ཀེམ་ཇུང་ཨན་རྒྱ་ནག་ཏུ་འགྲོ་འཆར།

མི་ལོ་དྲུག་ལྷག་གི་རྗེས་བྱང་ཀོ་ར་ཡའི་མགོ་ཁྲིད་ཀེམ་ཇུང་ཨན་རྒྱ་ནག་ཏུ་ཕྱིན་ནས་ཨུ་རྒྱ་གཉིས་དང་དམག་དོན་གྱི་འབྲེལ་ལམ་སྲ་བརྟན་གཟུག་རྒྱུ་ཡིན་པའི་ཚོད་དཔག་བྱེད་ཀྱིན་འདུག

North Korean leader Kim and Chinese leader Xi in Pyongyang, DPRK, June 20, 2019. (Xinhua/Ju Peng)

ཕྱི་ཟླ་ ༨ ཚེས་ ༢༨ ཉིན་རྒྱ་ནག་ཞོགས་པའི་ཆ་འཕྲིན་གསར་ཁང་གིས་གནས་ཚུལ་སྤེལ་བ་ལྟར་ན། བདུན་ཕྲག་རྗེས་མའི་རེས་གཟའ་ལྷག་པའི་ཉིན་འཛམ་གླིང་གི་རྡུལ་ཕྲན་མཚོན་ཆ་ཆེས་མང་ཤོས་བཀོལ་སྤྱོད་བྱེད་མཁན་གྱི་རྒྱལ་ཁབ་ཏུ་ངོས་འཛིན་བྱེད་མུས་ཡིན་པའི་བྱང་ཀོ་རི་ཡའི་མགོ་འཁྲིད་ཀིམ་ཇུང་ཨན་འཛམ་གླིང་དམག་ཆེན་གཉིས་པ་མཇུག་བསྒྲིལ་ནས་མི་ལོ་ ༨༠ འཁོར་བའི་དུས་དྲན་ཟེར་བ་དང་བསྟུན་རྒྱ་ནག་གི་རྒྱལ་ས་པེ་ཅིན་དུ་འགྲོ་རྒྱུ་ཡིན་ཞིང་། དེ་ནི་བྱང་ཀོ་རི་ཡའི་མགོ་ཁྲིད་ཁོང་མི་ལོ་དྲུག་ཙམ་གྱི་རྗེས་སུ་རྒྱ་ནག་ཏུ་སྐྱོད་ཐེངས་དང་པོར་གྱུར་ལ། དེ་བཞིན་རྒྱལ་ཁབ་ ༢༦ གི་མགོ་ཁྲིད་རྒྱ་ནག་ཏུ་འགྲོ་འཆར་འདུག

གནད་དོན་དེའི་ཐད་རྒྱ་ནག་ཕྱི་སྲིད་བློན་ཆེན་ལས་ཁུངས་ཀྱིས་བསྒྲགས་གཏམ་ཞིག་སྤེལ་བའི་ཁྲོད། བདུན་ཕྲག་རྗེས་མའི་རེས་གཟའ་ལྷག་པར་དམག་ཆེན་གཉིས་པ་མཇུག་བསྒྲིལ་བའི་དུས་སྐབས་དང་བསྟུན། རྒྱལ་ཁབ་ ༢༦ གི་མགོ་ཁྲིད་མགྲོན་འབོད་བྱས་ཡོད་པའི་ཁྲོད། རྒྱ་ནག་གི་མགོ་ཁྲིད་ཞི་ཅིན་ཕིན་གྱིས་རྒྱ་ནག་དང་བྱང་ཀོ་རི་ཡའི་གནའ་བོའི་དུས་ནས་ཡོད་པའི་མཛའ་འབྲེལ་བཟང་པོ་སྲ་བརྟན་ཆེད། བྱང་ཀོ་རི་ཡའི་མགོ་ཁྲིད་ཀིམ་ཇུང་ཨན་ཡང་སྐད་བཏང་སྟེ། མཛད་སྒོར་མཉམ་ཞུགས་བྱ་རྒྱུ་ཡིན་ལུགས་དང་། གཙང་པོ་དང་རྒྱུག་ཆུས་མཐུད་པའི་རྒྱལ་ཁབ་གཉིས་ཀྱིས་སླར་ཡང་མཛའ་འབྲེལ་གྱི་ཐོག་ནས་མཉམ་ལས་བྱ་རྒྱུ་ཡིན་ལུགས་བསྒྲགས་འདུག

དེ་བཞིན་ད་ལན་རྒྱ་ནག་གཞུང་གིས་ཆེད་དུ་གོ་སྒྲིག་བྱས་པའི་མཛད་སྒོར། ཨུ་རུ་སུས་ཡུ་ཁེ་རིན་ལ་བཙན་འཛུལ་གྱི་གནད་དོན་དང་འབྲེལ་ནས། རྒྱ་ནག་གིས་མགྲོན་འབོད་བཞིན་ནུབ་ཕྱོགས་རྒྱལ་ཁབ་ཁག་གི་མགོ་ཁྲིད་མང་དག་ཅིག་ཕེབས་མེད་ཀྱང་། ཨུ་རུ་སུའི་མགོ་ཁྲིད་པུ་ཊིན་དང་། ཨི་རན། འབར་མ། པཱ་ཀི་སི་ཐན། མ་ལའེ་ཤི་ཡ། བྷེ་ལ་རུ་སུ། ཁུ་བྷ། སིར་བྷི་ཡ་བཅས་ཀྱི་མགོ་ཁྲིད་གཙོས། རྒྱ་ནག་གི་མཐུན་གྲོགས་རྒྱལ་ཁབ་ ༢༦ གི་མགོ་ཁྲིད་ཡོང་གི་ཡོད་པ་དང་བསྟུན། རྒྱ་ནག་གི་མཁའ་དམག་དང་། མེ་སྒྱོགས། དེ་བཞིན་ས་མཚོ་གཉིས་ཀྱི་དམག་མིས་གནམ་སྡེ་སྒོ་མོ་ཆེའི་ཐང་གཞུང་དུ་རྩལ་སྦྱོང་གིས་རྗེས་དྲན་བསུ་རྒྱུ་ཡིན་པའི་མུར། གནད་དོན་དབྱེ་ཞིབ་པ་མང་དག་ཅིག་གིས། སྤྱིར་བྱང་ཀོ་རི་ཡའི་མགོ་ཁྲིད་རྒྱལ་ཁབ་གཞན་དུ་སྐོར་སྐྱོད་འགྲོ་ཧ་ཅང་ཉུང་ནའང་། ད་ལན་ཆེད་དུ་ཞི་དང་པུ་ཊིན་གཉིས་དང་ཐུག་འཕྲད་དུ་འགྲོ་བ་དེས། དམར་ཤོག་རྒྱལ་ཁབ་དེ་དག་གིས་སླར་ཡང་དམག་དོན་གྱི་ཐོག་ནས་མཉམ་འབྲེལ་གྱི་ལས་དོན་སྤེལ་ནས། དམར་ཤོག་རྒྱལ་ཁབ་ཁག་གི་དམག་དོན་གྱི་སྣེ་འཁྲིད་མཁན་དང་དམག་དོན་གྱི་དཔུང་སྡེ་ཞིག་ཏུ་འགྱུར་ཉེན་ཡོད་པའི་ཚོད་དཔག་བྱེད་ཀྱི་འདུག

དེ་བཞིན་ཨེ་པུ་(AP) གསར་ཁང་གིས་སྤེལ་བའི་གནས་ཚུལ་ཁྲོད། ད་ལྟ་བྱང་ཀོ་རི་ཡས་ཨུ་རུ་སུ་དང་མཉམ་འབྲེལ་གྱི་ཐོག་ནས་དམག་དཔུང་དང་གོ་མཚོན་གྱི་རོགས་རམ་བྱས་ཏེ། ཡུ་ཁེ་རིན་ལ་བཙན་འཛུལ་བྱེད་མུས་ཡིན་སྟབས། ད་ལྟ་རྒྱ་ནག་དང་། ཨུ་རུ་སུ། བྱང་ཀོ་རི་ཡ་གསུམ་གྱིས་མཉམ་འབྲེལ་གྱིས་ནུས་པ་སྔར་ལས་ལྷག་པ་སྐྱེད་ནས། ཨ་རི་དང་ལྷོ་ཀོ་རི་ཡ། དེ་བཞིན་ཉི་ཧོང་བཅས་ཀྱིས་མཉམ་འབྲེལ་བྱེད་མུས་ཡིན་པའི་སྟོབས་ཤུགས་ལ་རྒོལ་ལན་སློག་འདོད་ཡོད་པའི་ཁར། ཕྱོགས་གསུམ་གྱིས་ཚོང་དོན་དང་། དམག་དོན། བདེ་སྲུང་དང་། ཕྱི་སྲིད་བཅས་ཀྱི་ཐད་ནས་མཉམ་འབྲེལ་བྱ་སྲིད་པ་མ་ཟད། རྒྱ་ནག་གིས་དེ་སྔ་ནས་ཨ་རིས་སྐྱོན་བརྗོད་ལ་མ་ལྟོས་པར་བྱང་ཀོ་རི་ཡ་དང་མཉམ་འབྲེལ་གྱི་ཚོང་དོན་གྱི་འབྲེལ་ལམ་ཚུགས་ཡོད་སྐོར་གསལ་འདུག

ཡང་ཕྱོགས་གཞན་ཞིག་ནས་ཕྱི་ལོ་ ༢༠༡༩ ཟླ་ ༦ ཚེས་ ༣༠ ཉིན་ཨ་རིའི་སྲིད་འཛིན་ཊོམ་ཕུ་མཆོག་དང་ཀེམ་ཇུང་ཨན་གཉིས་ལྷོ་བྱང་ཀོ་རི་ཡའི་རྒྱལ་མཚམས་སུ་ཐུག་འཕྲད་གནང་ཡོད་པ་མ་ཟད། ཀེམ་ཇོང་ཨན་གྱི་སྣེ་ལེན་ལྟར་སྲིད་འཛིན་ཊོམ་ཕུ་མཆོག་གིས་ཀེམ་དང་ལྷན་དུ་བྱང་ཀོ་རི་ཡའི་ས་ཆའི་ཐོག་གོམ་པ་ ༢༠ སྤོས་ཏེ། དེ་ནི་ལོ་རྒྱུས་ནང་ཨ་རིའི་ལས་ཐོག་སྲིད་འཛིན་ཞིག་བྱང་ཀོ་རི་ཡའི་ས་ཐོག་ཏུ་ཕེབས་པ་ཐོག་མ་ཆགས་ཡོད་ཅིང་། སྐབས་དེ་ནས་ཊོམ་ཕུ་སྲིད་གཞུང་གིས་བྱང་ཀོ་རི་ཡར་འབྲེལ་ལམ་བཟུང་ཐབས་དང་། རྡུལ་ཕྲན་མཚོན་ཆ་བཀོལ་སྤྱོད་ཇེ་ཉུང་དུ་འགྲོ་རྒྱུའི་རེ་བ་བཅངས་ཡོད་ལ། ཟླ་འདིའི་ཕྱི་ཚེས་ ༢༥ ཉིན་ཨ་རིའི་སྲིད་འཛིན་སྐུ་ཞབས་ཊོམ་ཕུ་མཆོག་གིས་ལྷོ་ཀོ་རི་ཡའི་སྲིད་བློན་དང་མཇལ་འཕྲད་བྱེད་སྐབས། ཀེམ་ཇུང་ཨན་ཁོང་གཉིས་འབྲེལ་ལམ་ཡག་པོ་ཡོད་པས། ཀིམ་ལའང་ཐུག་འདོད་ཡོད་སྐོར་གསུངས་ཡོད་ཀྱང་། གནད་དོན་དབྱེ་ཞིབ་པ་ཁག་ཅིག་གིས་ཀེམ་གྱིས་ཞི་དང་པུ་ཊིན་ལ་ཐུག་འཕྲད་བྱས་པ་དེས། ཨ་རི་དང་བྱང་ཀོ་རི་ཡའི་འབྲེལ་ལམ་ལ་དོ་ཕོག་འགྲོ་མི་སྲིད་པ་མིན་པའི་ཚོད་དཔག་བྱེད་ཀྱིན་འདུག

ཕྱི་ལོ་ ༢༠༡༨ དང་ ༢༠༡༩ ལོར་ཀིམ་དང་རྒྱ་ནག་གི་ཞི་ཅིན་ཕིན་གཉིས་ཐེངས་འགར་ཐུག་འཕྲད་བྱས་པ་མ་ཟད། ཕྱི་ལོ་ ༢༠༡༨ ལོར་ཀེམ་ཇུང་ཨན་སྔོན་ཆད་ཁོའི་ཕ་རྒན་ཀེམ་ཇུང་ཨེལ་རྒྱ་ནག་ནང་སྐྱོད་བྱེད་ཀྱི་མེ་འཁོར་ནང་བསྡད་དེ། ཁུ་སིམ་སིམ་གྱིས་རྒྱ་ནག་པེ་ཅིན་དུ་ཕྱིན་ཡོད་ཅིང་། སྐབས་དེར་རྒྱ་ནག་གཞུང་གིས་ཀིམ་ལ་མཐོང་ཆེན་གྱིས་ཉིན་མ་མང་པོར་མེ་འཁོར་གྱི་འགྲུལ་བཞུད་བཀག་ནས། ཀིམ་གྱི་རྒྱ་ནག་གི་འགྲུལ་བཞུད་ལ་སྣེ་ལེན་ཟབ་རྒྱས་བྱས་ཡོད་ལ། ལྷོ་ཀོ་རི་ཡས་ཀིམ་གྱི་རྒྱུན་ལྡན་མིན་པའི་ད་ཐེངས་ཀྱི་འགྲུལ་བཞུད་དེའི་ཐད་དོ་སྣང་ཆེན་པོ་བྱེད་ཀྱི་ཡོད་པའི་མུར། སླར་ཡང་རྒྱ་ཨུ་ཀོ་གསུམ་གྱི་གཏིང་ནག་པའི་མཉམ་འབྲེལ་ལ་དོགས་གཟོན་བྱ་དགོས་སྐོར་བསྒྲགས།