྱལ་དུ་ཕྱིན་པ་ཡིན་ན། ང་ཚོས་ས་ཆ་སྤྲད་ཟིན་པ་དེ་དག་ས་གནས་མགོ་འཛིན་ལ་ཞུས་ནས་ཡར་ལེན་གྱི་ཡོད་པ་རེད། དེ་མིན་སྒུག་ཐོའི་ནང་དུ་ཡོད་ན་རྗེས་མ་ས་བགོས་ཀྱི་མིང་ནང་བསླེབས་ཀྱི་མ་རེད། ཆ་རྐྱེན་དང་ལྡན་གྱི་མ་རེད། ཕྱི་རྒྱལ་དུ་འགྲོ་རྒྱུ་ཡིན་ན། ང་ཚོས་མར་འཐེན་རྐྱང་བྱེད་ཀྱི་རེད།
དྲི་བ། གཞུང་ནས་ས་ཆ་སྤྲད་དེ་ཁང་པའང་རྒྱག་གི་ཡོད་པ་དེ་ཚོའི་ཁང་པའི་གནས་སྟངས་ག་འདྲ་ཡོད་དམ།
ལན། ཨོ་ཌི་ཤ་དང་མན་སྤར་ནང་ང་ཚོས་ཁང་པ་རྒྱག་བཞིན་ཡོད་པ་རེད། ང་ཚོས་བརྒྱབ་པའི་ཁང་པ་ལ་དབྱེ་བ་གཉིས་ཡོད། མི་གྲངས་གསུམ་ཅན་ཞིག་ལ་ཁང་པའི་ནང་ཉལ་ཁང་གཉིས་དང་སྡོད་ས་གཅིག དེ་བཞིན་ཐབ་ཚང་དང་། གསང་སྤྱོད་འཁྲུས་ཁང་ཆ་ཚང་ཡོད་པ་རེད། མི་གྲངས་བཞི་ལས་བརྒལ་ཡོད་ན་ཉལ་ཁང་གསུམ་དང་སྡོད་ས་གཅིག གསང་སྤྱོད་གཉིས་བཅས་ཅུང་ཙམ་རྒྱས་པ་ཞིག་ཡོད། གཞན་དེ་མི་གཅིག་གམ་ཁྱིམ་ཚང་སོགས་གང་ཡིན་ཡང་ས་ཆ་གཅིག་པ་རེད། ཁང་པའི་རྒྱ་ཆེ་ཆུང་སོ་སོས་རྒྱག་རྒྱུ་རེད། ང་ཚོས་རོགས་དངུལ་གྱི་དོད་འབུལ་རྒྱུ་རེད།
ཨོ་ཌི་ཤ་ལ་མཚོན་ན་ཁང་པ་ ༦༩ ཙམ་ཡར་ཕུལ་ཡོད་པ་རེད། ང་ཚོས་ཨོ་ཌི་ཤའི་ནང་ལམ་ཁ་དང་གློག་བཟོ་མི་དགོས་ལ། ཆུ་ཡང་འཐེན་དགོས་ཀྱི་ཡོད་པ་མ་རེད། ང་ཚོས་ཁང་པ་བཟོ་རྒྱུ་གཅིག་པོ་རེད། ཁང་པའི་འགྲམ་དུ་ཁོར་ཡུག་གང་ཡོད་ཁོང་ཚོར་བདག་གི་ཡོད་པས་རྒྱ་ཆེན་པོ་རེད། ངས་གོང་དུ་ཞུས་པ་བཞིན་ལྷོ་ཕྱོགས་སུ་གྷུན་ཌ་ལྔ་ཟེར་གྱི་ཡོད་པ་དང་། ཕི་ཌི་གྲུ་བཞི་མ་ལྔ་སྟོང་དང་། སྨི་ཊར་གྲུ་བཞི་མ་ ༥༠༦ ཆགས་ཀྱི་ཡོད།
དྲི་བ། བཀའ་ཤག་སྐབས་བཅུ་དྲུག་པ་རྫོགས་ཏེ་སྐབས་བཅུ་བདུན་པ་བསླེབ་དགོས་ཀྱི་ཡོད་པས། གཞིས་སྤོས་ལས་གཞི་འདི་མུ་མཐུད་དུ་འགྲོ་ཐུབ་ཀྱི་རེད་དམ།
ལན། ཆབ་སྲིད་ཀྱི་འགྱུར་ལྡོག་ཐོག་ནས་ངས་ད་ལྟ་དེ་ཚོད་དཔག་ཐུབ་ཀྱི་མ་རེད། ངས་གླེང་སྟེགས་འདི་བརྒྱུད་ནས་ཐོ་འགོད་བྱས་ཟིན་པ་རྣམས་ཀྱིས་དུས་ཚོད་སྤྲད་ཟིན་པའི་ནང་ལས་ཀ་བྱ་ཐུབ་པའི་འབོད་སྐུལ་ཞུ་རྒྱུ་ཡིན། ད་ལྟའི་ཆར་ཁང་པ་རྒྱག་པ་དང་རོགས་དངུལ་སྤྲད་ཀྱི་ཡོད་པ་རེད། མ་འོངས་པར་བཀའ་ཤག་གཞན་བསླེབས་ན་འགྱུར་འགྲོ་མི་སྲིད་པ་མ་རེད། འགྱུར་བ་ཕྱིན་ཚེ་ང་ཚོས་ཀྱང་དེ་གཞིར་བཟུང་འགྲོ་དགོས་པ་རེད། ལས་གཞི་འདི་མུ་མཐུད་ནས་འགྲོ་བ་དང་ཡང་ན་ཆད་འགྲོ་བ་ཞུ་ཐུབ་ཀྱི་མ་རེད། དངོས་གནས་ལས་གཞི་འདི་མུ་མཐུད་འགྲོ་དགོས་པ་ཞིག་རེད། ལས་གཞི་འདི་སྤྱིའི་བདེ་དོན་ཞིག་ཆགས་ཡོད་དུས། ལས་ཀ་མགོ་བརྩམས་ཡོད་པ་དེ་མཇུག་བསྐྱལ་དགོས་པ་གལ་ཆེན་པོ་རེད། མི་མང་གི་འདོད་པ་དང་བསྟུན་དགོས་པ་རེད། ངས་ལས་གཞི་འདི་མུ་མཐུད་འགྲོ་བ་ཡིན་ན་མང་ཚོགས་ལ་ཁེ་ཕན་ཆེན་པོ་ཡོད་པ་རེད་བསམ་གྱི་འདུག
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། པདྨ་མཚོ།
