སྲིད་སྐྱོང་མཆོག་གིས་བོད་ཀྱི་ཟློས་གར་ཚོགས་པའི་སྒྲིག་འཛུགས་རྒྱུན་གནས་དང་ཚགས་ཚུད་ཡོང་ཆེད་དུ་འགན་འཛིན་ལྷན་ཚོགས་དང་དགེ་ལས་སློབ་ཕྲུག་ཐུན་མོང་ནས་མུ་མཐུད་འབད་བརྩོན་བྱེད་དགོས་སྐོར་གསུངས་སོང་།
བོད་ཀྱི་ཟློས་གར་ཚོགས་པ་དབུ་བརྙེས་ནས་མི་ལོ་ ༦༦ འཁོར་བའི་དུས་ཆེན་དང་བསྟུན། ཁ་སང་ཕྱི་ཚེས་ ༢༨ ཉིན་གྱི་ཉིན་རྒྱབ་བོད་ཀྱི་ཟློས་གར་ཚོགས་པའི་ཚོགས་ཁང་དུ། ཕྱི་ལོ་ ༢༠༢༥ ལོའི་དབྱར་སྐྱིད་གླུ་གར་འགྲན་བསྡུར་གྱི་དུས་སྟོན་འཚོགས་ཡོད་ཅིང་། མཛད་སྒོའི་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་། དམིགས་བསལ་སྐུ་མགྲོན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ། བོད་མི་མང་སྤྱི་འཐུས་ཁག་ཅིག དེ་བཞིན་གཞུང་ཁོངས་དང་གཞུང་ཁོངས་མ་ཡིན་པའི་ཚོགས་སྡེ་ཁག་གི་འགན་འཛིན་དང་སྐུ་ཚབ། དྷ་ས་ཁུལ་གྱི་སེར་སྐྱ་མི་མང་བཅས་འཛོམས་འདུག
འདི་ལོའི་དབྱར་སྐྱིད་ཀྱི་རྐང་བྲོ་གླུ་གཞས་འགྲན་བསྡུར་ཀྱི་གཟུ་དཔང་ནི་རྣམ་རྒྱལ་གྲྭ་ཚང་སློབ་གཉེར་ཁང་གི་སློབ་སྤྱི་ཐུབ་བསྟན་ཡར་འཕེལ་ལགས་དང་། བོད་ཕྲུག་ཁྱིམ་སྡེའི་སྤྱི་ཁྱབ་འགན་འཛིན་བསོད་ནམས་སྲི་གཅོད་ལགས། བོད་ཀྱི་ཟློས་གར་ཚོགས་པའི་ཟློས་དགེ་ཟུར་པ་ཚུལ་ཁྲིམས་སྒྲོལ་མ་ལགས། དྷ་སྟེང་བོད་ཕྲུག་ཁྱིམ་སྡེའི་འགན་འཛིན་ཚུལ་ཁྲིམས་རྡོ་རྗེ་ལགས། སཱ་ར་མཐོ་སློབ་ཀྱི་ལོ་རྒྱུས་སློབ་དཔོན་ཆེན་མོ་གཙང་ཕྲུག་སྟོབས་ལགས་བཅས་ལྔ་ཡིན་ཞིང་། འགྲན་བསྡུར་ཁྲོད་རྐྱང་གཞས་དང་། གཏམ་བརྗོད། འཁྲབ་གཞས་ཁག་དང་པོ་བཅས་ཚན་པ་གསུམ་ཀར་རྒྱ་ལུ་རུ་ཁག་ལ་ཨང་དང་པོ་ཐོབ་པ་དང་། འཁྲབ་གཞས་ཁག་གཉིས་པ་རུ་ཁག་གཉིས་ལ་ཨང་རིམ་གཅིག་མཚུངས་ཐོབ་སྟེ། ཁྱོན་བསྡོམས་སྐར་གྲངས་ ༥༠༠ ནས་རྒྱ་ལུ་རུ་ཁག་ལ་ཨང་གྲངས་ ༤༢༣།༥ དང་། རྔོན་པ་རུ་ཁག་ལ་ཨང་གྲངས་ ༤༡༤ ཐོབ་ཡོད་འདུག
མཛད་སྒོའི་ཐོག་་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་རྐང་བྲོ་གླུ་གཞས་འགྲན་བསྡུར་གྱི་བྱ་དགའ་གནང་སྟེ། བོད་ཀྱི་ཟློས་གར་ཚོགས་པ་དབུ་བརྙེས་ནས་ལོ་ ༦༦ འཁོར་བ་དང་བསྟུན། འདི་ལོ་བྱམས་བརྩེའི་ལོའི་བརྗོད་གཞིའི་ཐོག་ནས་གཞས་སྣ་དང་གཏམ་བརྗོད་འཁྲབ་སྟོན་གནང་བར་བསྔགས་བརྗོད་དང་། འགྲན་བསྡུར་ཞེས་པ་ནི་གཅིག་ལ་རྒྱལ་ཁ་ཐོབ་པ་དང་། གཅིག་ཕམ་གྱི་ཡོད་པ་རང་བཞིན་ཆགས་ཡོད་། བོད་ཀྱི་ཟློས་གར་ཚོགས་པ་ནི་བོད་ཀྱི་རིག་གཞུང་དང་འབྲེལ་བའི་ཧ་ཅང་གལ་ཆེན་བོའི་སྒྲིག་འཛུགས་ཤིག་རེད། སྒྲིག་འཛུགས་འདི་རྒྱུན་གནས་དང་ཚགས་ཚུད་པོ་ཡོང་བའི་ཆེད་དུ་འགན་འཛིན་ལྷན་ཚོགས་ཀྱི་ངོས་ནས་འགན་འཁུར་བཞིན་ཡོད། ཟློས་གར་གྱི་དགེ་ལས་སློབ་ཕྲུག་རྣམས་མུ་མཐུད་བསྡད་དེ་འབད་བརྩོན་བྱེད་དགོས་ཀྱི་འདུག ལོ་ཁ་ཤས་ཀྱི་རྗེས་ནས་ཟློས་གར་ནང་གསར་དུ་འཛུལ་ཞུགས་བྱེད་མཁན་ཁག་པོ་འདུག སྔོན་མ་ཟློས་གར་ནང་འཛུལ་ཞུགས་བྱེད་མཁན་འཚང་ཁ་ཡོད་ཀྱང་། དེང་སང་བོད་པ་གསར་དུ་འཛུལ་ཞུགས་བྱེད་མཁན་ཁག་པོ་ཆགས་འདུག དེ་ཡང་བོད་ཀྱི་ཟློས་གར་ཚོགས་པ་གཅིག་པུའི་གནས་སྟངས་ཤིག་མ་རེད། བཙན་བྱོལ་བོད་པའི་སྤྱི་ཚོགས་སྤྱི་ཡོངས་ཀྱི་གནས་སྟངས་ཤིག་ཆགས་ཡོད་པ་གཏམ་བཤད་གཞན་གྱི་ཐོག་ནས་མང་པོ་བཤད་ཡོད། ཅེས་གསུངས་སོང་།
བོད་ཀྱི་ཟློས་གར་ཚོགས་པ་ནི་ཕྱི་ལོ་ ༡༩༥༩ ཟླ་ ༨ ཚེས་ ༡༡ ཉིན་བཙན་བྱོལ་ནང་གསར་འཛུགས་ཡོད་ཅིང་། ཕྱི་ལོ་ ༡༩༦༡ ཟླ་ ༤ པའི་ནང་ྋགོང་ས་མཆོག་གི་དགོངས་གཞི་བཞིན་ཀ་སྦུག་ནས་དྷ་སར་གནས་སྤོས་ཏེ་རྟེན་གཞི་ཆགས་ཡོད་འདུག དབྱར་སྐྱིད་དུས་སྟོན་ནི་ལོ་རབས་དྲུག་ཅུའི་སྨད་ཙམ་ནས་མགོ་བཙུགས་ཏེ། གླུ་གར་འཁྲབ་སྟོན་པ་རྣམས་ཀྱི་རྣམ་དཔྱོད་ཀྱི་རྩལ་འདོན་སའི་གར་སྟེགས་ཤིག་དང་། བོད་ཀྱི་ཡུལ་ལུང་ཁག་གི་སྲོལ་རྒྱུན་གྱི་རྐང་བྲོ་གླུ་གཞས་འཁྲབ་སྲོལ་བཅས་ལ་ཉམས་ཞིབ་དང་དཔྱད་བསྡུར་གནང་སྟེ། རྒྱ་ལུ་རུ་ཁག་དང་རྔོན་པ་རུ་ཁག་ཞེས་པའི་བར་འགྲན་སྡུར་གནང་བཞིན་འདུག འདས་པའི་ལོ་མང་རིང་རུ་ཁག་གཉིས་བར་འགྲན་སྡུར་བྱས་པའི་ཁྲོད་བསྟུད་མར་རྔོན་པ་རུ་ཁག་ལ་རྒྱལ་ཁ་ཐོབ་ཡོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།
